ضليت جامد بمكاني ماعرف شسوي .. غمضت عيني وكعدت بالكاع مثل الاطفال وكلبي يدك سريع.. ياربي ارجوك ماتطلع ميتة يا ربي .. لو شاردة ورايحة واعرف انو هي سعيدة احسن مما تموت .. ياربي اسوي اي شي ياربي اروح مشي لكربلاء ياربي اذبح عشرين طلي واوزعه ثواب بس تكون ساره عايشة
غطيت عيني بايدي ودمعت عيني واسمع الرياجيل يصيحون ويهوسون .. واحد صاح انا لله وانا اليه راجعون والناس كامت تجي من حيث لا ادري .. اجه علية حسين وكاللي عمر كوم .. عمر تعال ويانة عمر .. اني مدا اجاوب ..ما اكدر .. كل فكري هو ساره عايشة لولا .. شلت راسي اباوع للسيارة شفت رياجيل ملتمين عليها وديطلعوهم .. صعدت عندي الغيرة ورحت ركض ودفعتهم كلهم واخذت ساره منهم .. اووف ياروحي مدماية من فوك ليجوة هي والساقط الوياها .. وال.سيارة صايرة قوطية اوووف ساره اووف .. اخذناها مستشفى واني كلبي راح يوكف من الخوف .. دومي حظي مايكعد بالحب .. بس حبيتها صار هيج .. معقولة ساره..معقولة تطلعين تحبين واحد .. هو هذا سعيد الحظ اللي انتي صافنة بالشباك تفكرين بيه .. زين وهذا العاشق اللي هنا؟
اووف منج ساره اني غلبي يتكطع بس اشوفها بهالمنظر بعدين اتذكر هي جانت دتشرد ويرجع يقسى كلبي ..وصلنا للمستشفى وودوها للطوارئ واني وكفت على صفحة .. حسيت بدوخة مو طبيعية وبالم وصداع شدييد .. يمكن من كثر التفكير .. دخت واجت علية ممرضة واخذوني وشدولي مغذي وكالولي مرتفع ضغطك .. يي ليش ميرتفع مثلا مو اني عايش بامريكا .. بنت عمي والبنية اللي اني احبها تشرد وي واحد .. وين اروح من حجي العالم ها وين اروح .. احس راسي حينفجر اجت الممرضة حطت ابرة بالمغذي ورة شوية حسيت نفسي دخت ونمت ..
كعدت ومحمد فوك راسي لابس الدشداشة والعكال اول ماكعدت صحت ساره وييين؟ ساره شلونها ولزمت محمد من دشداشته الله عليك محمد ساره عايشة ؟ الله عليك الله عليك كلي ولا تغشمرني .. محمد سكت ماحجة ولا كلمة كمت على حيلي وكمت اصيح ساره عايشة كلي ساره عايشة؟
محمد باوع علية وكاللي يي عايشة وراح نطب بمصيبة بكد راسك وانت تصيح عايشة لولا لو ميته مو احسن من هالعار اللي صرنا بيه؟ كلتله شنو يا عار شبيك هاي بنت عمنا لو شمايصير هي تبقى من دمنا وبعدين تعرف اني احبها ..كاللي يي عيني خلي حبها يفيدك طلعت تحب غيرك وناوية تتزوجه وتشرد وياه وانت ضل كول احبها واحبها وبنت عمي ..عيني بنت عمك هاي بايعة ومخلصة واني ماتشرفني هيج بنت عم .. دخل علينا حسين وهو عصبي وحالته حالة وكال اني حطلك مرتي كلنا باوعنا عليه بصدمة كلناله شنو؟ كال مثل ما سمعتو راح اطلك ايه ..كلناله ليش يمعود هسه وكتها احنا وين وانت وين ..كال هي تعرف بساره راح تشرد وهي اللي ناطيتها الفكرة ومقنعتها بالموضوع .. جريت نفس وذبيته وغمضت عيني واني دا احاول استوعب كل اللي ديصير مامعقولة هيجي صدمة ورة صدمة ومشاعري اختلطت وماعرف يا شعور ديتغلب على ياهوو .. محمد كال اهاا تحضرو .. الولد اللي ساره شردت وياه مات وعشيرته جايين علينه ..
