أخبرني الحقيقة (باللهجة الجزائرية)

42

ملاحظة ::
حبيت نقولكم بلي فالبارت لي فات ، كان لازم نقولكم بلي فالحنة تاع كنزة ، كان المفروض تجي سعاد وهي هازة صينية فيها طبسي تاع حنة وديرلها فيدها ، وتزيد دير للبنات العازبات ، ويكونو زوج ولا ثلاثة بنات صغارات رافدين ذوك الشمع الطويل وواقفين قدام العروسة .. نسيت ما ذكرتش هاد المقطع لي هو الاهم فالحنة ، باسك على هذا لي سماوها حنة ، باسك يديرو فيها الحنة للعروسة ..

الحلقة 42 :::

زادت جازت سمانة وحدوخرا ..
جازت هي تان بنفس الروتين ، كل يوم واش يوجدو للعرس ، سواء ادهم ولا كنزة ، لي مكانوش يهدرو مام با بزاف مع بعضاهم من كثرة الشغل لي كان طايح عليهم من كامل الجهات ..
لحق النهار لي قبل العرس ..
فطنت كنزة كي العادة بكري وعيطت لادهم ، اصلا هذا هو الوقت لي تقدر تعيطلو فيه ، باسك من بعد يكون مع فاميلتو يوجدو وفالليل بين زوج يطيحو كي الميت فالسرير ..

ادهم : صباح النور يا قلبي

كنزة : صباح الفل والياسمين ادهومي

ادهم (تبسم) : ياا يماا ، نوض الصباح على كلامك المعسل ، رح نهبل علابلك ، راني حايبك تكوني قدامي دوك ، توحشتك ياااا جدك

كنزة (ضحكت) : مام انا توحشتك ، عندنا سمانتين ما تلاقيناش

ادهم : خلاص غدوة ان شاء الله رح نكونو مع بعضانا وما تفرقنا غير الموت

كنزة : بعيد الشر ، ما تجبدش كلمة الموت تعيش

ادهم : خلاص سمحيلي .. المهم انا نوض نعاونهم باش يسقمو السطح للحنة تاعي اليوم

كنزة : ايه مام انا مزال ما كملت الفاليزات كامل

ادهم : اوك ، اتهلاي فروحك حبيبتي

كنزة : نتا تان

ادهم : نحبك

كنزة : مغسي

ادهم : هكدا ؟؟ اوك معليش ، اصبري برك طيحي بين يديا يا كنزة

ضحكت كنزة عليه وكوبات ، تحب تهبلو هكدا وتهبل بالضحك عليه ..
ناضت من بلاصتها، راحت صلات صلاتها وبدلت قشها وحبطت لعند العايلة باش يفطرو كيف كيف ..

سعاد : اليوم مكاش خدمة بيسك النهار اللخر تاع كنزة لهنا

كنزة : لالا جدة ، انا كاين سوسن تعاونني ، نتوما روحو

سعاد : لالا معليش ، خلينا نجوزو هاذ النهار معاك

كنزة : ايه كيما تحبو

سعاد : كنزة تقدري ترجعي للخدمة بعد العرس .. واذا حبيتي تبدلي البوست بدلي

كنزة ماعرفتش وش تقول ، يعني هي ماهيش حايبة تكمل فالشركة .. قعدت ساكتة شحال وهي تخمم ، ومن بعد جمعت كامل الكوراج لي كان عندها وخزرت فعينين سعاد ونطقت ضربة وحدة ..