تهزمني السمراء وانا ند فرسان

39

«البارت التاسع والثلاثين»
.
.
في بيت ثنيان تحديداً بغرفة الترف
الترف اللي غمضت بخوف بعد حضن ثنيان
وقال ثنيان : الترف صار لازم نتكلم
الترف : نتكلم في وش
ثنيان جلس : لا تحسبين اني ماني حاس بالتوتر اللي بينك وبين منيره لكن اللي بقوله شي واحد يالترف ينتهي الخلاف بأسرع ما يمكن انا ابي بيت هادي مافيه حقد ولا فيه مشاكل صبري له حدود كل وحده منكم اكيد سوت اللي بقلبها على الثانيه سوا بعلمي او بدون لكن هي كلمه ورد غطاها يا ينتهي هالخلاف وترجعون زي قبل يا كل وحده في بيت اهلها
الترف ناظرته بصدمه: اللي تبيه يا ثنيان
ثنيان : جوابك يالترف
الترف : جوابي طويل يا ثنيان انا جيتك هنا كارهه الزواج وكارهه كل شي لكن رغم هذا ما غلطت على احد ما غلط علي اح صافيت منيره وحبيتها ويعلم الله اني احبها بعد لكن انا ماني مسؤوله عن قلوب الناس اللي تغير ! لكن لكم مني حق الطيب والعشره ولكن اذا صار غير هذا لا تطلب مني اصافي احد يأذيني
ثنيان : انا ما جيت انبش الماضي انا جيت ارتب اللي جاي ابي نكمل من دون مشاكل
الترف : زين لك مني وعد ما اغلط على احد ما ضرني
ثنيان هز راسه برضا وانسدح اما الترف اللي سكرت الانوار وجلست بهدوء وهي ما تدري وش في قلب ثنيان لكن وعدها وعد وبوعدها ريحة ثنيان اللي ماكان يبي الا هالوعد ولانه يثق بالترف اللي ماهي زوجه كثر ماهي توأم لروحه
.................••............
منيرره كانت منهاره جدا لكن ماعاد همها الا تحصل العدل بحياتها او تنتهي هالحياه
كانت تجهز لملكة محمد وهي تدعي الله يسخر لها الخير ................••............
ومن بكره في بيت ابو ثنيان
الكل كان مستنفر ويشتغل ويجهز ورهام اللي كانت تستعد بفرحه
ونوف اللي طلعت مسرعه لرهام: رهام امي تقول وين الكااسات تبع الضيوف
رهام: في المطبخ الصغير
نزلت نوف وشوق تراقب حماسهم بضيق وقهر رجعت وهي تبكي قهر
ام ثنيان كانت رايحه جايه بعكازه وهي تشرف على الاوضاع
ودلال اللي تتناسى وضع شوق وتحاول تلتهي
اما نواف ونوف اللي كانوا قاهرين دلال اكثر شي وهم كل شي يخربونه ويطقطقون عليه
................••............
اما في بيت ابو محمد
محمد اللي كان هو منيره من بدري طالعين يجهزون الشبكه والورد والاشياء
كانت منيره تراقب فرحة محمد وهي تدعي ان رهام ما تكسر فرحته وانها تعيش معه بالسعاده اللي يستحقونها
................••............
اما في بيت ثنيان
ثنيان اللي صحى وهو يتوقع انه يحصل ردة فعل عنيفه من الترف بس كان الموضوع عكسي تماما كانت الترف مليانه حيويه وهي تبخر ملابس ثنيان وعمر
عمر: بابا بنروح نجيب امي
ثنيان: ايه اللبس
الترف : ثنيان وش بتجيب لرهام هديه
ثنيان: مدري بنمر ونشوف انتي بعد اجهزي مافيه غيرك ينزل معي ويختارها .
الترف : طيب
جهزوا كلهم وطلعوا وثنيان والترف اللي بعد ما اختاروا هديتهم لها طلع جواله وهو يتصل على مشاعل ويستشيرها بالهديه وواقفت وبعدها اتصل على منيره وهو يسألها نفس السؤال والكل اتفقوا على نفس الهديه
وصلوا بيت مشاعل ونزلت الترف وهي تساعد مشاعل اللي كانت احسن من قبل
وركبوا الترف : مشاعل كيفتس الحين
مشاعل: لا احسن الحمدلله من قبل
ثنيان: ان شاءالله ايام وبتقومين بالسلامه
مشاعل: ان شاء الله
كانت مشاعل ملاحظه ان فيه مسافه بين ثنيان والترف وفيه تحفظ مب مثل قبل
وصلو البيت والترف اللي كانت شايله البيت كله ومريحه مشاعل وتستشير مشاعل بكل شي
وثنيان اللي ماهو مرتاح انه صاد شوي عن الترف بس مجبور انه يوقف اندافعه لها شوي
ثنيان: انا بروح بيت ابوي
الترف : خل جوالك قريب عشان اذا انتهى الغدا اتصل بك
ثنيان: طيب
طلع ثنيان ولفت مشاعل بهدوء: الترف صاير شي!
