تهزمني السمراء وانا ند فرسان

36

«البارت السادس والثلاثين »
.
.
في بيت نوره
نورره اللي كانت تعيش بحاله كئيبه من معنااتها امس ما قدرت تنام من الفشله ووقفت وهي تنزل فطور امها بضيق ( يا ربي عسى بس محد درا بي والله لصير فضيحه على كل لسان ،واصير نوره مروعه الرجال) ................••............
في بيت ابو الترف
عند سلوى اللي بعد ما جهزت الفطور شافت الترف داخله وتضحك
سلوى: حي الله وش عندتس يالمجرمه من صبح الله رايحه جايه
الترف : ابد كنت اختبر مدى صلابة رجلي
سلوى: يا بنت الحلال الرجال من امس ما جلس به صلابة شاف نجوم الليل بعز القايله ممنكم حرام خلاص اعتقوه
الترف : ماعلينا المهم خلينا نفطر بسرعه ونطلع نشوف نوره ونروح نشقر على دويده ونوير من زمان ما غثيت احد
سلوى: تصدقين والله كم لي يوم ضايقه ودي اتهاوش
الترف : اجل يلا افطري
................••............
في بيت اهل مشاعل
مشاعل اللي كانت جالسه وتراقب بطنها بضيق كان ثقيل ومتعبها لدرجة نومتها وقومتها بالقوه لفت اول ماسمعت صوت جوالها ردت لما شافته رقم ثنيان : الو
ثنيان: ياهلا وغلا حي الله مشاعل
مشاعل: يا هلابك
ثنيان: كيفك اليوم ان شاءالله بخير
مشاعل: الحمدلله لكن احس اني مدري ليه بولد بدري
ثنيان: لا قولي خير ان شاء الله ما يصير شي وانتي بس عشانك ثقيله تقولين كذا
مشاعل: مدري يا ثنيان بس من جد احس خلاص بطني بيطيح
ثنيان اللي توتر : لا لا ما عليك لا تخافين انتي وانا بجي اوديك المستشفى ونشوف وضعك
مشاعل: ايه تكفى احس اني تعبانه شوي
ثنيان: توك دخلتي الثامن صح
مشاعل: ايه
ثنيان: لا بسيطه انتي لا تخافين وتخوفيني عليك
مشاعل: طيب
مشاعل كانت فلا خايفه وثنيان توتر من خوفها
................••............
في بيت نوره
طلعت بتروح لترف وسلوى وجاوا الترف وسلوى
الترف : هاااااه كيف جنيتنا
نوره: الترف فكيني منتس ترا ما نمت امس وانا اهوجس
سلوى: عزالله يا نوره ماسويتي خير صالح جاني عيونه حمرا ماناام الا ساعتين
نوره: وش اسوي انا بعد انفجعت
الترف : اقول تعالوا تعالوا نمشي من عند بسطة ام دويده من زمان عنها
نوره : اقول لا تهاوشين وثنيان فيه تفضحينا
سلوى: ابشرتس انه ماعاد يستغرب الفضايح
الترف وقفت وهي تناظر دويده وامها : اقوول ماعندتس بخور
ام دويده : لا ما عندي بخور مانبيع على اشكالتس
الترف ضحكت : ما ابيه لي ابيه صدقه فيكم المكان محد يقربه اللهم يا كافي
سلوى: ليتس علمتيني يالترف بفزع واجيب ننقذ اهل القريه شوي
دويده : وانتن من يفزع لناس منكم يا شياطين الارض
نوره: والله شياطين نركد اللي في راسهم فكه
ادويده : اقول انتي ترا ذبحتينا باللي تسحبينه وراتس كل يومين جايه وجايبته معتس ترا سوق الحمير مب هنا
الترف عرفت انها تقصد ثنيان واخذت كيس الحنا اللي قدامها وهي تخبطه على راس دويده : هاذي لتس عشان تميزين من الحمير وتشوفين اسيادتس
دويده وامها وقفوا وهم ناوين الهوشه بس تدخلوا الحريم فكوهم ومشت الترف وهي تضحك
سلوى: ليتني فقعت انا بعد كيس على راسها
نوره وهي تناظر بصالح اللي جاي بخطوات سريعه: صالح جاي بيفقع وجهتس الحين
سلوى: يوووه وش فيه ، شكله شافنا
صالح جاء : انتم وين ساعه ادور عليكم
الترف : ليه وش تبي
صالح: امشي رجلتس يبيتس بتروحون بيتكم
الترف : ليه ، كنا بنروح بعد الغداء
صالح : يقولون عنده احد من اهله تعبان
الترف تذكرت مشاعل وركضت للبيت ولف صالح على سلوى: وانتي وراتس تمشين وانتي حامل
سلوى: وش اسوي مليت ابي اتنفس
صالح : كان قلتي لي نروح بالسياره
نوره اللي كانت حاسه لو تكلمت بيكشفها صالح وجلست ساكته ولف عليها :نوره علامتس هاجده
نوره:مصدعه
صالح : اجل دام الترف بتروح وش رايكم تجهزون وبنرووح لسوق شوي
سلوى: اي والله
نوره:يلا بقول لامي
راحت نوره وسلوى وصالح كملوا طريقهم وصالح يعلمها باللي سوته الترف في ثنيان
................••............
