تهزمني السمراء وانا ند فرسان

22

«البارت الثاني والعشرين »
.
.
في ديرة الترف
وعند الترف اللي رجعت للبيت وشافت صالح اللي جالس عند الباب قربت وهي تصيح عليه فز صالح : الترف
ضحكت الترف وهي تسلم عليه : وش عنده المعرس جالس لحاله
صالح : اي معرس واي زفت
الترف : ليييييه
صالح : تعالي ادخلي
دخلوا والترف تناظر صالح اللي ضايق:وش فيك يا صالح
صالح: ابوي
الترف : وش فيه
صالح : رفض اني اتزوج سلوى
الترف : ليييييه
صالح : عشان شغلها
الترف : صالح وش فيه شغلها ادميه تشتغل وكافيه نفسها
صالح : ما كأنتس تعرفين ابوي يالترف
الترف: وش بتسوي
صالح : مدري مدري
الترف : خلني بكلمه
صالح : لا لا بيعاند اكثر خليني اجلس فتره وارجع احاول
الترف وهي تضحك : اجل طلعت تحب يا صويلح
لف صالح وهو يبتسم : ايييه الحين بتلقين شي تقولينه وتدقين به
الترف : بس جد زين ما اخترت
صالح ابتسم وهو يناظر السماء بهدوء
...............••............
بعد ساعات عند ابو ثنيان
جاء نواف يركض وهو يقول : يييبه يبه ألحق يببببه
ابو ثنيان وقف بخوف :وش فيك وش بلاااااك
نواف : ثنيان متصاوب يبه
ابو ثنيان اللي مسك نواف بقوه: وش تقول انت متى متتى
نواف : دقوا علي وقالوا تعالوا المستشفى
ابو ثنيان : يلااا بسرعه بسرعه
طلعوا مسرعييين للمستشفى دخلوا وكان فيه اثنين من الشرطه واقفين
ابو ثنيان: وينه ثنيان وش صار له
الشرطي : باقي فالعمليات
نواف : وش صار
الشرطي : كنا في مداهمه وصابوه برصاصتين
طلع الممرضه : حمدلله على السلامه مريضكم بخير لكن يحتاج راحه
ابو ثنيان: طلعتوا الرصاص
الممرضه : ايه الحمدلله
نواف : وين مكانها
الممرضه : في الكتف وفي البطن بس حمدلله عدت على خير تقدرون تشوفونه بعد ساعه
جلس ابو ثنيان : الله يهديك ويشفيك يا ولدي .................••............
في بيت ثنيان
وعند منيره اللي كان قلبها مقبوض وفيها عصبيه ما تدري وش سببها
سحبت جوالها وهي تدق على ثنيان بس كان مغلق غمضت وهي تقول ( تكفى يا ثنيان لا تصدمني فيك )
كانت متوقعه ان مع الترف وناسيهم
...............••............
اما مشاعل اللي مستغربه حالت منيره بس توقعت انها مريضه ولا شي وفزت لما سمعت مي اللي صرخت : ثنيييييييان لااااااااا
ركضت مشاعل برعب : وش فيك وش فيه ثنيان
مي اللي كانت تتصل بجوال ثنيان الثاني وتدق وتدق لكن رد فالاخير نواف وقالها الخبر
منيره نزلت لما سمعت الصراخ: وش فيكم
مي : ثنيان بيمووووت رموه بالرصاص
اقل ما يقال عن كلام مي ان ثنيان مات وهنا انتشر الصراخ بالبيت والكل خايف مرعوب
اما نواف اللي كان على الخط وهو يسمع الصراخ طلع من المستشفى وهو متجهه لبيت ثنيان طلع وهو يدق الباب بقوه فتحت منيره وهي تبكي : مين
نواف: منييييره ثنيان مافيه شي مافيه شي بخير بس تصاوب وهذا هو فالمستشفى وطلع من عمليات وهو بخير اصاباته خفيفه
منيره: احلف يا نواف
نواف: والله يا منيره انه بخير بس اسكتوا ماله داعي تصارخون
منيره : طيب طيب بنروح معك
نواف: ماله داعي شوي وبيطلع بس انتي فهمي اللي جوا
منيره : طيب
رجع نواف ودخلت منيره وهي تروح لمشاعل اللي تبكي :مشاعل ثنيان بخييير ما صار له شي
مشاعل : والله
منيره: والله تو نواف قالي
مشاعل: الحمدلله الحمدلله
منيره : بس يا مي بس ثنيان مافيه شي
مي: كيف مافيه شي وهو متصاوب
منيره: طلع من العمليات وبخييير
مي : لا ما اصدق لاااااا
منيره تركتها وهي تروح لمحمد وعمر اللي يبكون حضنتهم وهي تطمنهم
................••............
