تهزمني السمراء وانا ند فرسان

37

«البارت السابع والثلاثين»
.
.
في بيت ابو محمد
عند محمد اللي من بعد ماعطوه الموافقه وهو محتار ومختبص في اي غرفه بيكون ومتى بيتزوج ومتى بيملك واذا البيت بيعجب رهام او يغيره وقف وهو يناظر بغرفتين جنب بعض ولف على منيره: اقول منيره وش رايك افتح هالغرفه على ذا الغرفه وتصير كبيره يعني ما تضايق فيها رهام
ابتسمت منيره: محمد اركد لا تطير وبعدين رهام انا متاكده ما يهمها كبر الغرف قد مايهمها كبر قلبك صدقني اعرفها انا قلبها ابيض واللي بتعطيه اياها تعتبره جنه
محمد ابتسم : اي والله انها كذا اي والله بس ودي اني أعطيها كل شي قبل تطلبه
منيره: البيت بيتك سو اللي تبي فيه بس تاكد ان رهام بسيطه وماتهمها المظاهر
محمد اللي للان ابتسامته ثابته على وجهه من الصباح وهو وده لو يقدر يفرش الدنيا لها ورد
................••............
في بيت سامي
عند شوق اللي كانت تستعد لزواجها اللي يكون بكره ابتسمت وهي تناظر فستانها اللي نفس ماكان في احلامها والدنيا حولها كلها الاغراض اللي تبيها بس كانت معبيه حياتها بالسوق والاغراض والتمشيات وناسيه امها واختها لفت اول ما سمعت باب الجناح انفتح ابتسمت اول ماشافتت زياد داخل وهو مبتسم
زياد : اوووه الحلوه هنا ! وش تسوي !
شوق بدلع : انا مكاني الليله هنا انت اللي وش جابك
زياد: جيت اتطمن على زوجتي
شوق اللي كانت تحب محمد بس تحب الفلوس اكثر ونست محمد بلحظات اول ماشافتت فلوس زياد : ابد مشتاقه لك وتنتظر الوقت اللي يجمعها فيك
زياد قرب وهو يبوس يدها : تاكدي ان شوقك ما يضاهي شوقي
كانت شوق مبسوطه وهي تحسب تودد زياد حب وكان زياد قريب منها بشكل مقرف لكنها ما كانت تعارض
زياد بهمس : دام زواجنا بكره خلينا نسهر الليله مع بعض
شوق : مايصير وبعدين عمي لو شافنا بيعصب
زياد : وش يدري عمك نايم ولا هو داري والبيت مافيه الا انا وانتي وبعدين وش يفرق بكره بتصيرين زوجتي رسمي
شوق : زياد بعد
زياد : كذا احسن
ابتعدت شوق بسرعه لما حسته ابتداء يبالغ وقبل تطلع قفل زياد باب الجناح وهم يضحك ضحكه خبيثه : ليش الخوف يا بنت عمي اعرفك قويه يا شوق
شوق : افتح الباب يا زياد
زياد : تعالي بكلمك
شوق عرفت نيته وراحت بعيد : والله لصارخ ونادي عمي افتح الباب
زياد ضحك : ناديه احسن يشوف بعيونه بنت اخوه وش ممكن تسوي
شوق اللي كانت بقمة خوفها وركضت وهذ تدق الباب وتصرخ ولكن ما فاد لان زياد عرف كيف يستدرجها حرفياً ويبعد الكل عنه والكارثه انها كانت جريئه معاه طول الفتره وكأنها تدعيه لنفسها وكانت المصيبه اللي حلت بشوق وماحسبت حسابها نهايه سيئه لشوق وتشهد عليها صرخاتها اللي كانت في معركه مع زياد اللي اخذ كل اللي يبي ورمى شوق وطلع وهو ياخذ تذكرته وشنطته بعد ماترك لابوه رساله يحتويها ( لا توقع اني بسكت وبرضا اني اتزوج بنت اخوك هال*** سايرتكم فتره وبعد ما اخذت نصيبي من الورث انتهى كل شي واتمنى تعيش مع بنت اخوك في امان هذا اذا ما قلبت عليك )
كان كل هم زياد الورث اللي بقى له من جده وكان لزياد نصيب كبير فيه بتوصيه من جده واخذ من ابوه تنازلات عشان يرضى يتزوج شوق وبعد ما انتهى واخذ كل شي طار ونسى كل شي بما فيهم شوق اللي دمرها .................••............
