*****ليساء تحكي*****
بدأ نهاري كي العادة...نضت صليت الفجر تقهويت وجدت روحي..من بعد نوضت شجن و هبطت نقرا و انا ماشي مامنة بلي النهار لي وعدني فيه جمال بلي راح يخليني نحكي مع ماما خلاص جا...بديت النهار و انا الحماس خارجلي من عينيا نستنى غير وقتاش يصوني تلفوني...الطريق كامل و انا نوجد في مخي واش راح نحكيلها و من وين نبدا و كيفاش نوصلها بالضبط واش عشت جديد في هاد اليامات لي جازوا بلا ماننسى حتى تفصيل....لي يشوفني من وجهي و عينيا يعرف بلي راني طايرة بالسعادة و نستنى عفسة مليحة راح تصرالي...
وصلت للافاك و التبسيمة ماتنحاتش من وجهي...نتمشى و عينيا لمعة الفرحة مرسومة فيهم...دخلت و بديت قرايتي و كل خمس دقائق نطل على تلفوني خايفة يعيطلي جمال و مانشوفوش حتى لحقت وين رجعت تلفوني يصوني نورمال بعدما كان سيلونس و قلت حب يحاوزني البروف يحاوزني المهم مانضيعش الفرصة على روحي و من المرة الأولى نجاوب...
الفرحة و الحماس لي كنت فيهم شوية بشوية بداوا يروحوا و يرجعوا خوف و توسويس باسكو أنا على حساب واش نعرف جمال يستغل الصباح لي يكونوا فيه قاع راقدين و حاسبينوا في الخدمة باش يروح يشوف ماما يعني لازم درك يكون عندها و يكون عيطيلي مي هو مازال مابان...جربت نهدي روحي و نقنع مخي بلي بلاك جمال هو لي راح وصل جدي للمطار على بيها مازال ماهدر معاي مي ماقدرتش باسكو تاني على حساب السنين لي عشتهم معاهم جدي مايخلي حتى واحد يروح معاه للمطار و دائما يوصلوا الشيفور تاعو يعني جمال مستحيل يكون معاه..كلما كان يفوت الوقت توسويسي كان يزيد و قلبي كان محسسني بلي كاينة عفسة قبيحة راح تصرالي...و من الطاقة السلبية لي دارت بيا و أفكاري القبيحة لي سيطرت عليا لقيت روحي خدعت البروف كي دار للطابلو و خرجت...قلت نتمشى شوية و نبدل جو بلاك نحبس تخمامي الزايد و حتى الساعة لي بعدها و ندخل نقرا...
كنت ندور في لافاك من بلاصة لبلاصة و نضيع في الوقت و انا نجرب نبدل أفكاري باي عفسة اخرى...كي حسيت روحي ريحت شوية حكمت طريقي راجعة لوين نقرا و يا ريتني مارجعت باسكو شفت الحاجة لي زادت كملت عليا...شفت حمزة واقف مع زوج بنات و هوما يضحكوا معاه و هو الفرحة باينة من عينيه...حسيت الغيرة ضربتني للقلب و الدمعة غلبتني ..ماقدرت نكمل طريقي و نلعبها ماشفت والو ماقدرت نروح نحاسبو و نبهدلو و نجمع عليه الناس قاع و نفضحو...حسيت روحي مربوطة حتى لقيتو يخزر فيا...تما دموعي و غيرتي نقلبو زعاف و شديت طريقي نجري و انا نجرب نخليه يلحقني للبلاصة لي دائما نحكيوا فيها أنا وياه بلا ماواحد يشوفنا..و غير لحقنا طرطقت فيه و فرغت قاع واش حسيت و كي سمعتلوا لقيت روحي ضربة وحدة طفيت و بردت و حشمت بروحي على ردود الفعل لي درتهم...
بعدما افترقت أنا و حمزة طلعت نجري للافاك باش نكمل واش بقالي قراية في نهاري...كنت نجري باش نلحق قبل الاستاذ و في نفس الوقت هابلة على روحي بالضحك على التبهديلة لدرتها لعمري...والله ماعرفت كيفاش و منين جاني الكوراج باش نقعد نحاسب فيه على هدرتو مع البنات و كيفاش حتى نحيت الحيا و الحشمة و قلتلو قاع هاداك الكلام.. الحاجة الوحيدة لي فهمتها في روحي هي بلي نار الغيرة كلاتلي قلبي و انا نشوف في هادوك البنات عينيهم يخرجوا القلوب و هوما يهدروا مع حمزة...ماقدرتش نسيطر على غيرتي و لوكان ماحاسبتوش و سمعت منو التوضيح كنت قادرة نبات بلا رقاد نورمال و نقلب لشجن مخها و انا نبكي و نندب عليه...مي كي تواجهت معاه حسيت روحي ريحت سورتو كي زدت حكيت على موضوع الزواج و تصارحت أنا وياه و وصلنا لحل لحالتنا باسكو لوكان ماضغطش عليا اليوم بعد حكاية الغيرة كنت قادرة نبقى حياتي قاع هاربة منو و مانرتاح لا أنا لا هو مي هاكا حطينا نقاط على الحروف و بقالنا رد ماما برك لي راني متمنية من قلبي يكون ايه و ماتقوليش لا لا باسكو تاع الصح راني حاسة روحي درك ماحابة حتى واحد في حياتي من غير حمزة..
VOCÊ ESTÁ LENDO
صراع إمرأتان
Romanceيقولو ناس زمان همك يجيك من دمك و انا نقول قادر الرحمة لي تلقاها في الغريب ماتلقاهاش في لقريب... لكرونيك تحكي على زوج بنات تجمعهم الصدفة في وقت تكون فيه ظروفهم حطمتهم و تعبتهم..زعما يلقاو الخير في بعضاهم؟و زعما يكون كاين حب في حياتهم؟
