حياة العمر

الحلقة الحادي عشر

جهاد قاعد مستغرب في هشام كيف راقد سمعه يهلوس قرب منه لقاه يحلم وناض مفزوع
جهاد : بسم الله عليك خيرك راقد توا
هشام : اعوذ بالله من الشيطان الرجيم كابوس
جهاد: باش تعرف الوقت هذا مش متع نوم هناك من يرقد بعد العصر
هشام: والله مانبي نرقد مكسد ع التليفون مشيت فيها نعسة برا شوف البنات وصيهم علي قهوة ندوش وجاي غادي عندي معاكم تهدريزة
جهاد: تم اني ماشي ما تعطلش لان عندي مشوار
احلام مقعمزة في الجنان تنقي في توابل خش جهاد السلام عليكم
احلام وعليكم السلام ياهلا بها الطلة وين الصبح ما شفتكش
جهاد: ااااه ياحلومة ديما شاقية بينا والله ياغالية راحت عليا نومة نضت موخر طلعت نجري حتي الفطور مافطرتش
احلام : خسارة والله ماندري عليك وكان هذا جيت نوضتك لان ياسر بايت هني هذا علاش مامشيتش عندكم
جهاد: حصل خير ياحلومة مش مشكلة تعرفي بكري لقيت عمي ابوبكر يفرغ ف الاثاث اللي حاطه في حوش بوه قال ب يأجره
احلام : غريبة اجروه قبل مستفيدين منه مخزن يلا ربي يسهل ه الاعباد
جهاد: حقا نسيت نقولك لقيت هشام راقد وضعه ملخبط مش عاجبني اشبح شن صاير معاه
احلام : تنهدت ربي يفرج علي عباده اهو حي وتو يحكي شن عنده نور وين القهوة هيا
هشام : السلام عليكم يا اهل البيت شن احوالكم
احلام: اهلين وليدي شن حالك خيرك كنت راقد شنو مريض ولا خيرك
هشام : لا والله لامريض لا شي نايض بكري وتوا كسدت عالتليفون لقيت روحي ناعس لكن توا نحس في عفاريت الدنيا كلها قدامي وخلوقي ضايقات
احلام :تعود من الشيطان وتو تشرب قهوة وتعدل دماغك شنو متغدي ولا نجيبلك حاجة تاكلها
هشام : تبي الصراحة والله جعان
احلام : نوض اجري لحق لجين روحت رقدت طول توا نايضة تخمخم في المطبخ تو تلقاها دايرة حاجة تاكلها كول معاها
هشام: هادي ديما مدلعة روحها تو نلقي حاجة مليحة وناض يجري تلاقا مع نور ف الباب
نور: هي هي علي وين القهوة واتية
هشام: جعان نلحق علي لولو شن تاكل والقهوة ملحوق عليها
نور: كيف قعمزت تاكل كان عطلت شوية تلقي الماعين يتقربعو فاضيات
جاوبها وهو ماشي صدقتي فيها
جبد الكرسي جنبها السلام عليكم
لجين فمها معبي وعليكم ماقلتم خير !
هشام ياخد في الخبزة بناكل معاك عندك مانع
لجين ماعنديش مانع صحتين عليك
المهم هشام كلي شوية لقاها دايرة قلاية ومعاها خبزة فرن وقال خيرك تشبحيلي شن مريحة في وجهي
لجين: عليك ثقالة دم ريت الزين اللي مقطع بعضه باش نشبحلك حايرة بنقولك خيره حواجبك في قصتك ومش علي بعضك
هشام: تنهذ بحزن سلم بنتي ما تفكرينيش في الهم خليني غافل لين نتمزمز
لحين: فهماته لان مش من طبعه يكون ساكت وهادي لانه من النوع اللي ديما يدوي ويضحك فرفوش
لجين: ربي يفرج نصبلك عصير ولا مشروب
هشام : الزوز لا كان ديري عصير ليمون بالنعناع يمسح الكبد خقا منين هالخبزة
