أخبرني الحقيقة (باللهجة الجزائرية)

44 (الاخيرة)

الحلقة 44 والاخيرة :::

******بعد ثلاث سنين******

كنزة : يااا المصيبة ، رح تخرجوني من عقلي ، ارواااحو دووك .. ادههههم اهدر معاهم

كانت تجري وراهم فالدار ، وادهم قاعد يحوس على الفاست تاعو فكل بلاصة

ادهم : وين راها الفااااست ؟؟ البارح كي دخلت فالليل كانت لهنااا

كنزة : معلاباليييش .. اروااحو نتوما لهناا .. اياد ، لين .. اروااحو دوك

لين : لالا ماما لالا

اياد : مآاه ماما

ادهم لقا الفاست تاعو ورفدها ولبسها وهو يخزر فيهم ..

ادهم : اياااا نتوما روحو عند ماماكم تلبسو لي فاست ديالكم وخليونا نروحو ..

لين/اياد : لالااااااا (وبداو يبكيو)

كنزة : يااا ربي وش رح ندير معاهم دوكا !!

ادهم : كل صباح يديرو الدراما باش ما يروحوش للكخاش ، يعني نتي راكي معاهم كامل النهار ، مالا وكان جيتو تروحو لكخاش نورمال كيفاه !

كنزة : لي يجي عندي دوكاا نشريلو شوكوولا
خزرو فيها لين واياد وجاو يجريو عندها وعنقوها ..

لين : نحب شوكولا

اياد : انا تان نحب شوكولا

لين : بلع نتا ، ماما ذيبيلي (جيبيلي) انا

اياد : لالا ماما ، انا نحب ، هي ما تثريلهاث (ما تشريلهاش)

كنزة : خلاص ، نشريلكم بين زوج

اياد : حبك ماما

لين : انا تان نحبك ماماتي

تبسمت كنزة ولبستهم ليفاست ديالهم وخرجو هوما ربعة وركبو فالطونوبيل ..

ادهم : رح نروحو لدارنا ولا لداركم اليوم ؟

كنزة : اممم ، خلي نخرجو اياد ولين يلعبو فالماناج

ادهم : قوليلي نتي راكي حايبة تروحي للماناج ماشي الدراري

كنزة (ضحكت) : تعرفي نحبو

ادهم ضحك عليها حتى شبع

ادهم : جابلي ربي نتي الطفلة مشي لين

خزرت فيه وقلبت عينيها .. ضحك عليها ورما يدو حطها فوق يدها ..

ادهم : ياو نموت عليك

كنزة (تبسمت) : ربي يخليك ليا حبيبي

حط ادهم يدو على يدها وتبسم ..

ادهم : وليا يا حياتي

تبسمو بين زوج وضحك وديمارا ادهم يديهم للكخاش ..

جازو ثلاث سنين .. فيهم تبدلو بزاااف حاجات ، بيان سور ادهم وكنزة كانو عايشين لاباس بيهم ، يشاركو بعضهم الحلوة والمرة ، ماكانتش الحياة سعيدة كيما فالافلام ، كيما كامل ليكوبل كانت بيناتهم مشاكل ، مي بالتفاهم والمحبة لي بيناتهم قدرو يحلوهم ويتجاوزوهم ..
كنزة بعد عشر اشهر من العرس ولدت توام ، طفل وطفلة ، اياد ولين عندهم دوك عامين وشهرين 👇