أخبرني الحقيقة (باللهجة الجزائرية)

30

بمناسبة عودة لاكونيكسيون وما رجعتش نطلب من ختي 😂 حبيت نحطلكم بارت تجوزو بيه السهرة .. ودعموني بالفوت والبارطاج بلييز 😘

حبيت نقول يعطيكم الصحة على الكومنتات تاعكم ، فرحتوني بزااااااف 🤩 اي لاف يووو 🥰

الحلقة 30 ::

جازو اليامات ..
ولحق العرس تاع ياسر مع ليليا وسمير مع خطيبتو .. الليلة لي قبل ، كانت كنزة فبيتها تصلي وتدعي ربي يصلحلها كل حاجة فسدت فحياتها .. حتى دخل ادهم .. تبسم كي شفاها هكاك .. خلاها كملت ورفدت صوالحها ..

ادهم : غدوا عرس ولاد خوالك ؟

كنزة : ايه ..

ادهم : تروحي تباتي عندهم ؟

كنزة تنهدت ، ماهيش عارفة اذا تقدر تروح ولا لالا ، خافت سعاد تزعف عليها .. ادهم كي شافها ساكتة فهمها ..

ادهم : مالا نوصلك الصباح وخلاص ..

كنزة (تنهدت) : ايه ..

خرج ادهم ، وتيليفون كنزة صونا ..

كنزة : لولو ، وش راكي ؟

ليليا : لاباس ونتيا ؟ توحشتك بزاف

كنزة (تنهدت) : مام انا ، توحشتك وتوحشتكم كاملين

ليليا : خلاص حبيبتي كلش يجوز

كنزة : ان شاء الله ..

ليليا : ما تجيش تباتي معايا ؟

كنزة : والله ماعرفت ، خفت نجي وندير مشكل ونتوما غدوة عرسكم ماكمش ناقصين !!

ليليا : لالا ما تقوليش هكا

كنزة : معليش ليليا خلي غدوة ونجي وخلاص ، حتى طاطا ميس وراها كارهتني

ليليا : ماما انا نهدر معاها ما تقلقيش روحك ..

كنزة : ايه ..

ليليا : المهم انا نخليك .. تصبحي بخير .. حقا قولي لادهم يجي هو تان ..

كنزة (تنهدت) : باي باي ..

كي جات رح تكوبي سمعت كي ليليا دخلت لبيتها وعرفت بلي البنات راهم مجتمعين وجاو فاميلة يماها تان وراهم دايرين جو ويقصرو ..
كوبات وحطت راسها وطاحو دموعها ، ليليا اعز صديقة عندها وبنت خالها لي كبرو كيف كيف ، مارحش تكون معاها ف أوقات كيما هاذو ، صح رح تحضر عرسها ، مي البنات يحبو اللمات لي قبل العرس والقصرة والضحك وكامل ..

غدوة من ذاك ..
ناضت كنزة ، دوشت وطلقت شعرها ينشف هكاك ، ولبست غوب تحت الركبة وباسكات ودارت حوايجها فالفاليزة .. خرجت شربت القهوة وستنات ادهم .. خرج هو بعدما صلى صلاتو وراح شرب قهوتو وراحو للقصر ..
غير جات حابطة تفكرت العرضة ..

كنزة : ليليا عرضاتك ..

ادهم (ببرود) : عندي خدمة

كنزة : كيما تحب ..