تهزمني السمراء وانا ند فرسان

14

البارت الرابع عشر»
.
.
في قرية الترف وتحديدا في بيت ابو الترف
عند العروووسه عند الترف اللي كانت تراقب التحضيرات والدق من الشباك ابتسمت وهي تشوف صالح معاه سلاحه وجنبيته وهو رايح جاي ومشتط وكأنه يمثل الفرح الددنيا بضحكته لفت تناظر ابوها بضيق وشافته بعد مشتط وعمال ثنيانن اللي معبين المكان والعالم مستانسه رجعت لما سمعت صوت سلوى اللي دخلت بطيرانها ودقها وهي تغطرف وتغني ونوره معها
ضحكت : حرام هالفرح كله على ذا الشايب
سلوى: اسمعيني يالترف انتي اليوم عروس بغض النظر عن المعرس ولازم نفرح ونسوي اللي نبي ولا نخلي العذال يتشمتون كفايه ما سكتوا من اليوم اللي عرفوا فيه انه متزوج لكن ما اكون سلوى اختس ان ما وقفت للعواذل على ساق
نوره: افا عليتس افرحي انتي وانسيه خلينا نستانس وندخل فرحتنا بعيون الحساد
سلوى: عشان كذا جيبي فستانتس ويلا نجهزتس
اخذت نوره الفستان وابتدوا يجهزونها وهي تبكي وكانوا يجهزونها تجهيز بسيط يليق بقريتهم وعادتهم وتقاليدهم الحلوه البسيطه اللي مادخل فيها تكلف الحاضر ولا خرب جمال العادات القديمه الحلوه .................••............
وعند اهل ثنيان تحركوا كلهم ونواف وعجاج اكثر اثنين متحمسييين وويدقون بواري ويغنون
كان ثنيان وعياله وعجاج في سياره ونواف وخواته في سياره ومحمد والبقيه بسياره وسيف وابوه في سياره
محمد اللي كل ما مر من عند نواف يسوي انه يبي يكلمه وهو اصلا يبي يشوف رهام
وشوق اللي عينها على رهام وصلوه على المغرب ونزلوا وهم مصدومين ما توقعوهم بيحصلون كذا ابدا
شوق ؛ وش ذا يا بنات لا انا مستحيل اجلس كذا
نوف: بنات مره بدووو
رهام: بس يا بنات هاذي حياتهم وش فيها ترا اهلنا كانوا كذا
فجر: يمممه يا جلطتها مي يا بنات
مي كان وجهها جدا مصدوم ومشاعل بعد اما منيره كانت عادي هي ودلال
كانوا يناظرون حوش كبير مفروش زل وفيه عقود وناس سمر جالسين
استقبلتهم سلوى : هلا هلا يا مرحبا
ام ثنيان بدون نفس : هلابك
سلوى: حياتس الله ياخاله نوره نوره جيبي كرسي تجلس عليه
قربت وهي تسلم عليهم واخذتهم ينزلون عباياتهم لكن الصدمه لسلوى كانت كبيره طلعت وسكرت الغرفه وركضت لغرفة الترف : هجي هجججي يالترف
الترف وقفت بزينتها وهي خايفه: ىش فيتس
نوره: وش بتس خرعتي البنت
سلوى : وش فيني فيني المزاييين والملح والقبله
الترف : سلوى ترا مانيب فاضيه لتس قولي وش فيتس
سلوى : 10 10 حريمهم جاييين عجزت اركز من الجمال يلقون لق لق وش ذا المكياج وذا الفساتين اقسم بالله نقدت على عمري وليتس شايفه حريم الجماعه كل وحده فمها واصل لركبتها
نوره: في ذمتس
سلوى: تعالي وبتشوفين بعينتس لكن اسمعيني يالترف معهم عجوز قشرا وجهها يسد النفس شكلها امه لكن من الحين اقولتس خلي لسانتس زاهب تعطيتس كله عطيها عشر
سلوى: حسبي للله عليتس
نوره: سلوى اطلعي اطلعي روحي استقبلي
طلعت سلوى وقالت نوره: ما عليتس لا تخافين كل شي بيزييين بس انتي لا تخافين
الترف اللي كانت تبكي وهي ترجف ونوه تحاول تهديها لا هدت وطلعت مع سلوى
................••............
