"ကလေးတွေရောလား။ သနားပါတယ်ရှင်။"
"တစ်မြို့လုံးနီးပါးဆိုမှတော့ ကလေးတွေပါ ပါတာပေါ့ဗျာ။ နောက်ပြီး အသက်ကြီးသူတွေ၊ ကလေးငယ်တွေက ခွန်အားမရှိတော့ ပိုဆိုးတာပေါ့။ ဒီအရိုးစုတွေ၊ ရုပ်သွင်းပုံစံတွေကနေ ကျွန်တော်တို့ကို အဲ့ဒီ့ခေတ်ကာလကအကြောင်းတွေကို ပြောပြနေတာ။ ဥပမာဗျာ ဒီအမျိုးသမီးလေးဟာ ကိုယ်ဝန်နဲ့။ အသက်အရွယ်အားဖြင့် ငယ်သေးတယ်။ အဝတ်အစားပုံစံအရ အစေခံမလေးတစ်ယောက် ဖြစ်ရမယ်လို့ ခန့်မှန်းရတာပဲ။ နောက်ပြီး အရပ်အမောင်း။ ရောမခေတ်မှာ လူတွေဟာ အခုလူတွေထက် အရပ်အမောင်း ပိုနိမ့်တယ်။ မြင်းတွေဆိုရင်လည်း အခုခေတ် Pony ဟုခေါ်ကြတဲ့ မြင်းငယ်မျိုးထက် နည်းနည်းပဲ ပိုကြီးတယ်။ ဒါပေမဲ့ ပိုပြီးသန်မာတယ်။ ဝက်ဆိုရင်လည်း အခုခေတ်အိမ်မွေးဝက်လိုမျိုး မဟုတ်ဘူး။ အရသာပိုရှိတဲ့ အသားရအောင် တောဝက်တွေနဲ့ မျိုးစပ်ဖို့ တောစပ်နားတွေမှာ လွှတ်ထားတတ်ကြတယ်။ ဒါ့ကြောင့် ပုံစံကွဲတယ်ဗျ။"
"ရောမလူမျိုးတွေအကြောင်း သေချာလေ့လာနိုင်တာ ဒီလိုသတင်းအချက်အလက်တွေကို ရလို့ပေါ့နော်။ သမိုင်းအချက်အလက်တွေကို သိမ်းပေးထားသလို ဖြစ်နေတဲ့ ဒီပုံပေမြို့ဟောင်းကြီးဟာ အင်မတန် တန်ဖိုးရှိတာပဲ။"
ဧည့်သည်အုပ်စုထဲမှ လူကြီးတစ်ယောက်၏ ထောက်ခံစကားကို ကြားလိုက်ရသောကြောင့် မာကိုအားတက်သွားသည်။
"ဒါ့ကြောင့် ပုံပေဟာ ရတနာသိုက်ကြီးလို့ ကျွန်တော်တင်စားတာပေါ့။ သူဟာ လွန်ခဲ့တဲ့ နှစ်ပေါင်းနှစ်ထောင်ကအတိုင်း ရပ်တန့်နေတာ။ အခုခေတ်နဲ့ ရှေးခေတ်ကာလကို ဆက်သွယ်ပေးနေတဲ့ ပေါင်းကူးတံတားကြီးပဲဗျ။ ဒီမြို့ဟောင်းကြီးကနေ လေ့လာစရာ၊ သင်ယူစရာ၊ နားလည်စရာတွေ အများကြီးပဲ။ တန်ဖိုးထားတတ်ဖို့နဲ့ ထိန်းသိမ်းစောင့်ရှောက်တတ်ဖို့ပဲလိုတာ။"
စကားအရှည်ကြီးပြောလိုက်ရသောကြောင့် မာကိုမောသွားသည်။ အိတ်ထဲမှ ရေဗူးငယ်ကို ထုတ်ယူပြီး မော့သောက်လိုက်သည်။ ထို့နောက် လက်မှာပတ်ထားသော လက်ပတ်နာရီကို မြှောက်ကြည့်လိုက်သည်။ သတ်မှတ်ချိန်ထက် အချိန်ပင် တော်တော်ကြာသွားပြီဖြစ်သည်။ ဧည့်သည်များကို မြို့လယ်နောက်ဆုံးနေရာကို ပြသရန် ကျန်နေသေးသည်။
YOU ARE READING
ထာ၀ရ ပုံပေ
Historical Fictionအေဒီ ၇၉ ခုနှစ် .. ပုံပေမြို့.. ရောမအင်ပါယာ ဒဏ္ဏာရီမဟုတ်တဲ့ ရာဇဝင်ထဲက အဖြစ်အပျက်လေးတစ်ခုလား ဒါမှမဟုတ်.. ရာဇဝင်တွင်မကျန်ခဲ့တဲ့ ဒဏ္ဏာရီဇာတ်လမ်းလေးပဲလား... ........ ေအဒီ ၇၉ ခုႏွစ္ .. ပံုေပျမိဳ႕.. ေရာမအင္ပါယာ ဒဏၰာရီမဟုတ္တဲ့ ရာဇ၀င္ထဲက အျဖစ္အပ်က္ေလးတစ္...
Part 36 (2017) (Unicode)
Start from the beginning