في المستشفى
عند ثنيان اللي كان فالتنويم ماكان يحس بشي وابوه ونواف عنده
دخل الممرض وقال ابو ثنيان : متى بيصحى
الممرض : الحين اصحيه
ابتداء الممرض يصحي ثنيان اللي كان يون وفتح عيونه وهو يتألم ابو ثنيان : ثنيان يا ولدي انت طيب يوجعك شي
ثنيان : ااااخ يا يبه
ابو ثنيان وهو يمسح على راسه : وش يوجعك
ثنيان سكت شوي : ولا شي يبه انا بخير
نواف : سلامات يالضابط
ثنيان هز راسه وهو يتقطع من الألم لكن ساكت
الممرض : ثنيان اذا فيه شي يوجعك قلي
ثنيان: وش اللي صار
الممرض : تصاوبت في اشتباك كان فيه رصاصه بكتفك ورصاصه فالبطن بس عدت على خير الحمدلله
ثنيان : حمدلله
ابو ثنيان: خلاص لا تكلم نم وارتاح
الممرض : رح اعطيك مسكن يريحك شوي
مارد ثنيان اللي شد على اسنانه بألم
ابو ثنيان : نواف رح رح بلغ امك لا يجي احد يفجعها وبعد علم منيره
نواف : طيب يبه وانت
ابو ثنيان: بجلس مع ثنيان شوي
................••............
في بيت ابو محمد
عند محمد اللي اتصلت فيه منيره وقالت له وطلع مسرع وهو يوصي الشغاله على ابوه وصل المستشفى وقابله نواف : نواف وش فيه ثنيان
نواف: ابد متصاوب بس بخير
محمد : كيف
نواف : كان في مداهمه
محمد : وين رايح طيب
نواف :بروح ابلغ امي
محمد : بشويش لا تفجعهم
نواف : طيب طيب
راح نواف ودخل محمد لثنيان وصل لغرفة ثنيان ودخل : عمي سلام عليكم
قرب وهو يسلم على راسه : حمدلله على سلامة ثنيان
ابو ثنيان: الله يسلمك
محمد : كيفه
ابو ثنيان : حمدلله بخير صحوه قبل شوي ورجعوا خدروه
محمد : عسى ما فيه شي خطير
ابو ثنيان : لاااا لا بخير الحمدلله
محمد اللي جلس وهو يسأل عن التفاصيل بإهتمام ................••............
في بيت ابو ثنيان
ام ثنيان اللي كانت منسدحه بالصاله وهي تسمع الاخبار دخل نواف : يمه
ام ثنيان: هلا
نواف : وين سيف ما مر عليك
ام ثنيان: لا محد مر لا سيف ولا ثنيان
نواف: ايه ثنيان كان عنده دوام وعنده بعد مداهمه
ام ثنيان: الله يحفظه بس هو ذا الشغل اللي يحط روحه في كفه عشانه
نواف بتمهيد : ايه يمه والحمدلله على كل حال ثنيان تصاوب لكنه الحمدلله بخير وهذا هو بالمستشفى وطيب وابوي عنده
جلست ام ثنيان بخوف : وش تقول تصاوب وش فيه وش صار عليه
نواف مسكها بسرعه: يمه لا تخافين توني جيت منه بخير وعافيه واصابته مب خطيره بسيطه وبكره بيخرجونه
ام ثنيان : لا والله اكيد انه فيه شي كان قلبي حاس والله
رهام : وش فيكم
ام ثنيان: قوم قوم ودني له
نواف : ابشري ابشري بس انتي اهدي لا ينخفض السكر عندك
وقفت ام ثنيان على عصاتها: جيبي لي عباتي
رهام بخوف : وش فيكم
نواف: ثنيان تصاوب لكنه بخير
رهام قبل تقول شي قامت ام ثنيان: اخلصي جيبي عباتي
ركضت وهي تاخذ عباياتهم وطلعو مع نواف
.................••............