في طرف الثاني من بيت ابو الترف
في غرفة اهل ثنيان رمت شوق عبايتها : يوووه مب من جده خالي اخذ وحده مو هنا شوفوا القرف كيف
نوف: مره اوفر
رهام: والله انا احس بنبسط
ام ثنيان بحده: والله ان قمتي سويتي شي لكسر رجلك
منيره: فكونا من الهواش
مي كانت تغلي تغلي تغلي
طلعوا ومنيره ودلال ومشاعل متجهين لسلوى
دلال : حبيبتي ما تعرفنا عليك
سلوى؛ الله يسلمتس معتس سلوى اعتبر اخت الترف وهاذي نوره بعد تعتبر اختها
منيره: اهلين فيك يا قلبي بس وينها ام العروس
سلوى بهدوء: امها متوفيه وهي بس يعني ماعندها خوات غير حنا خوات دنيا
دلال: الله يرحمها ويخليكم لها
سلوى : انتي شكلكم اخواته
دلال: انا اخته دلال الكبيره وهاذي منيره زوجته وبنت عمي وهاذي مشاعل زوجته
سلوى فتحت فمها بصدمه واستوعبت وهي تقول : الله يحيكم
منيره : تعالي بعرفك على عايلتنا
اخذتها منيره وهي تعرفها وسلوى اللي يوم شافت مي ونظراتها بغت تتوفى راحت من عندهم وهي تقول : نوره من الحين اقولتس زوجته الثالثه تشق القلب وغير ذا شكلها ملعونه خييير اهبيييي يا وجهها احرقتني بعيونه وامه امه اهبييي عجوز قريح
نوره: لا احد يسمعتس اسكتي
سلوى: اسكتي اسكتي جت دويده وامها تعالي نقهرها
وقفت سلوى وهي تقول : حي لله ..وقصرت صوتها : دويده
سوير بغضب : احترمي نفستس
سلوى: اقول وش جايبتس عرس الاكباريه
ام سوير: اقول احترمي عمرتس واذلفي
نوره: اقول خليهم يدخلون فيهم صدقه
دخلوا وسلوى اللي راحت لفرقتها : يا بنات شيلو الحفل ابي كل الناس ترقص
سعديه : ابشري بعزتس
................••............
في الطرف الثاني عن الرجال
عند صالح اللي كان واقف معه نواف وعجاج وكان صالح حرفياً انسان حار وحركي وطول الوقت يشتغل ويستقبل
وثنيان اللي من حرارة صالح يحس انه ارتبك وعجز يجلس
عجاج: وش فيك مشتط
ثنيان: اسمع خلك مع صالح والله احسه شوي ويشب من كثر ماهوب طاير
عجاج: ما عليك اجلس انت بس
سيف وابو ثنيان وبندر كانوا جالسين بهدو
محمد لنواف : حلوه الاجواء غيرنا جو والله
نواف : اموت في ذا الاجواء ياخي شف الناس مسفهله ويرقصون مب نفسياتنا
محمد : اقول تشوف ذاك اللي جالس جنب الشايب
نواف : اييه هذا راعي البقاله يعني ابوه عنده بقاله
محمد: شعرفك
نواف: امس كنا هنا
محمد: المهم تشوف شلون يخز ثنيان
نواف: ايييه من امس ترا صالح يقول عليه قل صح ( مجنون شوي)
محمد : والله مدري
................••............
عند الترف
كانت على الشباك وهي تراقب شافت ثنيان اللي واقف بشموخ وفرح شافت اهله وكانت تناظر جماعتها بضيق
دخلت نوره: الترف هاه كيفتس
الترف : نوره انا وش وداني لذا الناس انا وين وهم وين رجالهم بس يكفون يوروني انا من
نوره: الترف لا تقولين شي انتي ما رحتي لهم ولدهم جاء وطلبتس مب ذنبتس ابد
الترف وهي تشهق ببكى : نااظري يا نوره بس ناظري
طلت نوره وهي تفهم زين شعور الترف ورجعت وهي تحضننها : لا تفكرين ابد اجلسي واستغفري وتفرج صدقيني ................••............