الترف: لا ليش!
مشاعل: مدري احس فيه توتر
الترف : لا عادي ، المهم قولي لي اخبارتس كلها
................••............
في بيت ابو ثنيان
ثنيان دخل وهو يشوف الكل مستعد ونواف اللي من بدري مشغل السماعه ويستهبل على ابوه هو نوف وفجر اللي كانت هاديه ومبتسمه
نوف وقفت اول مادخل ثنيان وابتسم ثنيان : كملوا كملوا
ضحك ابو ثنيان: لا خلهم يعقلون شوي ازعجوني من الصبح
ثنيان: خلهم ينبسطون
لف ثنيان وهو يشوف وائل مع فجر وقرب وهو يسلم عليه هو وعمر وجلسوا
ابو ثنيان: علامك كأنك ضايق
ثنيان: ابد صداع
ابو ثنيان : خذلك قهوه
ثنيان : زين
قطع عليهم اتصال منصور ووقف ثنيان وهو يرد : هلا منصور
منصور: كيفك واخبارك
ثنيان: حمدلله بخير انت كيفك
منصور: حمدلله كيف امورك مع المطلوب
ثنيان: مثلك عارف ما بيدينا شي اذا طلع
منصور: الله بينصرنا ان شاء الله
ثنيان: امرني
منصور: موجود في بيتكم
ثنيان: والله انا في بيت ابوي امر
منصور: بمركم شوي اذا ماعندكم مانع
ثنيان: حياك الله يا منصور بس عسى خير
منصور: خير خير
ثنيان : حياك الله
منصور: يلا ربع ساعه وانا عندك
سكر وثنيان مستغرب اتصال منصور لف وهو يقول: نوف فجر نظفوا المكان بسرعه بيجينا رجال
نوف : مين ياخالي بدري ماجاء المغرب
ثنيان: بنقدم لك برنت المره الجايه من يجي ومن مايجي
نوف ضحكت: امزح معك وش فيك مشتط
ثنيان: فجر زهبي قهوه
راحت فجر ونوف ونواف يرتبون
ابو ثنيان: وش صار
ثنيان وهو في حضنه وائل : منصور يققول بيمرنا
ابو ثنيان: اي والله يا حليله منصور بس عسى خير
ثنيان: ان شاء الله خير
بعد ربع ساعه كان منصور واخوانه متواجدين
ودخلوا والكل مستغرب وبعد الرسميات
عبدالعزيز اخو منصور: والله يا عم إحنا جايين ان شاءالله في امر خير ويشرفنا نطلب منكم تزوجون منصور ومنصور طالب نسبكم ومصر ما يتزوج الا من عندكم
الكل بدون استثناء سكتوا وهم يناظرون بإستغراب
منصور: ادري انكم مستغربين خصوصا اني ما طلبت احد معين لكن انا يشرفني اتزوج من عندكم وثنيان اخوي وحبيبي وودي يصير لي نسيب
ابو ثنيان : والله يا منصور طلبك شوي جاء لنا غريب
منصور: المفروض اني اكلم ثنيان من قبل بس هذا اللي صار
ثنيان اللي نسى كل شي وخاف ان ابوه يعطيه شوق وقال : انت مافي بالك احد يعني
منصور: يشرفني نسبكم وانتم ادرى
ثنيان : معليش بس يبه ابيك شوي
طلعوا وقال ابو ثنيان: هذا وش بلاه جاي يخطب ومايدري من يخطب
ثنيان: هو شاري نسبنا ماهمه البنت لكن يبه انا اقول نزوجه نوف
ابو ثنيان: انهبلت نوف صغيره عليه
ثنيان: اصلا فجر سيف بيرفض مافيه الا نوف
ابو ثنيان: وشوق وين
ثنيان: لا يبه شوق ما تصلح لمنصور
ابو ثنيان: يا ثنيان
ثنيان: انا مستعد اكفل منصور ونوف انت تعرفها طيبه وتستاهل كل خير
ابو ثنيان: بدون ما ناخذ رايها
ثنيان: لا يبه اكيد بناخذ رايها بس وش بنقول لرجال
ابو ثنيان: انا اول مره يمر علي ذا الموضوع
ثنيان ضحك: وش نسوي يبه بعد الرجال كفو