في بيت ابو ثنيان
ابو ثنيان اللي كان يتصل بثنيان ولا فيه رد نزل جواله : نواف اليوم ماكلمت ثنيان
نواف : لا ماكلمته
سيف : وينه هو ؟!من امس مب فيه
نواف : اكيد عند ابو الترف امس عندهم عشا
سيف: شكلهم ساحرين عقله الترف واهلها
ابو ثنيان: روح يا نواف شوف اذا هو في بيته
نواف : طيب
سيف كان جالس هو وولده عند ابوه ويلعبونه ورجع نواف : يبه محد يفتح
ابو ثنيان:ناد لي دلال تتصل في حريمه
دلال جات : يبه توني مكلمه منيره تقول مشاعل عند اهلها وهي عند عمي تعبان وثنيان والترف راحوا لعشاء ابو الترف
ابو ثنيان: اجل خلونا بنروح لابو محمد
نواف : يلا
سيف : اسبقوني بلحقكم انا وثريا
ابو ثنيان هز راسه وطلع وسيف اللي قال لفجر تنادي امها ويجون وركبوا وثريا صامته وكان سيف مناسبه الوضع
................••............
عند ثنيان
اللي كان ينتظر الترف بالسياره جات له الترف مسرعه وركبت : ثنيان وش صاير
ثنيان: انتي وين اختفيتي
الترف :رحت لنوره
ثنيان اللي كان متوتر ومعصب : الله يا سلام وما عندك رجال تقولين له بروح ولا انتي شروك بيدك وتمشين للي تبين
الترف ناظرته بهدوء وقالت : والله انا مارحت اسوي غلط وانت كنت تفطر شسوي يعني
ثنيان بغضب: اقصري صوتك بس وتنعاد ذا الحركه وشوفي وش بيصير
الترف اللي هنا حقدت عليه (خير وش يبي يصارخ ، لكن اوريك )تكتفت ولفت وهي ودها تكفخه كف
تحرك ثنيان اللي من كثر ماكان خايف على مشاعل ومتوتر ماكان يبي يسمع اي شي ولا اي كلمه ولا اي حركه مدت الترف يدها وهي تشغل المسجل لكن سحب ثنيان يدها ودفها بغضب وهو يسكر المسجل : لا تقلقيني وانثبري في مكانك بهدوء
الترف هنا اتسعت عيونها بغضب وهي تضرب المسجل : من زينه مسجلك مابي اسمع منه شي خلاص
ثنيان: انا وش اقوووول اقول اص اص ماتفهمين
الترف : خير وش فيك تصارخ وش مسويه لك انا ذبحت لك احد
ثنيان احتدت نظرته: اذا ماتبين اذبحك اسكتي
الترف لفت وهي تتأفف وثنيان رجع لطريقه وهو كل ماله يزيد عصبيه وتوتر وطبعا هالترف اللي تعاااانده عناد الدنيا لين وصلوا بيت مشاعل ونزل ثنيان وترك الترف
دق الباب وفتحت ام مشاعل : هلا ثنيان
ثنيان: عمه مشاعل وش فيها
ام مشاعل: والله من صحت وهي تعبانه وتبكي وكنا بناخذها للمستشفى وقالت انك بتجي
ثنيان:زين خذي لي طريق
دخل ثنيان بعد شوي وهو يركض يسرع بخطواته لغرفة مشاعل اللي كانت تبكي وقفها يساعدها وهو اول ماشاف ملامحها وقف قلبه
مشاعل: ألحقني يا ثنيان بموت ألم يقطعني
ثنيان : بسم لله علييك بسيطه يا مشاعل اذكري الله انتي اذكري الله
ركبوا السياره ومعاهم ام مشاعل والترف اللي مصدومه من بكى مشاعل وصراخها واستنجادها في ثنيان اللي كانت ملامحه لوحدها رعب رعب ................••............
في بيت ابو محمد
محمد اللي دق عليه نواف وقال انهم جايين وكان مستعد بكل فرح متوقع الرد ومتوقع جيت رهام لكن خابت ثاني امنيه.وهو يشوف ابو ثنيان ونواف نازلين وبعدهم سيف وفجر وثريا تقدم لعمه وهو يبوس راسه ويسلم على الباقين
ابو ثنيان اللي اول ماشاف ابو محمد وشافه تعبان حيل ضاق وجلس وهو يسلم عليه ويناديه بس مايسمعه رفع راسه وهو يقول :وشلونه ابوك اليوم يا محمد
محمد : الحمدلله اليوم تحسن اكثر من امس بكثير
نواف : وش قال الدكتور
محمد : ابد سكر ضغط وامراض الكبر
ابو ثنيان: الله يختم له بالعمل الصالح
الكل كانوا ساكتين ومحمد ثنيان يصب القهوه
محمد : سيف زرت بندر
سيف : لا الزيارره الجمعه
محمد : زين اذا زرته قلي اروح معك
ابوثنيان: كلنا بنروح
سيف : زين
ابو ثنيان : وعاد على الطاري يا محمد بقولك بأذن الله زوجتك رهام ومبروك مقدما
ومحمد اللي كان بياخذ الفنجان من محمد وقبل ياخذه سمع الكلمه وسحب يده وطاح الفنجان عليه وفز بفرحه ما اهتم للقهوه : صدق يا عم
ابو ثنيان: بسم للله عليك لا تحترق اي ان شاء الله وشوف اوضاعك وتعال ملك
محمد اللي ياما تمنى يسمع هالكلمه واخيررا كانوا العيال يباركون له وهو يرد وفيه رجفه فرح
.................••...........