عند الحريم كانت سلوى شايله العرس شيل وراحت لسعديه وهي تقول : هاتي اهداء لاهل المعرس
وابتدت سعديه وهي تدق بحماس وقامت دلال ومنيره ومشاعل
ودخلت نوره وكل وحده ترقص من طرف وقامت نوف وشوي فجر رهام كانت تصفق بحماس اما شوق ومي وام ثنيان جالسين بقرف
وشوي شوي دخلوا الناس والرقص زاد والدق احتمى وسلوى ونوره يجاكرون اللي يكرهون الترف
ومنيره ودلال ومساعدينهم ومشاعل اللي مافوتت اي فرصه عشان تقهر مي
وفي لحظه غير متوقعه قامت سوير ترقص ولما وقف الدق قالت : اقول الله يعينهم على الشيفه
الكل سمعها والكل ناظرها لكن قالت سلوى لسعديه تغني وانطلقت لسوير وهي تسحبها ورمتها برا الحوش : انقلعي يا دويده لبيتكم لا اتوطى ببطنتس يلا
سوير اللي صارت ترمي الحجر من فوق الحوش وتسب محد قدر يرقص
رهام:وش فيها ذا المجنونه
شوق : واضح ان الكل مجنن
نوف ؛ بس فله
مي : يالله منتهى القرف كيف ثنيان يتقبلهم
رهام: والله يعتبرهم عسل على قلبه مقارنة في زواجه منك
مي : احترمي نفسك
رهام: وخري بس
سلوى اللي لبست وطلعت ومسكت وكفختها والكل يناظر بصدمه ودقت على صالح يجي يخليها تطس
وراحت سوير بعد ما فضحتهم
ورجع الضحك ورجع الرقص والوناسه والكل مبسوط كان الزواج بالنسبه لاهل القريه ملكي واول مره يكون عندهم زواج بذا المتسوى اما بالنسبه لاهل ثنيان عادي عادي عادي واقل جدا من عادي ................••............
الساعه 9 والكل كانوا مبسوطين والرجال اللي دق السامري ورقص ووناسه للحظه نسى ثنيان نفسه مع عجاج ورقص وطبعا اهله كانوا في صدمه
محمد : يا رجال اخوك ذا لا يكون صكه زار
نواف : لا لا معليك هاذي شخصية ما نعرفها
ابو ثنيان: سيف اخوك علامه
سيف: اخذ العرق بسرعه يا يبه
اما عجاج وثنيان نسوا كل شي وهم لقو صالح واهل الحاره اللي كانوا محترفين سامري وبعد تعب جلس ثنيان وهو ياخذ شماغه
وجاب نواف العود : تبخر تبخر
تبخر ثنيان وهو يقول : كيف شخصيتي
نواف بضحك: الجديده رهيبه
ثنيان: شخصية غترتي
عجاج جلس وهو يزبطها: خل عنك بس اناا اعرف الشخصيه اللي يحبونها الخوال
محمد: انت اعرف هههههههههههه بس هاااه لا ترجع معرسنا علينا
عجاج: معليك عندي خلع على طول
دفه ثنيان ووقف وهو يشخص ويناظر ساعته وجاء صالح : جاء وقتك يامعرس
ثنيان ببتسامه : ابشر بس ابي مرايه ولا شي
صالح ابتسم وهو ياخذه للمجلس ودخل ثنيان وعجاج معه ................••............
وعند الحريم بعد اللي صار وقال صالح ان ثنيان بيدخل قررت سلوى تعطيهم اخر رقصه وتسوي تسجيل دخول
راحت لسعديه : اسمعيني الحين عطينا يالعود الازرق
سعديه : كفووو بتسوين تسجيل دخول القبيله
نوره: ايه بنسويها
سلوى: ياخي اهله ميتين بس ثلاثه اللي يرقصون بنفضهم بهالرقصه قبل يدخل المعرس
سعديه: من عيوني
حمت الطار سعديه وانطلقت( يالعوووود الازرق ايه ياثنيان يالعووود الازرق
وهنا سجلت سلوى ونوره تسجيل دخول من العيار الثقيل وهم يلفون لف فالحوش وهالمره قاموا اهل ثنيان كلهم الا مي حتى امه قامت )
في طرف ثاني عجاج اللي سمع الدق وسمع الرد واخذ المجلس رققص وثنيان طبعا ما صبر هو الثاني
وسعديه االلي حولت مدح لترف (الترف يا مشخص الحكام لا لبسوها الذهب تزاها تستاهل اللي جبينه سيف ويستاهل الدانه المصفاه )
والكل قام الدنيا صارت حماس ورقص ومن طرف ثاني ثنيان اللي بالقوه مسك نفسه وعجاج مكمل ويصارخ بحماس
وطبعا وقفوا وجاء وقت دخول ثنيان
................••............