دخلوا وضحك ابو ثنيان: والله يا منصور حيرتنا في امرك ولكن إحنا ما عندنا الا بنت بنتي عمرها 18
منصور: اجل اعتبرني طلبتها منك واخذوا راحتكم
ثنيان ونواف كانوا مصدومين من طريقة الخطبه بس فالحقيقه منصور اللي كان يبي يتزوج اخت ثنيان ( رهام ) لان ثنيان قد قال ان عنده اخت ماتزوجت بس لما وصل عرف انها اليوم ملكتها وتفشل وقرر يخطب اي وحده بما انه يبي يتزوج مايبي شخص معين
عبد العزيز اللي يرقع : انا ادري خطبتنا غريبه عليكم لكن احنا ندور النسب الطيب وبنتكم اكيد انها طيبه مثل اهلها وهذا والله سلم ( عادات وتقاليد )عندنا
اما منصور اللي تورط وهو يتذكر سالفة بنت اخت ثنيان اللي سجنته وانهبل وتوقع انه خطبها هي وانخطف لونه وانحرج : اجل احنا نستاذن
طلعوا بعد ماسلموا وعبد العزيز زعلان: ياخي فشلتنا جينا كأنا مهبل
منصور: وش دراني أنا بس يلا ان شاءالله ان بنت اختهم مثل اختهم
منصور كان مختبص وعبد للعزيز متفشل
................••............
في مجلس ابو ثنيان
نواف: وش بلاه ذا يخطب كذا على الهامش
ثنيان: مدري لكن تسمع اخوه يقول عاداتهم وتقاليدهم انهم يطلبون الرجال يزوجهم هو بنفسه
ابو ثنيان: غريبه اول مره تمر علي
ثنيان: بس والله منصور رجال ونوف تستاهل
نواف : اصلا هذا اذا وافقت نوف اكيد بترفض
ثنيان: بنشوف بنشوف ننتهي من رهام الحين ونشوف بكره
دخل سيف: وش بتشوفون
ابو ثنيان: ابد رجال يخطب نوف
سيف: نووف ليه وشوق وين !
ابو ثنيان: هذا اللي صار
سيف بعد سكوت قال: رحت لبندر بخير ويسلم عليكم
ابو ثنيان: زين الحمدلله
ثنيان: الحمدلله
نواف : انا بروح اشوف امي وش تبي
ثنيان: نواف خلك على الصامت لين بكره
نواف : ابشر
وقف ثنيان وهو ينادي عمر وطلع وهو يتصل بمنيره
منيره ردت بنفس الهدوء : هلا
ثنيان: سلام ، قضيتي من محمد
منيره:ايه
ثنيان: اذا ما يحتاجك محمد اجهزي بمرك ونرجع للبيت
منيره ابتسمت بفرح وهي توقعته يطلقها بس هانت : ابشر
طلع ثنيان متجهه لبيت عمه ووقف وهو يسلم على محمد اللي كان يساعد ابوه ويلبسه
ثنيان: محمد متى جاي
محمد : المغرب اتفقت مع عمي
ثنيان: الله يتمم لكم يارب
محمد : امين
ثنيان ابتسم: اجل بناخذ منيرتنا تراك مصختها طول الايام عندك
محمد : خلاص ماعاد نحتاج منيرتك
ضحك ثنيان: خير ان شاء الله يلا يا مناير حمود يلا
تقدم ثنيان وهو ياخذ اغراض منيره ويوديها لسياره وركبوا ومنيره تشوف ثنيان جدا لطيف معها ابتسمت وهي تقول ( لو دريت انفجرت من زمان )
اما ثنيان اللي كان حاس بالذنب وهو يحاول يرتب اموره من جديد
بعد شوي قال : منيره راجعين للبيت لكن هناك الترف وهناك مشاعل لكن اللي ابيه منك ترجعين منيره العاقله الواعيه من جديد الترف مارح تقرب منك ولا تقربين منها كل شي بيكون بالعدل وعلى اكمل وجهه لكن مابي مشاكل وانتي تعرفين اني ما احب المشاكل كل وحده في نفسها وينتهي الموضوع
منيره : ابشر
سكت ثنيان وهو وده انهم فعلا يبطلون مشاكل
................••............