في ديرة الترف
عند صالح اللي للان يراضي في سلوى اللي للحين مقهوره منه دخل بعد ما اخذ القهوه من عند ابوه : المزيونه وش تسوي
سلوى: وخر عن المزيونه ال XxxL عشان ماتذبحك
ابتسم صالح: والله اني نيتي حسنه بس مدري كيف اوصلها انا اقصد اني اشوفتس تضايقين من ملابس اللي صغرت عليك واللي صرتي ما تحبينها قصدي تاخذين شي ترتاحين فيه
سلوى: انا ما يذبحني الا نيتك يا صالح بيجي يوم وتذبحني وتقول نيتي حسنه
صالح: عاد انتي لا تكبرين الموضوع بسيط ترا
سلوى صدت وهي تضحك : وش اقولك بالله عليك
صالح اللي ابتسم وهو يهمس : قولي لي احبك
سلوى بضحك: ابك والله اني احبك
صالح : ابك انا من يولمني في حبتس
ابو الترف من الحوش : يا صاالح فراشي ويينه
صالح ابتسم بتسليك : ابوي يلومني وولله
سلوى: روح روح حط فراشه عشان مايذبحنا
صالح راح وهو ياخذ فراشه وفرشه وهو مبتسم ابو الترف : وتعود تدخل وتخليني وراك اعنبوك انت رجال ولا وش 24 ساعه ناقع عند مرتك اللي يشوفك يقول رخمه
صالح:توني قمت من عندك يبه وديت الصحون وجيت ما ابطيت
ابو الترف: اييه هذا اللي ينقص تشيل الصحون وش رايك تغسل عنها
صالح صد بضيق وهو يسكر الانوار وياخذ ثوب ابوه طبعا سلوى سمعت هالكلام اللي صار روتين يومي يسمعونه بس مب مشكله المهم ان صالح رغم دفاشته الا ان مافيه اطيب من قلبه .
................••............
وطبعا عند ثنيان وعجاج وعيد اللي كانوا في اجمل وامتع اوقات حياتهم بالنسبه لهم قرب عجاج من ثنيان : وش بلاك يالحبيب معاد الرقص على حله
ثنيان بضحك : انا اسج مع الاغنيه
عجاج ضحك : على قلبي اللي يسجون لكن اضبط عمرك ترا عيد ما بدا للحين
ثنيان اللي كان مجرد ما يسمع الاغنيه اللي رقص عليها هو والترف ينسى الدنيا ضحك : يا ويل حال ثنيان منكم يالخوال
انتهت الاغنيه وجلسوا بتعبت وهم يضحكون ويسلمون على اللي ما سلمو عليه وجاء حمدان لعيد وهو يقوله يبدا يغني ويروقون بعد السامري
عيد بصوت عالي : وحدوا الصوت يا شباب وغنواا
الكل صفق وابتدا عيد يدق العود وارتفع صوته وصوت الكل معه : انا وخلي كل دارٍ وطناا
والكل بدون استثناء كان يغني مع عيد كبير وصغير والكل مبسوطين وخواطرهم وسيعه لين انتهت ليلة ثنيان معهم وهو مايبيها تنتهي ابتسم وهو يودعهم
حمدان: بدري يا ثنيان
ثنيان: الليل سرا وبكره دوام
حمدان: يا رجال واصل
ثنيان: دوامي ما ينفع معاه مواصله
عيد : اجل ودعتك الله يا مداوم وناوي الدوام
انتشر الضحك وعيد يلحنها ويغني والكلك يغني معه وثنيان اللي ضحك وهو يودعهم ويسمع غناهم له ركب سيارته وهو دايما وابدا مايطلع من عندهم الا بكامل روقانه
................••............
