البارت الثاني
الجني اليهودي العاشق
فقدت الوعي من رهبة المنظر اللي شفته..
أول مرة بحياتي اشوف هيج منظر..
من التفتت حتى أشوف مصدر الضحكات اللي بغرفتي..
شفت...
شفت خيالات لأشخاص..
الخيال يتحرك بصورة سريعة يخطم بسرعة..
لكن لا لا ابد ما كانوا أشخاص.. 😭😭
الجسد جسد شخص طبيعي لكن اطوالهم متفاوتة اكو طول عملاق واكو قصير وعدهم قرون براسهم ما اتحملت اللي شفته كولش خفت دخت والمغص اللي بطني زاد ما حسيت غير اهلي فاتحين الباب ودخلوا عليه يضربون بية راجديات حتى يصحوني..
من صحيت كمت ارجف..
ظليت اتفقد المكان اباوع على جدار جدار بالغرفة اباوع على السقف ودموعي كامن ينزلن حضنت ماما وظليت ابجي
ماما كالت شبيج ليش دترجفين
ما كدرت اجاوبها..
كالت ماما لتخافين هي باب وانقفلت عادي تصير هواية ومرة ثانية لتقفليها من تدخلين للغرفة وحدج..
بهالأثناء اختي ربى انتبهت على كتاب "عجائب الملكوت"
ربى : اكلج رباب هذا شنو الكتاب
اني فزيت من حظن امي بسرعة رحت اركض أخذت الكتاب من ايد ربى ما اريد ماما تنتبه على الكتاب لإن متقبل اقرا هيج نوع من الكتب تخاف علية..
سحبت الكتاب من ايد اختي..
ماما كالت هاي شبيج شنو هذا الكتاب ليش هيج فزيتي
كلتلها ماما هذا كتاب بي مجموعة قصص جبته من صديقتي اتسلى بي
ماما : انتي سادس وقت تسلية؟
كلتلها ماما مرات احب اغير جو واخرج من روتين الدراسة لذلك استعاريت هذا الكتاب من صديقتي
ماما : اقري شي قليل لتقرين هواية وتهملين دروسج ترى اخذه منج..
اختي بهالأثناء ظلت مركزة على الكتاب..
كالت انطيني أني هم اقرا من اكمل دروسي
اني ارتبكت..
شلون انطيهيا..؟؟!
كلتلها لا طبعاً ما انطيج لإن هذا كتاب صديقتي اخاف عليه ترحين تمزقين اوراق منه وهو بإعتبار أمانة يمي..
ماما كالتلها صحيح كلامها كله إلا الإمانة لازم واحد يحافظ عليها ❤
اني كلت بداخلي دحجي بالأمانة والحفاظ عليها و اني دكذب على ماما وأهلي كلهم كولش انقهرت من روحي..
شنو اللي ديخليني اكذب..؟!
ليش ما احجيلهم الحقيقة..
ليش ما اكول الهم اللي شفته بالغرفة..
هواي تساؤلات بعقلي بس ما لكيت إلها أي جواب..
قررت أسكت وما احجي..
طلعوا ماما وربى من الغرفة..
رحت فتحت الباب ما قفلتها خفت يتكرر الموقف وتنقفل مرة ثانية..
جتي عيني على الكتاب رحت لزمته..
اريد اكمل قرائته.. بس.. بس خايفة كولش خايفة
من لزمته إيدي خدرت ياربي هاي شنو عبالك راح تصير شلل الكتاب سقط من إيدي على الأرض..
من سقط سمعت صرخة قوية بالغرفة..
شلون واحد تأذى وفجأة كام يعيط..
الصرخة جانت قوية إذني كوة تحملت الصوت..
دخت وعيوني كامن يدمعن..
دنكت على الكتاب اريد أجيبه بس خايفه منه..
كلت بداخلي لازم ارجعه لبيت عمتي ولازم ما اقرا بعد أي شي بهذا الخصوص..
كلت بسم الله الرحمن الرحيم ولزمت الكتاب بس إيدي لحد الآن ترجف..
