عشقني فجرحته

الجزء السادس عشر

مرحبا، حبايبي... طبعاً مثل ماعودتكم هذا البارت  راح يكون مختصر وراح تكون احداثة  مهمة جداً  اهم من البارتات السابقة
راح تصير بي هواي شغلات غير متوقعة راح نشوف كيف راح تتعامل بطلتنة الحلوة مع الاوضاع التواجهها... اتمنالكم قراءة ممتعة مع  قصة ... عشقني فجرحته.....
–––––––––––––––––––––––––––
ليان ... لما تقربت على الشخص الواگف عالشط وگحيت علمود الفت انتباهة التفتلي وتفاجئت فعلاً
..... هاااااااااا هذا شجااااااايبة مو عالاساس العزيمة بس للشلة وعلاوي فقط

ياسر .... سلامات سلامات

ليان ... الله يسلمك شلونك ياسر شخبارك

ياسر ... الحمدلله تمام وانتي انشالله تمام

ليان .... صفنت بيني وبين نفسي كلت اكيد علاوي عازمة بدون علم رواء لان اهي اكدت العزيمة بس للشلة مالت المدرسة حتى من گتلهة على لطيف رفضت حتى مااستحت مني وعزمتة لخاطري
..... وانة بصفنتي وسارحة صوت فززني

علاوي .... هاااا ام صابر وين وصلتي بالصفنة ليكون تفكرين بصابر شياكل وشيشرب هههههههههههههههاااي

ليان ...عصبني كلامة انتبهت ياسر ماهو رايح يم رواء والشلة
..ركضت ورى علاوي لان گالي ام صابر وهو يركض ويضحك
وانة اركض كل قوتي ومالحگتة
تعبت گعدت وضليت الفض انفاسي رجع علاوي يركض يتطمن علية
علاوي ......هااا حبيبتي سلامات خوما تاذيتي

ليان .... لا ابد بس صاير هواي ماراكضة فتعبت صحيح
نسيت اسألك ماگتلي انك عازم ياسر ويانة

