حياة العمر

الحلقة الاولي

كان يامكان في قديم الزمان
نبصر عليكم قصدي
كان فيه زوز سوادين يجروا وراي وانا مش عارفة كيف نهرب منهم وين مانمشي يطلعولي فجأة طحت ورجليا انعقدو معاش قدرت نتحرك رجليا مثلجات صوتي راح من كتر العياط ومافيش حد يرد وينك عليوة وينك اوفي بابا ماما ياناس حد يخلصني مانبيش نموت قاعدة ماشفت شي من الدنيا كيف طلعت من الدحية علي قولت حناي فقت من شرودي شفت مطارديني ماسكين مسدسات يبو يقتلوني واني خايفة ومرعوبة ربي اذا كان هذا سحرا فابطله دعيت ودعيت ودعيت رقبتي مدبوحة خانقتني العبرة ودموعي جفو من الخوف بعدها قدرت نتحرك كيف بنجري بسرعة طحت فتحت عيوني شفت .........
علي : جاد برا نوض اختك تبي العيادة مش عارف هاذي خيرها الوقت اللي ترقد فيه اكتر من نايضة فيه .
جاد: بالله وراس عليوة فكني منها تو تقعد تتفلسف ساعة وتعاود ف الدسكة الحزينة متعها " ويقلد في صوتي مانحبش من ينوضني نرقد لين نوض بروحي باهي 😡.
علي : صار حفظت اسطوانة متعها
اياد : علوش
علي: طاح سعد ياقليل الفهم كم مرة قتلك معاش تقول علوش
إياد: وراس عليوة خودها بروح رياضية حلوة طالعة عليك علوش شن رايكم
علي : باهي شن تبي يودا
إياد: شن رايك لما يجي الضي تلعب بلايستيشن خاطري ف مبارة سمحة جاد ديمة نفوز فيه بسهولة
علي: هادي بس تدلل خيوا
رؤوف: وين أمي ياشباب
ردت عليه نجلاء وهيا طالعة من المطبخ وتنشف في يديها طلعت من شوي مشت لخالتي منى عندها ضيوف
رؤوف : من ساقها ان شاء الله مشت علي رجليها لان بوي ف طرابلس
نجلاء : رفعها هشام لقاته طالع دبساته يوصلها
علي: جوجو شن كنتي ديري 🤨
نجلاء: بسبوسة وتوا بندير قهوة نحسبكم
رؤوف : 😋😍الله سلم ايديك بسرعة وتعالو نقعمزو برة اليوم راحة ومخاطريش نطلع اليوم ليكم
علي: قبل بنطلع نرفع لجين للعيادة تعيط من سنها لكن مابتش تنوض فوتها غدوة نرفعها
نجلاء: نور فرشي اللايدة نقعمزو فيها هذا وين برد الجو شوية
نور: هيا جاد واياد تعالو كل واحد ياخد حاجة الفرشة والمنادير
رؤوف : بالله عليك فكيني من جو البرستيج متعك حطي حصيرة وقعمزو عالستاك محلاها
علي: مش عارف اختك هادي تقول امي جايبتها ف مؤتمر صحفي حشيشتها تصوير وتفتليك
إياد : خلي نستنو أروي وياسر قريب يجو خلي نكلمهم يسرعو
علي : صوت عياط منين جاي شكله حد مات من الجيران
نجلاء :الصوت جاي من داخل الحوش حي لجين اشبح خيرها
خشو يجرو فتحو الضي لقوها تتعافر في نومها ورجليها حاصلات ملوي عليهم الشرشاف وبعدين طاحت من فوق السرير
لجين فتحت عيوني لقيت الضي شاعل والعائلة فوق راسي ويضحكو جاني اياد وجاد بحداي خيرك لولو وجهك عرق ودموع خايفين عليا
لجين : شبحتلهم وضحكت حلم مرعب
علي : من بكري نوضو فيك كان نضاي راهو مصارلك شي
رؤوف : تستاهلي زيدك منه ديمة نقولك معاش ترقدي بعد العصر نوضي صلي وتعالي نهدرزو برا
ياسر واروي مروحين قريب يوصلو
اروي طالعة تشري في حاجات لحلويات يوم الجمعة
المهم كلهم مقعمزين يهدرزو عالقهوة خش بوهم مروح من طرابلس وجه منسود
نجلاء : خيرك بابا وجهك اسود
ابراهيم ديريلي مية وسكر توا مروح صار قدامي حادث نحس في الرعشة قعدة في رجليا مش عارف كيف وصلت بالله جيبولي حاجة تحول الرعشة
نور : بابا هاك اشرب مية وسكر وروق تو تجري ف عروقك وترتاح .
ابراهيم : سلمها رؤوف شن صار معاك في الموضوع اللي قتلك عليه
رؤوف : والله يا باتي هذا شكله متعب وراه موااااال يبي يغنيه لكن وحق من خلقني ماصاير واني قدها
ابراهيم : يارب الموضوع حطيته ف يديك هنيني سلم ولدي
لجين : موضوع شنو بابا
ابراهيم : انتي ياقصقاصة لازم دكي خشمك في كل شي لما يصير الوقت كلكم تعرفوه