في بيت ثنيان
عند الترف كانت مرتاحه جدا وهي تسولف مع مشاعل كانت تشوف تعب مشاعل وهنا عرفت ان ثنيان معه حق يخاف عليها كان بطنها يفجع يفجع
كانت هي ومشاعل جالسين ودخلوا ثنيان ومنيره
وقربت منيره تسلم على مشاعل بحراره وبهدوء على الترف
ثنيان: يلا وين غداكم
الترف: يلا الحين انزله
وقفت منيره وهي تاخذ اغراضها الكل كان فاهم الوضع االا مشاعل اللي تحس فيه شي بس ما تدري وشو كان وثنيان مختصر السوالف على عمر ومحمد بس
بعد الغداء طلع ثنيان ينام اما مشاعل اللي كانت ترتاح
ومنيره والترف دخلوا مع بعض للمطبخ ينظفون
تركت الترف اللي بيدها وتوجهت لمنيره وهي ودها توقف هالمهزله : منيييره
..................••............
في ديرة الترف
عند نوره اللي راحت لسلوى وهي زهقانه مره دخلت وهي تنادي: سلوى وينتس سلوووى
سلوى: هنا يا بنت علامتس
دخلت نوره: شعندتس جالسه هنا
سلوى بغضب : واللي يعرف هالعم يعرف يجلس مثل الناس
نوره: وش فيتس
سلوى: ابد فجاءه قرر انه يجيب خيشة عدس ويخليني انقيها
نوره: علامه يسوي كذا ذا الشايب
سلوى: عشان يقهرني
نوره: وصالح وينه
سلوى: وش يسوي صالح ابوه
نوره: ياويلي كنت احس الترف تبالغ بالخوف منه بس شكله مب هين
سلوى: تكفين نوره ساعديني ظهري انكسر وهو مايخاف الله وانا ساكته عشان صالح مابي اضيقه
نوره: حسبي لله بس ، خلصتي نصها
سلوى: لاا اخذ صالح ثلاث ارباعها يقول بيروح ينقيها ويجيبها
نوره: الله يساعدكم بس
دق الباب وقامت نوره: هلا والله ام عايض
ام عايض : كيفتس يا نوره
نوره : بخير يا خاله اقلطي
ام عايض دخلت وسلمت على سلوى وجلست وبعد سوالف عاديه قالت: اقول يا بنات انا ابي رقم اهل البنت اللي تقولها الترف اخيرا عايض وافق
سلوى نست التعب : بالله الله يوفقه الحين اتصل في الترف ترسله
نوره: يعني خلاص بيتزوج عايض
ام عايض: ايه ان شاء الله ، انتم خذوه وارسلوه لي انا بروح
نوره: ابشري اجيبه لتس ياخاله
طلعت ولفت نوره بضحك: اخيييييراً بنفتك
سلوى ضحكت: ايه الحمدلله
................••............
في بيت ثنيان
منيره لفت وهي تناظر الترف
الترف : اجلسي بحكي معتس
منيره: قولي
الترف : شوفي يا منيره كلنا غلطنا كلنا ضغطنا على بعض انتي غلطتي وانا رديت الغلط بغلط وانا ادري اني غلطانه لكن كل اللي ابيه انك تسامحيني واسامحك ونرجع مثل قبل ماتسوى علينا هالمشاكل احنا مب كذا احنا ارقى من كذا
منيره كانت متوقعه ان الترف بتغلط لذلك متجهزه بس انصدمت من كلام الترف وعجزت ترد شافت الترف فعلا جديه وسكتت وهي تدري انها فعلا على غلط وهالمشاكل ما جابت الا وجع الراس ابتسمت : صدقتي يالترف فعلا ما تسوى والله يسامح الجميع واعذريني يا اختي الشيطان شاطر
ضحكت الترف وهي تحضنها : الحين بنطرد الشيطان ونلعن خير
ضحكت منيره وهي تبادلها الحضن ورجعوا لشغلهم وهم متحمسين ويسولفون مع بعض وبعدها طلعوا يجهزون مع بعض واخذت الترف اغراضها وراحت تجهز مع منيره
اما ثنيان اللي كان نايم مع مشاعل صحى على منبه صلاة العصر ومشاعل اللي تناديه طللع بعد ما لبس وراح صلى ورجع لكن تصلب ولف اول ما وصله صوت الضحك تحرك وهو يطل ووقف يده على مسكة باب منيره وهو يناظرهم بصدمه كلهم كانوا يجهزون بعض
لف عليه وثنيان طايره عيونه ماتوقعهم يرجعون بذا السرعه كانوا يناظرونه ويدرون انه مستغرب
منيره: ثنيان تبي شي
ثنيان : ا ابي قهوه
الترف : منيره زهبتها تحت
منيره: اسبقنا بنلحقك الحين
مشاعل جات من وراه وهي تناظر باستغراب : كملوا وانا بقهويه
الترف : لا حلفت عليتس ما تعبين نفستس كلنا بننزل نتقهوى
ثنيان بدون ما ينطق من صدمته اخذ مشاعل ونزل هو وياها على الصامت ونزلوا منيره والترف وهم يتقهوون ويضحكون ثنيان مصدوم
وبعدها افترقوا يجهزون وثنيان جالس بمحله ماهو مصدق طلع لما دق عليه عجاج وقاله انه عند الباب
عجاج اللي كان ينتظر عند الباب : وينك انت مختفي
ثنيان: انا ذا الايام بيصكني وحده من الثنتين يا سكر يا ضغط ! وذا تعديتها اكيد جلطه
عجاج: لييييه !
