عشق الشيخ ملكني

part:25

اني عمر گلي:
_امشي خلي ارجعج للبيت وجيبي غراض رزان لتريدها.
اني اخذت الجنطة وطلعنا للبيت ومن جاي ادخل من الباب الخلفي هو سحبني بهدوء وگلي:
_لتحچين لرزان او لخواتها على حالة جود هو ما بي شيء واحنا راح نهتم بي افتهمتي؟
اني گلتله:
_ما احچي لتخاف.
عافني ودخلت ورحت لغرفة الشيخة حطيت الجنطة بعد ما گلت لرزان ردت احطها بغرفة كيان بالطابق الثالث بس هي مقبلت گالت:
_عوفيها بغرفة الشيخة ما اگدر اصعد واعوف العالم محلوة.
افتهمت قصدها وحطيتها بغرفة الشيخة كانت فارغة لأنه الشيخة بالأستقبال مع النسوان سديت الباب وگعدت بالگاع يم الجنطة وضليت اذكر كلام حبيبي من گلي:
_احبج هند افهميني.
كل ما اذكر گلبي ايگوم ايدگ سريع وفرحانة بس بعدين اهدء نفسي واگول لا تتأملين هند وتنخذلين بعدين واگول ايجوز لأنه حرارته مرتفعة مكان واعي على نفسه وميعرف شيگول وضليت فكرة اتجيبني وفكرة اتوديني لحد ما تعبت وطلعت اساعد البنات وتفكيري بجود اشلون صار هسة.