في بيت ابو ثنيان
عند الترف اللي ماكانت تبي ترجع للبيت وخصوصا ثنيان مب فيه ولا احد بالبيت كانت عند نوف ورهام وهم يتناقشون بموضوع ماجده اللي عجزت الترف تسكره
نوف دخلت وهي معاها كيس حب دوار الشمس ونزلته بضيق
الترف : نوف علامتس
نوف : مدري امي هناك ضايقه تقول تحس ان شوق فيها شي
رهام: يا بنت الحلال مافيها الا الجن الازرق مايجيها شي ذي
نوف : يعني هي ماهمتني كثير بس امي حرام
الترف : يا اختي ما عليتس هم الامهات كذا يتوهمون
رهام : خلينا منها وقولي يالترف عطينا وش مغامراتس الجديده
الترف : يا بنت الحلال ماعندي الا الفلس انتم سىولفوا لي عنكم ترا معرف عنكم كثير
نوف : ايه ايه بالله رهام سولفي لنا عن ايام حارتكم القديمه وسوالف خالي ثنيان مع بنات الحاره
الترف : نوف بتوطى في بطنتس
ضحكت نوف : والله امزح
رهام : امحق سوالف ثنيان نفسيه من زمان كان 24 ساعه فالحاره اللي جنبنا مع الخوال يموت عليهم دايماً وابوي وامي يكفخونه ولا يفهم
الترف بضيق : ليه يكفخونه مب اوادم
رهام تورطت : لا مب ذا القصد بس انتي ماتعرفين جيرانا اللي قبل كانوا مشكلجيين يعني ما تصورين كيف وابوي كان خايف على ثنيان اللي دايم معهم وخصوصا بعد ما تهاوشوا معه وطعنوه ومن بعدها ابوي وامي اخذوا موقف
ويوم تعرف على عجاج بغوا ينهبلووون لكن ثنيان طنش والحين مثل ما انتي شايفه ناقع ثنيان في حارتهم 24 ساعه كلن يعرفه كبير وصغير اصلا حتى جماعتنا ما يعرفونه كثرهم
نوف : والله بيني وبينكم انا مع خالي ناس يوسعون الصدر والله
الترف : افا عليتس نعجبتس
قطع عليهم اتصال ثنيان بالترف وردت : هلا
ثنيان: وينتس مب فالبيت
الترف : توقع اني انحشت
ثنيان : وين بتروحين يعني مالتس الا قلبي
حمر وجهه الترف وابتسمت : عند رهام
ثنيان: يلا انزلي وراي دوام
الترف : يعني بتنام !
ثنيان: وش رايتس انام ولا اجلس
الترف : لا اقصد يعني انت وراك دوام وتبي تنام وانا بجلس طفشانه
ثنيان : نامي انتي بعد وش يسهرتس
الترف : بسولف مع البنات تونا جلسنا زين
ثنيان: ومع مين بترجعين للبيت ولا تبيني انام لحالي بعد
الترف : لا تعال نام هنا انت بعد
رهام بهمس : قولي له يجي ينام بغرفته ترا محد يجيها
الترف : ايه تعال لغرفتك
ثنيان : لا لا مالي خلق تعوذي من ابليس وانزلي
الترف : طيب تعال عند بيت اهلك وتعال جوا حوشكم يخوف
ثنيان : يلا
رهام: لا تقولين بتروحين
الترف : انتي بتنامين
رهام: لا ماعندي شي انام عشانه
الترف : نوف عندتس دوام
نوف : لا عندي اوف
الترف : يعني صاملين فالسهره
نوف : بقوه اصلا بنموت من الطفش
الترف : اجل فزي انتي وياها بنقنع ثنيان
رهام: لا والله استحي
نوف : حتى انا اخاف
الترف : افا يا رخمه انتي وياها
رهام : ياخي انتي تقدرين عليه
الترف : امشوا اوقفوا معي طيب
................••............
