حياة العمر

الحلقة التاسعة

سليمة: افتحو الباب يامصايب ينكسر ماعندنا باش نصلحوه نغلقة بقندولة بعدين (زعما تعرفوه القندول شن هو)
رجاء: منال صكري الدار علي خواتك وما تطلعوش مهما يصير لين اني نجيكم مانبيش نسمع صوت ونزلت بسرعة للباب قالت مني
انا عمار حلي الباب يعطيك دعوة شنو انطرشتو
رجاء: خيرك داهش شن فيه
عمار ضمي دبشك انتي وبنات لازم نرحلو من اهني عندي 24 ساعة ونكون طالع المنطقة
سليمة: ياغبارة سودة شن فيه علاش بترحل شن داير قطع عليها صوت بنتها نادرة
سليمة عندها بنت ولد بس عمار ونادرة متزوجة وعندها 3 بنات متزوجات ولد واحد حتي هو مزوج نادرة ليها هلبا مواقف ح نعرفوهم لكن عائلتها بعيدين كل البعد عن محور الحديث
نادرة: خشت تعارك ليه عليك ياخوي تبهدل في روحك وتبهدل فينا معاك حرام عليك دير الشبح لصغارك راهو عندك بنات سمعتهم مهمة وهذا راس مالهم علاش تطيح في سعدهم من غير شي مرفد بلوحة
سليمة:جيتي حبيبة مرت خوها طاح سعدك بدل ما تجي مع خوك جاية مع مرته
نادرة : يامي انتي ماتعرفي شي اكرمينا بسكوتك لو كان خوي مظلوم اول من يسانده اني لكن ماعندي ما نقول حسبي الله عالظالم
قولي رجاء شن دخلها هيا تصنع فيهم الولاد لو كان بالود والشهوة راهو جابت 20 ولد لكن هذا امر الله توصل بيك تقتل ودير رقبة في رقبتك ياويلك من ربك وياريت حتي تقدر عالكفارة تقدر تصيم شهرين بدون تقطيع ماتقدرش من البلي اللي تبلع فيه وكل يوم تتطوطح في تركينة ولانك ماتعرف ربك حتي الصلاة ماتعرف القبلة وين والله هالمراة وهالبنات خسارة فيك وما تستاهل يعني توا كان جاك ولد بيمسح تاريخك وسمعتك الزفتة ويمحي اللي صار لا وتوا وين بترحل بعيالك اللي قتلته متوقع ولاده يسكتو ما فكرتش انهم يردو تار بوهم في بناتك يخطفو وحدة منهم يغتصبوها ويكسرو بختها مش انت تقعد في العار طول عمرك نبي نعرف دماغك وين لما قتلته لكن اسمع من هاللحظة خود دبشك.وخود وجهك دور وين تهج عيالك معاش ليك علاقة بيهم ماتفتحش عيون الناس عليهم فاهم
عمار وجه اسودويسمع وساكت لان كلامها صح
ناض خدي شنطة عبا فيها دبشه وقربع الباب وطلع
سليمة : ياحليلي ولدي بيضيع انتي كيف تدوي مع خوك هكي
نادرة ودمها محروق كله منك انتي كله منك انتي اللي دلعتيه وطلعتي عيونه ولتوا قاعدة تستري في عيوبه ومش راضية فيه وكان خليتيه علي باباه راهو رباه كويس  لكن هدي رباية النسون مايطلع منها ونقولك هذا حرام يتزوج راهو يشرد بنت الناس معاه مالقيتي الا هالمسكينة واهي متحملة الهم تنكل وتصرف عالحوش وتعاني وانتي تقطعي فيها ومش عاجباتك اسمعيني جاي حتي انتي يام  حوشك ماتطلعيش منه وقضيتك ولازمك كله يوصلك لقدام الباب وانا ديما نطل عليك
رجاء مصدومة ومش عارفة شن تقول حتي حرف ماطلعش من فمها معقولة عمار توصل بيه الدرجة انه يقتل علشان ماعنداش ولد
نادرة: رجيوة وخيتي يلا انتي والبنات ضمي اللي عندك وهيا معاي
رجاء: وين نعدي بوجهي وانا عندي بنات وين نسكن بروحي وماعنديش محرم يسندني ويسترني
يارب امتحانك صعب عليا ارجوك يارب هون اختباراتك عليا يارب يسر ولا تعسر  والدمعة تنزل وتبلع معاها الف غصة وغصة وغصة الله يهديك ياعمار الله يهديك
خشت لناتها بسرعة ضمو دبشكم هنادي انتي ضمي كتبك وكتب خواتك كلهم وحاجات المدرسة في راسك انتي
نادرة: منال تعالي بسرعة
توا بيجي ولدي حسام ومعاه مرته تمشي معاهم تروحي باختك من المدرشة وتجيبي ملفها ودرجاتها وكل حاجة خاصة بيها في المدرسة جيبيها فاهمة البسي بسرعة
رجاء: ياوخيتي قوليلي وين بنمشو بس
