الحلقة الاولى :::
فريدة : يا بنتي نوضي والله غير لوكان ترجع لالة سعاد والله غير تزقي عليا وعليك
كنزة : ايه ايه راني نايضة خالتي فريدة خلاص
فريدة : دوك غير نروح نتي ترجعي ترقدي راني نعرفك
كنزة : خالتي تعيشي نزيد خمس دقايق برك
فريدة : كنزة يا ربي راها العشرة ، تعرفي جداتك ما تحبش تزيدي فوق الثمنية
كنزة : وعلاش رح نفلح الارض ، يا خي حالة
ناضت من بلاصتها تنسف وتضرب رجليها مع الارض
كنزة : خلاص نضت
فريدة : مالا وجدي روحك وحبطي رح نوجدلك الفطور
كنزة : معليه خالتي
خرجت فريدة وراحت للكوزينة توجد الفطور لكنزة ، وكنزة دخلت للدوش تغسل وجهها وسنانها ، توضات وصلات ، وبدلت قشها خلات شعرها مطلوق وحبطت ، كانت فريدة وجدتلها الفطور فالكوزينة باش اذا جات سعاد ما تشوفهاش ، كلات وهي تهدر مع الخدامات لي كانو يوجدو فالغذا..
كنزة : يا خالتي فريدة والله غير الخبز ديالك ما نشبعش منو
فريدة : ما تاكليش بزاف راكي تسمني
كنزة : ودوكا الواحد ما ياكلش
سيرين : كولي مي بالطبع يا طفلة
كنزة : اااه سيرين اسكتي عليا خليني ناكل مادام جدة ماشي لهنا .. حقا وين راهي ؟
فرح : راحت عند سي فاتح
كنزة : وش راحت دير عندو ؟؟
فرح : الله اعلم
كملت كنزة الماكلة ديالها وعاونت البنات فغسيل الماعن وهوما يحلو فيها باش ماتغسلش مي هي راسها يابس وتحب تعاونهم .. خرجت من الكوزينة وراحت للجاغدان عند الجاردينيي سليم
كنزة : عمو سليييييم ، صباح الخير
سليم : صبااح النور بنتي ، وش راكي ؟
كنزة : مليحة عمو ، قولي معلابالكش وعلاش جدة راحت عند خالي فاتح ؟
سليم : والله يا بنتي ماعلابالي
كنزة : صحا عمو ، تحب نعاونك شويا تبان عيان
سليم : لالا تعيشي بنتي كنزة ربي يخليك
كنزة : صحاا 😁
دخلت كنزة للدار وراحت لبيتها تخملو ، هي فالحقيقة سعاد موصية الخدامة فرح باش تخمل كامل البيوت تاع القصر مي كنزة حلفت بلي تخملو وحدها بلا علم جداتها سعاد اكيد ..
البارت قصير ، باش يكون تعريف صغير على حياة البطلة تاعنا ، بلاك يبان مافيهش احداث وسامط .. نحب نقولكم كملو قاع ليبارت ، التشويق والاحداث الكبيرة ما تبداش دوك ، رح تبدا تجي كلما قريتو كثر .. الدعم بليييييز وقراءة ممتعة 🥰🥰
YOU ARE READING
أخبرني الحقيقة (باللهجة الجزائرية)
Romanceفتاة من اغنى العايلات ، يتيمة الوالدين ، عاشت تحت سلطة وسيطرة جدتها ، تتعرف على شاب فقير وترجع تحبو .. وش راح يصرا وهل رح يقدرو يبنيو قصة حبهم ولا القدر يوقف فطريقهم ؟💥💥 اول كرونيك ننشرها ، باللهجة الجزائرية، من قلمي 💗💗 نتمنا تقراوها وتعطوني راي...