في الحوش
عند ثنيان اللي كان واقف ينتظر واول ماشافهم نازلين الثلاثه سكر اذانيه : بدون اي عذر وكلمه البيت ينتظر يلا
الترف : يا رجال ادحر الشيطان وتراه بيت ابوك
ثنيان: من قال اني جاحد بيت ابوي بس مابي انام هنا
الترف : عشان رهام ونوف تكفى
ثنيان: يروحون معنا
نوف : لا امي تعبانه
ثنيان لف : ليه وش فيها
نوف : مريضه شوي عشان كذا خل الترف تجلس معنا
ثنيان سكت بهدوء : يلا يلا اطلعوا بنجيكم
رهام ونوف طلعوا ولف ثنيان على الترف: وش فيها دلال
الترف : مريضه
ثنيان: وش مرضها يعني
الترف : صداع اتوقع
ثنيان: نواف فيه
الترف : لايقولون رايح مع اصحابه
ثنيان : حطي ببالك يا استاذه بتجين معي غرفتي لين انام
الترف : ثنيان انت بزر ! ياخي ترا ماباقي على الفجر الا ساعتين تقلب شوي وبتنام ماله داعي اجي
ثنيان: والله تبين والا البيت
الترف : وش رايك تجلس عندنا وتسولف معنا لين تنام
ثنيان : لا ويين اصلا محد بيتكلم بيسكتون
الترف : ليه يسكتون
ثنيان: لاني فيه
الترف : يا رجال تعال بس والله محد يسكت
ثنيان ماكان بيجلس مع البنات لانه يدري انهم بيصيرون رسميات ويستحون ومحد بيسولف لانه بعمره ما سولف معهم الا مره بس وكانت كلها رسميه ومايبي يضيع وقتهم
اخذته الترف ودخل ثنيان الحمام وطارت الترف للبنات: اسمعوني زين يا ويل وحده تستحي ولا تسكت بيجلس ثنيان معنا لين يجيه النوم
رهام: يوه كيف نسولف
الترف : سولفي تراه اخوتس
نوف : ايه بس مقدر احسه ينقد
الترف ضحكت: ثنيان ينقد لا والله بالعكس انتم سولفوا لا تسكتون وهو بيسولف بعد او يمكن ينام مايدري عنكم
نوف: شعنده دايم يروح ينام ولا ينتظر احد
الترف : اصلا من بعد السجن معاد ينام لحاله اصلا ونوره كملت الباقي
رهام: نوره
ضحكت الترف : بعدين اعلمكم
دخل ثنيان وجلس واضح عليه النوم وانسدح عند الترف والترف اللي كانت مستلمه الجو سوالف وطبعا تجرأت رهام ونوف وابتدوا يسولفون واستانس ثنيان انهم سولفوا وانه اخيرا قدر يكسر الحاجز سولف معهم شوي بس دخل بعدها في نومه عميقه تحت ذهول رهام ونوف
الترف : اصحيه يروح لغرفته ولا ينام هنا عادي
رهام : لا لا خليه ينام وحنا بنطلع لغرفة نوف
نوف : ايه ايه
طلعوا والترف تحكي لهم سالفة نوره وماتوا ضحك عليها
................••...............
في بيت سامي
شوق اللي بعد حالة انهيار فضيعه كانت مثل الضربه على راس شوق اللي لملمت نفسها وهي تبكي ومنهاره نزلت وهي تدور على عمها لللي ماكان له وجود طاحت بين الخدم وهي تبكي والكل يناظرها وكان ابشع منظر ممكن ينشاف ركضت وهي تاخذ الجوال دقت على عمها اللي ما يرد ابد حاولت تستنجد بس ماعندها احد ينجدها
اخر حلولها كان اتصالها بأمها دقت وهي ترجف وهي في وضع يرثى له ................••............