لجين : حناي جابتها الصبح وتسأل عليك قالت امس ما جيتهمش
هشام : ااااااه يارب والله روحت رقدت خلوقي ضايقات مخاطري نشوف حد
لجين: خيرك هشومة شن مضايقك هدرز ترتاح خير
هشام جاه كلامها عالجرح لانه يعزها هلبا وقريبة منهم ويهدرزو فيها واول وحدة هيا تعرف بعلاقته مع ندي وحكالها كل شي بالتفصيل
لجين: انت سمعت منها مرات يكون ولد عمها عنده غاية فيها ويبي يخرب بينكم
هشام:مافيهاش تخريب لان تأدت باكثر من طريقة
لجين: مانبيش نزيد عليك ولو انه الشي هذا واضح من البداية شدت ايده ماعندي ما نقولك غير ربي يعوضك باحسن منها والحمد لله عرفت حقيقتها وانتم علي بر خير من كان بينكم صغار
هشام: تفكر للنقطة هادي فعلا لو كانو متزوجين شن كان صار فيهم لان قبل يومين كان يبي يرفع عياله ويتم فيها لكن ربك رايدله الخير وكانه عطاته جرعة امل وطاقة ايجابية انه يوقف من جديد وما ينهارش لان مافيش حاجة تستاهل
لجين: يلا خلي نلم السفرة ونطلعو نهدرزو معاهم شوية وغير جوك واحمد ربك لانها ماتنفعش بيك هذا علاش كشفها قدامك خير من تكون معمي وماتندري شن ادير من وراك وبعدها الضربة اقوي
هشام: معجب بكلام بنت خوه لانها ف العمر صغيرة لكن كلامها واسلوبها اكبر من عمرها وخبرتها في الحياة لاباس بيها وهيا قنوعة لابعد الحدود ابتسم علي كلامها وقال ربي ما يحرمني منك يلا نعاونك
لم الخبزة مكانها ورجع الحاجات في الثلاجة وطلع مابين غسلت الصونية اللي كلو فيها وطلعت
لقوهم يهدرزو ومنسجمين قعمز معاهم وسعيد بالوضع اللي هو فيه لان فيه ناس في ظهره تدعيله وتخاف عليه اكتر من خواته بالنسبة لجهاد وهشام وياسر عندهم حوش ابراهيم وعياله وصغاره كل شي متعلقين بيهم لابعد الحدود
والنسبة لاحلام تحبهم وتعزهم كيف ولادها وعمرها مافرقت بينهم مع ان امهم وبوهم عايشين وخواتهم موجودات لكن هيا تفقد فيهم اكتر من اي حد تاني
هشام: حلومة نبي نقولك حاجة من هالشهرين بنبدا نبني شنو رايك
احلام : ربي يعاونك ويقدرك وليدي واللي تحاتجه اني موجودة
جهاد:فيه جارنا الحاج عبدالله عنده ارض للبيع اللي فيها حوش عالدورين شن رايك نشروها
احلام : والله مانعرف شن نقوللكم اني كان جت ليا نبيكم هني بحداي وقراب مني وهيا الارض كبيرة كان تاخدوها حلوة وبعد وقت حتي رؤوف وعلي يبنو جنبكم وتقعدو بحداي
هشام : تو نشوف ابراهيم ومحمد وبوي شن يقول وبعدها ساهل مرات نبيعو ارضنا اللي في ............ ونشرو هادي يصير خير وتم اليوم في نقاشات وتهدريزة عائلية
—————————————————
نادرة توتي في الفطور علي خشت رجاء للمطبخ داهشة صباح الخير
نادرة: صباح النور تعرفي انتي مش طبيعية يامرا توا تفطري ونطلعو للعيادة ونجو نلقو البنات جاهزات نمشو نسيقو الحوش خلي نكلم حسام يجينا