ضميت الكتاب بجنطتي مال المدرسة حتى محد يشوفه..
واكول بداخلي زين أني ليش هيج دسوي..؟
عبالك بايكتلي بوكة ليش خايفة يا ترى اللي دسوي غلط؟
ما لكيت أي إجابة لنفسي..
طلعت من الغرفة نزلت جوة كعدت يم اهلي لكيت بيت عمتي هاجر يمنه..
سلمت وكعدت..
ماما : كومي رباب سوي جاي
كمت رحت للمطبخ..
سمعت عمو رائد استأذن وكال أني رايح للبيت
طلعت ركض وكفت يم باب المطبخ..
قبل لا عمو رائد يفتح الباب صحت عليه..
عمووو
عمو رائد : ها عيني كولي
رباب : عمو انتظر ثواني لتروح هسة اجيك
عمو رائد : ماشي..
رحت ركض صعدت لغرفتي نزلت الكتاب وجيت..
رباب : تفضل عمو
عمو رائد استغرب من اللي شافه..😳😳
عمو رائد : هاي شنو منين الج هذا الكتاب؟
اني ارتبكت ما عرفت اجاوبه..
رباب : عموو.. عمو هذا...
عمو رائد : شبيج مرتبكة احجي
رباب : اخذته من المكتبة مالتك..
رائد : وشلون تاخذي بدون لتستأذنين؟
فجأة... 😳😳
سمعنه صوت فد شي انفجر بالمطبخ اني بهاللحظة رجلي كامت ترجف ما سيطرت أظل واكفة.. سقطت على الأرض..
وحطيت إيدي على راسي وكمت ابجي واصيح هاي اكيد همة راح يفجرون بيتنا اكيد همة نزلوا من غرفتي وراح يكتلونا كلنا..
عمو رائد إستغرب من كلامي..😳
عمو رائد : بنيتي شبيج منو اللي راح يكتلوكم هاي شدتحجين؟
رباب : الجن
عمو رائد : شنووو
رباب : أي عمو الجن قبائل الجن يمكن راح يدمرونا شفتهم اني شفتهم
عمو رائد : لج وين شفتيهم
رباب : بغرفتي من جنت اقرا بالكتاب..
عمو رائد تخبل من سمع هذا الكلام..
تعصب علية عيونه كامت تجدح نار..
عمو رائد : اهدأي وكومي خلي نشوف شنو هذا الصوت اللي صار بالمطبخ..
رحنا أني وعمو رائد للمطبخ..
لكينا المطبخ ما بي أي شي.. كل شي بمكانه ولا متخربط شي
باوع عليه وأني باوعت عليه زين هذا الصوت العالي اللي مثل الانفجار اللي سمعنا جاي من المطبخ شنو؟؟!
عمو رائد راح دخل على اهلي لغرفة الضيوف..
عمو رائد : سمعتوا هذا الصوت اللي صار قبل شوية لو لا
العائلة كلها : يا صوت لا ما سمعنا أي شي
عمتي هاجر : هاي شنو انت مو رحت للبيت شرجعك؟
عمو رائد ارتبك..
عمو رائد : هااا.. هاا مو سمعت هذا الصوت وجيت دسألكم عبالي انفجار..يله من رخصتكم
عمو رائد وصل الباب..
صحت عليه..
عمووو
اندار عليه عمو رائد وهو ضايج مني كولش..
عمو رائد : هاا احجي شتردين؟
رباب : عمو هذا شنو اللي صار ؟ انت سمعته للصوت اللي صار مو؟ جان كولش قوي؟ وجاي من المطبخ ؟ عمو الله عليك احجي سمعته؟
عمو رائد : اي سمعته..
رباب : زين ليش اهلي ما سمعوا؟؟
عمو رائد سكت ما جاوبني..
رباب : عمو شنو معناها بس اني وياك اللي سمعنا الصوت؟ هذا الصوت منهم مووو؟ هذا الصوت من الجن
عمو رائد : ما دام تعرفين الجواب وهذا الصوت كان من الجن ليش دتسألين..؟
#زهراء_الزهيري