ثنيان: ياخي محد ذابحني الا حريمي
عجاج: حمدلله ياربي اني انعم بالصحه والراحه
ثنيان ضحك: تعال انت صدق لك عندي موضوع
عجاج: هات
ثنيان : وش رايك تزوج
عجاج: لا والله وزواجي جلس على كتفك وش تبي انت
ثنيان: طعني عندي لك عروس يا زينها
عجاج: مابيها
ثنيان : اسمع طيب
عجاج: من
ثنيان: نوره صديقه الترف
عجاج : خييير
ثنيان: قصر صوتك
عجاج: خبل انت خبل معصي ووالله
ثنيان: لييه وش فيها
عجاج: تبيها تذبحني
ثنيان: عجاج ترا مب عذر هي كانت خايفه وش دراها وبعدين خلاص راح عمرك لازم تزوج
عجاج: اتزوج مرزوقه ولا تزوجها
ثنيان: متاكد
عجاج: نص ونص
ثنيان ضحك: اسمعني ياخي والله انها محترمه اترك عنك الهبال بس صدقني بتحصل البنت اللي تناسبك خصوصا انها ماهي نفسيه وانت تقول بلسانك اذا تزوجت تبي وحده فله هذا هي
عجاج: وين عرفتها انت عشان تقول فله
ثنيان: ياكثر ما تسولف الترف عنها
عجاج: يا رجال وخر
ثنيان: عجاج انت تدري كيف الترف وانت بنفسك تدري ان نوره كويسه بس خبيله وبعدين فكر انت حتى مايمديك تحتج وتقول بيرفضوني من ربعكم وغير كذا انت تدري كيف اخلاق ديره الترف
عجاج: بس اتزوج من عندهم لا
ثنيان:فكر فكر مب شينه
سكت عجاج وثنيان اللي كمل يقنعه وهو متاكد ان نوره تناسب عجاج ................••...........
. بعد اذان المغرب ابتداء الكل يجتمعون في بيت ابو ثنيان وينتظرون محمد والشيخ يجون
دخلوا زوجات ثنيان والترف اللي سانده مشاعل واول مادخلوا المجلس جمدوا كلهم الثلاث
منيره بهمس: وش جابها ذيي
مشاعل: حسبي لله عليها ما افتكينا منها ذي
الترف بنفس الهمس : ابشركم انها متواجده لها فتره وانا اعيش عذاب نفسي منها
مشاعل: لا تقولين ثنيان يدري بها
منيره: مادام هاذي ضحكة خالتي اكيد انه يدري
كل هالحكي كان يدور بينهم وهم كلهم يناظرون ماجده اللي بنص المجلس
جات نوف وهمست بضحك : مقدره خوفكم بس وضعكم يفشل وانتم تناظرونها
ضحكت مشاعل: اي والله
دخلوا كلهم وهم يسلمون عليها لكن فزت منيره وهي تسمع صوت ثنيان
مشاعل: منيره اركضي لا يدخل
الترف: اصلا لا يدري انها هنا ترا يا بنات له مده وهو يسأل عنها
منيره: والله مالي خلقها ابد
الترف : اسمعوني بس روحوا له اشغلوه وانتي يا مشاعل روحي تشكوي عنده وانا بألهيها ذا الخبله لا تقول بسلم عليه
مشاعل: وعيالها بيشوفهم
الترف: خلوهم علي روحوا بس
طلعت مشاعل ومنيره لثنيان وهم يسولفون معاه ويشغلونه والترف اللي كانت جالسه لعيال ماجده مايطلعون
ثنيان اللي حس بشوشره فالجو ولف ببتسامه: خير وش فيكم كلكم جايين
منيره: لا ابد انت وش تبي هنا
ثنيان: انتظر القهوه
منيره:انت !! تاخذ القهوه
ثنيان: ايه ليه ما اخذها
منيره: لا بالعاده ترسل نواف او محمد
ثنيان: مشغولين جيت اخذها انا
مشاعل بهمس: ماشاء الله فجاءه حب الشغل
الترف اللي ملت وهي ترجع العيال طلعت وهي متوجهه لثنيان: ثنيان وش تسوي بقسم الحريم
ثنيان: خير ان شاء الله لا يكون بتطردوني من هنا بعد
الترف: محشوم لكن فيه حريم بياخذون راحتهم وانت جالس