في بيت ابو ثنيان
عند دلال اللي كانت جالسه وهي على نار تحس ان فيه شي فزت اول ما اتصل الجوال ردت بخوف : شوق
شوق صرخت: يمممممه ألحقيني يممه
فزت دلال وهي ترجف : شوق شوق يمه وش فيك وينك شوق
شوق ببكي متقطع ومنهار: في بيت عمي يمه ألحقيني يمممه
ركضت دلال وهي تاخذ عبايتها بخوف لما تسكر الجوال وطاحت شوق مغمى عليها
ركضت وهي تدور صوت البنات دخلت غرفه نوف وهي تبكي : رهام نوف
فزوا كلهم بخوف : دلال وش فيك
نوف : يمه وش فيك
دلال : نواف وينه نواف وينه
رهام: مع اصاحبه
نوف: يمممه وش فيك يمه
الترف : دلال بسم لله عليتس
دلال : وين ثنيان يالترف
الترف : نايم بغرفة رهام
ركضت دلال وهي من خوفها ما تشوف الطريق فتحت الباب وهي تبكي ركضت لثنيان اللي كان بعز نومه وهي تبكي : ثنيان
فز ثنيان يناظرها برعب : دلال وش فيك
دلال طاحت عند رجول ثنيان بخوف : تكفى ودني لشوق يا ثنيان تكفى
ثنيان : دلال وش تبين بشوق بذا الحزه وش فيك
دلال وهي ترفع جوالها برجفه: بنتي بتموت يا ثنيان تكفى يا اخوي بتموت شوق
ثنيان ججلس وهو يرفعها : دلال فهميني زين وش السالفه
دلال شرحت له وهي تشهق من البكي ونزل ثنيان وركض وهو معاه دلال ولف لرهام: ابوي وامي لا يدرون بشي
تذكر انه ما اخذ اغراضه ورجع وقابلته الترف وهي تعطيه اغراضه ومسكت ذراعه: ثنيان سم بالله انت صحيت مفجوع
ثنيان حرفيا اللي كان تايه ما يدري كيف يتصرف او وش يسوي نزل وهو يسمي ويحاول يستوعب لان كل خليه في جسمه ترجف وهو مايدري وش هي المصيبه اللي صارت بشوق ولا وش الجديد عن شوق
طار لبيت سامي وهو يطوف اي اشاره تقابله وصل بوقت وصول سامي اللي جاء : خير وش تسوي هنا
دفه ثنيان وهو يمشي ورا دلال اللي كانت تبكي ودخلت وهي تنادي : شووووق شوووق وينك يا شوق
لفت وهي تشوف الخدم متجمعين عليها وهي طايحه مغطاه بلحاف خفيف صرخت وهي تركض وترفعها بس الصدمه كانت اثار الضرب عليها ركض ثنيان وهو يسحبها من يد دلال رفعها على ركبته وهو يناديها ويصحيها سحب المويه وهو يرشها فيها وسامي واقف بصدمه وجمود من المنظر
شهقت شوق وهي تكح وتبكي ثنيان : شوووق شووق ناظريني تسمعيني شوق
شوق راحت لامها بخوف وهي تحضنها وتبكي وهي خايفه من ثنيان اكثر من اي شي
دلال: دلال يمه حبيبتي قولي لي من سوا فيك كذا قولي يمه لا تخافين
ثنيان: شوووق تكلمي
سامي : شوق وش صار
شوق وهي تشد على امها ببكي : يمه زياد زز ي اد ضيعني يمه
انهارت تبكي لكن شعور دلال اللي حست ان كل الدنيا دارت فيها كان صعب وثنيان الي كان مستند على ركبته لكن مالت يده ومال جسمه ويمسك بالطاوله من هول الكلام اللي ينقال وهو مايدري كيف يفهم هالجمله
اما سامي للي اتسعت عيونه بصدمه وقال: زيااد مستحيل وش سوى زياد
ثنيان هالمره سحب شوق وهو يصرخ: وش سوىىىىى فيك ذا الكلب انطقي
شوق اللي كانت خايفه وترجف وتبكي وثنيان يصرخ وقالت بصوت مليان بكي : اعتداء علي
دفها ثنيان بكل قوته على دلال وفز وهو يشد سامي بثوبه :هاااذي سواتك في امانتك يا ابن الكلب هاذي تربيتك يا واطي
سامي وهو يصرخ: اقووول وخر بي اكيد فيه شي غلط اكيد زياد مايسوي كذا من فراغ اكيييد انها قالت له شي .