في المستشفى
عند ابو ثنيان ومحمد اللي كانوا كل فتره يسمعون ونين لثنيان
محمد : عمي انادي الدكتور
ابو ثنيان: يقول الدكتور انه عادي لانه اصلا بيتألم من الجروح
محمد : الله يعينه
دخلوا نواف وام ثنيان : وينه ثنيان
ابو ثنيان عطى نواف نظره: وشوله جايبها
ام ثنيان: بشوف ولدي
راحت له : ثنيان ثنيان ياولدي رد علي
ابو ثنيان: مخدرينه ما يسمعك وهو بخير بخييير
محمد اللي دق قلبه اول ما دخلت رهام اللي عيونها مليانه خوف
رهام اللي ناظرت ثنيان وهي تشوفه نايم بهدوء وتاكدت انه بخير ورفعت راسها اول ما حست بنظرات احد شافت محمد وبسرعه صدت بخجل ونزل راسه محمد اللي قال: اجل انا بستاذن
ابو ثنيان: الله معك
................••............
في حارة عجاج
عجاج اللي استغرب اختفى ثنيان اليوم ما دق ولا جاء غريبه مب مثل العاده جلس على درج البقاله وهو يدق ورد عليه نواف : الو
عجاج باستغراب : ثنيان!؟
نواف : لا نواف
عجاج : كيفك ، غريبه ترد على جوال ثنيان
نواف : ايه ثنيان تعبان شوي وانا معاه
عجاج: لا لا وش فيه
نواف بهدوء : ابد كان في مداهمه وتصاوب لكنه بخيير لا تخاف
عجاج وقف : لا اله الا الله ، متى وكيف
نواف : قبل ساعات وللله ودخلوه العمليات وطلعوا الرصاص لكن الحين بخير الحمدلله
عجاج : بسم لله عليه هو جنبك عطني اياه
نواف : لا والله نايم
عجاج:بأي مستشفى انتم
نواف : مستشفى ال ..
عجاج : يلا جايكم
طلع عجاج يركض للمستشفى ولاهي 10 دقايق وعجاج عندهم
عجاج : سلام عليكم
الكل : وعليكم السلام
عجاج: حمدلله على سلامة ثنيان
الكل: الله يسلمك
عجاج : كيف صار
نواف : لا بخير بس مخدرينه
عجاج : الله يقومه بالسلامه
ابو ثنيان: يلا نواف خذ امك وروح البيت
نواف : وانت يبه
ابو ثنيان : ببات هنا
عجاج : لا ولله يا عمي لا تعب نفسك انا عنده انت روح ارتاح
ابو ثنيان : لا لا ابد ما يجلس عنده الا انا
عجاج : لا والله تروح ترتاح وبكره تجي
نواف : ايه يبه وانت وراك دواء ولازم ترتاح وتعرف اصلا ثنيان بيزعل اذا شافك هنا خل عجاج وبكره نجي اصلا حتى لو بتجلس انت مافيك ترفع في ثنيان وتنزل ثنيان عجاج عنده واحسن
ابو ثنيان سكت : اجل يلا بس انتبه له
عجاج: في عيوني
طلعوا جلس عجاج وهو يناظر ثنيان بضيق
.................••............
في بيت ثنيان
وعند منيره اللي وصل لها محمد وقال لهم ان ثنيان بخير وبكره يشوفونه انسدحت بالصاله وهي ضايقه
نزلت مشاعل : منيره وش قالك محمد
منيره: يقول بخير بس الحين نايم وبكره يمكن يخرجونه
مشاعل : الله يحفظه لازم انه يعرض نفسه المشاكل
منيره : امين
مشاعل : والله ما ناموا العيال الا بطلعه الروح خايفين
منيره: ومي بعد خوفتنا
مشاعل: اعوذ بالله منها ، حتى الترف ما ندري عنها
منيره: اكيد عند اهلها ماتدري
مشاعل: ايه ، قومي نامي انتي لا تسهرين
منيره:طيب
................••............