. اما عند منيرره
اللي كانت جالسه مع ثريا وهي تحاول تشكي لها
منيره: ثريا ساعديني وش اسوي بذا الكلبه اللي اخذت ثنيان وصارت تلعب به
ثريا : منيره انا ماعاد لي شغل بأحد كل همي ولدي يرجع لي والناس بكيفهم ونصيحه اتركي كل شي وانتبهي لولدك
منيره اللي كانت تناظرها بضيق وهي ودها لو تساعدها مع انها تدري ان كلام ثريا صحيح
................••............
عند المستشفى
ثنيان اللي نزل وهو يقول لترف : خليك بالسياره
ركض يجيب الكرسي وهو ينزل مشاعل عليه ودخلوا الطوارئ
واما الترف اللي ماقدرت ماتنزل ونزلت وراحت وراهم
ثنيان سلم مشاعل لدكتوربعد ما شرح لهم وضعها ولف وهو يقول : يارب سهلها يا ر.. انقطع كلامه وهو يشوف الترف واقفه مع ام مشاعل توجهه لها وهو يبعدها عن ام مشاعل: وش جابك انا ما اقول اجلسي بالسياره
الترف : ماقدرت اجلس وانا اشوف مشاعل تعبانه
ثنيان: وش بتسوين لها يعني
الترف : بدعي
ثنيان: مايجوز الدعاء بالسياره
الترف : لا
طنش ثنيان ولف وهو ينتظر مع ام مشاعل اللي قامت تقوله يعني كيف تعبانه وكيف انها من امس ثقيله وثنيان اللي ضاق زياده اما الترف اللي كانت تدعي ان ربي يسهل لمشاعل
كانوا ينتظرون وينتظرون والانتظار مستمر وطلعت الدكتوره : فين زوج مشاعل ال ..
ثنيان: انا كيف مشاعل
الدكتوره: بخير الحمدلله لكن تقلصات وارتفاع بالضغط لكن الحمدلله هي بخير
ثنيان: يعني مو ولاده
الدكتوره: لا لا بدري على الولاده تقدر تخرج بعد السيروم
ثنيان : الحمدلله
ام مشاعل : الحمدلله
راحوا لسرير مشاعل اللي كانت نايمه بتعب وصحت بجيتهم
ثنيان: مشاعل كيفك كيف تحسين الحين
مشاعل : حمدلله احسسن من قبل
ثنيان: لازم ما تخافين وتتوترين كذا يرتفع عندك الضغط وتتعبين كل شوي
مشاعل : مو بيدي
ام مشاعل: سمي بالله يا امي وان شاء الله بتكونين بخير
ثنيان: اذا تبين ارجعي للبيت معي
مشاعل: لا بكون عند امي
ثنيان: مو مشكله ارتاحي انتي
الترف قربت تسلم عليها: مشاعل ان شاءالله مالتس شر كيفتس
مشاعل ابتسمت: بخير يالترف انتي كيفك
الترف : حمدلله بس انتي لا تخوفينا عليتس
مشاعل ابتسمت: يعني من حظي انك تخافين علي
ابتسمت الترف : افا عليتس انتي في قلوبنا
ام مشاعل كانت تناظرها بهدوء وقالت مشاعل: يمه هاذي الترف
سلمت الترف عليها بود وجلست جنب ثنيان ومر الوقت وانتهى السيروم وطلعوا واخذوا مشاعل لبيت اهلها ودق جوال ثنيان
ثنيان: هلا يبه
ابو ثنيان: انت وينك غايب ادق ماترد وبيتك مافيه احد
ثنيان: والله يا ابوي نمت عند عمي ابو الترف والصبح مشاعل تعبت واخذتها للمستشفى لكنها الحين طيبه
ابوثنيان : سلامتها سلامتها وانت وينك الحين
ثنيان: راجع للبيت
ابو ثنيان: تعال لنا عند عمك ابو محمد تعبان
ثنيان: ابشر الحين اجي
سكر ثنيان ولف على الترف : بنروح لعمي
الترف : نزلني في البيت وروح عند عمك
ثنيان : ليش ماتجين معي
الترف: وين اروح ان شاء اللله ! عند ثريا ولا عند منيره اللي كل وحده منهم كارهتني نزلني فالبيت احسن
ثنيان شاف انه بيدخل في دوامه اختصر الموضوع ونزلها وراح هو لبيت عمه ................••............