ثنيان ماكان ينتظر فرصه وانقض عليه وهو يضربه صرخت دلال : ثنيان ألحق شوق
ثنيان رماه ورجع لشوق وهو يحاول يرجعها لوعيها واتسعت عيون سامي لما شاف رساله زياد وسكت وهو يمسح وجهه اما ثنيان اخذ شوق ودلال وطار على اقرب مستشفى
................••............
في بيت ابو ثنيان
عند الترف ورهام ونوف اللي كانو جالسين بالحوش بتوتر وينتظرون دخل نواف : رهام وش عندكم هنا
رهام: نشم هواء
نواف اللي شك او ماشاف الترف : اكيد
رهام: اي ما عليك
نواف: ثنيان وينه اجل
رهام: سهران مع اصحابه
نوف كانت منهاره وعلى الصامت والترف ساكته ورهام هي اللي ترد دخل نواف طلع نواف متجهه لغرفته وهو مب كثير مطمن
................••............
في المستشفى
دلال وثنيان اللي سلموا شوق لطوارئ وبعد شوي توجهت الدكتوره لثنيان بغضب : مين ولي امر هالبنت
ثنيان : عمها وليها ولكن عمها مو موجود انا خالها
دلال: انا امها
الدكتوره: تفضلي معنا رح تشرحين لنا كل الموضوع وقصة البنت
ثنيان: معليش قبل تتفضل معك نبي نعرف وش اللي صاير فيها بالضبط
الدكتوره: مو معقوله انكم للحين ما ادركتوا اللي صاير فالبنت
ثنيان اللي كان يحس ان عرق من عروقه بينفجر : ممكن تشرحين يا دكتوره
الدكتوره: اشرح ولكن قبل استدعي الشرطه
ثنيان انهبل وهو يطلع هويته: الشرطه معك هنا تكلمي بالرضا يا دكتوره
الدكتوره وهي تناظر ثنيان بقلق :البنت تعرضت لهجوم عنيف من ضرب واعتداء وفي هذا الوضع لازم نبلغ الشرطه
ثنيان غمض وقهر الدنيا في صدره : تمام الشرطه صار عندها خبر ينتهي دورك هنا يا دكتوره يكفي انك تشوفين حالة شوق وهل هي بخير او لا
الدكتوره: شلون يعني مافيه تحقيق
ثنيان: لو سمحتي خليك بشغلك ينفتح تحقيق ما ينفتح هذا شي خارج عملك ألتفتي لشغلك ولا تحاولين تدخلين عشان ما ينتهي عملك تفضلي
الدكتوره اللي كانت مصدومه ان في مثل هالوضع ماينفتح تحقيق لكن فضلت انها تكسب عملها وكيف الناس ماتدري وش ورا هالبنت
اما دلال لللي مسكت ذراع ثنيان بصدمه : وش تقول انت ؟ لا يكون مانك مشتكي على زياد الزفت
ثنيان لف وهو ياخذها لغرفه شوق اللي كانت نايمه : شوفي يا دلال مرت علي اعداد ما تتخيلينها من ذا الحالات ومن ذا القضايا تدرين وش تنتهي به اولاً لا تحطين في بالك ان زياد بيجي يبكي ويصيح ويقول ان هو الغلطان ابد بيقول ان بنتك هي السبب وثاني شي لا تنسين انهم كانوا في خلوه وهو مابينهم اي ورقه او اي رابط زواج اسم انها خطبه وغير كذا شوق في جناحه !! يعني هي اللي جات له ما راح لها وفي ذا الحاله تتعاقب ششوق اكثر من زياد وغير ان سمعتها بتدمر لو طلعت من قسم لقسم لطب شرعي لمحكمه ويمكن جلد ويمكن سجن
ولا تفكرين سامي يبيع ولده عشان شوق بيوقف مع ولده ويرمي كل شي على شوق اول النكران قاله قبل شوي قال زياد مايسوي شي من فراغ
لازم تستوعبين انك ما تاخذين حق بنتك كذا ! ابد
دلال انهارت : بتخليه يروح كذا يدمر بنتي ويروح
ثنيان : ما بيروح ولا بخليه هو وابوه يروحون ابد لكن لازم نسكت الحين ويندفن ذا الموضوع بينا حتى ابوي مايدري ولا نوف ولا اي احد واتركيني اتصرف سامعتني
