تهزمني السمراء وانا ند فرسان

20

«البارت العشرين»
.
.
طلع ثنيان وهو يشوف عجاج واسرع وهو يسلم عليه بحراره : حي الله المزيون
عجاج بهمس : يارجال لا تغزل ابوك مب طايقني من دون مب تغزل
ضحك ثنيان : اي والله نور المخيم
عجاج: متاكد
محمد : ههههههههههههههههههههه اي والله
حمود الصغير : يبه يبه بنسوي الملعب الصابوني
ثنيان: لا لا بعد الغداء مب الحين
محمد : ثنيان صاحي جايب ذا بعز البرد
ابو ثنيان: الله يصلحك بتذبحهم به
نواف : لا والله بيجي فله
محمد : لا يكون بتلعب معهم
نواف : حبيبي كلنا بنلعب اتركوا النفسيات بس
ثنيان: نتغداء ونتفاهم
بعد الغداء دخل ابو ثنيان ينام واما ثنيان والباقين صلحوا الملعب ودخلوا فيه وابتدوا يلعبون ولا قصروا في بعض كل واحد يصقع الثاني ................••............
وعند البنات
نوف اللي كانت تراقب : يوووه تكفون نبيه نبي نلعب
دلال : وش تبين ياخبلله تبين تكسرين
نوف : والله حماس
رهام: انسيه من يوم صار عندهم
منيره: الله يستر عليهم من البرد بس
مشاعل: من ذا اللي معهم
منيره: هذا عجاج
مي : لا مو من جده ثنيان مصاحب ذا الاشكال
مشاعل: ليتك تسكتين بس ، والله اني اول مره اشوفه
دلال: يا حليله قلبه ابيض لكن الله يهدي ابوي
الترف : انا بروح انام شوي
مشاعل: كلنا بنروح والله
................••............
وعند العيال
الكل مصدومين من هبال ثنيان وعجاج
عجاج : خلاص تكسرت الله يصيب العدو
ثنيان : والله كويس ذا الملعب
نواف : عجاج والله لازم نعطيك براءة اختراع
عجاج : ليييييه
نواف: طلعت لنا اخو جديد
ثنيان:بدينا بالحكي الماصخ
محمد : بس بنصحك خلك مثل ما انت عند عمي لو شافك ذا بينهار
عمر : يبه انا بردان
محمد : وانا تعبت
ثنيان وقف وهو يشيل عمر : حمود تعال
عجاج : اقول يا ام العيال جيب لي معك شي اللبس
ثنيان: متاكد تبي شي من عندي
نواف : لا وين بيروح بحر تعال انا اعطيك
................••............
داخل المخيم
دخل ثنيان وهو يدور عليهم شاف الكل نايم دخل لمشاعل وهو يصحيها بشويش لعمر وصحى منيرت وراح يدور شنطته وبدل ورجع للعيال
محمد اللي بعد تعب نام ونام نواف ومابقى الا عجاح وثنيان
عجاج: ايوه وش صار معك
ثنيان: ابد سلم الله يمينكم يالخوال الواحد مايمزح معكم
عجاج: ليه
ثنيان: والله لو تشوف عيونك وش سوت بنتكم في مي انك لتنفجع
عجاج: تكفى قولي انها كفختها
ثنيان: سلامات ياخوي اشوفك فرحان
عجاج: والله اني ما اداني مي ذي
ثنيان طارت عيونه : لا والله عطيتك وجهه من طلب منك تحبها اصلا
عجاج : يارجال كمل بس وش مسويه مي ذي
ثنيان اللي حكى كل شي وعجاج مصدوم : ياخي ذا البنت مب صاحيه بس زين تسوي فيها
ثنيان: والله اني انكسر خاطري على مي بس عاد الترف معها حق اصلا حتى لو بعصب عليها مقدر اقولها شي
عجاج: لا بس قويه
ثنيان: والله اني لو بقولك افهمها اني اكذب عليها عجزت استوعبها عوبا وقويه ومسكينه وكل شي فيها
عجاج: والله مصيبتك وانت تحمل
ثنيان: متحمل والله غصب علي
عجاج : طيب وبندر !! وش بتسوي
ثنيان: لا تذكرني فيه يجيني غثيان اذا تذكرته
عجااج: وبتخسر اخوك
ثنيان اللي انفعل : تكفى تسكت اخوي خسرني من زمان لكني اداريه بالقوه ترا للحين ما نسيت افعال ثريا فيني وسيف متكتف ويراقب
عجاج : والله ياخي عجزت افهم وضعكم بالضبط
ثنيان: والله اذا بسكت هالمره بسكت عشان اضبط وضع الترف مع امي وابوي والباقين ماهموني
عجاج: اقول ماودك تطلع الترف لبيت لحالها لاني احسها بتقضي على مي
ثنيان: لااا الترف متصافيه مع منيره ومشاعل وبيموتون على بعض المشكله هي مي
عجاج : لا تقول بتطلق
ثنيان: لا وين بس بشوف حل اكيد لاني احس ان مشاعل بعد بدت تفور من مي ومنيره بعد
عجاج : الظاهر ان الترف بتسوي في بيتك مظاهرات
ثنيان ابتسم وهو يسمع تحليلات عجاج
................••............