في بيت ابو محمد
وصل ثنيان ووقفوا الكل يستقبلونه وابتسم ثنيان اول ماشاف سيف وهو يسلم عليه وراح لعمه وبعدها جلس
ابو ثنيان: كيف مشاعل
ثنيان: حمدلله بخييير
ثنيان: محمد كيفه عمي
محمد : حمدلله احسن
ابو ثنيان: دامك جيت اجل بعلمك خبر بيفرحك
ثنيان: الله يديم الافراح بشرني يا يبه
ابو ثنيان: ابشرك إنا عطينا محمد اختك رهام
ثنيان لف بصدمه وابتسم : تمزحون
سيف : لا والله صدق
ثنيان لف لمحمد : صادقين
محمد : ان كنت موافق صادقين
ثنيان ابتسم بتردد : بس رهام قلبها تعبان
ابو ثنيان: لا تخاف يقول الدكتور بعد اخر قسطره بأذن الله انها كل شي عندها بخير
ثنياان وقف بفرح وهو يضم محمد ويبارك له كان فعلا هالخبر مفرح بس تذكر عايض ( اييه نسيت اعطيهم العنوان )
كان محمد مبسوط وهو يسمع التبريكات وبعد ما تغدوا وقف ثنيان :محمد ناد لي منيره بالله
منيره جات وهي تشوف ثنيان واقف يناظر جواله وقالت: هلا
ثنيان : كيفك اليوم
منيره:حمدلله
ثنيان: بتباتين عند عمي او ترجعين معي
منيره :لا وضع ابوي انت شايفه يحتاج مراعاة
ثنيان: زين اجل خذي هذا مصروفكم واذا بغيتوا شي اتصلو بي
منيره: بترجع البيت لحالك
ثنيان: لا الترف فيه
منيره لفت بقهر : زين
طلع ثنيان حاس بصوتها المغبون بدونن مايدري عن المكالمه امس كان ودها منيره انها تروح وتجلس الى قلب الترف بس وضع ابوها مزري ................••............
في بيت ابو ثنيان
رهام اللي نزلت وهي تشوف نوف جالسه مع امل في الحوش الخلفي : سلااام
نوف : هلا وين رحتي انتي ولا انخطبتي واختفيتي
رهام: لا بس كنت اراجع حساباتي
امل: مبروك يا رهام
رهام : يبارك فيك ، ليش مب جالسين عند امي ودلال
نوف : اسكتي امي وامك مستنفرين بالبيت يقولون بتجي ماجده
رهام شهقت: اي والله والله ماشفت وش يسوون
نوف : والله مالي خلق ضيوف مره
رهام: عاد شنسوي
امل: من تكون ماجده
نوف : هذا الله يسلمك تكون بنت جيران جدتي ويحبونها كلهم
امل : اييه
................••............
في بيت ثنيان
الترف اللي بعد ما رتبت اغراضها راحت تسوي لها غدا وهي متوقعه ان ثنيان بيتغدا عند منيره اكيد جلست وهي تحط سفرتها وصدرها ضايق من الفراغ اللي بالبيت
لفت وهي تاخذ الجوال وتدق على رهام : الو رهامو كيفتس
رهام: هلا هلا باللي ماندري عنها ابد
الترف : والله توني جيت من الديره وسويت غدا والبيت فاضي حتى ثنيان مب فيه وش رايتس تجين انتي ونوف ونتغدا
رهام : تدرين والله حتى انا ما تغديت يلا بنجيك
الترف : انتظركم
قامت الترف وهي تزيد الاكل وفتحت لما سمعت الباب : تطيرون انتم
ضحكت رهام: جوعانه والله
سلموا عليها وجلسوا
نوف : ايييه عاد رهام من اليوم وهي تعيش الطيران
الترف: عساه خيير وش بتس تطيرين
نوف : بتودع بيت جدي قريب وتدخل القفص الذهبي
الترف : شلون يعني ؟ بتعرسين !
