حياة العمر

الحلقة الثالثة

جهاد : واني شن دخلني نقانه عالطبع واخده من سعيد كل شي بالجملة مايعرفش قطاعي
نا : والله ياكبدي كلهن هك نتفكر امي زمان وككك ياكبدي لما تعصب من شاهين تخطم ع الحوش كله حتي باتي مرات ينسي مايجيب الخبزة تتفكرها بعد شهر وتقعد تنق عليها
علي : حق ياماما بالله لما يبدا راقيتلك ومعصبة من يقرا عليك ف السيناريو القديم ويفكر فيك بعمايل فاتن وبادن
ماما : اسهوكو تو من كنتو نازلين في ابراهيم علقتو المنظار علي اقعدو فيها نمشي نرقد افضل من مقابلة وجوهكم اللي تجيب  ستين قبلي
فاتت ايام بدون احداث تدكر مجرد روتين عادي في كل عيلة وجي يوم الجمعة طبعا الروتين يلتمو الخوت والخوات يتغدو في حوش ابراهيم لان عمكم سعيد مايحبش الدوشة و مايحبش حد يقمز قدامه وين يلقاهم ملتمين يقعد ينده فيهم وكل واحد يطلعله شغله من تحت ضوافره لذالك كلهم هاربين منه
طبعا خلي نحكيلكم ع الحوش كيف تشكيلته
الايدة او الجنان كبيير هلبا الباب الرئيسي ممر طويل يرفع لقراج كبير فيه ماطور حرت جذع للحاج سعيد وسيارة ابراهيم  والباقي دايره علي مخزن لبضاعة المحل لان علي فاتح محل احذية علي دورين راقي وحلو
حوش الحاج سعيد فيه ثلاث ديار حمامين ومطبخ كبير وسط حوش وفيه مربوعة برا بحمامها والشباب واخدين المربوعة وزايدين عليها دار كبيرة وحمام ويفتحو علي برا وحوش ابراهيم فوق حوش بوه فيه ثلاثة ديار وحمامين ومطبخ كبير وزايد في الجناح اللي قاعدين فيه خوته زايد عليهم صالة كبير ودار وحمام يعني يكون اربع ديار وصالة كبير وثلاث حمامات ومطبخ كبير ويفتح علي بلكونة كبيرة
المهم الجمعة الصبح ابراهيم ناض ونزل لخوته وولاده نوضهم وفطرو وبعدها البنات استلمو جناح عمامهم الشباب ونضفوه لان التريس يقعمزو فيه والنساوين في حوش ابراهيم طبعا المهم فات الوقت بدون احداث تدكر مشو الرجالة للجامع لبسهم فيه اللي لابس بدلة عربية قصيرة وفيه اللي طويلة والا عمكم سعيد عابد الجرد شتاء وصيف
والنساوين الكبار ف المطبح في حوسة الغدي والصبايا في توتاي سفر الغداء واللذي منه وفيه منهم يغسلو في اماعين الحوسة الاولة وراح الوقت ردو الرجالة من الجامع وتغدوا كسكسو يهبل وشربو الشاهي متع العالة بالكشكوشة بعدها لقوها ساعة 3:15 القايلة وفجااااااأة هوووب قطع الضي المهم رن هاتف جدي الحاج سعيد نوكيا ونحن نسمع
جدي : يا ااااهلييييييين ومرحبتيييييييين  جمال تي كيف حالك ياباتي
جمال : كيف حالك ياعمي وشن اخبارك وكيف حال العويلة البنات والاولاد شن حالهم
جدي : الحمد لله في نعمة ياولدي نحمدوه ونشكروه
واستمر الحديث .........
نا : هشو من يكون هذا جمال اللي يدوي مع جدي
هشام : هذا جمال ولد عمي منصور اللي عايش ف البرازيل شكله رد ليبيا لان الرقم ليبيانا
بابا : ايه بالله والله ليه زمان من بعد مات ولده حرم يعتب ليبيا ابصر شن جد عليه
جهاد: الله يصلح الاحوال
وفجأة سمعنا
جدي : لاحول ولا قوة الا بالله البقاء والدوام لله امتي صار هالكلام الاسبوع اللي فات كلمت جميلة قالت كلهم طيبين ومافيهم باس طلعت مريضة وتعاني سنين والله عيب عليك كيف ماتدوي وتجحدها عليا كيف اه.  المهم مش وقته توا نعطيك ابراهم واحكيله علي مكانك وخلي يجبك عندي وبعدها ساهل
بابا : هايابن العم شن اجبارك
جمال : والله فيه مصيبة ولازم تعرفها لكن مش توا المهم تعذر من عمي وتوا انا حاجز وطالع للسويد فترة وباذن الله نرجع ومعاي امانه ليكم وصية الوالدة وتمت المكالمة
المهم جمال ومن يكون ما يهمش المهم ليش طلع فجأة وشنو المصيبة البي يحكي عليها وليش مزال وقتها ومزال فيه سر بين ابراهيم ولده روؤف وح تخش معاهم لجين شنو السر هذا وهل خطير وكيف بيعرفو صاحب الشأن .......