ثنيان: بيت ابوي تراه
الترف : ادري بس يعني روح للمطبخ او انتظر برا
ثنيان: ليه من فيه غريب
منيره: امل امل زوجة سيف
نوف جت: هاذي القهوه وصلت
ثنيان: هاتي هاتي طلعت روحي من ذا القهوه
الترف : اذا بغيت شي ارسل عمر ولا محمد احسن
مشاعل: ايه
ثنيان قبل يطلع شاف بنت ماجده وابتسم بهمس : ايييه كذا الموضوع اوريكم
طبعا ثنيان طول الوقت وهو رايح جاي والكل مستغرب ان ثنيان يشتغل وبالحقيقه ثنيان مبسوط بغيرة زوجااته وبشكل خاص الترف
اخر دخول له بالدفتر وطلع رهام يعطيها الدفتر ببتسامه وهو يناظرها بحب عمره ما تخيل ان بيجي اليوم اللي تزوج فيه رهام
انتشر التصفيق بعد ما وقعت رهام وتقدم ثنيان وهو يحضنها ويبارك لها
منيره بهمس: الترف طلعي ثنيان ترا كلنا هنا مافيه الا خالتي وهالسحليه تحت
الترف : يلا يلا
تقدمت الترف لثنيان وهي تمشي معه لف ثنيان ببتسامه: اخيرا جيتي !
الترف : كيف يعني
ثنيان: كان المفروض اني اول واحد يشوف ذا الكشخه لكن صرت الاخير
الترف ابتسمت : الكشخه المهمه الحين هي كشخه رهام والباقي بلا
ثنيان : والله لكل انسان أولوياته مثلاً انا يهمني اشوفك اول شخص
الترف : مب على اساس تعدل اشوف فيه انحياز
ثنيان: اوك اعدل بكل شي وباللي اقدر عليه لكن قلبي ما اتوقع اني اقدر اعدل فيه مب في يدي
الترف لفت ببتسامه : عشان ما اصعب الوضع اتوقع انك تأخرت على الناس
ثنيان ابتسم وطلع دخل وهو يشوف الكل يبارك لمحمد تقدم وهو يسلم عليه ويبارك له
وبعد شوي دخل محمد لرهام ومعاه نواف وسيف
وابو ثنيان اما ثنيان جلس عند الرجال بما انه سلم عليها .................••............
في الصاله
عند رهام اللي كانت في قمة ارتباكها كانت تنتظر محمد سمعت صوت خطواته اللي تشبهه دقات قلبه وقلبها شدت على مسكتها بفرح لما حست بيده على كتفها وهو يتقدم ويبوس راسها
اما محمد اللي كان يفتقد شعور الفرح كان على قد ماهو شامخ وواقف بثبات على ما قد داخله كله يرتجف مثل الريشه غمض عيونه اول ما انتشر عطرها بصدره ماكان وده يبتعد لكن تذكر ان عمه موجود وقف جنبها وهو يحاول يضبط نظراته وانفاسه المتسارعه
تقدمت فجر وثريا وام ثنيان ومنيره يسلمون عليه ومن بعدها ابتداء يلبسها الشبكه وهو يدعي ان محد يحس برجفته
وبعد صراع مشاعر حلوه دخلوا المجلس وتسكر الباب وعم الهدوء المنعزل عن الناس ومحمد اللي حس انه جمد ورهام نفس الشعور لف بعد هدوء طويل وهو على كثر ما رتب كلام ضاع منه ناظرها بحب وهو خلاص يحس طاح من عمره عمر كان وده يحضنها بس ماقدر كان وده يتكلم بس عجز ضاع وقت محمد اللي من فرحته وده يحنطها قدامه دخل نواف : يلا يا ابو الشباب خلص وقتك
محمد : بدري
نواف : اقول يلا بس قبل استعدي ثنيان يطلعك بإذنك
ثنيان طل: حتى اني وصلت
محمد ندم انه ماقدر يتكلم وقام بهدوء وطلع ورهام اللي كانت فعلا تتمناه يسكت مايقول شي لان رسالته امس كفت ووفت
واللي كان مريح محمد انه بيرجع يقولها كل شي بقلبه من الحين براحه
.................••............