والعشاء
بعد ما الكل صحصح كانت الترف تسوي القهوه في المطبخ
دخلت دلال : يعطيك العافيه
الترف : يعافيك
دلال: لمين القهوه
الترف : ابد صحيت وشفت عمي جالس بلحاله قلت اسويها واروح له
دلال ابتسمت :اجل انا بناديهم ونجي عندكم
اخذت الترف القهوه وراحت :سلام
ابو ثنيان رفع راسه باستغراب : هلا وعليكم السلام
جلست الترف : شفتك جالس بلحالك قلت اجيب قهوتي واجي
ابو ثنيان: حياك الله
الترف صبت القهوه وهي تحاول تفتح معاه سالفه وتسولف وابو ثنيان اللي كان يلامس في سوالفها الماضي الحلو وابتداء يسولف على خفيف
وشوي جو الكل وجلس وهم يشوفون الترف مسترسله تسولف
ام ثنيان اللي كانت تحاول تطنشها عشان خاطر ثنيان .................••............
في قسم الرجال
عند ثنيان اللي كان نايم بتعب ولا يدري عن التخطيط
نواف : بس اخاف يعصب
عجاج: يا رجال ما عليك منه ما هو معصب عنيي
محمد : بس بيصحى
عجاج: اخذوا عياله ودوهم بعيد
نواف : اصلا كيف بنشيله
عجاج : المشكله ان نومه خفيف بعد بيصحى
محمد : ااخصلوا قبل يصحى ابوي
نواف : المشكله مب انه يصحى البلا ذا الجثه ما تنشال
عجاج : ماعليك بنعد لين ثلاثه ونقشه ونركض فيه اذا قدرنا نركض ونرميه فالملعب لكن اهم شي لا يوقف اذا شفتوه بيوقف دفوه لين اجيب البخاخ
محمد : والله اني احس انه بيكفخنا
عجاج: التكفيخ خذلك تكفيخ بس اهم شي سعة الصدر
نواف : يلا اجل
محمد : يلا
وبسرعه ركضوا الثلاثه وهم يشليون ثنيان ويركضون وهو ماصحى الا بنص الركض وهو مفجوع ورموه فالملعب وتزحلق لاخر الملعب وهو مايدري وش صاير قبل يوقف دفه نواف وركض له محمد قبل يوصل ودفه وعجاج اللي ركض وهو يجيب بخاخات ثلجيه وقبل يوقف ثنيان بخها عليه وثنيان اللي يصارخ مايدري وين يروح
والباقين يضحكون وبعد ما خلصت البخاخات هجو وثنيان يركض وراههم ويطيح مايدري وش صاير
وطاح اخر طيحه وهو ييلعن فيهم
عجاج : ذبحك النوم قم قم
ثنيان: قامت قيامتك يالسحليه هييين هين اوريك
نواف:ههههههههههههههههههههههههههههههههههههههههههههه ههههههههههه شكلك رهيبب والله
محمد اللي كان يصور ويضحك
ثنيان: والله ما اخليكم طيب طيب
وقف ثنيان وهو يعرج وهم يضحكون وراح يغسل وجهه وطلع متجهه للقسم الحريم عشان يلبس
دخل وهو يشوفهم جالسين بس استغرب ضحك ابوه وابتسم لما شافت الترف هي اللي تسولف: ماشاء الله ضحك وسوالف ومخليني عند المجانين
دلال: بسم الله وش فيك كذا
ثنيان: ابد مصخروني جيت
ابو ثنيان: ادخل اللبس لا تبرد ادخل
مشاعل: تروش بمويه دافيه عشان ما تمرض
منيره: خذ شاهي حار
ثنيان: بتروش واجي بس تعالي يالترف طلعي لي ملابس
الترف اللي وقفت وهي تمشي جنبه وهمست: كأنك اخذتها حلا
ثنيان : ترا ما مافي يدك نقش الحنا
الترف : ياخي مافيه الا انا
ثنيان: فيه مي اقدر اناديها اذا ما تبين
ناظرته الترف بطرف عين : اقول ادخل ادخل
دخل ثنيان يتروش والترف طلعت الملابس وجلست طلع ثنيان بعد ما لبس : حسبي للله عليهم
الترف : من لاعب فيك انت
ثنيان: العيال يقالهم مسوين مقلب قسم بالله قمت مثل المجنون
حكى اللي صار والترف تضحك ثنيان: تضحكين بدال ما تفزعين لي
الترف : افاااا ابشر بعزك وش تبي بس
ثنيان: دوري لي شي اسويه لهم
الترف جلست وهي تفكر ونطت وركضت للمطبخ وثنيان معاها : وش بتسوين
الترف وقفت وهي تقول : انت كيف تبي تنتقم بقوه ولا بشويش
ثنيان: اوصخ فكره في مخك عطيني اياها
الترف : شوف هذا الكيس نظفنا الذبيحه اليوم فيه يعني كل شي يجيب الغثيان فيه
ثنيان ابتسم : ابد عطيني شي احطه فيه
اخذ كروانه وهو يكب الكيس فيه وصد وهو يكح : وععع
الترف : اصبر بالله
راحت وهي تجمع كم حاجه تجيب الغثيان زياده وحطتها
ثنيان: ياااوك كيف بشيلها هاذي
الترف : ماعليك اهم شي النصر
اخذ ثنيان طرحة الترف وهو يلفها على وجهن والترف االلي تخبط على كتوفه : ايه ايه اهم شي ماتسكت عن حقك
ضحك ثنيان وطلع بشويش ومن حسن حظه كانوا كلهم بمكان واحد ولا حسوووا الا باللي انكب عليهم من شحم واشياء😷
وانتشر صارخهم في كل مكان وثنيان رمى الكروانه وهج .................••............