ابراهيم : ياباتي جمال قال انه حاجز ومشافر السويد توا وجاي المدة الجاية وعنده امانه لنا وقال في مصيبة لازم تعرفوها وخلا ويتعذر منك مايقدرش يجي
جدي : تنهد تنهيدة اشق الجبل وحط راسه لوطا ودموعه ينزل
كلنا انصدمنا من ردت فعل جدي وعرفنا انه فيه حاجة خطيرة مخبية وماحد يعرفها وبدت التساؤلات شن الامانه اللي بيجيبها جمال وشن تكون
نجوي: خيرك يابوي شن فيه بينك وبين جمال واحني مانعرفوش
جدي: وقف وقام جرده بكل شموخ الحق عليه هيبة  مشاءالله وقف وقال مع الايام تعرفو ومانبيش حد فيكم يفرط في حقه ولو علي حساب نفسه الا وقام سبابته بتحذير إلا بين بعظكم ارحمو بعظكم وحبو بعظكم وساندو بعظكم حتي عالغلط المهم ماحد يخش بينكم خوذوها وصية مني وانا حي
عمي محمد : خيرك ياباتي عليش تدوي هك شن فيه اقل شي من اللي توفي جاك خبره وانت تحكي مع جمال
جدي : شخص بيني بينه حساب مات قبل مانتحاسبو وطلع لحوشه وخلي الكل في حيرة
نجوي : ابراهيم انت اكتر واحد تعرف بوي قولنا شنو فيه
ابراهيم : ماتشبحوليش مامعرف شي زي زيكم مانعلم بشي وبعدين باتي قدامكم امشو واستجوبوه
طبعا فيه من مركز مع ابراهيم وعارف القصة شن وفيه حد نبيه جدا ومن خلال رد ابراهيم عرف انه فيه شي كبير يعلم بيه الحاج سعيد ولده ابراهيم ولده روؤف اكيد عرفتو من صاحب الاستنتاج هذا
اللي هيا لجين همست ل هشام طبعا صاحبها هلبا ويفهم عليها من عيونها نخصاته من كتفه وشافت لبوها ولرؤف وكسرة عين فهم هشام كل شي ان ابراهيم ورؤوف عندهم علم وسكت  وفات اليوم بين حيرة واستغراب
وعدت الايام بدون اي احداث مجرد روتين وفي عرس سرور بنت خالتي نجاة  واخدها خالي فتحي كنة لولده فراس طبعا البنات تجهيز في شناطيهم ولبسهم واخلام حايرة تمشي حوش خوها ولا اختها
ياسر اني نعطيك راي ياحلومة انتي هليك في حوش اختك ويوم الفاتحة امشي حوش خوك واقعدي غادي ولما بيجيو الكسوة تعالي معاهم عمة العريس عاد واقعدي عند اختك مش راي
علي : والله من الصبح واني ندشش في الغناية ومش مقتنعة
جهاد : عارفك ياحلومة ماتبي يفوتك شي تحضري هني وهني
رؤوف : يام اني طالع تبي حاجة
ماما: استني نمشو معاك للمحلات انا واروي ولجين ناخدو حاجات ناقصة وتو يروح بينا هشام
رؤوف : لازم منه الدوران انتي وهالبنوت بروحكم
اروي: وشن بياكلونا ماهو معانا ماما وبيجينا هشام
رؤوف: انتي تحترمي نفسك وتنقصي طولة لسان خيرلك والا قسما بالله نحلف العرس كله ماتعفسيه
ماما : خلاص ياسر من الدوة انشو البسو
لجين : ياشكل لازم تلاقفي ماتعرفي تسكتي وانتي وهو كيف النار والبنزينة ماطيقوش بعظكن
نجلاء: ربي يهديهم اسمعو جيبولي جورب لحمي داكن لونه اسود والنبي لجونة خوديلي بروش حلو وراقي علي ذوقك نبيه مع قفطاني الاكحل نبيه فضي تمام وكان عجبك شي يجي عليا عادي ترا اي شي اقبل
اروي: باهي اكتبي شن تبي وانتي طلاباتك ماتخلصش
المهم مشي الوقت ومشن حلومة وبناتها للسوق
وخذن شن يبن منه جاهم هشام 😱
وحطن اكياسهم وركبو السيارة
هشام : نهار سود مغبر هذا شنو كله ماخليتو شي ف المحلات شن هالاكياس كلها
ماما: وووك يا كرعيا خلاص تنفخن معاش نحس بيهن ولفت علي البنات خلاص كملتن معاش فيه حاجة ناقصة .
هشام :😳 قصدكم مزال تبو تاخدو بعد هذا كله
اروي : هشو بالله نبي المحل ....... اللي جنب سوق ...... نبي منه حاجة ضرورية
هشام : عليك حصلة سودة امري لله وخلاص
نا: نجك ليا عمو السمح الغالي نبي..
