زينوفوبيا🥀

الحلقة9

اشرف يجبد فيه:خلاااص ياامهند خلااص متوسخش ايديك بيه فووته سيوره يعترف اطللقه
مهند ناض وقف وهوا داهش واشرف جبده لين طلع براا

مهند يعيط:مااحدش يخشله ولا يعاالجه خلووه هكي زي الكلب نلقى حد خااشله بصير فيه زيه
اشرف جبده لين دخله لي مكتبه
مهند داهش
اشرف:اهدا ياا راجل خيرك ولعت
مهند:بشن يهدد فيهم بشنييييي باش كلهم خاايفين يقوولو اسمه علااش مش قااادر نوصل فيه علاش😠
اشرف:ليك شهرين فاتح ملف القضية وقدرت توصل لي نص المعلومات المطلوبة ممكن وهادي تعتبر حاجة كويسة اهدا مافيش حاجة تجي بساهل كله يبي وقت
مهند تنفس بلقوة وقعمز علي الكرسي :اليوم كانت بتقولي كل شي البنت الززفت مفروض ماخليتهاش تطلع لين تتكلم
طقطق الشرطي علي الباب ودخل ملفات لي مهند وطلع
مهند:اشرف تعالا شوف التقارير هادو شني اني ماعنديش خلوق لي شي
اشرف مشي قعمز علي مكتب مهند ومهند مقعمز مقابله وقعد يشوف في التقارير ومهند سرحان

وبعد دقاايق
اشرف:احممم اااء مهند في خبر
مهند شبحله
اشرف لفتله الورقة :شكوة ضدك
مهند ضحك بهزوة :من وكيل النيابة صح!؟
اشرف: اي والنائيب العام جاي هني غدوة الصبح مع الساعة9
مهند طلع سبسي :مرحبتين بيه
اشرف:وهادي ورقة من المحكمة اليوم حكمو علي صلاح خميس الحاج بعشرة سنين وخوته الزوز تلاتة سنين
مهند:جتهم في الريش
اشرف:بتروح انت اليوم ولا قاعد
مهند :قاعد
اشرف :حتى اني مناوب اليوم خلي نمشي انجيب قهوة راسي مصدع تبي ؟
مهند :جيبها بلا سكر
اشرف خدي مفاتيحه وطلع

_____________

اول ماطلع الضي خدي نوح شنطة صغيرة حط فيها شوية حوايج وجواز السفر و وراقه وخدي فلوس وخلا لي جميلة فلوس في الدولاب وطلع من غير ماحد يحس عليه
اتصل بي منعم وهوا في الطريق وعطاه علم

الساعة9:00

مهند واقف قدام الروشن ويدخن ويشوف للساعة
انفتح الباب وخش اشرف فمه معبي ماكلة
اشرف:خييييير
مهند شبحله:تي شن ادير ؟
اشرف: ناكل شنيي🙄
مهند :تي اطلع كول في مكتبك الناايب قريب يوصل عفنت الدنيا
اشرف:جبتلك نفاص
مهند:اشرف متهبلنييش براا تو انجيك لما يروح النااايب يااراجل خيرك خليت صنة المكات ماكلة
اشرف :الحق فياا 😒 ومشي طلع

مهند خدي المعطر وقعد يبخ في المكتب
قعمز في مكانه وشوية وخش النائب
مهند ناض وقف وضرب التحية :اهلا سيادة الناائيب
النائب:اهلا يا حضرة الضابط كيف حالك
مهند:بخير سيادتك تفضل وناض مهند من علي كرسيه جي النائب قعمز ومهند قعمز مقابله
النائب:اي يامهند كيف الشغل هني
مهند :كل شي في احسن مايكون
النائب:سمعت ان شديتو خاين من يكون
مهند:العريف فتحي يخدم هني ليه سنين اني لما عينوني هني لقيته
النائب:تم التحقيق معاه ولا مزال
مهند:مزال ماكملتش التحقيق وهوا مزال معترفش
النائب:تمام هدا مش موضوعنا الاساسي و انت عارف سبب جيتي
مهند:اكيد عارف
النائب:يا حظرة الضاابط اللي صار في المحكمة امس غلط والمفروض ميتكررش
مهند:الغلط لما انشوف الناس اللي ماعندهاش واسطة تنحبس بلعشرة سنين واللي عنده واسطة طلع من اول جلسة وهوا متهم
الناائب:وكيل النيابة عرض عليا ورق القضية وقالي ان تم نصب فخ ليه وجاب ادلة انه برئ
مهند:اسمعني وركز معاي كويس ياحظرة النائب اني اللي القيت القبط علي ولد خو وشديته بجرم المشهود وكان بيبيعلي الكوكااين وعندي الصور كلهم في ملف القضية ومع هدا ماتاخدوش بعين الاعتبار في المحكمة وقدمو شوية ورق ملهمش لازمة ومايتبتو شي عندي والسيد عامر وكيل النيابة خداهم بعين الاعتبار وطلع ولد خوه برااءة شن يتبت الكلام هداا
النائب سكت
مهند:تحيز واسطة تزوير وكل هدا لما قدمت طعن معجباش وقدم شكوى ضدي
النائب:شوف يا مهند حني في دولة بدون قانون واللي يحاول يطبق القاانون فيها يااكل علي رااسه وانت عارف ان وكيل النياابة خوه مجرم كبير وعنده السلاح والنفود ف ماتحاولش تخش في مواضيعه هلبا هي البلاد متخدة من كل جيهة ف مش حيتغير شي سوا انحبس او طلع
مهند :ااه بتفهمني ان النائب العام خايف من وكيل النيابة
النائب:مش قصت خوف لاكن تفااديا للمشاكل مانبيش لانخسر مكانتي ولا خدمتي ف لي هدا نخدم اللي عليا بس والباقي مادخلنيش بيه وياريت حتى انت تمشي بنفس الطريقة
مهند:اني اللي بنشوفه غلط بنتكلم عليه ومش حنسكت علي الحق لان هادي وظيفتي وهدا شغلي
النائب ناض وقف:الباين انك قاعد شاب وطاايش ومش حتفهم اللي انقول فيه ومافيش جدوة من الكلام معاك
اني حنقوللهم ان عطيتك اندار اول وانت حاول تخفف معاهم مشاكل
مهند ناض وقف :انشاء الله خير مانقدرش نعطيك كلمة
النائب قعد يشبح لي مهند ومتعفلق من تسكير راسه مد ايده سلم عليه وطلع