وعند الترف اللي رجعت وهي فيها ضحك
منيره: وين ثنيان لايبرد الشاهي
الترف : بيجي الحين
ولما سمعوا صراخهم اللي اختلط بضحك ثنيان ضحكت الترف : هذا هو جاي
وفعلاً جاء ثنيان اللي كان يركض وهو يضحك وطرحة الترف على رقبته جلس وهو يضحك
ابو ثنيان: ولللد انت وشبك وش ذا الصراخ
ثنيان:هههههههههههههههههههههههههههههههههههههههههههه هههههههههههه ولا شي يبه اخذت حقي بس
نوف: تكفى خالي وش سويت
مي بحقد: وش ذا اللي على رقبتك
ناظر ثنيان وهو يضحك وطلع الطرحه وهو يعطيها الترف اللي اخذتها وهي تضحك
رهام : وش سويت تكفى
نواف اللي يصرخ: الله لا يعطيك العافيه
عمر اللي جاء يركض وهو يضحك: يا بابا محمد يرجع
منيره فزت: وش فيه
ثنيان:ههههههههههههه مافيه شي يا مناير اجلسي نمزح نمزح
ام ثنيان: لايموت الولد وانت تمزح
حمود جاء هو بعد : وعععع يا يبه عجاج بيموت هناك وهو يغسل
ابو ثنيان وقف وهم مو متعودين على مزح ثنيان: ثنيان وش صاير
ثنيان وقف : يا يبه مزح اجلس الله يهديك
عجاج : ان كنت رجال اطلع
ثنيان : بالله كيف شعورك
محمد واللي بعد ماشاف المنظر جلس يرجع وقف وهو يغسل : حسبي لله مالقيت الا ذاااا يالدفش
طلع ابو ثنيان وانصدم من اللي شافه : حسبي لله هذا وشو ثنيان ثنيييان
ثنيان اللي جاء يركض وهو يضحك
ابو ثنيان: امشوا كلكم نظفوا ذا
ابو محمد اللي كان بالمجلس وهو ينادي : ياااااا محمممممممد يااا مححححمد
محمد ركض لابوه يعطيه دواه وركض يتروش وهو يشوفهم ينظفون ويضحكون بنفس الوقتً
................••............
عند البنات
نوف : الترف وش مسوي خالي
الترف : انتقم بس
مشاعل: يا بنت الحلال وش اللي صار
الترف بدت تحكي وهي تضحك والكل منصدم وبعدها انقلب ضحك وطلعوا وهم يشوفون العيالل اللي صار الوضع عندهم مقالب ولعب
وابو ثنيان اللي جالس مع ابو محمد ويناظر فيهم مره يضحك ومره يعصب ويهاوشهم
وبعد ما انتهى اللعب والكل تعب وانهد حيله من الركض وبعد العشاء وابتداء المخيم يعم عليه الهدوء شوي شوي
وقف عجاج وهو يقول : ثنيانوه ترا ماعندي فراش
ثنيان : افااا وش ماعندك فراشي تحت امرك
عجاج: اعترف ياخي وش عندك صاير كلامك معسول
ثنيان: معرس ياخي معرس
عجاج: اقول والله الكلام معتمد على عرسك كان صار علوم ، المهم وين بتنام انت
ثنيان: انت خذ الفراش ونم وانا بدور لي فراش واجي
عجاج اللي نام من التعب وثنيان طلع يدور له لحاف ما حصل في قسم الرجال ابد
ودخل لقسم الحريم والاغلب نايم ماعدا نوف ورهام اللي صاحين
ثنيان : شعندكم صاحين
نوف : نايمين اليوم
ثنيان: زين عندكم لحاف زايد
نوف: لا والله انا ماعندي وبنام مع رهام دورت من شوي وكانت منيره وحمود في لحاف واحد ومشاعل وعمر في واحد ومي اصلا لحافها خفيف واخذت فروتك والترف توها قامت عاد مدري عندها ولا لا
ثنيان : وينها الترف من بينام معها
رهام : هنا بذا الغرفه وحنا اللي بنام ليه
ثنيان : لا اسال بس ادخلو لا تطولون بالبرد
نوف : ططيب
دخل ثنيان وهو يدور على الترف اللي كانت بزاويه ثنيان : الترف نايمه
تحركت الترف اللي كانت مابين نوم وبين صحوه : يعني وش فيك
ثنيان: معك لحاف زايد
الترف : لا ليه
ثنيان : عطيت عجاج فراشي وجلست كذا
الترف : وش ذا الفزعات الغلط وين فروتك
ثنيان: اخذتها مي
الترف : وش بتسوي
ثنيان ابتسم وهو يدخل معها بنفس اللحاف : ابد بنام معتس
الترف : ضاقت الوسيعه
ثنيان : لا يا شيخه تراني زوجك المفروض تحتويني
الترف : روح لمي تحتويك هي تعرف تحتوي اكثر