في قسم الرجال
عند ثنيان ومحمد ونواف اللي طلعوا هم وعجاج بعد الملكه
محمد : وين بتودوني
ثنيان: عازمينك عزيمه غير شكل
عجاج: اعتبرها اغلى هديه بتمر عليك
نواف : كأني حسيت بها
عجاج: عازمينك على سامري
محمد : مب من جدكم
ثنيان لف : شوف حبيبي محمد ترا اذا عزمناك على شي ثاني اعرف انك ماتسوى شي عندنا لكن طالما عزمناك على سامري اجل اعرف انك بالقلب
عجاج: وانا اشهد
نواف : هذا نظامهم ترا
محمد : يلا بما اني مستانس معكم اجل
فعلا كان هذا وضع ثنيان وعجاج اللي اذا كانوا بقمة الفرح راحوا لسامري واذا كانو بقمة الزعل بعد اتجهوا لسامري حب غريب بس يعتبرونه الرقم الاول المتحكم بروقانهم
تماماً يشبهه مكانة القهوه الساخنه في قلوب الناس الكلاسيكيه ................••............
في قسم البنات
اللي بعد ما طلع محمد هجموا على رهام وشغلوا سمعاتهم وبدوا بالردح والفله في بداية الامر كانت الترف خجلانه لكن بعد فتره دخلت هي ونوف الجو مع بعض وبدعووا حرفياً
رغم وجود ام ثنيان الا انهم فصلووا
كانت الترف ترقص مع نوف وتقلب على منيره اللي ضايعه برقصهم ومن بعدها دلال ومشاعل وامل وبعدها على فجر ولكن وقفت وهي تشوف ماجده اللي جالسه بوضع عادي كأنه بيت اهلها الترف اللي كانت ترقص ورايحه جايه وهو ودها تخنق ماجده
.................••............
عند العيال اللي كان السامري عندهم قايم والكل يرقص بحمااس بعد ما وقفت الاغنيه تقدم ثنيان وهو يطلب من للي يغني
ورجع وهو يمسك ذراع محمد من يمين وعجاج من يسار وجلسوا ( رقصه لسامري )
عجاج :وش قلت انت !
ثنيان اللي غنى معهم :اهديت لك يازينِ قلبي هديه .. وش عاد تهدين
يازين لامريتِ سلم عليه .. ياكامل الزين
لو بصبعك يازينِ رد التحيه .. ياداعج العين
ثنيان كان داخل مع الوضع جو ومحمد جات له السطور على ما يبي وعجاج اللي من غير شي هواوي ونواف هو الوحيد اللي عايش على انه ينبسطط ويسولف ويضحك بس
................••............
انتهى الليل اللي كان كله فرح ورقص ووناسه الكل طلع اللي بقلبه والكل استانس
بما فيهم رهام اللي كانت تنقي الاغاني نقوه وهي في نفسها تهديها لمحمد
اما محمد اللي للحين مب مصدق وللحين يعيد اللحظات في باله حتى لو اللحظات كانت صامته
................••............