رهام ضحكت بخجل: ايه
نوف : طبعا اذا وافق خالي ثنيان
الترف : وثنيان ليه مايوافق،وبعدين من العريس
رهام: محمد ولد عمي ،وانا ما اشوف ثنيان بيرفض
نوف : حتى انا بس ماندري عن مزاجه
الترف: لا معليتس بس تعالي تغدي
جلسوا وهم يسولفون رهام: الترف اليوم تعالي بيجينا ضيوف
الترف : من بيجينا
رهام: بنت جيرانا زمان
الترف قبل ترد دخل ثنيان ينزل اغراضه :سلام
الكل رد وجلس ثنيان : رهاموو كيفك
رهام ببتسامه: حمدلله
ثنيان: ايووه وش ذا الاخبار الزينه اللي سمعناها
رهام :وش سمعت
ثنيان اللي كان شاق الابتسامه : اجل بتزوجين يا رهام
نزلت رهام راسها وهي خجلانه وثنيان اللي مبتسم : الله يوفقك يا رهام وان شاء الله زواج العمر
الكل : امين
نوف : خالي تعال تغدا
ثنيان اللي كان يناظر الترف اللي ماناظرته من يوم دخل ولا تكلمت : لا متغدي بالعافيه
الترف اللي كانت معصبه من صراخه عليها الصبح فما ردت عليه ابد
ثنيان : انا بطلع انام ساعه وصحيني
ماردت الترف وهي تقول : ايه يا نوف شخبار امتس من زمان عنها
نوف : حمدلله ماشي حالها
ثنيان اللي كان منتظر ان الترف ترد وقال لما ماردت : الترف امشي ابيك شوي
وقفت الترف وراحت وراه دخل ثنيان المطبخ وهي واقفه ومتكتفه
ثنيان: خير ان شاء الله اكلمك ماتردين ! وش فيه
الترف : يعني مافيه شي مهم اجل بروح
ثنيان رجعها : بنت اكلمك انا
الترف : الله واكبر مب تقول اسكتي هذاني ساكته انت اللي وش فيك
ثنيان: والله الحين استوعتبي تسكتين يوم صار وقتك تكلمين صرتي بتسكتين
الترف : لا ابشرك بسكت وبريحك خذ راحتك بس
طلعت وتركت ثنيان اللي توه يستوعب انه راح نص اليوم وهو يصارخ عليها طنش وطلع والترف اللي رجعت للبنات
................••............
في حارة عجاج
عجاج اللي كان نايم عند عيد وطول وقته وهو يحلم وكوابيس وحوسه سمع عيد يناديه وفز : وش فيك
عيد : بسم لله عليك بس قم تغداء
عجاج : يوووه والله ما نمت زين
عيد: هههههههههههههه اشوفك تتفزز واضح متروع من قلب
عجاج اللي للان مصدق: والله اني اول مره اشوف جني انهبلت
عيد: سم بالله وتعال تغداء
عجاج راح يغسل ورجع: والله حتى ابوي مدري به
عيد: ابد هذا هو قاعد عند البقاله ويهاوش الرايح والجاي وكل من يمت لابو نعيمه بصله
عجاج: عساه بس مايزعج الرجال
عيد: انا للحين مستغرب ان ابو نعيمه تراجع
عجاج : الله هداه
................••............
في السوق
عند سلوى ونوره وصالح اللي كانوا يتمشون بأسواقهم البسيطه
صالح وقف وهو يناظر جلابيه كانت كبيييره مره مره مره : اقول سلوى
سلوى ناظرته: هلا
صالح: شوفي ذي!
سلوى طالعتها : وش فيها
صالح : خذيها
سلوى شهقت : ليه
صالح: انتي حامل خذيها توسعين فيها
نوره سحبت الجلابيه اللي كانت xxxl وانفجرت تضحك : ليييه بتكفنها فيها
سلوى: وش شايفني يا صالح بقره لذا الدرجه انا سمنت .
صالح توهق : لااا يا بنت الحلال والله مافيه ازين منتس بس قصدي ان يعني ماتضايقين باللبس
سلوى بغضب : اتوسسسع هاه الله يوسع قبري بس الله يوسعه
صالح: وش بلاتس عصبتي ترا كله قطعه ان بغيتيها خذيها وانا اشوفها زينه
سلوى لفت بقهر: معاد ابي السوق طلعني
صالح: ليه تونا
نوره: انت خليت تونا انت دمرت كل التمشيه
صالح : يا بنت الحلال امزح
سلوى: والله معاد اجلس مانيب جالسه ودني للبيت
حاولوا فيها تجلس ورفضت سلوى ورجعوا وصالح متورط وش بيسوي فيها كيف بيرضيها
.................••............