رجاء: ياعليك حشمة الراجل شقيناه اكيد راقد بالله فوتيها المشية اليوم نمشو نسيقو ونرتبوا وبعدها تو نمشي نعاين ونشوف الوضع
نادرة: والله مصارت توا تطلعي قدامي ما تشوفيش في روحك كيف مولية زي الفوستو
رجاء: اه يلي ما تستحي اخرتها طلعت زي الفوستو ياحسافة وخلاص ههههههههههه
نادرة: يلابدلي حسام قريب يوصل
رجاء: خلاص نمشي نوض البنات يفطرو ويرتبوا امورهم ويديرو حاجة سريعة للغدي
نادرة : مادوريش الفدي تو عيال حسام تحسبنا
رجاء: والله مصارت كترناه ع المرا يكفي في كل حاجة  الو حسام تعالي
نادرة : والله ماهكي الحق بنت اصول الله يبارك هيا بروحها ما ترضاش زيدي شوي تاني كان هيا ما اتصلتش وقالت غداكم معاي تعالي حاسبيني
رجاء: حتي لو كان صاحبك عسل ما تاكلاش كله
المهم نوضت البنات وفات الوقت ومشيت للمصحة وزحمة ورقمي بعيد المهم نادرة استأذنت من الحالات الموجودة وخشيت للدكتورة وهيا معاي درت جهاز شفت وجه الدكتورة مصدومة وفاتحة عيونها
تكلمت نادرة يادكتورة العفو منك هيا كيف خشت الشهر الرابع وبطنها كبيرة شنو زعما توأم
الدكتورة: فعلا عندي ف الجهاز 17 الاسبوع تمام
لكن يامدام الكلام اللي بنقوله نبيك تفهميه كويس
حسب اللي شفته ان الجنين مش طبيعي تمام عنده 3 يدين والجنس مزال مش واضح وعندك كتلة سودة عالدماغ لو تبي تجهضيه هالشي جايز ونقدر نديرك عملية ع مسؤليتي وهذا التقرير شاوري روحك وتفضلي عندي اي وقت تبي تشوفي دكاترة واطباء تانيين عندك كل الصلاحيات واني هذا اللي شفته وطلع معاي مانديرش في رقبتي ولا نجبرك
رجاء : مصدومة وتحمي بدموع وخانقتها العبرة مش نجهضه ولا ح ندير اي حاجة سلمته في يد اللي خلقه لو تعطيني فيتامينات او حاجة يلزم ناخدها غير هكي شكرا
نعطيك كالسيوم وحديد وكثري من الخضرة الورقية والفواكه وربي يفرج ان شاءالله كتبت الوصفة وان شاءالله خير
طلعو من عندها رجاء تحكي لنادرة كله منك خليتيني غافلة ومانعلم بشي
نادرة : ما تعبيش عليها نمشو لمصحة تانية ونتأكدو
رحاء : وحق من خلقني ماني معتبة باب مصحة ولا مستشفي لين نهار نجيب وكان يقولو فيه 60 ايد ورجل وكان فعلا مش طبيعي بنطير ونجنح نخش الخلي هذا ما عطاني ربي والحمد لله علي نعمته وفضله يلا نمشو نكملو حوستنا نبي نندمر نرتاح
نادرة : بعيد السو صكري فمك وانتي بديتي تفتفتي
وروحو ومشو للحوش اللي بتسكن فيه رجاء وبناتها
نظفوه ورتبوه وطلع من اجمل ما يكون واصحاب الحوش مخليين في اثاث وفرش من المستعمل ما بوش يقيموه وتغدو وهذاك اليوم نادرة باتت معاهم ماتبيش تخلي رجاء بروحها لان نفسيتها تاعبة وهي من النوع الكتوم ماتحبش تبين شن فيها

                                                          

                                                               ......يتبع

نلتقي ان شاء الله