ثنيان : للله الله وش ذا النبره
الترف وهي توخر شوي : سلامتك
ثنيان سحبها وهو يرجعها قريبه منه : وين بتطيرين
الترف تورترت : ما تقول بتنام نام يلا
ثنيان : ايه بنام بس لا تعطيني ظهرك
الترف : ليييه بيجيك الحرامي
ثنيان : اييه بيجي ناظريني عشان ما اخاف
الترف اللي تورطت ورطت عمرها ولفت وهي تناظر تحت ما تناظره لكن ثنيان اللي كانت نظراته صريحه وهو يدقق في كل تفصيل بوجهها ويده اللي تلعب بشعرها بهدوء لين ما طغى عليه النوم ونام .................••............
عند نوف ورهام اللي انتظروا ثنيان يطلع بس ماطلع
نوف : شكله نام عندها
رهام: شكله الله وش نسوي كيف بناخذ اغراضنا
نوف : اسمعني ندخل وناخذها ونطلع
رهام: ياختي مقدر انا ادخلي انتي وانتي مغمضه وخذي الاغراض واطلعي ركض
نوف : اذا شفت شي محجوب
رهام وهي تضربها: اقولك غمضي لا تستهبلين
نوف : واذا كشفوني والله بيذبحني خالي
رهام: هو سأل وقلنا له احنا بنام عندها
نوف : طيب خلاص بدخل بسرعه واطلع
رهام : يلا
دخلت نوف وهي ماتشوف من الظلام وتتخبط بالقوه حصلت فراشهم ورفعته بسرعه وهي مغمضه وركضت لكن ماتدري وش كانت تركض عليه وفجاءه صرخ ثنيان وصرخت الترف ونوف اللي من الخبصه طاحت وطاحت عليهم وهي دعسستهم بالغلط وهي تصرخ معهم
الترف : يمممممه وش ذا ثنيااان
ثنيان اللي كل ما حاول يقوم طاحت عليه نوف زياده وفجاءه حست انها نشبت بينهم وهي تحاول تنحاش ودعستهم زياده
رهام اللي سمعت المعركه االلي صارت ولما سمعت صراخ تاكدت ان نوف ياشافت شي او طاحت عليهم وجلست وهي تضحك من كل قلبها
ونوف اللي في نص الصراخ جتها نوبه ضحك بالقوه وقف ثنيان وهو مايدري وش ذا اللي جاهم والترف تصارخ وهي تكفخ فالهواء والحقيقه انها تكفخ ثنيان وخر الترف : خلااص مسكته
نوف اللي من بين الضحك كانت تقول : فك شعري ياخالي انا نوف
ثنيان: وجععععععع ان شااء الله
الترف اللي كشفت وهي مفجوعه : وش جايتس ياخبله
ثنيان: وش عندتس هنا
نوف اللي كانت للحين مغمضه وهي ميته ضحك : باخذ فراشنا وطحت عليككم فالظلام ماشفتكم هههههههههههههههههههههههههههههههههههههههههههههههههه هههه
ثنيان دفها وهو يضحك والترف اللي تذكرت اشكالهم وماتت ضحك هي بعد
ثنيان: بقره انتي كان قلتي ولا شغلتي كشاف
نوف للحين مغمضه : مادريت انكم فالزاويه
الترف: وش بلاتس مغمضه
نوف : مدري عطوني فراشي بروح
اخذت نوف فراشها وهي ميته ضحك وطلعت واول مافتحت وشاففت رهام طاحت وهي تضحك ورهام تضحك
وقف ثنيان اللي يضحك هو بعد وطلع لهم : مجانين انتي وياها ورا مادخلتو تنامون مثل الاودام
رهام اللي من قوة الضحك ماقدرت انها ترد اخذت فراشها ودخلت ولحقتها نوف
ورجع ثنيان للترف اللي تضحك بعد : انتي حسيتي فيها
الترف: والله ما دريت الا هي في بطني
ثنيان:هههههههههههههههههههههههههههههههههههههههههههه هههههههههههه خبله
الترف : ياربي الحين كيف بنام من الضحك
ثنيان انسدح وهو يضحك : والله انها مريضه هي ورهام
انسدحت الترف وهي كل ما سكتت ترجع تضحك
لف ثنيان وهو يحط يده على فمها : خلاص بننام اسكتي
الترف وخرت يده:هههههههههههههههههههههههههههههههههههههههههههههه هههههههههه الحين انا من كنت اكفخ
ثنيان تذكر وهو يضربها بالمخده : تكفخيني يالخبله
ضحكت الترف وهو تمسح على كتفه وثنيان الله كان يضحك على ضحكها وحركه منها تطيره سما سما
احتضنها وهو يبي يسكتها لكن مافيه فايده وبعد معاناة سكتت الترف ونامت
................••............