ومن بكره في المستشفى
عند ثنيان اللي صحى بألم لف يناظر وشاف عجاج نايم على الكرسي اللي بجنبه كح ثنيان وصرخ بألم: ااااه
فز عجاج: ثنيان فيك شي يوجعك شي
ثنيان : لا لا
عجاج : انادي الدكتور
ثنيان: لا
عجاج : حمدلله على السلامه
ثنيان: الله يسلمك
عجاج :تقدر تتكلم
ثنيان : ايه
عجاج : وش صار معك طيب
ثنيان : مدري اخر شي اذكره اني طلعت بروح لشرطي متصاوب بس اني تصاوبت اصلا فقدت وعيي بدونها
عجاج : انا قايل لك حمار وش تبي تطلع وانت شايف الوضع
ثنيان: اذا بتغثني انقلع
عجاج: ماني غاثك بس بقولك انك ملقوف
ثنيان: ماجبت شي جديد
عجاج : بس بسيطه معليك يالذيب
ثنيان : من متى انت هنا
عجاج : من امممس وانا عندك
ثنيان: ليه متعب نفسك
عجاج : عشان تعرف انك عندك صديق ذهبه بس وييين تفهم انت
ثنيان رفع يده بيطقه بس نزلها بألم
عجاج اخذ يده الثانيه وهو يطق نفسه : يلا بنخليك تطقني ندلعك شوي
ابتسم ثنيان بألم ودخل الدكتور : لاااا ضابطنا اليوم بخيير
ثنيان: حمدلله
قرب الدكتور وهو يفحصه : لالا كل شي بسيط بس يبي لك ترتاح شوي ولا تتحرك عشان جرح بطنك
عجاج بضحك: اصلا كيف طلعتوا الرصاصه من ذا الكرش
ثنيان : ان قمت دفنتك بذا الكرش
ضحك الدكتور: لا حرام عليك كرشه بسيطه
عجاج : وين بسيطه الله ينصر كبسة منيره
ثنيان : عججججججه
الدكتور ببتسامه: بكتب لك ادويتك تلتزم فيها واذا بعد قاطعت ذا الانسان وماخليته يحارشك بتشافى بسرعه
عجاج وهو متكي : لا والله ما قلت خييير حبيبي هذا اذا ماشافني يتدمر
ثنيان : جرب تنقلع وشوف من بيجي الثاني
عجاج: ما برد عليك مريض مريض
الدكتور ضحك : ماعلينا المهم خروجك بعد نص ساعه على ما تنتهي الاجاراءات وتجي كل يوم ويوم تغير على جرحك او انك تغير فالبيت
ثنيان: تمام
طلع الدكتور ودخل نواف وسيف وابوه قربوا يسلمون عليه ويجهزونه للخروج
...............••............
في بيت ثنيان
عند منيره اللي من اول ماعرفت ان ثنيان بيطلع وهي تجهز مكانه وتجهز له اكل
مشاعل نزلت وهي ماسكه ظهرها: منيره متى قالوا بيطلع ثنيان
منيره: جايين بالطريق، فيك شي
مشاعل :لا بس تعب الحمل
منيره: اجلسي انا بسوي كل شي
مشاعل: نادي على هاذي تساعدك
منيره: فكيني بس
محمد : يمه ابوي متى يجي
منيره: جاي بالطريق
عمر: يمه انا بجيب لابوي ورد
مشاعل: طيب اذا جاء نواف روحوا معاه
مي نزلت : جاء ثنيان
مشاعل: صح النوم كان نمتي شوي
مي: خير انتي من كلمك
مشاعل: اقولك عدلي حالك احسن وامشي حطي يدك بشغله احسن من كلامك الفاضي
منيره: بس عاد فكونا
صدت منيره وطنشتها ومي اللي جلست وهي تهز رجلها
دق الباب وركض محمد يفتح وكانت ام ثنيان ودلال وبناتها ورهام اللي دخلوا ينتظرون ثنيان
نوف : غريبه وين الترف
مشاعل: عند اهلها وشكلها اصلا ماعرفت
رهام : اكيد
ام ثنيان: خليها تذلف لا تجي تذبحه وانتي نزلي رجلك لا اكسرها
مي نزلت رجلها وهي تتأفف .
...............••............