هشام: وااااااااااااك نطلع من السيارة شن تبي تاني نهار حرف اللي يشبحكم يقول ان خلاص الدنيا كملت
نا: ياسطل كنك تفزع نبي ناكل جعانة دبر مش دخلي باش نوصل الحوش نلقي جهد نرتب الدبش اللي خديته بعدين والله خديتلك تشيرت يهبل وجينز عجبني يجي حفر عليك
هشام : اعطيك دعوة وخشيتو محلات شباب
ماما : هشو وليدي ياسر تقصقيص افتكيك من اوفة حصلت فيك ووك وانتو طبع واحد احسن شي تسوق وتسكت خيرلك
هشام : تي كنك ياحلومة زعلتي خيتي نا نتحملش زعلك
اروي : تنبال مليح هذا كله علي الهانم والله ماتمشي معاك وترخي بيك ماتعباش عليها
هشام : ووك تحركي من مكانك لان انتي حصلة فالك واحساسك مايطيح في وطا وتكدر هشام خاف ان ندي ترخي بيه وتفوته لان عينها كبيرة وتبي ولد وزير باش يلبي رغباتها الله يستر وخلاص
المهم راح الوقت وخذو شن يبو وردو للحوش نا انادي من الدروج نوووووور نجلااااااء مساكين طلعت العيلة كلها مفجوعة يسحابو  في حاجة صايرة
نور : خير بلاويك تنعبي شن فيه
نا: جعاااااانة شن العشاء
نجلاء :عطك عصا تتكسر علي ضلوعك هذا كله علي خاطر العشا تي نشفتي دمنا فكرنا في مصيبة
هشام : خلوها المفجوعة المشكلة انها واكلة نصين شاورما ف السيارة مش عارف الوكال اللي تاكل فيه وين يمشي ومش طالع عليها والله لو نور تاكل وكالك تبقي زي الفيل
نا: صلو عالنبي وخلوني في حالي الخلاصة شن العشي
نور: بيتزا وشربة وخبزة خضرة
ماما: سلم يديكم حطو لبوكم وخوتكم وماتنسوش الدوايح اللي برا جهاد وياسر وعلي
ماما: هشام دير بالك من ياسر وضعه مش عاجبني يطل ف السهر برا وما نبيش ندوي لبراهيم
هشام : والله ياحلومة مركزله وان شاء الله نديرله حل تصبحي علي خير
وفات الوقت وتم الاسبوع وجاء اسبوع العرس ومن يوم الاثنين البنات مشو لحوش خالتهم. الا نا وماما مشينا لحوش خالي لان خولة انتيمي وصاحبتي روح المهم وصلنا حوش خالي سلمنا وكسدنا مشوار ودرنا جو دربوكة وغناء
ورتبنا شقة فراس وفرشناها ورتبنا دبشه وكل حاجة في مكانها وفتحتا في قرأن وسكرنا وطلعنا لاقونا شباب العيلة ومعاهم شباب خوال وخالات فراس شفت من بينهم شخص مركز علي ماعرتش الموضوع اهتمام هو شاب حليوة وشخصية وعيونه ملونة ونضرته حادة بس باين عليه حامل هم كبير وكبير هلبا الصراحة وجعني مع انه مش مبين داخله لكن انا عرفت هذا كله من نظرة خطف بس
بعدها في الليل
نا : خوختي في واحد بكري شفته هكي نقشه عالاشقر وعيونه مش معروف لونهم  لابس جينز ازرق بايد وسورية اخضر فيه ضربة في حاجبه من يكون هذا
خولة : هذا صاحب فراس عنده اسمين اكرم والثاني مانعرفاش ملقبينه الصيد  لان مشاءالله ماتفوتاش قنيصة وتقريبا حتي رؤوف وجهاد يعرفوه
نا : اها مشاء الله لكن حسيته مهموم هلبا
خولة : والله مانعرف لان مايجيش هلبا حسب شغله مايفضاش لانه دماغه مشاء الله يشتغل في المطار
مانبيش ندخل في شغله لان هلبا تفاصيل ودوخ وكان بنحكي بنطول هلبا وتملو منها
نا: مشاء الله حسيته شخصية طول ف عرض
خولة : شنو غاليتي حسيتك اوفر شكلك طحتي فيه
نا: طاح سعدك وانتي ديما تفكيرك مسوس زي وجهك حسيت انه وراه قصة وقصة كبيرة وفيها كوارث
خولة : الله اكبر هذا كله عرفتيه من شبحة وحدة وخطف وكان هدرزتي معاه احتمال تعرفي الدكتورة اللي ولد علي يديها
نا: والله مانكذب عليك متأكدة زي مانشبح فيك واني وياك والزمان طويل وقولي لوجي قالتها
خولة : انتي الله يجيرنا من احساسك
                                                  يتبع............