ومن بكره الفجريه
محمد اللي صحاه ابوه وطلع محمد بعد ماطار نومه ونام ابوه يتمشى بالمخيم لكن تجمد لما شاف رهام اللي جالسه برا وهي معاها كوب قهوه وواضح انها تفكر
لكن محمد هالمره مافكر وانطلق لها هو بداية خايف عليها من البرد ونهايته يبي يسأل وش اللي صار عشان ترمي السلسال
تقدم وهو يقول : رهام
لفت رهام برعب وبسرعه رمت شالها على وجهها :انت نعم وش جايبك هنا
محمد سكت بس تدارك نفسه:ليش جالسه فالبرد بتمرضين
رهام :مب شغلك
محمد طلع السلسال من جيبه ليش سويتي كذا
رهام : ولك عين تسأل بعد؟؟ قد ايش انك انسان غبي واناني
محمد انصدم: وش تقولين انتي
رهام : اللي بقوله انك تروح من هنا بدال ما تضيع وقتك مع مريضه قبل اصحي ثنيان واوريه كل شي
محمد:رهام اصحي على نفسك وش مريضته وش ذا الخرابيط
رهام :انت تحسبني لعبه عندك يوم تعطي سلسال ويوم تعطي امل ويوم ترمي كلامك برساله وتسوي مسكيييين
محمد :لحظه لحظه :وش رسالته !!
رهام :يا حرام مسكين ما تدري اي رساله
محمد :انا مسكين بس وش السالفه
رهام اللي كانت بتموت من القهر اخذت اغراضها ودخلت وهي تسبه اما محمد للي كان يعيشش صدمه انسحب وهو ماهو مصدق ان أول لقاء بينهم اللي دايم يحلم فيه يكون كذا جلس وهو يتذكر كل حرف وانتبه لرساله اللي قالتها
وقف وهو يقول (اكيد الرقم اللي يرسل علي يرسل عليها اكييييد )
رجع يدورها بس ما حصلها توتر ورجع وهو مايدري وش بيسوي
................••............
عند الترف
اللي صحت بدري وهي متنشطه لكن لفت وهي تحس شي ماسك شعرها لفت بالقوه وهي تشوف ثنيان نايم عليه وخرت ثنيان وهي تأفف جلست وهي تجمع شعرها ووقفت
وصحى ثنيان على حركتها : وين رايحه
الترف : رايحه لتحدي
ثنيان قطب حواجبه : تحدي وش
الترف : مب انت متحديني على الفطور
ثنيان : بدري
الترف على ما احضر
طلعت الترف وهي تحضر ولفت لما سمعت ثنيان اللي دخل المطبخ : وش بتسوين طيب
الترف : وش تبي لاحقني بتغش مني ؟
ثنيان ابتسم : امس كنتي معي ماقلت شي
جلس وهو ياخذ مويه : تعالي صح وش قصة التيس
الترف: اصبر بجيب اغراض
طلعت الترف وجات منيره اللي صحت على الاصوات :ثنيان وش مجلسك هنا
جات الترف :منيره صباح الخير
ناظرتها منيره بهدوء:صباح النور ، وش تسوون
الترف: بسوي الفطور
ثنيان : عسانا بس ما نجلس جوعانين
الترف:اصبر بس وبتشوف
وقف ثنيان جنبها وهو يشوف وش بتسوي
منيره لفت وطلعت هي تشوف ثنيان طار مع الترف وانتهى امره
................••............