علاوي ... منو گلج انة عزمتة اصلن مثلچ تفاجئت من شفتة
وانة ضيف حالي حالچ

ليان .... بصراحه تفاجئت اكثر يعني منووو عازمة اكيد ماجاي لوحده ورواء كالت العزيمة بس للشلة
وهوة اساسا صديق علاوي يعني اذا مو علاوي العازمة لعد منووو هالايام جاي تصير امور غامضة شالة تفكيري
عالعموم .... الحمدلله مرت العزيمة
على خير وكان الجو حلو واتونسنة ولعبنة كرة قدم البنات ضد الشباب وطبعا خسرنة ١٠ – ١  ههه
صارت بالعشرة بالليل رجعنة للبيت علاوي طلع وي صديقة  ياسر وانة كنت ميتة تعب دخلت للحمام سبحت ولبست تراك حاولت انام مايجيني نوم محتارة مالاگية اي تفسير للجاي يصير
تأخر علاوي صارت الساعه ب2 باليل وهوة ماجاي كل شوي اتصل يگلي انة وي اصدقائي بالكهوة كاعدين صار فترة ماملتمين سوة لا تنتضريني نامي واخذي راحتچ
اجوز  اتأخر....
اانتضرت صارت ب3 وهوة ماكو اخر شي تعبت من السهر ونمت
كعدت الصبح عيوني مااكدر افتحهن من النعاس باوعت  علاوي غاط بالنوم  حاولت اكعدة علمود الكلية  وراه  دوام وهوة ماكو تگول حجارة كمت من فراشي كوة
سحلت روحي للحمام سبحت وبدلت
ورجعت گعدت علاوي  گال البارحة منايم مااروح للكلية
عفتة ونزلت صادفت رواء عالدرج توة نازلة سلمت عليهة
ونزلنة تريگنة عالسريع واجة الخط مالت المدرسة
ومرت هيج الايام وانة مستواي ممتاز ودرجاتي عالية
كنت مجدة ومجتهدة
ومرت امتحانات نصف السنة وامتحنة بذلت قصار جهدي علمود احقق امتياز وبدت العطلة الصغيرة مالت نصف السنة كنت فرحانة بادائي ومنتضرة النتائج بفارغ الصبر
الى ان اجة هذاك اليوم ابداية عطلة نصف السنة
صادف يوم جمعة بالليل نزلت للمطبخ اسوي كبجينو للسهرة وسمعت خالتي ام علاوي واكفة بالباب تحجي تفاجئت منو يكون ممكن اجة لينة
طبعاً المطبخ قريب على باب البيت دخلت للمطبخ وكفت يم الشباك اسمع طگني الفضول كان المطبخ ضلمة فمحد يشوفني او يحس بية سمعت شي اثار استغرابي
كانت خالتي ام علي تگلم ام احمد (الخدامة)
گلتلهة مشكورة تعبناچ ويانة هاي مكافئة جهودچ وبعد لا تجين ليان تعلمت تطبخ بعد مامحتاجينچ
وحتى ماتگولين ام علاوي گطعت رزقي
راح اكلم الكلية يشغلونچ بالخدمات بلكي الكالج شغلة هناك واذا لكيت اتصل بيچ ..وودعتهة وسدت الباب ودخلت انة تفاجئت  من فعل خالتي شنو قصدهة بالسوتة
انسدت شهيتي ماسويت كبجينو رجعت صعدت فوك علاوي لاحض اني مو طبيعية لح علية يريد يعرف شبية ماكتلة شي
گلت خل اتاكد شنوو الموضوع بالاول
وبعدها الله كريم
سألني وين الكبچينو گتلة شفت بزون مرت من يم المطبخ والجو كان اظلم خفت وصعدت ماسويت خلي ناكل اچباس وعصاير خلي الكبچينو مرة ثانيه
مرت اليلة وانة بحيرة واجة يوم ثاني الي مفروض اكتشف بي اللغز گعدنة الصبح التمينة عالريوك بغرفة الطعام كال عمي كالعادة بكل سنة نطلع سفرة بعطلة نصف السنة
توقعوا هالمرة وين السفرة
علاوي گال لدبي ورواء گالت لإيران وانة ماخمنت
خالتي گالت تخمينكم مو صحيح انشالله هالمرة العطلة نگضيه بتركيا
طبعاً فرحوا ورواء ضلت تعيط من الفرحة وانة متفاجئة ضلتيت ساكتة بس ابتسمت ابتسامة فرح انة ماشايفة تركيا اخيرا راح اشوفها واجوز هذا السبب الخلة خالتي ام علاوي
تگول لام احمد بعد مامحتاجينچ  بس ماهو سبب مقنع بالنسبة الي بس لازم اقنع روحي بيه علمود اريح راسي من التفكير
واحضر نفسيتي للسفر والوناسة اخيرا  راح اغير هذا الجو واطلع من ضغوطات الدراسة والبيت
لان گالو السفرة باجر بالليل تطلع طيارتنة لتركيا
حضرت كل الاشياء الممكن احتاجهة بالسفر
بس علاوي گلي لا تكثرين ملابس مناك اشتريلچ كل اليعجبچ
سافرنة لتركيا كان الجو بارد وثلوچ واجواء تجنن
طلعنة منتزهات ومنتجع وزرنة الجبال والغابات
ماخلينة مكان يعتب علينة
وصادفنة هواي عراقيين هناك يعني شكو واحد غني وعدة امكانية ياخذ اهلة يسفرهم بالعطلة
انة لما كنت عد اهلي كانت سفراتنة السياحية لاربيل والشمال العراق او كربلاء والنجف ومرة للبصرة يعني كانت كلهة داخل العراق
المهم  اكو ناس عراقين كانو ساكنين ويانة نفس الفندق صادفناهم عدة مرات وطلعو ويانة اماكن سياحية ابنهم كان شاب جامعي كان لازگلي يباوعلي هواي ويغازلني بحجة شقة ولما يسلم علية مايهد ايدي
شفت علاوي ضاج منة بس مامنطي للموضوع اهتمام قوي يعني علاوي ماهو من النوع المشكلچي او المتعصب