نادرة : صاحب حسام في الشارع اللي مقابلنا عندهم حوش دايرنة مخزن يحطو فيه في الاثاث لان عندهم معرض كلمناه يفضيه وب انجروه منه
رحاء: يانادرة انتي تعرفي البير وغطاه يعني مصرفنا كله من الصغار اللي تقري فيهم منال وخدمتي في الكعك والفطيرة يعني منين بنجيب الايجار
نادرة: رجيوة ماتخممي في شي المهم عندي توا تطلعو قبل الليل
هنادي: قصدكم بنطلعو وبنسكنو بغوحنا(بروحنا) ومعاش فيه حناي سليمة تنقغز( تنقرز) علي غوسنا(روسنا) ونفتكو من الكهف متع سليمة اللي دايغاته ( دايراته ) تقول البيت الابيض
مودة: غوغوغو ضمي وانتي مسكرة فمك ياسر نفختي راسي بالتوغويغ متعك
________________________
هشام: السلام عليكم
احلام والبنات وابراهيم وعليكم السلام شن الاخبار
هشام: الحمد لله نور بالله وتيلي غداي
بتوشويش حلومة نبيك في كلمة راس ومشي للصالة ولحقاته احلام
احلام : ها هشام ان شاءالله خير
هشام: لا لا خير بعون الله نبيك تشوفي ابراهيم يدوي مع باتي ونمشو نطلبو ندي
احلام: هذا قرارك متاكد منه
هشام: انشاءالله
احلام : لكن بنقولك كلمة راهو لو تشتت العيلة ح تكون انت السبب
ولما يوصل الموضوع للعيلة ح تلقاني في وجك وضدك مش معاك ماتقولش معارضتنني لا شوف جهاد لانه كلامي هذا نفسة قلته له لما طلبنا دانة
انا معاكم في كل شي الا حاجة اضركم وتفرق بينكم وقتها صدقني انت مانعرفك ونعاملك معاملة الغريب
هشام: حاظر  ان شاءالله يكون كل شي تمام وماتبقي الا راضية
احلام : الله يوفقك ويقدملك اللي فيه الخير ويبعد عليك الشر يارحمن يارحيم
هشام: ربي يحفظك لينا وان شاءالله انكافوك بالخير ومانقصروش معاك والله شاقية بينا هلبا ياحلومة
احلام: والله كلكم ولادي زي رؤوف وعلي وكان تحرف هكي ولا هكي تاكل علي راسك تسحاب نتحشم منك وضرباته علي ظهره وطلعت
هشام: يارب هونها من عندك وامتد عالصالون وفتح فونه وللفيس طول لقي مسج مكتوب فيه
الرجاء الاتصال علي هذا الرقم *******091
الامر ضروري .......... الخ
هشام : ان شاء الله خير ألوو السلام عليكم
!؟: وعليكم السلام حضرتك هشام سعيد ال..
هشام : اي نعم خوي تفضل ان شاءالله خير لقيتك باعتلي كلمني ومش عارف شن فيه
!؟: معليش الموضوع حساس هلبا ولازم نتقابلو ونحطو النقاط عالحروف عندك حد توثق فيه زي نفسك ويحفظ السر
هشام : نعم سراج صاحبي وكبدي تاني
!؟: جيبه معاك وتعالي نتلاقو في طريق الشط جنب ....... بعد ساعة محسوبك خالد سيارة فورد سودة
هشام : تم ان شاء الله
احلام : اهلين يا هانم وينك لتوا لا تقولي عندي ام تنشغل عليا ويين وين نتصلو ماترديش قولي يا لِلاَ لكن تعرفي الحق مش فيك الحق في اللي عطاك الاذن وقالك بري تو تشوفي منو جاي
نا: هوب هوب خودي راحة ياماما طحتي فيا حاصل فاصل
اولا بابا عنده علم وعارف وين ماشية وثانيا لما اتصلتي كنت فعلا مش فاضية ماشية مع رؤوف للشركة وندير معاه في اوراق وهو اللي بعتلك مانقدرش نتكلم لذالك ما تحاسبينيش اني هونا راجلك ولدك وتفاهمي معاهم ماقادرة غير عليا اني
احلام : يمة منك ومن لسانك مااطوله رشاش مش لسان وانت ياغزال جبت لحناك اللي وصت عليه
رؤوف: جبته هونا في المطبخ ابعتيه مع شاهين
احلام: برا انت ارفعه وشوف حناك وجدك يسألو عليك
رؤوف:  حاضر يام اروي جيبي الكيسة بسرعة المشكلة عندي ماندير خداها. ومشي يتمتم وراقيله خش حوش جده سعيد
رؤوف: السلااااام عليكم عرب الحووووووش
مافيش رد وينكم يااااأهل البيت سمع الله اكبر عرفهم يصلو اه ها كلمت تو معاش صلاة عصر هيا تراويح نمشي ندير صنعة علي حالي ارجل من وين جيت وشن نص هديك الحاجة