اما ثنيان طلع وهو متجهه للعيال يصحيهم شاف محمد اللي جالس قدام النار وهو يحركها بضيق واضح جاء ثنيان وهو يخبطه على كتفه : محمد وش عندك مصحصح من بدري
محمد اللي لف يناظر ثنيان بهدوء : ولا شي جالس
ثنيان: متضايق من شي
محمد : لا
ثنيان :بس وجهك ما يطمن
محمد : ابد صداع بس
ثنيان : انا بروح اصحي العيال
محمد صد بدون ما يرد وهو مو معاه ابد وقف وهو ياخذ جواله ودق على منيره تجي
اما ثنيان اللي دخل وهو يشوف عجاج نايم ابتسم وراح وهو يمسك رجوله وسحبه بسرررعه وهو يفحط فيه صحى عجاج مثل المجنون : يمممه يمممممه
ثنيان اللي كان يضحك : صح النوم
عجاج وهو يدفه: ياخي انت خبل وراك تصحيني كذا
ثنيان: هااه كيف تبيني اصحيك ب ورده
عجاج :اقول وخر بس
ثنيان : يلا يلا صحصح عشان ابوي يقول كفو هذا الصديق الصح
عجاج قرب وهو يهمس : لو هي على ابوك تفل بوجهي
ضحك ثنيان اللي قام وهو يقوم نواف وراح عجاج يغسل وطلع وجلس بهدوء جنب ابو ثنيان عند النار
.................••............
وعند محمد اللي كان ينتظر منيره اللي جات
منيره: محمد وش فيك فجعتني
محمد : منيره انا بموت بموت
منيره: بسم للله وش فيك
محمد : يوم انفرجت علي تسكرت من جديد
منيره: محمد فهمني لا تجنني
محمد قال لها كل شي وشهقت منيره: انت مهبول تشتري لها سلسال مهبول والله لو يدرون عنك ينتفونك
محمد : تركتي كل شي وجيتي على السلسال اقولك ان فيه رقم يرسل لي بأسمها ويرسلها بإسمي ومدري وش قايل لها يا منيره تقولين لي سلسال
منيره: من ذا الرقم
محمد : مدري مجهوول اللي ابيه منك تروحين تفهمينها اني والله مالي شغل والله
منيره : يا محمد شلون
محمد : اذا تعزيني يا منيره روحي لها وفهميها انا مقدر مقدر اعيش كذا
منيره : زين يا محمد زين
وقفت منيره وهي ماتدري كيف تقول وكيف تبدا
................••............
في ديرة الترف
عند صالح اللي كان ينتظر ابوه وهو فرحان انه بيخطب سلوى دخل ابو الترف اللي جاي من الدوانيه وهو يستغفر : لا اله الا الله وحده لا شريك له وسبحان الله والحمدلله والله واكبر
صالح وقف وهو يبوس راسه : لا تعبت يبه
ابو الترف : لا ندمت
صالح وهو يقدم الفطور :سم يبه
ابو الترف جلس وهو يحط عصاته وجلس صالح وبعد شوي قال : يبه انا اقول البيت فضى علينا وصرنا نحتاج احد يشيل البيت
ابو الترف : ايه وانا اقول خلنا نزوجك
صالح : ايه يبه عشان كذا جيت بقولك اني ابيك تخطب لي
ابو الترف : ابشر ادور لك احسن بنت فالقبيله كلها وازوجك
صالح: لا لا يبه لا تدور ولا تتعب عمرك البنت موجوده
ابو الترف : منهي
صالح : سلوى
ابو الترف : سلوى الطقاقه
صالح : ايه يا يبه
ابو الترف : معصي والله تزوج طقاقه
صالح : يا يبه وش فيها اذا هي على قولك طقاقه هذا رزقها
ابو الترف: معاد الا هي ولدي ياخذ طقاقه اقول اسمعني زين بس وشل الفكره من راسك لو تموت ما تزوجها
صالح :يا يبه لا تقطع من راسك انت اسمعني انا لا تزوجت مانيب مخليها تطق بكفيها عن الطق والحاجه
ابو الترف: اقول قم اذلف بس ابو طبيع ما يجوز عن طبعه قم قم
قام صالح وهو ضايقه فيه الوسيعه ولاهو حق فرحته وفرحة سلوى ................••............