المغرب
في بيت ثنيان
ثنيان اللي صحى على هدوء تام استغرب ان الترف ما سوت شي وازعجت توقعها نايمه بس الصدمه ان فيه نور خفيف في غرفة الملابس قام وراح فتح الباب وشاف الترف اللي لابسه وجاهزه : الترف
شهقت الترف برعب : بسم لله الرحمن الرحيم
ثنيان: وش تسوين ، وين بتروحين
الترف اللي كانت تقول كلمات مختصره مب مثل العاده تعطيه برنت كامل : لبيت اهلك عندهم ضيوف
ثنيان: وليه ما صحيتيني اصلا ليه ما قلتي لي
غمضت الترف ( بدينا بتدوير المشاكل ) : اول شي انا باقي مارحت! ثاني شي صحيتك وقلت بتنام زياده وخليتك
ثنيان اللي ماعجبته ردودها البارده: ما يحتاج تروحين هذاك جاهزه وخالصه
الترف مسكت راسها وبعدها لفت وهي تنزل اساورها واغراضها واخذت ملابسها العاديه : الحين ابدل واجلس فالبيت خلاص
ثنيان اللي انصدم ما توقعها اخذه كلامه جد ومسكها: خير وش تبدلين وتجلسين امزح معتس
الترف : لا معليك بنثبر واسكت هنا اهم شي لا اقلقك
ثنيان ابتسم وهو يشوفها فعلاً زعلانه: الحين وشوله زعلانه
الترف : ابد لا زعلانه ولا شي
ثنيان وهو ياخذ اساورها ويلبسها : والله ما توقعتك زعول
الترف سحبت يدها : لا والله اجل اتضحك وانت من صبح اللله وانت تصارخ ومعصب ! ومحد فالارض غيرك هذا وانا ماسويت شي ولا تدري خلني ساكته
ثنيان : افا والله زعلتي على كم كلمه قلتها وانا في وقت معصب ومتوتر وانتي تعاندين انا مازعلت على اللي سويتيه فيني الصبح
الترف : انا ما سويت شي انا مزحت معك ! وفيه فرق بين المزح والاهانه
ثنيان: لا لا عاد ما وصلنا للاهانه افا يالترف لهدرجه مرخصه قدرك عندي
الترف : هذا وانا لي قدر مسحت بي الارض
ثنيان : يلا خلينا نقول اني عصبت وغلطت وش يرضيتس
الترف لفت بضيق : ماله داعي
ثنيان : يا شينتس اذا زعلتي تراني ما اراضي الا للي غالي عندي
الترف ماردت وقرب ثنيان يحتضنها : اووه عاد خلاص يا بنت الحلال ادحري ابليس وانا اسف وحقتس علي وش تبين اكثر
الترف : مابي شي
ثنيان اللي يشوفها ماتناظره لفها يناظر عيونها : نقول طاح الحطب
الترف اللي كانت ماتبي تناظره بس ماعاد لها قوه : اخر مره تصارخ علي وانا مالي دخل
ثنيان: على خشمي
الترف ابتسمت: طاح الحطب
ثنيان ابتسم وهو يبوسها بخفه :ايه من بيجي عند اهلي
الترف : مدري يقولون بنت جيرانكم زمان
ثنيان: جيرانا !! يلا المهم خلصتي
الترف : شوي واخلص
ثنيان : يلا بلبس وبروح لامي بطريقي اوصلك
راح ثنيان يبدل وكملت الترف وهي مبتسمه
طلع ثنيان اللي كان يجهز على عادته وطبعا ابتسم لما شاف الترف واقفه جنبه وبيدها العود وتناظره بتمعن
اخذه ثنيان وهو يضحك : خير وش فيتس تناظريني
الترف : احاول أحصل سبب اللي يخليك تأكل نفسك
ثنيان ضحك: والله جاني اللي اشغلني عن نفسي
الترف ضحكت : ما اظن
ثنيان سحب العود وهو يبخرها معاه وفاحت ريحة عطر الترف لما قربت ابتسم ثنيان وهو يشمها : اووه اووه يا ذا العطر
الترف لفت:ليه مب زين
ثنيان: ما توقعت احب ريحة المسك والعود على حرمة ابد
الترف : حدد مدحه ولا سبه
ضحك ثنيان اللي احتضنها : اكيد مدحه
بعدت الترف ورجع ثنيان يقربها : انتظري ابيه عطررك يلزق فيني
الترف انحرجت وبعدت : تاخرنا اصلا
ضحك ثنيان وطلع وهو نسبياً مرتاح ان مافي البيت الا هو والترف بس
................••............
في بيت ابو ثنيان
كانوا الكل عند ماجده اللي كانوا كلهم يحبونهاا ومجتمعين عليها خصوصا ام ثنيان
دلال بهمس لرهام: بتجي الترف
رهام: ايه
دلال: ومنيره
رهام: منيره عند عمي
وقفت رهام ونوف اول ماسمعوا صوت ثنيان
رهام طلعت: لحظه لا تدخل
ثنيان : ما بدخل امي وينها بسلم عليها
رهام : اناديها الحين ، الترف تاخرتي
الترف : وش اسوي
لفت الترف تنزل عبايتها وترتب شكلها ولفت على ثنيان: كيف !
ثنيان:الاحسن ما تسأليني من غير شي قلبي يعورني
الترف: يا شينك ، صدق كيف ؟ بدخل لناس
ثنيان بضحكه: موتٍ حمر
ابتسمت الترف ولفت على على ام ثنيان اللي جات وهي مكشره في وجه الترف سلمت عليها وبعدت بسرعه
ثنيان : كيفك يمه
ام ثنيان: بخير وينك انت من يومين
ثنيان: انشغلت كيف رجولك كيف امورك طيبه
ام ثنيان: حمدلله اجلس اجلس تقهوى
ثنيان: اي والله وقتها
ام ثنيان وهي تخز الترف : اايه من بعد حريمك السنعات مدري وش حالك .
ابتسم ثنيان : بخير يالغاليه بس ابي اتقهوى واروح ، الا من ضيوفك يمه
ام ثنيان: ماجده تذكرها بنت ام سليمان
ثنيان : ايييييه ماجده ماشاء الله هي هنا
ام ثنيان: ايه بعد ما تطلقت من زوجها الثاني سكنت هنا قريب منا
ثنيان: تطلقت !