جريت حسرة اوف منج ساره اووف راح توكعينا بمصيبة ماكو منها وحسين كال ابو ساره عرف هي شردت وراح يجي ويكول ساره ماتبقى عايشة .. اني كلت لابلة قابل بكيفه؟ هو اني ماصدكت تعيش وتالي يجي هذا يريد يكتلها ..محمد كاللي يي عيني وشحتسوي لعد .. ضليت صافن ماعرف شسوي
رحت اشوف ساره بالعناية المركزة ..بعدين اتصل علية سراج ابن عمي اللاخ يكوللي تعالو لديوان عمنا نمر هناك صارت الكعدة والحجي .. رحت للبيت واول ماطبيت امي بدت هااا وشكو وشنو ساره شردت وشنو وشنو ..عفتها ورحت لبست دشداشة وعكال واخدت سلاحي ونزلت وطلعت من البيت .. ورحت لديوان عمو نمر .. صاير بيها حجي وابو ساره جاي ويكول اذبحها واغسل عاري بايدي .. فضحتني .. والكل موافق الراي ويكولوله يي اقتلها موتها اغسل عارك تخلص منها .. واني كمت صحت بنصهم .. ساره ماتموت ومحد يقتله واللي يمسها بشعره اخليها حرب واوصل الدم للركاب .. ابو ساره كاللي وانت شعليك ؟ من يمك كايم تحجي اني ابوها والي حق اذبحها واسويها عشرين قطعة همين
كلتله انت من بعد هاليوم ما الك اي حق وعلاقة بساره وانه انهي على ساره .. ومحد ياخذها ومحد يمسها حتى بحجاية طول ما اني عايش
ابوها كاللي لك بابا شتسوي بيها هاي عاار عاار شتسوي بالعار انت؟.. تعصبت وردت اتباسط وياه وكلتله بنت عمي واريدنها وانه ناهي عليها ماتصير لغيري ومحد يمسها بحجاية حتى انت ابوها كاللي يوه عساس اني ميت عليها اخذها خفة وراحة وخلصني منها.. وصارت عركة وحجي غير منتهي وبس خلصنا من هاي الكعدة اجوي شيوخ عشيرة ال ***** (ماراح افصح عن اسم العشائر بطلب من البطلة الحقيقية) يريدون يگومونه ويفصلونه لان ابنهم مات.. كلنا كلناله ابنكم عار وساقط وراد يشرد ببنتنا واخذ حقه وراح لربه.. كام رجال وكال بنتكم هي الساقطة اللي قبلت تشرد وياه واحنا اليوم مانخليكم بحالكم ياتنطونياها فصلية يا نخيسكم بالسجون.. گمت ولزمته من رگبته وكلتله انت تخيسنا بالسجون موو؟ هم الك عين وتحجي ورة عملة ابنكم الساقط اصلا الحمد لله من مات وخلص البشرية من شكوله وهو كام يتباسط وياي والرياجيل يفاككونه وكال ماكو عدنه غير حجي يا تنطها فصلية يا كلكم بالسجن..
گام عمو نمر كال عيني البنية ناهي عليها ابن عمها.. ماتاخذوها ماتكدرون وروحو ارفعوا علينلظا قضايا شكد متريدون لان قضيتكم فاشلة احنا ماقتلنا الولد هو صار حادث ومات ف ماتربحون القضية.. طلعو من عندنا متعصبين ويتحلفون واحنا نعرف ماراح يمرروها على خير بس احنا هسه بحالة اصعب من انو نضل نتعارك
هيلاو حبايبي وياكم كاتبتكم.. هذول بارتين بنفس اليوم هدية لان وصلتوني للالف.. وراح احاول انزل بعد باسرع وقت.. وشكرا على الدعم والكلام الحلو.. انتظروني باقرب وقت بالبارت الجاي احداثه تموت
YOU ARE READING
الدلوعة وابن الناصرية
Romanceقصة بنت مدللة ولسانها طويل تروح لبيت عمها بالناصرية.. هل راح تگدر تتاقلم بأجواء الريف؟ القصة باللهجة العراقية 💖