عند التررف دخلت نوره وهي تشيك عليىها لاخر مره
الترف: جاء
نوره: ايه
الترف : نوره ادعي لي
نوره :معليتس انا ما انساتس من دعاي
دخلت سلوى بالعود وهي تبخر الترف وسلمت عليها بفرح وسلمت عليها نوره
وطلعوا
وعند ثنيان اللي دخل هو وصالح وابو الترف قبل يفتح الباب صالح قال : خذها امانه وحطها بعيونك
ثنيان ابتسم: في عيوني لا تخاف
فتح الباب والترف اللي جالسه ببساطه وعينها فالارض ورجفتها واضحه
للحظه كان صالح وده ياخذ ثنيان ويرميه برا اما ثنيان ابتسم ابتسامه عريضه لما شاف الشي اللي دور عليه
شاف البساطه الجمال الطبيعي الهداوه المنظر اللي يشرح الصدر لكن كان ناقصه ان الترف تناظره بعيونها اللي من اول يوم جابت راسه
دخل وتقدم وهو يبوس راسها ولف ابو الترف وهو مو متعود وسلم على الترف ووصاها شوي وطلعوا
وبعدها على طول دخلوا اهل ثنيان اللي وقف يسلم على امه واهله لكن كان يسلم وهم عيونهم طايره فالترف بصدمه كان واقع الترف معاكس جدا لواقعهم الحضاري
لكن الكل كان ملاحظ جممال ملامح الترف رغم انها كانت بسيطه سلموا
ما عدا مي اللي اول ماشافت الترف اتسعت عيونها بصدمه وداخت لا شعورياً مسكتها منيره: مي وش فيك
مي اللي كانت تناظر ثنيان بصدمه بس توجهه لها ثنيان وحواجبه اللي قطبت بغضب وقال : مب وقت افلامك توكلي يلا
لف وهو يقول : سلمتوا يلا الله يستر عليكم
طلعوا كلهم والترف اللي كانت كلمته هاذي سببة لها رجفه لدرجة انها كانت تحس انها بتغيب عن الوعي بأي لحظه
ثنيان اللي يحس انه من فرحته ما قدر يتمالك نفسه كان وده يضحك بكل صوته بس اخيرا ضبط نفسه وتقدم وجلس ببتسامه : كيفك يالسمراء
كان وده يلاطفها لكن رفعت راسها الترف ونظرتها حاده وفهم ثنيان انه جاب العيد ضحك : حبيت امازحك شوي لكن خليني اقول كيفك يالترف
ماردت الترف اللي صدت وكان ثنيان يحاول يتكلم ممعها بس ابد كان بس ترجف
وقف : اجل خلينا نطلع للفندق
لا شعورياً قالت الترف : لا
ثنيان : كيف !!
الترف : انا بجلس انت روح
ضحك ثنيان : افا عروس تترك عريسها
لا شعوريا الترف مسكت راسها وهي تحس خلاص بتموت انحنى ثنيان : اذكري الله وسمي بالله ومافيه شي يخوف بناديهم يساعدونكك لا تخافين
طلع وكانت سلوى متغطيه واقفه هي ونوره صد وهو ييقول: ساعدوا الترف
ركضوا ودخلوا : الترف وش فيتس
الترف :مابي اروح تكفون
سلوى: بسم الله عليتس قولي لا اله الا الله وش بتسوين هذا رجلتس ولازم تروحين
الترف : نوره تكفين خبيني
نوره: الترف حبيبتي قومي سمي بالله وروحي
دخل صالح وهو يسحبها من بين يديهم وحضنها وهو ياخذ عبايتها بيده الثانيه : الترف ناظريني يا اخت صالح عمرتس لا تخافين من شي وانا وراتس سمي بالله روحي مع رجلتس واذا ازعجتس بشي دقي علي وشوفي كيف بلعن خيره
ابتسمت الترف من بين دموعها وطلعت لثنيان اللي كان يسمع كلامهم ببتسامه وركبوا وهو يشوف عجاج اللي ترأس فرقة السامري وهو يدق لثنيان لين راح
كانت الترف تسمع ضحكه وتشوفه وهو يرقص لعجاج قبل يركب صدت وهي تبكي بصمت
ثنيان كان يسمع بس مايدري وش يقول قرر انه يسكت لين يوصلون .................••............
