أخبرني الحقيقة (باللهجة الجزائرية)

28

في خاطركم ، رح نزيد نحط البارت الثالث لليوم ، سمحولي اذا قصير مي راني مشغولة وكتبتو بالزربة وهذا على واش قدرت .. من فضلكم فوت وبارطاجيو الكرونيك 😘😘

الحلقة 28 ::

جازو اليامات ، ولحق عرس ريم (بنت خالة ادهم اذا نسيتوها) ..
ناضت كنزة الصباح ، لبست جينز وتيشرت وباسكات ووجدت وش رح تلبس وماكياج وكامل داتهم فالفاليزة وراحت لدار فريد مع ادهم بيان سور ..
لحقو ، وادهم راح يعاون الرجال من فاميلتو باش يوصلو القضيان وغيرو لللاصال ..
والنسا راحو لدار خالة ادهم (يمات ريم) ..
كي شافو كنزة تخلعو ، مي صفية سيات تقنعهم بلي ادهم ما عندوش باش يدير عرس وغير يطم الدراهم رح يدير عرس كبير ، بيان سور كامل جاتهم غريبة مي بلعوها ..
بداو يوجدو رواحهم ويضحكو ويقصرو .. كنزة فرحت بزاف لريم وطلبت منها السماح على وش قالتلها هذاك النهار فالتيليفون وهي تفهمتها ..

ريم : باين عليك تحبيه بزاف ، ربي يهنيكم

كنزة (بحرقة) : امين ..

بعدما كملت كنزة وعاونتهم وكامل راحت تلبس هي تان .. وجدت روحها .. وكانت لابسة هكدا 👇

وماكياج سموكي سامبل كيما هكدا باش يواتي عينيها الزروقا 👇

وحبطت عندهم ، غير شافوها بداو يسميو بالله وقعدت خالة ادهم ديرلها البخور باش ما يعينوهاش زعما ..

ريهام (اخت ريم) : يا كنزة ختي تهبلي ، خموس عليك ، والله غير ادهم دا ملايكة

كنزة (حشمانة) : ربي يخليك حبيبتي ..

سهام : بالعقل على مرت خويا تعينوهالو تان ، خمسة فعينين الحساد

ريهام : بوووه عليك ، ربي يبارك عليها