ام ثنيان : ايه الله يرزقها
ثنيان: اللهم امين
ام ثنيان: عاد بروح واخلي رهام تجيب قهوه
جات رهام ومعها قهوه ومعها عيال ماجده اللي سلموا على ثنيان
ثنيان: ماشاء الله عيال اي رجال ذولي
رهام: زوجها الاول ابو البنت والولد من الثاني
ثنيان: والحين تطلقت
رهام ضحكت: ايييه سبحان الله شوف كيف عيالها اصغر من عيالك .. وقبل تكمل تنحنح ثنيان وسكتت لما انتبهت
الترف اللي كانت تسلم وعيونها طايره بماجده اللي كانت تعذب القلب من جمالها
رجعت وهي تسمع كلام رهام حست فيه شي ونادتها: رهام عمتي تبييتس
رهام :طيب
راحت رهام ومسكتها الترف بالمطبخ : وش تقولين انتي
رهام: وش اقول
الترف: بغيتي تقولين شي وسكتس لثنيان
رهام تورطت : لا ولا شي
الترف: رهام تعرفيني مابي اكفخ
رهام ضحكت :والله سالفه قديمه
الترف : قوليها
رهام : يا بنت زمان امي كانت حالفه تزوج ثنيان ماجده وطبعا ابوي رفض وزوجه منيره وبعد منيره قالت امي بدال مشاعل ماجده بس انخطبت وثنيان تزوج وهي بعد فتره تطلقت وكذا يعني كانت امي تبيها لثنيان
شهقت الترف : وهي متطلقه الحين
رهام : ايه
الترف : ابك يا ويلي ويلاه اللي يطلق ذا المزيونه وش في عقله
رهام : والله مدري
الترف :اقول وخري خليني اروح اصرف ثنيان
طلعت وشافت بنت ماجده عند ثنيان وكانت البنت مزيونه بعد
الترف ضحكت: ماشاء الله جت البنت عندك شكلها تعرفك
ثنيان ابتسم: لا والله معرفها بس جت كذا شوفي يا زينها بسم لله عليها
الترف ( ياليل والله من يوم صار يمدح فالبنت وامه تبي ذا الماجده شكله ناوي نيه عاد الحين فيه خانه فاضيه يا راسي راساه ) : اقول انت ما تقول بتروح
ثنيان: ماتقهويت علامتس انتظري
دلال جت ببتسامه: ثنيان ماجده بتسلم عليك
اتسعت عيون الترف : تسلم وين
دلال : من ورا الباب عاد ثنيان كان صديق الطفوله
الترف لفت تناظر ثنيان وعيونها طايره ( بععد صديق الطفوله ،ابك والله لتطير به)
ثنيان وقف ومسكته الترف : وين
ثنيان: بوقف عشان اسلم
الترف : الله اللي يشوفك يقول مايطلع صوتك وانت جالس اصلا تدري انه حرام تكلم حرمه مب محرم لك
ثنيان: بسم لله يالترف ترا سلام من بعيد وخري
الترف : خلك جالس يارجال
ماجده: ثنيان كيفك
الترف بهمس : ثنيان حاف الله مالك ولد تناديك بأسمه
ثنيان ابتسم : حمدلله بخير انتي كيفك وكيف عيالك واخبارك
الترف بنفس الهمس : وش سلام الشياب ذا
ثنيان لف : سمعتك
الترف ابتسمت : يعني
ثنيان سكتها وهو يسمع ماجده: حمدلله على سلامتك يقولون متصاوب
ثنيان: عدت على خير والله يسلمك
الترف : وش دخلها تصاوبت ولا لا
ثنيان ضحك : وش بلاتس انتي
ماجده: اجل اخليك دمت سالم
ثنيان: الله يستر عليك
الترف وخرت وهي تقلدها : دمت سالم
ثنيان : خير وش محرق رزك انتي
الترف وهي ترجع شعرها ورا: وش يحرقه حمدلله
جات بنت ماجده وهي تسولف مع ثنيان
الترف قربت وهي تقول : حبيبتي امتس تناديتس روحي لها
البنتت: مانادتني
الترف : الا تناديتس روحي لها
رهام : وش فيك عليها خليها تسولف
الترف ( الله ياربي ليته ما طلق مي كان اضمن انه ما بيتزوج وينتس يا منيره وينتس يا مشاعل خليتوني في ذا الحرب )
ثنيان : رهام عطينا شاهي
الترف لفت:وش شاهيه مب تروح لعجاج
ثنيان انتبه لغيرتها واستخرى ببتسامه : لا والله شكلي كسلت
رهام جابت الشاهي وتكى ثنيان: ايه وماجده كم لها من يوم تطلقت
رهام : اووه لها سنه ، وعاد نقلت ذا الشهر هنا عندنا با اخر الحي
الترف ( ايييه كدينا خير ) بهمس: الله لا يحيها
تعدلت الترف : رهام روحي عندهم يمككن يحتاجونتس
رهام : ايه صادقه
الترف : وش رايك دامك بتقهوى نروح البيت احسن ولا نضايق الناس
ثنيان: لا مرتاح هنا وانتي بعد ما تقهويتي روحي روحي ما عليتس مني
الترف ( معععصي الله ما اخليك عشان تلعب على كيفك معصي ) : لا شدعوه بجلس معك
ثنيان اللي انبسط على الاخير ماهمته ماجده بس استانس على وضع الترف وهو يشوفها كل ما جوا العيال رجعتهم لامهم
الترف: ثنيان مارحت لمشاعل
ثنيان اللي تذكر: اووه كنت بروح لها
الترف : لييه مارحت حرام عليك تتركها لحالها وهي مريضه
ثنيان وقف وهو يبي يضحك عليها : اجل خليني بضبط شماغي على ذا المرايه
سحبته الترف: وش تضبط هنا مجلس الحريم تكشفهم
ثنيان بكذب: يووه عادي كانت بنت جيرانا وحافظها
الترف طارت عيونها وهي تخبطه:وش حافظها خير ان شاءالله
ثنيان انفجر يضحك: ياربي تكثر الحريم اللي اعرفهم عشان بس اشوفتس كذا
الترف : اقول توكل على الله
طلع ثنيان وهو مبسوط ورايق ويضحك والتوف دخلت وهي ودها تفجر ماجده ................••............