في المخيم
عند الترف كانت تجهز وجاء ثنيان: هاه خلصتي
الترف : ايه
ثنيان ركض قبل تحط العسل : لحظه لا تحطين
الترف : ليييه
ثنيان : منيره عندها حساسيه من العسل يوجعها
الترف وخرته بسرعه: اشوى قلت لي
ثنيان: سويها قسميين شي بعسل وشي بدون
دخلت نوف اللي اول ماشافتهم ضحكت وهي تقول : مساعده شي
الترف ضحكت: ايييه نحتاج بطون جديده فقعتي بطونا
ضحكت نوف : وش اسوي
دلال جات: يا صباح الريحه الحلوه شكلك بتخسر التحدي يا ثنيان
مشاعل: اللي جات من ورا ثنيان وهي تطل: لا خسرت والله
ابتسم ثنيان : يعني مب 100٪
مي دخلت وهي تناظر بإستهزاء اخذت كوب الحليب وطلعت
ثنيان: وينها منايير
دلال: مدري
دخلت منيره وهي متجهه لرهام بس وقفها ثنيان :منييييره تعالي تعالي
جات منيره : هلا
ثنيان : تعالي ذوقي الفطور واحكمي
منييره ناظرت فيه بضيق : مالي نفس والله
الترف : افاااا والله يا ام محمد والله محد يمد يده قبلتس
منيره: لا تحلفييين مالي والله نفس
الترف : حلفت عليتس افا بس انتي عين السيييح ما تفطرين من فطوري لا تخليني اعتزل
ابتسمت منيره وهي تذوقه : تسلم يدك مره لذيذ
الترف وهي تكي على كتف ثنيان: هاه من فاز
منيره ابتسمت وهي تشوف ثنيان يغمز لها تقول انه هو اللي فاز : والله الغش شين الترف اللي فازت عليك
صفقت الترف : يلا يلااا وخر انت وين وانا وين
ثنيان اللي ضحك: يا شيخه روحي منيره ماتبي تكسر خاطرتس
دلال: عرفنا من الفايز الحييين يلا ابوي ينتظر الفطور
طلع ثنيان وابتدوا الحريم يحضرون وهم يضحكون ومنيره عيونها على رهام
................••............'
وبعد الفطور في قسم الحريم
راحت منيره لرهام وهي تقول : رهام تعالي معي بنسولف
رهام وقفت وهي تروح وجلست منيره : واخبارك كيف تحسين
رهام : حمدلله احسن من قبل بكثير على الاقل معاد يصير معي كتمه قويه
منيره: حمدلله
رهام : وش فيك انتي احسك متضايقه
منيره: بيني وبينك يا رهام مره متضايقه
رهام : خير وش فيك
منيره : رهام اسمعيني زين ادري بتنصدمين بس انا مامعي فرصه الا اني اساعد اخوي
رهام اتسعت عيونها بصدمه وكملت منيره: الله يخيلك تسمعيني اذا تثقين في منيره اسمعيني
رهام سكتت وتكلمت منيره : شوفي يا رهام انا مدري وش وصلك بس محمد من فتره توصله رسايل على جواله بإسمك من رقم مجهول مايدري من هو ولما قلتي له اليوم رسايل هو بعد شك وانا ما جيتك اتكلم من فراغ ابد واعرف محمد ولو اني ادري انه راح يأذيك بحرف واحد والله ما اجي ولا اكلمك بس انا شاهده على افعال محمد كلها وحبه لك لدرجة انه متابع حالتك بحذافيرها ويعرف تفاصيلها بالضبط محمد ما يدري وش وصلك من الرسايل بس متاكد انهم موصلين لك شي مب زين وانا ما اتكلم عن حب عادي وطيش شوفي محمد كم عمره 30 ويحبك طول هالفتره ورغم انه يدري انه مافيه امل بس يحبك ولا حتى رضا يتزوج على كثر الإلحاح وبعد ما تكلم مع طبيبك وقاله انك تعافيتي وصرتي تقدرين تتزوجين ما تصدقين فرحته حتى انه كان يخطط يخطبك واليوم ناداني وقالي اللي صار يبيني اشرح لك انه ماله شغل بالرسايل حتى شوفي
طلعت منيره جوال محمد وهي تفتحه دخلت وهي توريها الرسايل اللي مرسله له من نفس الرقم
ورهام اللي كانت مصدومه وهي تناظر الجوال بصدمه وتسمع منيره وهي تبكي
محمد يطلبك بس تفهمينه وتقولين هالرقم وش قالك
رهام اللي ماكانت قادره تصدق من الصدمه
منيره:رهام ما ابيك تبكين وتتعبين قلبك بس قولي لي وش كانت رسايل هالرقم
رهام بعد ما بكت لين قالت امين قالت لمنيره وش محتوى الرسايل وانها حضرت الرقم
منيره انفجعت من الكلام : رهام مهما كان الوضع المفروض ما تصدقين الكلام مستحيل ان محمد يتكلم كذا ابدا ابداً مهما صار
رهام : وش عرفني انعميت
منيره: لا تنعمين ولا يصير لك شي كل شي بينحل بس خلي الموضوع بينا
رهام سكتت بخجل من منيره اللي ابتسمت وهي تقول : رهام عمرك لا تشككين في حب محمد سواء لك او لاي احد محمد للحينه قلبه نظيف ما يعرف يجرح وامسحي دموعك لا يدري بها محمد ويذبحني
رهام سكتت وهي تمسح دموعها بفرح ومتخالط بغرابة شعور وقامت منيره وهي ما لاحظت ان شوق تسمعهم وابتعدت بقهر وهي تقول : بتموت من حبك اجل يا محمد لكن هين
.................••....................