في ديرة الترف
عند التررف اللي من يوم صحت وهي تفكر بحل لصالح اللي طلع لدوامه بضيق
رفعت جوالها وهي تناظر غريبه ماله حس ثنيان نزلت الجوال اول مادخلت نوره
نوره: يووووه اشتقت اجي لبيتكم واحصلتس هنا
الترف : وانا والله اشتقت لكل شي
نوره : تكفين الللبسي عباتس بنطلع نلف ابي اطلع معتس ومن زمان ما طلعت
الترف : اي والله وماعندي شي خلينا نطلع
نوره: وسلوى
الترف : نمر عليها
طلعوا وهم ياخذون سلوى ومرت نوير وهي تناظر في الترف : جيتي
الترف : اييه جيت عشان اكتم انفاستس انتتي وكل عذالي
نوير : عذال وش يا حسره نعذلتس على وشو شايب ومزواج ولا على انتس خطفتي رجال من حريمه وخليتيه يسجن منير ويطقه
الترف ضحكت بإستفزاز: مقهوره يا قلبي هو حصلتس مثله كل ذا من قهرتس وبعدين من زينتس انتي واخوتس عشان يوصخ يده به
نوير: مالت عليتس وعليه حبيبتي اخوي اكبر من امثال ذا المزواج
سلوى : اكبر من وش يا ام شوشه ما اسمع حبيبتي اذا بعلمتس عن الفرق بينهم بينصدع راستس من ثاني فرق
نوير: هههههههههههههههه لا تقارنين اخوي بالمزواج الشايب
نوره: يا ضعيفهه انتي واخوتس حبيبتي هذا ضابط واخوتس وشو راعي غنم معفن
الترف : واكبر شي ان اخوتس كله على بعضه مايجي شعره من شنب ثنيان
سلوى : وليش شنبه حبيبتي الارض اللي يمر عليها صعب على اخوتس يمر عليها
نوير : اقول احشمي نفستس انتي وهي
سلوى: اقول توكلي من هنا ازين لتس
الترف : قبل تروحين بعزمتس على شي يخصتس
ناظروا نوره وسلوى فيها الترف : حياتس على عرس صالح وسلوى
سكتت نوير بصدمه وانسحبت وهي تخز سلوى
سلوى لفت: من صدقتس ابوتس وافق
الترف : والله مدري للحين صالح ماقاله لكن اكيد بيوافق بس ابي اقهرها وان شاءالله بتزوجون
نوره : امشوا تكفون بنروح البقاله
سلوى: شتبين فيها
نوره: ناخذ لنا شي بارد وبنشوف عايض وش يقول
الترف: وش تبين فيه فكيني منه
سلوى: ايه والله تكفين الترف تعالي
نوره: مانتس خاسره شي وبعدين هو مايدري انتس تدرين
الترف: ما يصير يابنات
نوره: امشي بس
راحوا للبقاله وكان عايض قاعد على الباب وهو يقراء الجريده
سلوى: عايض سلام
عايض نزل الجريده ووقف بارتباك : هلا هلا
نوره: عندك رز
عايض وهو يحاول انه ما يناظر : فيه خبز
انفجرت سلوى تضحك: رززز رززز
عايض : ايه فيه ، ترف شلونتس
الترف اللي لفت بضيق : بخيير نوره خلصي
نوره: عايض ارسل على امي رز
عايض : طيب
طلعت الترف وهي تشوف سلوى ونوره يضحكون: وجع انتي وياها مب حرام
سلوى: والله يضحك
نوره: اجل خبببز
الترف : يا شينتس بس
سلوى: اقوله وينه الشايب ماله طاري
الترف : مدري عنه
نوره: وشلون ماتدرين
الترف : من يوم جيت مدري عنه
سلوى: مالت عليتس اي والله
الترف : هذا صالح
لفت سلوى: وينه
صالح اللي جاء وهو مقطب بضيق : سلام
الكل : عليكم السلام
صالح : الترف كلمتي رجلتس
الترف : لا ليه
صالح : امشوا البيت
تقدم صالح اللي كان عنده شغله قريب القسم ومر بيسلم على ثنيان لكن سمع انه متصاوب
دخلو البيت
الترف : وش فيك
صالح وهو يتشتت عيونه : مافيه شي بس امس كان عنده مداهمه وتصاوب هناك
الترف شهقت : وشو تصاوب
نوره: وش صار فيه
صالح: بخير بخير
سلوى: اصابته قويه
صالح : رصاصتين بس بسيطه
الترف ما عرفت وش بتكون ردت فعلها الا انها خافت وهاجتمتها دموع رعب : صار له شي
صالح : لا بخير بخير لا تخافين بس مدري وين الرصاص بالضبط
سلوى: الترف قولي بسم لله ان شاءالله بخير
صالح : اللبسي بوديتس
الترف : وينه هو
صالح : اتصلت بنواف ويقول طلعوه للبيت
نوره: دامه طلع اكيد بخير
راحت الترف تلبس وهي ساكنه لكن دموعها ما وقفت ................••............