برا عند ثنيان
اللي قابل سيف وولده واخذه وهو يلعب معاه شوي وبعدها طلع لمشاعل ومن مشاعل لعجاج وصل الحاره ونزل وهو يسلم عليهم وناظر باستغراب في ابو عجاج اللي كان معصب وهو عند باب البقاله واول ماشافه قال : قطع الله ذا الوجه
عجاج نزل من الحوض وجاء يركض : ثنيان تعال تعال
ثنيان: وش فيه ابوك
عجاج : ابد من بعد ما تفركش الزواج وهو مستقعد للحاره كلها
ثنيان: ياساتر
عجاج : تعال بس خلنا ندور شي نسويه ضايقن صدري
ثنيان: انا انا عندي لك خطه رهيبه
عجاج: وشهي
ثنيان: تعرف عايض !
عجاج: وش به عايض ذا صار كابوس
ثنيان: انا اشهد انه كابوس بس بزوجه نعيمه
عجاج : هااااه
ثنيان: اللي سمعت
عجاج : يا رجال انت صرت خطابه كل شوي جايب واحد بتزوجه
ثنيان: لاا بس اشغلني وابيه يتزوج وافتك منه ومن جهه ثانيه نفك نعيمه من ابوك
عجاج : ماشاء لله وش رايك تزوجها انت بعد تكمل الهبه
ثنيان ضحك: لا يا رجال انا بلشان بعمري الحين مابي ازيد خلاص
عجاج : الله ينصرها الترف اللي وقفتك
عيد جاء وهو معاه عوده واغراضه : فاضين ولا
ثنيان: حي الله عيد كيفك بعد خرعة امس
عيد : ماشي حالي خلك مني اقرا على خويك ذا منخلع عقله
ثنيان:هههههههههههههههههههههههههههههههههههههههههههه هههههههههههه اييه عجاج مب غريبه عليه دايم عقله مخلوع
عجاج: على شحم وانت وين بتروح
عيد: معزوم على جلسه محترمه وففيه سامري بعد
عجاج : لا يكون عزيمةحمدان
عيد: اييه عليك نور
عجاج لف : ثنيان تراه يعزمك بعد
ثنيان: ولييه ما قلتي لي اكشخ
عيد :يا رجال ما يحتاج ماشاء الله عليك بس ألبس شماغك ويلا
عجاج : متى زواجه هو
عيد: بعد بكره
ابتدوا يجهزون وكل وقتهم ضحك وتخريب على بعض لما وصلو ونزلوا وهم يسلمون على حمدان
................••............
في بيت ابو ثنيان
الترف اللي كانت تراسل مشاعل وتتطمن عليها
ماجده : اقول الترف
رفعت راسها الترف تناظرها : هلا
ماجده : كم لكم متزوجين
الترف ناظرتها بإستغراب :6 شهور
ماجده : غريبه وما حملتي
الترف احتدت نظارتها لها واعتدلت : ما كتب ربي
ضحكت ماجده : يلا ان شاء الله نعيش ونشوف عيالك
الترف ( جعلتس ما تعيشين ان شاء الله ) : ان شاءلله
رهام بهمس: وش فيك عليها
الترف : ابد طال عمرتس انتظر بس امتس تزوجها ثنيان
ضحكت رهام : لا وييين ارتاحي بس مستحيل
الترف : والله ما يندرى عنكم
نوف بضحك وهي تحارش الترف : والله نظرا لحب جدتي لها توقعي 9٪ و10٪ من خالي ثنيان خصوصا انه عنده مجال
الترف : اقول ورا ما تشربين قهوتس بس
رهام : لا وازيدك من الشعر بيت بيتها قريب من بيتكم يعني قولي بينكم شارع بس
الترف : ماشاء الله صراحه مشكوره
ارتفع صوت ضحكهم عليها ولفت الترف وهي ماتبي تتصل بثنيان ويتذكر ويجي
.
.
انتهى البارت✨