رزان:
مرت ايام الفاتحة مثل الجحيم علي وعلى الكل وخواتي منهارات ومفرفحات من البچي وجهالهن عاقلين وحابسين نفسهم بالحديقة الخلفية للبيت مرة اختنگت وطلعت للحديقة اشوفهم وشفت ملاك تبچي من صوت النسوان وصريخهن لأنه بعدهن يجن رغم خلصت الفاتحة وعمر ومحمد وعلي ايحاولون ايسكتوها ويخففون عليها ونجحوا من گلولها راح ايلعبون وياها وارتاحيت من شوفتهم هادئين وما عليهم شيء ، رجعت ودخلت لغرفة الشيخة اعالج جرح رجلي رغم اني متعذبة وميتة تعب فاطمة ما عافتني بحالي وكل يوم مسويتلها شيء وصلت اخر شيء دفعتني على سور الحديقة الحديد هو ناصي كلش واطرافة حادة واني جنت مطيتها ظهري وصافنة وما حسيت غير واحد دفعني مگدرت اتوازن وگعت على الحديقة ورجلي انخدشت بالسور وانجرحت اذتني بس اتحملتها لأنه جرح سطحي والتفتت وشفتها تباوع علي بحقد وگالت بهسهسة:
_ديري بالج مني منا وجاي رزان راح اندمج على القضى والمضى ومستحيل اخلي حبيبي الج وهسة اشوفين.
ودخلت للبيت اني مهتميتلها هددتني هواي ومگدرت اتسوي شيء گمت ونكتت ملابسي ورجلي تنزف دخلت للبيت وشافتني مرام اعرج ورجلي تنزف اتخبلت وگالت:
_رزان هاي اشلون انجرحتي تعالي خلي اضمدها الج.
گعدت يمهن بالصالة وهي جابت علبة الأسعافات ردت اعالج الجرح مخلتني الة هي اتعالجها ما عارضت اكثر ونضفت الجرح وضمدته وگعدت بصفي واجن البنات وسألني شلون انجرحت وگلتلهن:
_وگعت وعثرت بالسور ما انتبهت وانجرحت رجلي.
هن محچن شيء اجت ملاك وگالتلي:
_خالة ماما وعمو جود وخالة ريم يردنج بالحديقة.
اني استأذنت من البنات واخذت ملاك ورحت اشوفهن شيردن شفتهن هن وجود وجهالهن گاعدين على الكراسي بالحديقة رحت گعدت يمهم بعد ما بست وحضنت جود اشتاقيتله وكان تعبان گالت ميار:
_رزان لازم نرجع اني وريم لبيوتنا راح يجون فؤاد وسالم ياخذونا باجر الصبح عيب نبقى هنا اكثر بعد.
اني گلتلهن:
_بيتي فارغ وبيت اهلنا هم فارغ ابقن بيهن اذا تنحرجون من بيت الشيخ بس لا ترحن فدوة.
ريم گالت:
_اسفة حبيبتي لازم ارجع لشغلي واعيالي هم يحتاجوني تدرين عايفتهم 3 ايام وهم هم تجيهم العالم ولازم ارجع.
وميار نفس الحچي اني مگلت شي بعد وعفتهن براحتهن هن حضنني وراحن اينومن الجهال اني بقيت يم جود انسولف وامبين عليه تعبان وضعفان اني گلتله:
_حبيبي ليش هيج ضعفان فدوة لتأذي نفسك واهتم بصحتك احتاجك بصحتك جود.
هو حضني نص حضن واني حطيت راسي على كتفه وگال:
_ما بيه شيء حبيبتي وراح ابقى يمج لتخافين.
اني گلتله برود قاتل هو انتبه على نبرتي:
_هم عرفت منو صاحب الفيراري الي سبب الكارثة؟
هو جاوبني بنفس النبرة:
_جاي ادور على صاحبها لتخافين مراح يهرب من ايدي لو كان بسابع ارض راح الگاه واندمة على الساعة لعرفنا بيها.
وباس راسي اني گلتله:
_اتشك بأحد حبيبي؟
هو گال:
_اي اشك بعلي تذكرين من كنا ابغداد وسمعناه ايهدد ابونا وگال الي راح يصير منا وجاي ابونا المسؤول عليه وراح ايندمه؟
اني گلتله:
_اي اذكر بس اني اشك بغير شخص همين.
هو باوع علي وگال:
_منو بيمن اتشكين؟
اني عدلت گعدتي وباوعت عليه برود:
_فاطمة بنت عمة كيان.
هو گال:
_ليش؟
گلتله تهديدات فاطمة من يوم الخطبة ولحد هسة وذكرته بعملة فاطمة وشسوت بأختها من اتهموها بشرفها لمن الرجال راد يضرب بابا بطلقة واني حميته وعملتها اليوم من دفعتني وگلتله اني ما مهتمة بيها وبتهديداتها بس اشك بيها وراء موت بابا مو بعيدة عنا اتأجر رجال واتخلي يقتل بابا هو استوعب لگلتله وگال:
_عوفيني اني احقق بالسالفة وشيصير اگلج وانشوف بالأخير شيصير وليش ما گلتيلي بعمايل فاطمة وياج وتهديداتها واشلون صارت رجلج هسة؟
اني گلتله:
_ماكو شي مهم ما اهتم بعمايلها وحدة طايشة متعرف شتريد اما رجلي فهي زينة هسة احسن الجرح بسيط.
هو گال:
_شيصير وياج منا وجاي گليلي افتهمتي؟
اني گلتله:
_ماشي حبيبي لتخاف.
وهو گال راح يروح يرتاح بالبيت مالتنا اني وكيان لأنه كيان مطيه المفتاح حتى ايبات بالبيت لأنه ميگدر ايفوت على بيت اهلنا ينقهر من يفوت وميلگاهم وراح واني فتت للبيت ومرام گالتلي:
_رزان روحي ارتاحي بغرفت كيان اليوم لأنه امبين عليج التعب روحي احنا هم راح انام تصبحين على خير.
اني گلتلها:
_ماشي تصبحين على خير.
ورحت لغرفة كيان گعدت على السرير وانتظرت كيان يجي نص ساعة ودخل كيان وكان كلش تعبان اني محضره ملابسه اعرفه اول ميرجع من برة يسبح هو شافني انصدم سد الباب وگلي:
_هاي ليش هيج ضعفانة وجهج اصفر.
اجة حضني وباس راسي اني هدأته وگلتله:
_لتخاف ما بيه شيء هاي ملابسك روح اسبح وتعال اريد احچي وياك بموضوع.
هو اتنهد وباس راسي واخذ الملابس وگال:
_مراح اتأخر.
وراح يسبح الحمام (تكرمون) متصل بالغرفة وكبير كلش اني نزلت للمطبخ اجيب عشة حتى ياكل ادري بي ما ماكل شيء صبيت الأكل واخذت مي وصعدت للغرفة اشوية وطلع حبيبي من الحمام وهو ينشف شعره گلتله:
_تعال اكل حبيبي اكيد جوعان.
هو سحبني كنت گاعدة على السرير والعب بتليفوني وگلي:
_تعالي اكلي وياي شوفي نفسج صايرة جلد على عظم.
محچيت شيء اكلت شوية وياه وردت اگوم مخلاني وكلني هو غصباً علي لحد ما خلصنا وگمنا انغسل وگعدت على السرير انتظره يخلص اجة واشرتله يگعد بصفي گعد وگلتله برود:
_كيان الكاميرات سجلت السيارة من اندعم بابا؟
هو گلي:
_اي سجلت السيارة بس ما امبين منو صاحبها لأنه مظللة ليش تسألين؟
اني گلتله:
_اريد اعرف منو السبب بموت بابا؟ وشنو حصل من عملته؟ وليش؟ تگدر اتجيبلي التسجيلات؟.
هو گال:
_ماشي موجودات بحاسبتي.
وجاب الحاسبة وطلعلي التسجيلات وشفت الرقم مغوش ما واضح وصاحبها ما امبين اني اخذت الحاسبة منه ونزلت برنامج بيها والتقطت صورة للسيارة وعدلتها بالبرنامج وخرت الغواش منها وبين الرقم وگلت لكيان:
_كيان تگدر تعرف منو صاحب السيارة هسة؟
هو گال:
_راح ادزها لعمر وانشوف انتظري.
كيان دز الصورة لعمر وخابره وگله ايجيب معلومات على صاحب السيارة وعمر گلة نص ساعة والمعلومات عنده ، انتظرنا نص ساعة وصدگ وصلتنا المعلومات وصور صاحب السيارة طلع واحد شاب اسمه نزار وهو رجل اعمال معروف عرفته گلت لكيان:
_اعرفه نزار كان ابن السيد سامي وهو منافس بابا بالشغل من كنا بغداد بس سافروا لأمريكا قبل لا نجي هنا بشهر وانقطعت العلاقة شنو غايته من قتل بابا؟
هو گال:
_راح انسأله كلشي من نقبض عليه لتخافين وارتاحي هسة باجر انكمل.
اني گلتله:
_كيان اريد ارجع لبغداد.
هو انصدم وباوعلي وگال:
_ليش شسوين هناك؟
گلتله:
_لازم اروح لشركة بابا سكرتير بابا اتصل بيه لمن ما حصل جود وگلي اكو اوراق مهمة بابا موصي يأمن عليهن وما يطيهن لأحد غير لجود او اني اذا صار عليه شيء والسكرتير من سمع بخبر وفات بابا گلي اروح لبغداد واخذهن منه.
كيان گال:
_ماشي اني اخذج بس خلي نفتهم نزار هذا شيريد وليش هيج سوة باجر اخذ دورية واقبض عليه ودزيت رسالة لعمر يجيب الأذن بألقاء القبض عليه.
اني همهمتله بتفهم وهو طفه الضوء ونومني بحضنه ثاني يوم.