جعت وفكرت يمكن هالطفل جوعان سألته :
جوعان تريد اكل ؟ تريد ننه ؟
بقى يباوعلي بلا جواب يمكن يخاف مني ..
كمت گليت بتيته وطماطة وكبة عالسريع وسويت زلاطة
وخليت الاكل كدامه مقبل ياكل .. اكل لكمتين وشفته كام يتمشى بالبيت كتله :
ها حبيبي سيوفي اني هنا بالمطبخ تعال ..
دخل للمطبخ كتله :
شبيك ؟
ظل يبجي كلي :
بيبي ...
كطع كلبي .. يريد بيبيته الانانية وهي مارف كلبها عليه ..
اذا اتصل بكريم هسه يظل يصيح ..
شسوي هسه شلون اتصرف وياه ؟
كعدته بحظي وضليت اسكت بي واحاول الهي بالاكل ..
اكل شوية بتيته واباوعله غفى بحضني ..
حسيته مثلي ماله احد .. كسر خاطري ..
اخذته نومته عالجرباية وغطيته وكعدت كباله اباوعله .
منا لحد مرجع كريم دخل كلي :
وينه سيف ؟
آمنة :
نايم بغرفتنه ..
كريم :
جيبيه خل ارجعه
آمنة :
نايم خطية نفززه خل يكعد واخذه ..
كريم :
دروحي روحي جيبيه خلصيني ..
رحت شلته وهو نايم وانطيته لكريم اخذه وراح ..
وره تقريبا ساعة رجع كريم وسيف وياه يبجي ..
آمنة :
هاا ؟ اشو رجعته ؟
كريم :
متقبل تاخذه بت الكلب .. قفلت الباب وخلته بره ..
آمنة :
صدك تحجي ؟.. شبيها هاي المره ادري غير ابن ابنها ؟ مو هي ربته شلون يهون عليها ؟؟
كريم :
هاج هاج سكتيه نوميه اي شي سويله راسي يوجعني مااريد اسمع صوت ..
ذب ابنه علي وراح يسبح ..
الولد يبجي موت نفسه من البجي بيبي بيبي ..
كتله بكلبي هي هاي تنحسب عالبيبيات الله يرحمج يايمة انحرمتي من هيج فرحة ..
بقى يبجي منا لحد متعب ونام ..
طلع كريم شافه نايم بحضني ضحك .. باوعتله كلي:
اثنينكم وجهكم يبجي ههههه البوساء ..
آمنة :
هذا هم مسكين مثل حالي ماله جناح ..
كريم :
دكومي كومي وديه هناك وصبيلنه عشا لو نروح ننطمر بدون عشا ؟
آمنة :
اصبر دقيقة خل اودي الولد .. وين اخليه بالله خاف ممتعود ينام وحده ؟
ماانطاني كلبي افرشله بغرفة وحده خليته يمي عالجرباية ..
رجعت عشيت كريم الي كاعد عالسفره ويسمع اغاني ويطك اصبع ..
آمنة :
استغفر الله ..
كريم :
ووجع شبيج ؟
آمنة :
مابيه سلامتك .. بس اكول النعمة كدامك ..
كريم :
اتزقنبي وكومي لتكعدين تدينين براسي تعرفين المتدينين شيسوولهم ؟ اويلي ههههه والله يخلوهم يتمنون الموت وميحصلونه ههههه ..
آمنة :
الله المعين .
كريم :
ههههههه خطيه انتِ ... عايشة بغير دنيا ..
مجاوبته ..كمت رحت اريد ادرس لان كبل بدت امتحانات عدنه ماانلغت السنة ولا مددوها ..
اجه وراي :
هذا وين تخلينه باجر اذا داومتي ؟
آمنة :
منو ؟
كريم :
سويف ..
آمنة :
اي زين كول سيف ليش تكول هذا ؟
كريم :
فضيني بلا فلسفة ..
آمنة :
ماادري .. شمدريني غير انت جبته بدون متفكر بهالورطة ..
كريم :
اني جبته لو امي الورطتنه ..
آمنة :
واني شنو ذنبي .. انت كله منك كل سالفة تروح تحطها بحلك امك ليش كتلها داومت ؟
كريم :
واني شمدريني بيها بت كلب وتريد تشمره علينه ..
YOU ARE READING
دراويش
General Fictionحينما تجبرك الظروف على البعد .. حينما تضطر للتخلي عن حياتك وحبك وكل مالك بسبب الظلم .. حينما تجبر على الغربة لسنوات طوال وتعود لتجد الماضي امامك ..
دراويش 30
Start from the beginning
