دراويش

دراويش ٤٠

صليت ورحت اخذت تكسي لبيت آمنة .
.
.
.
انا لستُ قاسية ولكن اوجاع قلبي بدأت بالصراخ ..
.
.
.
( آمنة )
بعد متصالحنه اني وسيف كلي :
ماما احجيلي شلون جان كريم اول متزوجتوا هم جان هيجي وحشي ؟

اتنهدت كتله :
خليني كلبي مرتاح من طاريه .. هو من يوم العرفته هاي اطباعه .. وحشي على كولتك ..
سيف :
وبيبي ؟
آمنة :
شبيها ؟
سيف :
من رجعت من العراق كلتيلي صايره عدها جلطة ومسببتلها شلل نصفي صحيح ؟
آمنة :
بعد هذا الحجي اللي كالوه اهل ابوك لخالك ليث من اتصل علمود يسالهم عليك ..
سيف :
حيل بيها .
آمنة :
لا ماما لا اسم الله .. لتدعي عليها مره جبيرة حرام .. والشماته مو زينه المرض هذا ابتلاء من الله وكل الناس تتمرض .. ادعيلها الله يشفيها ويهديها ..
سيف :
مااحبها .
آمنة :
مو مسألة حب .. بس مسألة انسانية مسألة حلال وحرام .. واللي متتمناه لنفسك لتتمناه للغير ..

سكت شوية وهو يتكلب عالقنفة مثل الطفل بعدين دار علي كلي :
ماما ؟
آمنة :
ها ؟
سيف :
هذا الدكتور متزوج لو لا ؟
آمنة :
ليش تسأل ؟ شيهمك امره ؟
سيف :
هيج مجرد سؤال ..
آمنة :
متزوج ومطلك .
سيف : ليش مطلك ؟
آمنة :
شمدريني خوما اسأله عن حياته الخاصه .. هاي اشياء عيب واحد يسأل عليها .
سيف :
يعني من يسألج هو عن ابوي عادي ؟
آمنة :
ميسال عن ابوك رغم ابوك اذاه لكن ميحجي عليه احتراماً الي والك .. بس انت ماادري شبيك ذاك اليوم صرت عصبي وكتيتهن كلهن سوالف ابوك كدام الرجال ..
سيف :
لان ميشرفني هذا ابوي .. كريم مو ابوي مجرد شخص جنت شايل اسمه .. والحمدلله حتى اسمه خلصت منه .
آمنة :
سد هالموضوع احجيلنه بموضوع بي حظ .. كافي مغثة ..
سيف :
شراح نتغدا ؟؟

ضحكت كتله :
هذا الموضوع البي حظ ؟

بالليل خلصت شغلي بالعيادة من وكت ورجعت سويت عشا وحجه وياي فؤاد وعزمته عالعشا ..
رحت لسيف دكيت عليه باب الغرفة جان يدرس :
نعم ماما ؟

فتحت الباب كتله :
سيوفي .. حجة وياي قبل شوية دكتور فؤاد وعزمته يجي يتعشى ويانه فد شوية مادام انت موجود .. عيب منعزمه ابيتنه شتكول ؟
سيف :
اوكي .. هلا بي .
آمنة :
معناها كوم البس ملابسك وانتظره جوه خاف ميندل البيت ..
سيف :
خمس دقايق بس اكمل هالصفحة وانزل .
آمنة :
اوكي .

نزل سيف ينتظر فؤاد جوه واني جهزت الطاولة والاكل ودخلت اغير ملابسي قبل ميوصلون ..

وره شوية رجع سيف كتله :
هاا اشو رجعت ؟
سيف :
تعبت من يوصل اكيد راح يتصل اذا معرف العنوان .
آمنة :
آخ منك .
سيف :
شنو هالاناقة شنو هالجمال ؟
آمنة :
يمه منك شكد لوتي .
سيف :
لا والله العظيم احجي صدك .. اصلا جماعتي من شافوج ذيج المره مصدكوا انتِ امي عبالهم اجذب عليهم .. كلولي هاي شابة شلون امك وانت شطولك ههههه .
آمنة :
آآه والله جماعتك بيهم بله .
سيف :
هههه كالوا دي امك مُزة هههههه .
آمنة :
يااا .. شكد قليلين الادب هههههه .
سيف :
يتشاقون امونه شبيج خفتي غير انتِ حلوه شيكولون يعني .
آمنة :
دروح انزل انتظر الرجال عيب ..