عند الرجال تحديدا عند محمد
ما صدق ان منيره تدق وطار لها :هاه وش صار
منيره : اللي توقعته انت نفس الرقم يرسل لها رسايل تفجع بإسمك طبعا
محمد بغضب : وش يقول
منيره قالت له ولف محمد بغضب : والله والله لطلعه من تحت الارض وادفنه حي
منيره: بس انتبه يا محمد
محمد لف :تبكي !؟
منيره وهي تناظر محمد ببتسامه : اذا بكت بتوقف دموعها
محمد : ايييه وبطلع عيون كل من نوى يبكيها
ضحكت منيره : ياعلي عنك عنك يا محمد
محمد : اسمعيني خليك قريبه منها لا تخلين هالرقم يضايقها
منيره: ابشر وغير هالامر
محمد : بس
راحت منيره ومحمد اللي من القهر مايدري وش يسوي بس ارتاح لما شرح كل شي لرهام
.................••............
عند الشباب
كان ثنيان وعجاج يسولفون بينهم وقطع عليهم ابو ثنيان اللي قال: ايه يا عجاج توظفت ولا للحينك من سكه لسكه
عجاج اللي حس انه احتر : لا ابشرك تركنا السكك وتوظفنا
ابو ثنيان : ماشاء الله اجل دامك قريب بتزوج وتنشغل
عجاج بهمس : ابوك قاعد يقصفني بإحترام
لف يرفع يصوته: لا وييين بدري على الزواج
نواف ضحك : يا رجال تراك مثل خويك بحب خشوم زوجناه والحين نبي نوقفه ماقدرنا
ثنيان: الحين وش حارق رزك في زوجااتي اتزوج ولا انسدح مب شغلك
نواف : ياخي وقفت نصيبي ابي اتزوج خلصوا الحريم
ثنيان : الله واكبر اصلا انت مين الخبله اللي بتزوجك
ابو ثنيان : المهبل اللي زوجوك يزوجون اخوك
عم الصمت لكن كسره ضحك محمد على الباب : اووووووه ياعمي وش ذا المدرعات والقنابل
ثنيان: والله مدري لمين السبه بالضبط بس مشكور ما تقصر
عجاج اللي مات ضحك على وجهه ثنيان ونواف لكن سكتهم دخول سيف وبندر: سلام عليكم
انقلب وجهه ثنيان ووقف لكن مسكه ابو ثنيان : وعليكم السلام
الكل :وعليكمم السلام
الكل صار يناظر ثنيان وبندر لكن سيف اختصر وهو يقول : محد بيسلم
قربوا كلهم يسلمون وبندر واقف بعيد لما خلصوا وقرب بيسلم على جده لكن صد ابو ثنيان
ونزل بندر وهو ياخذ مفتاح سيارة ابوه وطلع
وثنيان االلي كان وده يتوطى في بطنه بس ابوه
سيف: لا تطيح عيونك من راسك يا ثنيان ولا تحط عقلك بعقل مراهق
ثنيان :لا والله ما احط راسي براسه انا بكسر راسه اللي مكبره علينا
سيف: جرب وشوف هالمره وش بيصير
ثنيان: تحداني يا سيف بدال ما تسمك ولدك وتعيد تربيته
قبل يسكت ثنيان ارتفع صوت بكى عمر ومحمد جاء يركض بخوف : يبه بندر طق عمر
سحب ثنيان يده من يد ابوه وهو يركض ونواف ركض وراه
ثنيان اللي جاء وهو يشوف عمر اللي يبكي بكى يفجع وطبعات يد بندر على خده
هنا ثنيان انهبل شاف سيارة بندر المسرعه وركض لسيارته وركب وهو يسب لكن وقفه محمد : ثنيييييان انتظرر مايصير كذا هذا يضرب وهذا يضرب
ثنيان : اقول وخر عن الباب بس
محمد : يا ثنيان اعقل يا ثنيان اترك ذا الطايش يسوي اللي يسوي عشان يستفزك
ثنيان سحب محمد وهو يوقف عند عمر: تشوووف خده ولا ما تشووف
محمد : اشوف اشوفف لكن اهدا الحين المووضوع بذا الشكل ما ينحل
ثنيان: شلللللون ينحل فهمني شلون
محمد : بتجلسون مثل الاودام وتتكلمون
وخره ثنيان وركب لكن رجع بعد شوي لانه اختفى اثر بندر نزل ثنيان وهو ياخذ عمر من عجاج وهو يناظر خده رفع عينه لسيف اللي جالس وهو ازاريره مفتوحه : صدقني ما يروح هالكف هدر
سيف : يااااخي رووووح دور عليه واذبحه وبرد قلبك وفكني من مشاكلكم
محمد : سيف كذا ما ينفع فلت الولد لين وصل هالمرحله والحين جاي بتزعل وتتشره لازم تعيد النظر فيه
ابو ثنيان: سيف اخر كلامي لك رب ولدك زين ولا اتركنا نربيه
الكل سكت وثنيان اللي كان محتضن عمر هو مقهور قهر الدنيا وعجاج اللي اخيرا اقتنع ان ثنيان ما يبالغ في مسألة بندر
.
.
انتهى البارت✨