وعند ثنيان
اللي دخلوا البيت وهو سانده سيف ونواف
ام ثنيان قربت وهي تحضنه: حمدلله على سلامتك يا حبيبي
ثنيان: الله يسلمك يالغاليه
دلال سلمت: ماتشوف شر ان شاء الله
ثنيان: مايجيك يا ام شوق
رهام قربت وهي تحضنه : خوفتنا عليك خطاك السوء
ثنيان حضنها : افا بس ليه الخوف انا بخير والله يسلمك
نوف : خالي ماتشوف شر يا بطلنا
ثنيان : هلا هلا بالمغمضه
ضحكت نوف وقربت فجر: حمدلله على السلامه عمي
ثنيان: يا هلا والله الله يسلمك يا فجوره
ركض محمد وعمر وهو يحضنونه ثنيان غمض بوجع وهو يحضننهم
نواف : بشويش يا عيال
عمر: خفنا عليك يبه
محمد : انا ما خفت ادري انك قوي
ابتسم ثنيان : لا لا ماعليكم انا طيب طيب
نواف : انا بروح لعجاج برا
ثنيان: دخله بالمجلس وانا جاي
ابو ثنيان :كلنا بنروح يلا يا سيف
طلعوا وجات منيره وهي مسرعه : ثنيان حمدلله على السلامه
ثنيان سحبها يسلم عليها : الله يسلمك يا مناير
مشاعل اللي كانت تمشي شوي قربت وهي تسلم : خطاك السوء يا ثنيان
ثنيان : ما يجيك السوء ياا مشاعل
مي اللي صدمت الكل وقربت مسرعه وحضنت ثنيان بعدها ثنيان بألم : بششويييش
مي : خفت عليييك
ثنيان: بخير بخير
ام ثنيان: وخري اوجعتيه وجعع
منيره: اجلس اجلس بجيب لك شي تاكله
ثنيان: ارسليه مع نواف بطلع عند عجاج برا
دلال : انتظر انادي نواف يسندك
ثنيان اللي كان بالقوه يمشي : لا ما عليك اقدر امشي
ام ثنيان: اص بس اترك المكابر بس
ثنيان لف مبتسم : طيب يا يمه
راحت دلال تنادي نواف
ثنيان: احد قال لترف
مشاعل: اتصلت فيها مغلق
ثنيان سكت وجاء نواف ياخذه للمجلس
................••............
اما عند الترف
اللي اول مره يطول عليها الطريق ماصدقت وصلوا نزلت وهي تشوف محمد جالس: محمد ابوك وينه
محمد وقف يسلم عليها: بالمجلس عنده رجال
صالح : ادخلي داخل
الترف : خله يجي
صالح: ماشاء الله عليتس ادخلي وبعدين بيجي
دخلت الترف مع باب الحريم
ودخل صالح : سلام عليكم
الكل : وعليكم السلام
ثنيان اللي كان منسدح فز بيوقف وقال صالح: والله لتستريح اجلس اجلس
قرب صالح يسلم على الكل ونزل لثنيان: خطااك السوووء يا النسييب ما عليك شر
ثنيان : مايجيك الشر يا صالح
صالح : كيفك الحين طيب
ثنيان: حمدلله على احسن ما اكون
عجاج بهمس: ايه الحين مافيه احسن منه
صالح : بسيطه ان شاء الله وانا والله مريت القسم وعلموني وفجعوني وجيت طاير
ثنيان اللي كان وده يسأله اذا الترف معه او لا بس خاف ان ابوه يكفخه : لا ما عليك بسيطه
صالح: وين جروحك
ثنيان: بالكتف والبطن
عجاج: ايه ايه نسيبكم تراه فارس مغوار اعرفوه الحين
ضحك صالح : خابرينه ابو محمد شهادتنا مجروحه فيه
ابو ثنيان : وكيف ابوك يا صالح وينه ما جاء معك
صالح : والله انه بخير وانا يوم جيت ما كان موجود وجيت بسرعه ولا هو لو درا بيجي اكيد
عجاج قرب لثنيان: خساره ماجت بنتنا معه
ثنيان : ليتك ساكت
ضحك عجاج وهو يناظر وجهه ثنيان اللي وده يسأل ................••............
في قسم الحريم
عند الترف دخلت : سلام عليكم
قربت لام ثنيان وهي تبوس راسها : حمدلله على سلامة ضناك ياخاله
بس صدت ام ثنيان ماردت
دلال : الله يسلمك يالترف وحمدلله على سلامة ثنيان
الترف اللي واضح ضيقها : الله يسلمك
مشاعل: اتصل فيك مغلق
الترف : ايه ماعندنا شبكه هناك
شوق : حمدلله ياربي مدري كيف عايشين
الترف ماردت وهي اصلا عينها على الباب
نوف : والله احسن ترتاح من الجوال
الترف : كيف صار الحادث !
رهام : كان في مداهمه وتصاوب
مي : عشتوا ما تعرفين !
الترف لفت تناظرها بهدوء : ابدا ابدا ابدا مب وقتس ماودي بمصيبه ثانيه بعد
نوف : بسيطه يالترف ماعليك خالي بخير توه كان هنا
الترف : ان شاء الله
لفت الترف لمنيره ومشاعل : حمدلله على سلامة ثنيان
منيره ومشاعل: الله يسلمك
................••............