وطبعا انتهى العرس بالنسبه لاهل ثنيان اللي تعشوا وبسرعه طلعوا ماعدا نواف وعجاج ومحمد اللي مايبون يتركون الفله ابد
وفي السيارات والكل كان ينتقد ويحس الا منيره دلال ورهام مبسوطين
وعند سلوى ونوره اللي بعد ما انتهى عرس الحريم جلسوا بالحوش وقدامهم القهوه والحلا
سلوى: ااااخ يا دويده والله والله اني لغسل شراعها بس اصبري لين بكره
نوره: ليتس ما كفختيها قدام الناس
سلوى: الا تستاهل بعدين اهل ثنيان ما اعجبوني يادوب منيره ودلال ومشاعل وهاذيك اخته الصغيره وش اسمها
نوره: رهام
سلوى : ايه خليهم يدرون من ورا الترف
نوره: حبيبتي الترف الله يوفقها كاسره خاطري
سلوى: تكفين اسكتي ترا بكيت لين قلت امين
نوره: اقولتس زوجاته غريبات
سلوى: يمكن معه حق يوم تزوج عشان كذا راضين
نوره: واضح يحبونه اما هاذيك السامجه
سلوى: ايه ام براطم
نوره : ايييه زوجته الاخيره اهبي يا وجههها
سلوى: ما عليتس دام منيره ومشاعل طيبات ماعليتس هاذي مقدور عليها
نوره: بس مزايين
سلوى: لا لا مزايين مزايين الا يشلعون القلب
نوره: بعد رجلها مزيون
سلوى : اسكتي تكفين قلبي يعورني العايله كلهم مزاايين
مرره: حق يسمعتس صالح
سلوى: اه الله يكون بعونه صويلح ضايق مره بس يبي يوسع صدره
شهقت نوره: اييه نسيت اقولتس نص اهله ماراحوا جلسوا يرقصون برا
سلوى : وجععع وساكته
ركضت سلوى ونوره يراقبون الرقص ويضحكون
................••............
وصلوا الفندق ونزل ثنيان وهو يفتح الباب للترف وطلعوا للجناح نزل ثنيان بشته وجلست الترف
ثنيان : خذي راحتك واستقري وانا بجيب العشاء
الترف انتظرته يطلع ووقف وهي تسمح دموعها بغضب ناظرت المرايه وهي تشوف شكلها واتجهت لشنطه وهذ تطلع اشنع شي عندها طلعت قميص روز وقددييييم مره مره لبست وهي تجمع شعرها الطويل لورا مسحت المكياج الخفيف اللي ما اخفى ملامحها بالعكس كانت ملامحها الحلوه حتى من بعد ما زالت المكياج موجوده
ناظرت نفسها : وشلون اهلق عمري شلووون
تذكرت انها حطت الفكس فالشنطه ركضت واخذته وهي تبتسم : ايييه ايييه هذا والله اللي بينفعني اوريك ياذا الشايب اذا ما صكيت خشمك بريحته ما اكون الترف
مسكته وهي تحطه على جسمها : اووووه يا ريحه الخايسه صرت كأني ام راسين ( عجوز من الجماعه ) بس هين ان ما نكدت عيشتك يالشايب
ضحكت على شكلها وهي تروح اخذت اللحاف وهي تفرشه بالارض وانسدحت
في لحظتها دخل ثنيان وصد بقرف من ريحة الفكس لكن طارت عيونه وهو يشوفها منسدحه على الارض دخل العشاء
والترف اللي حست بدخوله توترت بس تشجعت وهي تقول في نفسها ( يا انا يا انت ) نطت اول ما قرب ثنيان وشهق لما نطت: بسم لله
الترف اللي بالقوه نطقت :جبت العشااااء ابطيت علي ذبحني الجوووع
ركضت هي تفتح اغطيه الاكل ( ماكانت الترف جوعانه وما كانت تحب الاكل بس تبي تقرف ثنيان بأي طريقة )
ثنيان اللي كان مصدوم من كل شي ما عمر احد قابله بذا الشكل او بذا الريحه او بهالهمجيه
