كانت الساعة خمسة ونص صباحا نزلت من السرير واتجهت على الحمام استحميت واتوضيت طلعت صليت فتحت الخزانة بقيت بعاين للهدوم
البس شنو؟
لأول مرة أسأل نفسي السؤال دا عمري م اتوقفت على الحاجة البلبسها اول مرة اقيف محتارة في اختيار اللبس عارفين عيني وقعت على شنو ف النهاية ؟!
عباية سودا اي عباية سودا بنفس السواد الطلعت فيو اليوم داك
نفس لون العباية الطلعت بيها قبل تسعة سنوات لبستها و معاها طرحة بالأسود نزلت تحت لقيتهم جاهزين منتظرين حسام بس وقبل م اتكلم الجرس ضرب وعرفنا انو بكون حسام طلعنا ليو برا قلت ليهم مشينا؟! حسام قال لي يلا اما امي وابوي اكتفو بالسكوت عارفة إحساسهم شنو مهما الشي الانا حاسة بيو م بفوت احساسهم
عند ابوي
مهما وصفت احساسي في اللحظة دي م بقدر عارفين احساس انو ح ترجع البيت الانطردت منو قبل ٣٣سنة ايوا ٣٣ سنة م شفت امك ولا ابوك واسي ترجع ليهم وم عارفهم عايشين ولا لا اتمنيت م يحصل الحصل كلو بس الله غالب وحكم ربنا كلو لي خير
عند امي
م ح اقدر اوصف حالتي الكنت فيها ع قدر م كنت مشتاقة اشوف اهلي بعد السنين دي كلها ع قدر م كنت خايفة لاني عكس ماهر تماما هو انطرد بس انا هربت وعارفة انهم اعتبروني ميتة عارفة انهم نسو بإنو عندهم بنت اسمها اماني هل ح اقدر اواجهم؟ دا السؤال الكان ف راسي لحدي م وصلنا
عند حسام
انا كنت تائه شديد وم عارف اقول ليهم شنو غالبني اواسيهم م حصل شفت واحد من اهلي ولا بعرف درب بيتهم ب وين بس كل ال ح اعملو اني اسيطر على الوضع هناك
كنا كلنا ف حالة صمت وكلنا بنفكر ف ال ح يحصل شنو لحدي م وصلنا اي وصلنا نفس المكان الطلعت منو قبل سنين هو نفس المكان الاندفنو فيو اكتر اتنين بحبهم هو نفس المكان بس كان متغير ومتغير كتير كمان بس الكآبة الفيو م اتغيرت وقفنا قدام البيت كان فيو كمية من الرجال برا ف الصيوان قلت خلاص معانا ف زول مات وسبحان الله كلامي طلع صاح لانو الرجال كانو بشيلو في الفاتحة حسيت ب زنة ف راسيوم عرفت أسأل المات منو الناس انتبهت لينا لانو شكلنا بدل على أننا غرباء وجايين نعزي ف الميت جا ماري ب جنبنا راجل ابوي وقفو
- سلام عليكم ي حاج
* وعليكم السلام
- الحاصل شنو هنا
* والله اتوفى امس محمد ود حاج الطاهر الله يرحمو
- محمد؟!! انا لله وانا اليه راجعون كان عيان ولا شنو؟
* لالا والله نصيح قالوا امس كان راجع بالليل بالتكسي الاحمر من الحلة الجمبنا هم أربعة وبالسواق خمسة العربية عملت حادث الركاب اتعوقو ولحقوهم والسواق حالتو حرجة الا محمد مات وقتي اتشوه شديد اتعرفو عليو بعد تعب وحتى الجنازة م قدرو يهبشوها كفنوهو واندفن مع صلاة الفجر