مر الوقت واستاذن صالح بيروح وثنيان اللي وده يسأله
عجاج: أساله واريحك!
ثنيان: هاه لا لا دامه ما جاب طاري اكيد ما جت اصلا لو جت بتجي
عجاج: والله ماطقت لك خبر بنتنا
ثنيان اللي كان يدق على رقمها مغلق صد بضيق : ماعليه
عجاج : انا بروح وانت ارتاح نجي لك شوي
ثنيان : الله معك
ابو ثنيان : قم يا نواف وده ثنيان يرتاح
ثنيان : لا لا برتاح هنا
سيف : ياخي نام في سريرك اريح
ابو ثنيان : مب على كيفك بترتاح فوق قوم
قام ثنيان اللي تضايق عشان الترف ماجت
................••............
اما الترف
شافت ان ثنيان طول وقررت تطلع لغرفتها وتبدل وطلعت ودخل ثنيان ونواف
ثنيان: خلاص انا بكمل
دخل وجات منيره مسرعه: استند علي بساعدك
ثنيان: لا يا منيره بوجعك انا ثقيل عليك
منيره: لا لا ما عليك
ام ثنيان: اجل يمه بنخليك ترتاح ونجي لك شوي
ثنيان: اجلسي تغدي هنا يمه
ام ثنيان: لا يمه لا ارتحت نجيك ونتغدا عندك
طلعوا كلهم وثنيان اللي شاف الترف مب بينهم وتنكد
مي : ثنيان غرفتي اقرب لك تعال فيها
ثنيان : لاااا انا في امانة منيره
ابتسمت منيره ودخلته الغرفه وهي تساعده انسدح اعطته منيره المسكن وهي تعمدت ماتقول ان الترف جت
منيره: تبي شي تاكل شي
ثنيان: لا لا سكري بس النور والباب بنام
محمد : يبه بنام معك
منيره:لا يمه توجعون ابوكم
عمر: والله ننام بشويش
ثنيان: خليهم يامنيره بس مابي صوت
انسدحوا جنبه وسكرت منيره الباب وطلعت
الترف طلعت : منيره جاء ثنيان
منيره : ايه جاء بس تعبان مره ونام يقول مره احد يجي ولا يزعجه
الترف اللي ضاقت : نام نام
منيره: اي والله بس تكفين لا تجين له تعرفين نومه بالقطاره الحين
الترف: لا ما عليتس مانيب داخله خليه يرتاح
رجعت الترف لغرفتها وهي ضايق صدرها مررره
وطرف الثاني ثنيان بينفجر ليه ماجت يمكن مادرت او يمكن بتجي مع ابوها
وعند منيره اللي بعد ما نزلت ندمت انها ما خلت الترف تدخل لثنيان بس تلاشى ندمها لما تحركت غيرتها
................••............
المغرب
عند ثنيان اللي كان ينام ويصحى بتعب تحرك بتعب وهو يشوف منيره اللي دخلت معاه الدواء: ثنيان دواك
ثنيان استند شوي وهو ياخذه ورجع انسدح
منيره: تبي شي
ثنيان : جوعان سوي لي شي خفيف
منيره :ابشر
ثنيان: وينها مي
منيره: نايمه ، تبي شي
ثنيان : لا لا ، بس بمشي شوي
منيره : انتظر لين تاكل عشان ما تطيح
ثنيان رجع : هو كذا
راحت منيره وثنيان اللي يدق على الترف بس مغلق ................••............