جلس بصدمته ولفت الترف وهي تتكلم وفمها فيه اكل : وش فيك جالس تعالي اكل لا تستحي
الترف كانت مصره انها تقرفه وهي اصلا متقرفه من نفسها وطريقتها بس مجبوره تكون كذا معاه وماهي مرتاحه له
ثنيان اللي وقف وجلس شوي بعيد وهو يحاول يستوعب وقفت الترف وهي تغسل ورجعت تنام على الارض ثنيان اللي غص : بتنامين على الارض
الترف : ايه
ثنيان : لا لا محب انا ذا اللي فالسماء ( تقصد السرير ) ابي انام فالرقه ( الارض ) ازين
ثنيان اللي راسه صدع ( اييه كدينا خير )
رجعت الترف تتغطى وهي تضحك بشويش ( بارك الله في ام راسيين اشوى تعلمت من عجازتها شي )
راح ثنيان ينام وهو مصدوم ويراقبها بصدمه ونامت الترف وهو يناظرها بعدم استيعاب ملامح وجهها تدل انها لطيفه اخلاق وانسانه راقيه
نام بدون ما يحس من هول الصدمه
.................••............
ومن بكره الصباح فتح ثنيان عيونه على احد دقق جبينه بأصابعه فز اول ما شاف الترف اللي كانت ناكشه شوشتها وجالسه قبال وجهه
ثنيان : بسم الله وش فيك يا بنت الناس لاصقه بوجهي .
الترف : قم قم قيللللت القايلله وانت نايم
جلس ثنيان وهو يناظر الساعه اللي كانت 8
نثيان : اي قايله يامسلمه تونا 8
الترف : يا فضحنا والله لو يدري ابوي انك نايم لين ذا الوقت ليذبحك
ثنيان اللي كل شوي تجيه صدمه : اسمعيني بدري الناس روحي نامي
الترف قامت وهي تفتح الشبابيك وتففتح باب الجناح نط ثنيان وهو يسكره : انهبلتي وش لك بالباب تفتحينه
الترف اللي كانت تستعبط : حنا بدو بابنا ما يتسكر
ثنيان : حبيبتي بابكم ما يتسكر اذا رحتي الديره هنا لا لا
الترف : زين
رجعت تجلس وهي تشوف وجهه المفجوع المصدوم
رجع ثنيان للحمام وهو يغسل وجهه وقف يناظر المرايه ( شكلك طبيت مطب يا ثنيان )
تروش وطلع وقبل يطلع طل وشافها ترتب وتنظف وراحت وهي تنكش شعرها زياده ( هاذي وش تسوي )
طلع وهو يطلب الفطور وجلس وهو يراقبها واضح توترها بس حركاتها غريبه
................••............
في بيت ثنيان
عند منيره ومشاعل اللي كانوا جالسين يفطرون
مشاعل: منيره ما تحسين زواج ثنيان غريب شوي
منيره: والله اني في صدمه صح غريب بس سكتتني فرحة ثنيان
مشاعل فجاءه انفجرت ضحك: اقولك مي وعمتي الضغط فلللللل
منيره ضحكت؛ كله كوم ولما داخت كوم ثاني
مشاعل: بس سكتها ثنيان
مي جات من ورا : خير ان شاء الله وش ذا الضحك
مشاعل: ليه نضحك من جيبك
مي : اقول اسكتتي بس وخليك بنفسك
مشاعل: بسكت بسكت اصلا انا سلمت العهده للترف وهي تعرف تسكتك
مي : مين مين السودا هاذي بتسكتني
مشاعل: هههههههههههههههههههههههههههه حبيبتي من الحين اقولك هالسوده على قولك اذا ما مشتك على العجين ما تلخبطينه لا تسميني مشاعل
تركتها مي ورجعت وهي مقهوره
منيره: الله يصلحك بتشبين نار بينهم
مشاعل: تكفين يا منيره انا اكثر وحده استانست اخيرا بتجي وحده تلعن خيرهم سوا
ضحكت منيره ومشاعل اللي تحكي بحماس

.
.
انتهى البارت✨