زينوفوبيا🥀

الحلقة4

مهاب:تي واااك يا مهند ضبااط كباار ومحققين ماقدروش يعرفو من هوا بتجي انت اللي كيف بديت في خدمتك وبتطلعه تي فكك من وجع الرااس تربح

مهند يلم في الورق وهوا متعفلق:اللي كانو يحققو مش امهم اللي انقتلت مش امممهم اللي دمها جف في الجنااان لين نضت الصبح بنمشي للمدرسة لقييتها زرقة مش همااااا تسمع فيااا مش همااا ولاا انت واخر مرة تدخل وتحاول تسااعدني تلقااني طاايح في النار متجييش اطلعني
مهاب:تي باهي خيرك يا راجل اهدا
مهند ماردش عليه خديه الملف وطلع حطه في السيارة وقعد واقف في الجناان ويدخن

فجأءة ولع ضي قوي هلبا من قدام المرسم ضوا الدنيا كلها
مهند قعد يشبح جيهت المرسم ومركز
شوية وطلعت تارا ومشت تحت الشجرة وتلود في الجنان وشكلها ادور في حاجة لوطة
مهند قعد يشبحلها ومنتبه معاها
شوية وطلعت قطوست تارا من العشب تجري وتارا تبي اتشدها
هربت القطوسة لي جنان حوش العارف
تارا في عقلها:لااا ماتمشييش غادي كيف بنجييبك لااا 😟🥺
مهند ابتسم : كأن الحظ يلعب فيها معاي لوح الدخان وعفس عليه وقرب جيهت القطوسة قامها ومشي لي الباب الفاصل

تارا عطت بضهرها قبل مايوصل فيها ماشافاتاش
مهند:تاارا
تارا تلفتت بخوف
مهند فتح الباب وخش
تارا وخرت وهي ترعش
مهند مشي للمرسم ودخل القطوسة وصكر عليها الباب
مهند مبتسم :خشيلها بسرعة قبل ماتهرب تاني
تارا ابتسمت بخوف ودارت بي ايديها هكي 🙌
مهند ضحك:نفهم ان بي لغتك انتي الحركة هادي معنااها شكرا

تارا مش مصدقة انه فهمها هي دارتها وخلاص لان حتى بهاء وعمتها تكتبلهم كتيبة لان مايفهموش في حركاتها هادي الا شموس وبوها
تارا ابتسمت وهزت رااسها
مهند :باهي اني كيف بنقولك عفوا.... خليها هكي 👌 بااهي
تارا ضحكت وهزة راسها بمعنى باهي
مهند:هي تصبحي علي خير وتلفت ومشي
تارا قربت من المرسم وخشت وهي فرحانة انها واخيرا قدرت انها تتكلم مع حد حتى لو كانت واقفة بعيد عليه وامشت طول كتبت رسالة لي دكتورها وحكتله كل شي صار
رد عليها:انتي غدوا عندك جلسة تو نشرحلك كل شي
تارا:تمام
وصكرت تليفونها وقامت قطوستها ومشت بتركب للحوش

كانو صغار عمها الصغيرين يلعبو في جنان حوش جدها ماقدرتش تخش تلفتت تلقت بوها يهدرز مع الرجالة مابتش اضاايقه
كان قلبها يدق بسرعة وايديها عرق وجبهتها عرق وترعش معش قدرت تتحرك لان الصغار هلبا ودايرين دوشة

طلعو بنات عمها من قدام الحوش شافوها
خلود ضحكت:شوفو مني هنيي
خولة اختها: هههه المتوحدة
صبرين:فكونة منها ياابنات تو تقعد تخضلنا زي المرة اللي فاتت واتجي اختها ادير العار
خلود:تخض ولا تصك شن درناالها حني ومشت قربت جيهتها
تارا وخرت وقنطت بي ايدها علي قطوستها
خلود :متخاافيش ياامتوحدة مش داايرينلك شي ههههه
خولة:تبي تركبي لي حووشكم
تارا هزة رااسها بمعنى لاا وهي ترعش
صبرين :تعالي انركبوك متخاافيش وجت بتشدها من ايدها خبشتها القطوسة
صبرين عيطت:يااا خرااا انتي ويااها كنت بنسااعدك اني لاكن ماتستااهليش الخير 😡