دلال بشهقات بكى: سامعه
ثنيان: فهمي شوق ذا الكلام وعقليها ترا انتهى طريق الدلع وعنادها
راح ثنيان وهو يدق على منصور اللي رد: حي الله ثنيان
ثنيان: الله يسلمك يامنصور كيفك
منصور: حمدلله انت كيفك
ثنيان: بخير يا منصور بس ابي فزعتك
منصور: ابشر امر وش تبي
ثنيان: في واحد اسمه زياد سامي ال .. ابيك تطلعه لي من تحت الارض
منصور: ابشر بس خير صاير شي
ثنيان: لا بس اللي لازم تفهمه انه مطلوب امني لكن اترك الوضع سري
منصور: لا اله الا الله زين اجل
ثنيان سكر وهو يتمنى بس يطيح زياد في يده بعد ما تطمن على شوق وشاف انها بخير لكن تاخذ شوية مهدات ومغذيات طلع وهو متجهه لبيت سامي دخل وهو يدور سامي شافه جالس بالصاله وفز : وش تبي هنا
ثنيان: اطلع بروحك يا كلب
شده ثنيان بكل قوته : وين ولدك الكلب انطق
سامي : مدري
ثنيان: اقولك تكلم
سامي : مدددري سافر مدري وين راح
ثنيان: ويييييين سافر
سامي : مدددري
طاح فيه ثنيان ضرب : انطق احسن لك
سامي : مدري ارسل لي رساله واختفى
سحب ثنيان جواله وهو يقرا رساله زياد وهوا مات من قهره رفع جواله وهو يدق على القسم وطلب دوريه تجي وماهي الا ربع ساعه وكانوا عنده
ثنيان: خذوه وحطوه بسجن انفرادي لا يدخل له اي مخلوق ولا يدخل له اي شي لين اجي سامعين
الشرطي : ابشر
اخذوا سامي وثنيان اللي دق على منصور يعمم في كل المطارات ان زياد ما يطلع ويمنع من السفر
ورجع للمستشفى وهو ياخذ شوق ودلال
وكانت شوق في حالة صمت وبكى لف ثنيان وهو يصرخ بوجهها : بسسسس اقطعي صووتك الحين تبكين هاااه الحيييين هذا اللي بعتي اهلك وامك عشانه هذا لكن اسمعيني زين تسكرين فمك ولا تنطقين بحرف واحد كل االموضوع الزفت سامي يضربك وبس وان طلع حرف واحد ذبحتك سامعه
شوق : طيب
ثنيان كان مقهوور من شوق كان وده يمسكها ويكفخها ويكفخها لين يطلع قهر السنين فيها ولكن دلال لاويه ذراعه مخليته ما يقدر يتصرف معها اي تصرف وكان ثنيان حريص على سمعة شوق وحريص ان اسمها ما يدخل بمثل هالمواضيع وهو متاكد مثل اسمه لو فتح تحقيق وحقق ان شوق هي السبب وصل البيت وهو يحذرهم للمره الاخيره ونزلوا واول مافتحوا الباب ركضوا لهم البنات وهمس ثنيان بغضب: كل وحده تنقلع لغرفتها احسن لها
نوف : خالي شفيها شوق
ثنيان:مافيها شي يلا كل وحده على غرفتها
ولف لترف: وانتي على غرفتي
الكل سكت من عصبية ثنيان وطلعت دلال وشوق لغرفة دلال والبقيه افترقوا مايدرون وش السالفه
................••............
في القسم
عند منصور اللي دخل له الشرطي وهو يعطيه معلومات عن زياد تنهد بضيق وهو يرفع الجوال ويدق على ثنيان رد ثنيان بسرعه: بشر يا منصور
منصور: ماهي بشاره يا ثنيان
ثنيان: وش صار
منصور: زياد طلع من السعوديه من زمان
ثنيان: وين راح
منصور: لروسيا
ثنيان: نععععم
منصور: وتدري انه اذا طلع معاد نقدر نجيبه
ثنيان: شلون يطلع يا منصور وشلون
منصور: طلع واتوقع انه مابيجلس بعد بروسيا يمكن يكون بدول اخرى
ثنيان صرخ بقهر وهو يضرب الجوال بالطبلون غمض بقوه وهو يسب ورجع للقسم وهو ناوي على سامي خلاص
................••............
