رانيا: اني الك عمر تضربني؟ ولك انتظر وشوف شضاملك الزمن
.................
سارة:فاطمة ليش فبركتي القصة
فاطمة :ششششش لج نصي صوتج ليسمعون ..مافبركت شي
_شلون عيني
__هو مو نهى عليج واخذج غصب؟
_يي
_مو بيناتكم مشاكل جانت؟
_يي
_ شفتي اني مافبركت شي اني بس مكلتلهم القصة كلها
_يي.. بس ليش
_لج ماكو مصخم وجه يحجي هذا كله حتى الي جان المفروض متحجين
_ياا شنو شطلعت هاي
_لج كلنا عدنا مشاكل وية ازواجنا وكلنا صارت شغلات ماحجيناها لاحد..ابقي ساكته ولتحجين اللي صار لاي شخص بالكون.. هذه الحقبة من حياتج انتهت واشياء سويتيها ويمكن انتي نفسج تكولين ليش هيج سويت.. مو كل غلط يسويه الانسان لازم يكول للكل عنه .. مرات من تذكرين اخطائج .. تصعب عليج هواي امور..نصيحة .. حتى انتي انسي .. انتي المضلومة المحرومة افتهمتي؟
سارة:صفنت بعينها واني افكر باللي تحجيه .. صحيح مرات الانسان يحتاج اشخاص ينبهوه ويذكروه باللي يسويه .. نزلت راسي وضليت العب بمحبسي
_شكلج تحبيه
_ههااه؟..
_للمحبس اقصد .. اشوف اعصابج تعبانة شوي احسنلج ترتاحين
طبطبت على رجلي وابتسمتلي وهي تكوم لزمت ايدها .. اا فاطمة .. اشكرج كالتلي مايحتاج تشكريني .. اشكري ربج
طلعت فاطمة من الغرفة واني مددت وحطيت ايدي جوة راسي واني اباوع عالسكف .. البارحة بهيج وكت جانت حياتي غير .. مادري افرح مادري اضوج ضليت افكر ودموعي تنزل بدون وعي .. مرت فترة واني افكر واتحسر .. وين جنت عايشة وهسه اني وين .. جنت بالعز والدلال والشعراية تنشال من جوة رجلي واني اتأمر واتدلع عالرياجيل واللي يخطب ارفضه واهينه وشايلة خشمي .. بسس اووف والف اوف .. سبحان الله .. بهالفترة الزمنية الصغيرة انقلبت حياتي راسا على عقب .. مادري اتندم انطيت عمر وجه .. مادري اتندم شردت وية احمد .. مادري اتندم بطلت دراسة وكعدت على كلب امي اوووفف ..
شلون راح تكون حياتي لو اني واحمد شردنا ومحد لزمنا .. شلون راح تكون حياتي لو ممبطلة دراسة .. شجنت راح اكون؟ وين جنت راح اكون.. زين هسه شحيصير اني وين حروح وشحسوي
قطع تفكيري صوت اذان الفجر .. هاي شنو ليش صارلي شكد افكر؟
اريد اتوضى بس استحيت اطلع من الغرفة .. وكفت على حيلي انتبهت هذا ديوان مو غرفة .. مبين حالتهم مو هلكد ..وانوب اني وياهم ياا خطية .. يي صح هي فاطمة كالت بس محسن يعيلهم ..
امشي واني اتلمس كل فطر بالحايط واني تخطر ببالي حياتي ببيت اهلي .. ونستي وطلعاتي .. جنت عايشة .. امي .. امي شلون كدرت تتخلى عني .. اعرفها تحبني كولش مستحيل تعوفني
انتجيت علحايط ودموعي شلال .. تجتفت ونزلت راسي وشعري انثر
محسن:سارة
شلت راسي وصار بوجهي محسن
كلتله نعم تفضل .. هو باوع بعيني وراها نزل راسه وسكت..
_يي؟
_اا جيت اكوللج وقت اذان الفجر
_يي سمعت الاذان
_مو قصدي سمعتي الاذان لولا بس علمود ادليج للحمام ..تفضلي كدامي
_تسلم خوية.. مشيت وهو دلاني .. طبيت للحمام متواضع جدا غسلت وجهي واني افكر..صح اني ماعرف شي على اهل الناصرية بس اللي اعرفه انو رياجيلهم يستحرمون يحجون وية النسوان .. بعدين ليش مجتي فاطمة علية ..
...................................
عمر: من طلعت سارة من البيت حسيت فقدت كلشي عندي .. شفت رانية بوجهي تعصبت ركضت وراها كطعت الحزام على جلدها .. من شوكت اني وحش؟ من شوكت اني اضرب واهين وافشر .. احس اني مو نفسي عمر .. اني صرت ماعرف نفسي
اني ممدد على الفراش وافكر .. هسه سارة وين شدسوي .. اكو احتمال ترجع؟ وابني؟ اووففف
...................................
توضيت ورحت اصلي .. اصلي ودموعي تنزل .. واكطع صلاتي استغفر ربي وارجع اصلي لان ميصير الواحد يبجي بالصلاة على امر دنيوي ..
بطلت بجي وبديت اصلي .. واني اركص حسيت بالم خفيف ببطني .. ومن وصلت للسجود صارلي الم يموت
وكعت وانطبكت على بطني واني ابجي من الالم وصرخت
فاطمة : ماما ماما هاي سارة يمكن دتصيح
محسن:فاطمة لج روحي شوفي شبيها
فاطمة: الحكو سارة متقرفصة وتصيح من الم ببطنها
مديحة: ياا خاف صار شي للولد اللي ببطنها
يتبع
أنت تقرأ
الدلوعة وابن الناصرية
Romanceقصة بنت مدللة ولسانها طويل تروح لبيت عمها بالناصرية.. هل راح تگدر تتاقلم بأجواء الريف؟ القصة باللهجة العراقية 💖