في بيت ثنيان
ثنيان اللي دخل بيته بعد ما انتهى الليل وشاف المكاان كله هدوء وطلع وهو للحين فيه طاقة الرقص والغنى كان متجهه لغرفة منيره كبداية جدول وهو يردد الابيات ويتهزع ( يرقص بشويش )عليها وهو متوقع ان الكل نايم
الترف ومشاعل كانوا سهرانين عادي بما ان الوضع انتهى وهم مب تعبانين وجالسين يحللون السهره
كانت غرفة الترف مفتوحه ولفوا وهم يناظرون ثنيان اللي باقي في اندماجه
ضحكت الترف وهي تاخذ علبه المنديل ووقفت وهي تكمل معه وتغني بضحك ولف ثنيان بفشله : انتم صاحين؟؟
مشاعل : اييه صاحين ومروقين وواضح بعد انك مروق
ثنيان ابتسم وهو يجلس جنبها: حمدلله ووالله يديمها اجل وينها منيره
مشاعل: مسكينه منيره تعبت وراحت تنام
ثنيان: والعيال
مشاعل: بعد ناموا
ثنيان: وانتي كيفك عسى ما تعبتي
مشاعل: لا الحمدلله مرت على خير ، دامك جيت اجل بروح انام
ثنيان : عوافي
طلعت مشاعل واالترف اللي ما صدقت انها توقف رقص وهيضها ثنيان كانت مكمله وهي تغني تقدمت وهي تمسك ذراع ثنيان اللي دخل معها بالجو وهي تدق على علبة المناديل وتغني
رمح الهواى قاعده عسكريه .. بين الحجاجين
فيها صواريخٍ وبها مدفعيه .. لك مستعدين
رميتني بالفردِ والبندقيه .. يوم انت ترمين
وكمل ثنيان وهو مروق على الاخير كان هالجو يعجبه دايما ويحب يغني ويحب يرقص واخيرا حصل احد على جوه وكمل يغني معها
هذي طعونك بينات وخفيه .. يوم انت ترمين
سلمت روحي رافعٍ لك يديه .. حسب القوانين
والترف اللي كانت تضحك مره ومره ترقص
واتفقوا على اخر بيتين وبصوت واحد
امين رب البيت يسخرك ليه .. ايضا قل امين
ونعيش انا وياكِ عيشه هنيه .. رغم الحسودين
ارتمى ثنيان على الكرسي وهو يضحك : بسجل هاليوم في قائمة اسعد ايام حياتي
الترف : الله يبرد قلب رهام ومحمد وسعوا صدورنا
ثنيان كان يناظر الترف بكل ود وانتماء وقف : دامتس استانستي نامي وعيني من الله خير وانا بروح انام بعد تعبت خلاص
الترف : اي والله حقها نومها بعد الردح
ثنيان دفها بمزح وهو مايبي يناظرها ويضعف لها طلع متجهه لغرفة منيره اللي كانت مسكينه من التعب في سابع نومه بدل ورمى نفسه بتعب وهو يحس شعوره من الفرح للحين يرقص
................••............
في بيت ابو محمد
محمد اللي ما صدق وصل البيت وتطمن ان ابوه بخييير واموره تمام انسدح جنبه وهو يسحب جواله فتحه وهو يطير لرقم رهام اتصل وهو ينتظر اللحظه اللي بيسمع فيها صوتها
ردت رهام بصوت خجلان: الو
محمد : اخييرا يا هال الو
كانت رهام ساكته ومحمد اللي ما صدق انه يسمع الصوت الا انفجرت كل مشاعره : اوك اول شي مبروك علينا
رهام : يبارك فيك
محمد : ما بغينا يا ربي اللهم لك الحمد قد ما كنت منتظر ذا اللحظه ، والله اني اول مره في حياتي استعد بالكلام ولكن انساه في ثواني
رهام اللي كانت ودها تقول ( وانا اول مره في حياتي تمر علي سطرين من الكلام ودي ان الدنيا توقف عليه )
كان محمد مسترسل يشرح اوضاعه ورهام يهمها حتى الفاصله بحياة محمد وطووا ليلهم على هذا النظام
................••............
من بكره الصباح
عند عجاج اللي كان يتقلب وهو يقلب موضوع الزواج براسه وقف وهو يشوف عيد نايم لبس وطلع وهو يسلم على اهل الحاره راح لبيتهم وهو يشوف ابوه اللي جالس قدام الباب كان بيتقدم وقال ابوه: انقلع من قدامي لا اشوفك
عجاج: يا يبه مايصير كذا والله انا مالي دخل بزواجك
ابو عجاج : اوريك اوررريك كيف تخرب اوريك
عجاج: يا يبه انا لللي في وضع انك تزوجني مب انت
ابو عجاج : تخسي ازوجك تخسي اجلس خس مثل الكلب
عجاج: اجل اعرف اني بتزوج يايبه
ابو عجاج ضحك باستهزاء: اييه ايه بتزوج من وين ي حظي بتجلس تشحذ
عجاج بقهر: بشحذ لكن اشحذ الواحد الاحد
تركه وراح وهو مقهور من ابوه اللي ماعنده اي مسؤوليه اصلا مايبيه خلقه طلع متجهه لدوامه وهو مقرر انه خلاص يخطب
.
.
انتهى البارت💓