في الطرف الثاني
الترف اللي كانت فالغرفه وهي كل ماتطل تقولها منيره انه نايم تأففت بضيق وهي تدور جوالها بس الحال انها نسته في بيت ابوها
فتحت باب الغرفه وهي تبي تتنفس ورجعت تجلس بدون ما تشوف ان غرفة منيره مفتوحه
عند ثنيان اللي تعب وهو جالس ووقف يمشي بالغرفه بشويش وصل للباب وهو يمسك فيه بشويش وألم رفع راسه وهو يشوف باب الترف مفتوح استغرب من فتحه توقع انهم العيال طلع يمشي وهو يد ملفوفه ويد ماسك بها جرح بطنه قرب للباب وهو يسحبه بيسكره وسكره وهو مو منتبهه لكن انسحب الباب من يده بقوه ورجع ثنيان مع الباب بقوه وزحلق وطاح
شهقت الترف بصدمه اللي ماصدقت اول ماشافت جاء وهو يسكر الباب ما انتبه لها ركضت بتفتح الباب ماتوقعته باقي ماسكه وطاح ثنيان اللي صرخ بألم
مشاعل اللي سمعت الصوت وركضت فتحت الباب وفي نفس اللحظه ركضت منيره من تحت بخوف وفتحت مي باب غرفتها والترف اللي نزلت بسرعه وهي ترفعه : ثنيان بسم للله عليك ما شفتك
مي : حسبي للله عليك وجعتيه
منيره وركضت وهي ترفعه : وش سويتي انتي
ثنيان اللي طاح على يده وفعلا هالمره تألم
مشاعل: ثنيان صار لك شي
ثنيان بعد مارفعوه وجلسوه على السرير كان مغمض بألم : لااا مافيني شي
منيره: انادي نواف يوديك المستشفى
ثنيان هز راسه ب لا وهو موجوع
مشاعل: بجيب لك المسكن
منيره: لازم ياكل اول اصبري
مي : انتي ما تشوفين
ثنيان لف لمي : انت ورا ما تسكتين تطسين لغرفتك
مي : تهاوشني بدال ماتهاوشها
ثنيان: ميييي
طلعت مي وهي تتحلطم ومنيره بغضب : ثنيام تعال للغرفة هناك عند ادويتك
ثنيان اللي اللي صدق ماكان قادر انه يوقف من الالم شد على اسنانه : مقدر يا منيره
مشاعل: لحظه خليه هنا يرتاح شوي لين ياخذ المسكن
منيره : يلا يلا بخلص الاكل واجي
مشاعل اللي رفعت راسها تناظر الترف اللي وجهها معفوس بضيق ودموعها مليانه بعينها : بسيطه ان شاء الله انا بنزل اساعدك يا منيره
نزلو والترف واقفه وهي خلاص بتنهار وهي تشوف ثنيان اللي مب قادره حتى يرفع نفسه من الالم
بعد فتره رفع ثنيان راسه وهو يكابر على الالم وببتسامه : انتي وش اسوي بتس يا مجنونه تبين تذبحيني
الترف ناظرت وهي عيونها مغورقه : والله ما دريت احسبك وخرت اصلا انا انتظرت من الصباح ويوم جيت قلت بلحق عليك قبل تنام
ثنيان تحرك بيوقف بس جلس بألم : متى جيتي انتي
الترف رفعت راسها وهي تبي تهدي وتوقف رجفه : جيت مع صالح وطلعت ببدل لقيتك نايم وما صحيت
مسك ثنيان يدها وهو يجلسها: من اليوم هنا وماجيتيني وانا ادق وانتظر من اليوم قلت ما جت وانتي جنبي
اخذت الترف نفس : خفت اصحيك وانت بالقوه تنام وانتظرتك ايه صح حمدلله على السلامه خفنا عليك
ثنيان اللي مد ذراعه السليمه وهو يحتضنها : اول شي الله يسلمك وثاني شي مابي تخافون ابي تخافين انتي علي .
الترف اللي احتارت وش تسوي ماقدرت تتجراء وتحط يدها على ظهره وقف حتى نفسها وهي تسمعه يتكلم : ليتني دريت انك جيتي
الترف اللي كانت تكافح دموعها وقدرت لكن ابتعد ثنيان وطاحت دمعه سريعه انتبه لها : افا والله تبكين
الترف : لاااا وين بس غبار
ابتسم ثنيان : اييه غريبه ماداهمتي المجلس صباح
الترف: قال محمد عندك رجال
ثنيان : ليه ما ناديتيني
الترف: مدري
لفت وهي تقول : اوجعتك جروحك من الطيحه
ثنيان : وش هي جروحي اصلا طابت جروحي
الترف بعدت شعرها وهي محتره : وينها اصلا
ثنيان وهو يأشر : في كتفي وفي بطني وجرح قديم في قلبي
الترف اللي حست انها ودها تعطيه كف : ياخي وش ذا الكيف اللي عليك حتى وانت مريض
منيره جت : جاء الاكل
مشاعل : والمسكن جاء
بعدت الترف وهي مرتبكه وثنيان اللي اعتدل وهو مبتسم حطت منيره الاكل عنده
ثنيان : معرف اكل بيساري يا منيره
منيره: ما عليك انا يمينك
اخذت الملعقه وهي تعطيه وثنيان اللي كان مبتسم عادي
مشاعل والترف جلسوا وهم مقتنعين ان مهما صار منيره اولى بإهتمام ثنيان
لكن ثنيان كأنه اخذ جرعه نشطته وصحصح
.
.
انتهى البارت✨