أخبرني الحقيقة (باللهجة الجزائرية)

23

فوووت وباطاجيو 😘

الحلقة 23 ::

رجعت كنزة للدار عيانة بزاااف ، طلعت للبيت ورقدت ديراكت .. وسمية راحت عند وحدة فاميلتها باش تقعد تتعشا معاها .. وسوسن قعدت فالدار باش تعس كنزة..

من بعد .. ادهم وصل للولاية وراح للحي لي قاتلو ليليا عليه وحوس على سمية وبيسك هي معروفة فالحومة تاعها وصلها ليه ليه ..
دقدق وخرجتلو سوسن ..

سوسن : وي ؟

ادهم : لهنا دار سمية #### ؟

سوسن : ايه ، وش تسحق ؟

ادهم : كنزة راها لهنا ؟

سوسن : كيفاش تعرفها ؟

ادهم : ااا.. انا .. انا وليد خالها ..

سوسن : وليد شكون ؟

ادهم قعدت يتفكر اسماوات خوالها باسك هي حكاتلو عليهم ..

ادهم : وليد فاتح ..

سوسن : اقعد دقيقة لهنا ..

غلقت الباب وطلعت للبيت تنوض كنزة ..
ناضت كنزة وتقعدت ..

كنزة : وشنو ؟

سوسن : جا وليد خالك

كنزة (تخلعت) : صححح ؟؟

سوسن : ايه ، وحاب يشوفك .. اخرجي ليه

كنزة فرحت ، توحشتهم ، لبست البليغة وحبطت تجري قالت هذا ما يكون غير سمير ..

فتحت الباب لقاتو اونفاص ليها يخزر فيها ، الدم حبسلها وفمها نشف ، اخر واحد كان تستنا تشوفو لهنا .. وش جابو وكيفاش وصل ليها ؟؟ مقدرتش تتحرك ولا تغلق الباب قعدت غير تخزر فيه ، الحق توحشاتو وغير شافتو قلبها لان عليه .. مي قعدت الهدرة تاع ماهر تتعاود فراسها .. وتفكرت بلي كذب عليها وزيد تاجر ممنوعات ، وبالرغم لي تحبو وبزاف لازم تبعد عليه .. جات حتغلق الباب ، حكمو ادهم وجبدها من يدها وخرجها .. قرب ليها وقعد يخزر فعينيها ... دنات عليه وتقلبو خزراتها من تاع شوق وحب ل تاع سخط وكره... روماركا كيفاش كانت تخزر فيه شغل عندها بزاف هدرة حابة تقولها وتعاتبو بيها ...

ادهم : كنزة؟

كنزة (ببرود) : وش جيت دير ؟؟

ادهم (مستغرب) : كيفاش هذا ؟؟ جيت ليك ، باش نشوفك ، باش نصلح كل حاجة، رايح نطلب يدك من جداتك خلاص، رايحين نعيشو قصة حبنا ف الحلال وواحد ما يحكي عليك ولا يقول بلي لعبت بيك

كنزة : ارجع منين جيت دوك ، منحبش الجيران يشوفوني واقفة معاك

جات داخلة عاود حكمها من يدها وجبدها ليه عنقها وزير عليها ، قعدت شايدة الدمعة بالسيف .. رخات روحها وهي بين يديه ، مي خف خف تفكرت وبعدت عليه وطبعاتو .. قعد يخزر فيها مشوكي ، وش بيها ، وش لي بدلها !!