في بيت ابو ثنيان
عند نوف اللي طلعت وهي متجهه لرهام اللي كانت بعد طالعه والترف طلعت
رهام : بنات وش صاير يا بنات انا خايفه
الترف : ثنيان عصبيته تخوف
نوف : اخاف عمي مسوي لشوق شي
رهام: شي مثل وش
نوف : يمكن ضربها او شي امي مقفله الغرفه عليهم
الترف : الله يستر يا رب
رهام: تعالوا بندق الباب
الترف: انا بجلس هنا روحوا انتم
راحوا نوف ورهام يدقون الباب وفتحت دلال وهي تمسح دموعها: وش فيكم
نوف: يمه شفيها شوق وش صاير
دلال بضيق: ولا شي بس عمك هاللي ما يخاف الله معذبها
نوف شهقت: شلون يمه عمي يحب شوق
دلال بغضب: الله لا يحب الله ينتقم منه يارب
رهام: دلال هدي طيب وش فيها شوق بالضبط
دلال: مافيها شي بس مفجوعه خايفه ونايمه
نوف : يمه معذبها مره
دلال هزت راسها ببكي ودخلت نوف اول ماشافت شوق بكت و طلعت ورهام اللي خافت ما تدري وش تسوي وطلعت لغرفتها اما دلاال اللي بعد ماهدت شوق فرشت سجادتها وهي تدعي من كل قلبها على زياد وسامي ................••............
اما ثنيان اللي دخل القسم
وهو ينزل لسجن بغضب دخل وهو يقول للحرس : الكل يطلع وقفلوا باب السجن الرئيسي
طلعوا ودخل ثنيان وهو يخنق سامي : اسمعني زين كلمه وما راح اكررها الحين تكتب لي كل املاكك خارج السعوديه وينها فيه وين مواقعها
سامي : ماعندي اي املاك الا بدبي
ثنيان :انا ماني غبي عندك تكلم
سامي :والله ماعندي والله
ثنيان: ولدك وش عنده
سامي : ماعنده شي اصلا توني كتبت له حقه
ثنيان كان يحاول يطلع بمعلومه بس مع الاسف انفلت وهو يضرب سامي بكل قوته وطلع وهو متوجهه لمكتبه حط راسه على الطاوله وهو يحاول يستوعب يبي يفكر وش يسوي كيف ياخذ حق شوق
طلع وهو يتجهه لسامي : وين أحصل ولدك
سامي : مدري عنه مدري
ثنيان : انت اللي بتجيبه يا سامي انت
سامي : ومن وين اجيبه اقولك ذلف برا السعوديه
ثنيان اللي كان يحاول لين اكتشف ان عذاب سامي انه عطى فلوس لزياد ابتسم ثنيان وهو يقول : وش رايك يا سامي لو ارميك بتهمه تروحك قصاص وارتاح منك ومن ولدك مره وحده
سامي : وش له ذا الكلام ياثنيان
ثنيان : بسيطه جدا بسيطه الجرايم عندنا مجهوله على قفى من يشيل وحده في ظهرك وينتهي امرك
سامي : ثنيان وش تقول انت ! كيف ترضى الظلم
ثنيان وهو يضربه: الله صار هذا ظلم يا سامي وشوق اللي صار لها مب ظلم
سامي : وش بتسوي يا ثنيان وش تبي
ثنيان: معك مهلة ساعه تفكر فيها يا أنك تكتب نص املاكك لشوق او اختر تهمه على كيفك تبي قتل ! تبي ترويج تبي تهريب تعاون ضد الدوله اللي تبيه وانا برجع
سامي انجلط وقف وهو يصارخ ويسب وثنيان طلع
وهو يحس انه بيبرد قلبه شوي في سامي ولكن مستمر يدور على زياد
.
.
انتهى البارت✨ اتمنى التفاعل