أصحاب و نسايب

الحلقة الثانية

عمر وصل للمطعم درس سيارته و شاف روحه في المرآية قعد يساوي في شعره و بخ من العطر متعه اللي في قجر الفودرا و نزل ، خش للمطعم لقي سرور تراجي فيه سلم عليها وقعمز .. لقاها لابسة سروال جينز و كبوط بيج في الاسود و وشاح بربري و عليه بوت اسود عالي
سرور : وين ياعمر التأخير هذا كله ؟ من بكري بروحي
عمر : اسف سرورتي الطريق زحمة هلبا و ماوصلت الا بعد جهدٍ جهيد
سرور ابتسمت : اها ولا يهمك ، به هي نطلبوا الأكل ؟
عمر : اها اكيد
تلفت عمر للقرسون : لو سمحت ؟
_____________

ساعة 05:00 م

فرح بعد ماكلت و كملت ضمان الحوش و دارت الوشق ركبت لدارها فتحت دولابها طلعت شن بتلبس و خشت لحمام دارها بتدوش
______________

وليد فتح باب الحوش و خش ينحي في كندرته
جاته امه فتحية قلبها مشغول : ماتقوليش خيرك عطلت ؟ من بكري نراجو فيك ع الغدي و تليفونك مسكر! شغلتني عليك من بكري و انا على نار
وليد : بعد ماروحت بوصال مشيت للمحل عندي فيه حاجات درتها و تليفوني شحنه تم
و باس على راسها : سامحيني لأني شغلتك عليا والله ما قصدي
فتحية حضناته و قالتله : والله يا وليدي ماليا غيرك سند في هالدنيا ليا و لخواتك بعد ماتوفى بوك الله يرحمه انت كبير العيلة و الكبير الله
وليد ضحك و قاللها : ربي يحفظك لينا والله الحوش من غيرك مظلم و مايسوىٰ حاجة
فتحية مبتسمة
وليد : هي حطيلنا الغدي يام
فتحية : هي لحظة ، وصال هاتي السفرة خوك جي
وصال طبست من باب المطبخ : وأخيراً 😀
فتحية تنادي  : إسراء ؟
إسراء في الحمام : هي لحظة ونطلع
وليد : إسراء امتى روحت من حوش خالتي ؟
فتحية : امبكري الظهر جابها راجل خالتك
وليد : باهي امالا انى نغير حوايجي و نصلي العصر مابين حطيتوا السفرة
_______________

طلعت فرح من الدوش و لبست حوايجها سروال أسود و بلوزة ، و طلعت برا الدار شعرها مبلول مفتوح

فرح : ماما جي عمر ؟
فايزة من داخل دارها : لالا مازال ، قال نص ساعة و يوصل ..
و طلعت فايزة من دارها لقت فرح واقفة تشرب في عصير برتقال
فايزة شهقت 😧: هييييه حيه عليك بتطلعي هكي و الدنيا مثلجة برا ؟؟ بري اجري جففي شعرك بالاستشوار و ألْبسِي حاجة غليضة تحركي
فرح : باهي ياماما عارفة غر عطشت بس
____

خشت فرح لدارها استشورت شعرها و دارت مكياج خفيف ؛ بودرة و مسكرة و روج وردي هادي و احمر خدود ☺️ ولبست كبوطها العنابي
____

جي عمر طلعها هي و امها رفعهم للجرابة
شروا قفاطين و كنادر و كل ما لازم و بعدين تفكرت انها بتاخد هدية لوصال ،،

فرح : و راس عموري توقفلي ع المحل هدا نبي ننزل نشري حاجة
عمر : اما محل ؟
فرح : هذا متع العطور
عمر : اوكى
فايزة : شن مازال ؟
فرح : بعد غدوا عيد ميلاد وصال بناخدلها هدية
فايزة تلفتتلها : عيد ميلاد شنو و انتِي عندك حنة بنت عمك ؟
فرح تتأفأف : تي مانيش ماشية و ماصدقت لقيت سبلة باش مانمشيش
عمر : ياودي ماعتقدش صلوحة يوافق تعرفيه جوه وين انتِي وين أمك
فرح و هي نازلة : معناها حلها بمعرفتك .. و سكرت باب السيارة
عمر ضحك 😂
فايزة : اختك صعبة ياودي مانقدرهاش ، و المصيبة لو تسمع ان بيوقفها بوك ع القراية مش عارفة شن بتدير
عمر : امي ممكن تفوتيه الموضوع هذا، والله ماصاير منه كلمة و اللي تبيه هي حايصير
فايزة تنهدت : ان شاء الله خير
سمعت تليفونها يشرين ..
طلعاته من الشنطة : هدا بوك
وفتحت الخط : الو .. اهلين صلاح
صلاح : وينكم لتوا العشي قريب يأذن
فايزة : هي جايين في الطريق
صلاح : ماشي في أمان الله
فايزة : سلامات ، و سكرت الخط
عمر : خيره شن يبي ؟
فايزة : لا شي قال وينكم لتوا بس
عمر : اه به
فايزة : تي هي وينها هادي عطلت
عمر : باهي يا امي وسعي بالك تو تجي خليها براحتها
فايزة ابتسمت : ان شاء الله مانفقدكم انتم الزوز قداش حنينين على بعض
عمر ضحك : والله يا امي فرح هادي مانتحمل فيها حاجة
فايزة مبسوطة من كلام ولدها : انى متطمنة من ناحيتك على اختك حتى كان نموت؛ نموت مرتاحة ان معاها راجل و سند ليها بعدي انى و بوك
عمر شبحلها : ربي يخليك لينا و بالله عليك معاش تعاوديه الكلام هذا تعرفيني مانتحملاش
فايزة : انى يا عمر خايفة عليها من خوك محمد قلبه قاسي زي الحجر طالع لبوك
عمر ضحك : رسمي 😂 ، اهو افتكينا منه عايش ف تركيا هو و مرته مستريح
فتحت فرح باب السيارة و ركبت : هي نمشو !
فايزة بإستهزاء : خيرك ماعطلتيش ؟ جري جري
عمر يضحك : امك من بكري تسحن عليك خيرك عطلتي
فرح : تي المحل يدوخ معاش عرفت شن نشري لين خديت هذا
عمر : ترا ورينا شن خديتي
فرح تفتح في الكيسة : سِت من فيكتوريا سكرت
عمر : اضرب ع القوي
فايزة : ماشاء الله ماشاء الله قداش حطيتي فيه ؟
فرح طرمت شواربها : واك ياماما مانحبش حد يحاسبني ع القرش المهم الحاجة الباهية و مقتنعة بيها ، و بعدين وصال تحبها الماركة هادي و خاطرها فيه السِت هذا
عمر يولع في السيارة و تلفت لأمه  : تي عادي يا فوفو ماتدوريش
فايزة سكتت 😏
و فرح جاها مسج فتحت تليفونها و بدت تدردش مع صاحباتها
_______________