يعني ماهو كلش غيور غيرتة قليلة اجوز لانة انسان منفتح وبيئتهم مختلطة دوم وحياتهم كلهة حرية وفريي
بصراحة مرات احب اشوفة يغار علية
بس للاسف مخيب ضني بهذا الشي رغم هيچ انة مرتاحة لان اعرف مقدار حبة الي ماينوصف
واهم شي الحب والثقة والصدق والحترام اذا تحققت هالاربع شروط راح تتحقق السعادة اليحلم بيهة اي شخص
طبعاً وانة هناك بتركيا كام يراسلني رقم غريب
وشكلة دولي كان يغازلني توقعتة
نفسة الولد جيرانة بالفندق ماانطيتة اي اهتمام اشو هوة زودهة وياي يومية يراسلني حضرتة
باليل رجع راسلني من نفس الرقم استغربت
كالي عندي قدرة افك الحضر عن رقمي واذا سويتي علية بلاغ اسحب كل صورچ من جهازچ وانشرههن
كان  عندة صفحتي  بالفيس، والفايبر  وكل برامج التواصل الاجتماعي تعجبت  منين جايب رقمي وحسابي
حتى رقمي الشخصي عندة
ويدعي انة خبير بالحواسيب يكدر يسوي المستحيل وهوة بمكانة بدون ان يلمس شي بيدة
كام يهددني وكال مااريد منچ شي بس مجرد صديق.. قررت انه بس ارجع للعراق اغير مبايلي كلة وكل برامج التواصل الاجتماعي
بلكي افتك منة خفت اگل لعلاوي وتخرب سفرتي كلت خل اغلس وتالي احاول احلهة بنفسي لوآگول لرواء تساعدني
طولت سفرتنة 11 يوم ورجعنة للعراق
وهوة بعدة يراسلني طلبت  من علاوي اغير مبايلي انطاني فلوس بدون ان يسألني  عن السبب
اخاف اخطي خطوة واتندم عليهة خاف يكون فعلاً عدة صوري وينفذ تهديدة ويحورهن وينشرهن
كمت اخاف منة واعاملة بحذر
خابرت لطيف گتلة ياخذني للسوگ اشتري  موبايل سالني عن مبايلي گالي صار سنة من جبتة الچ بعدة جديد ليش تردين تغيرينة خفت اگلة الحقيقة
ماادري ليش هالخوف بداخلي غلطت اكبر غلطة من اخفيت هيچ موضوع حتمال يدمرني
بس خوفي هوة السبب شسوي ماادري غيرت مبايلي وكل حساباتي سويت حسابات  متعددة وقفلتهن علمود اتجنبة واتطمنت ان مايگدر يوصلي يوم ثاني
داومنة اول يوم بالمدرسة كنت متحمسة للنتائج ماكنت اعرف شينتضرني بهذا اليوم
وزعوا النتائج وطلعت اعلى معدل عن مستوى ثلاث شعب يعني على مستوى المدرسه كنت اتمنة يكون معدلي هذا بنهاية السنة يعني فرحتي كانت ماتنوصف
رجعت للبيت متحمسة اريد ابشر علاوي وصلنة للبيت كنت ميتة جوع ام احمد كانت ماموجودة اجيت للمطبخ ماكو غدة ردت اتصل اطلب من المطعم بس خفت مبايلي يكون مراقب
يعنى صار هاجس بداخلي احسب لكلشي حساب
قررت اطبخ شي سريع لان الكليات والمستشفى تحل بعد المدارس بساعة
يعني عمي وخالتي وعلاوي بعدهم ماراجعين
فگلت اسوي اي شي سريع فتحت المجمدة لكيتهة متروسة لحومات بآشكالهة بس كل هاي الاشياء طبخها يحتاج وقت ضليت افتش بالمجمدة لكيت سفريات كفتة جاهزة للطبخ گلت اخيرا هية هاي اخذتها تبلتهة بصلصة حارة وبهارات
ودخلتهة للفرن
وسويتلهة مرگة وطبخت التمن طبعاً نگعتة بماي حار علمود مايصير حب وبعد ربع ساعة طبختة بجدر ضغط
سويتة متبل صار يخبل ريحتة تشهي
وانة ميتة جوع كملت الكفتة شوي خليتهة بالمرگة باوعت للساعة بعد عشر دقايق ركضت صعدت فوك رحت لرواء گتلهة طبخت غدة وراح اروح للحمام نزلي سوي سلطة
وحضري الطاولة راح يجون وانة اسبح عالسريع وانزل وياج
ماقبلت بالبداية تعاجزت تگول تعبانة اريد انام
لحيت عليهة ووافقت ضيعتلي وقتي
شلون الحگ  اسبح لومسوية شغلي بنفسي احسلي
فتت للحمام سبحت بسرعة تقريباً بعشر دقايق
لبست تراك وطلعت انشف بشعري
دخل علاوي للغرفة شافني كال نعيما حب شنو  كانچ متاخرة اليوم  بالمدرسة لان كل مرة اجي الكاج سابحة وداخلة صالون بيتي ههه وطالعه  عروس
گتلة شتقصد يعني هسة شنو طالعة  گالي كلچ على بعضج گمر بس حتى اكون صادق وياچ مبين بوجهچ التعب خير انشالله شبيچ نتيجتچ شخبارها ،،
سويت روحي ضايجة ومقهورة  تقرب حضني گال هاااا شبيچ
گتلة الضاهر انة كنت متحمسة للنتائج اكثر من الازم
كان لازم اخلي نقطة تراجع واافكر بسلبية ولو نسبة قليله حتى ماانصدم واطيح بالموقف الشفتة اليوم
گالي وشنو  شفتي اليوم احچي شلعتي كلبي
كالت علاوي  انة اسفةةة.. وسوت روحة تبجي وختلت راسة  بصدرة تعجب عليهة وكال
خلاص حبيبي خيرها بغيرهة وعدج بعد  النصف الثاني  اكيد تگدرين تعوضين وانتي مميزة وشكو درجة عدچ شك بيهة انة اروح واقدملچ اعتراض للادارة ومايصر خاطرج الا طيب ...