كذبتي الصادقة❤

١٣

خبرت عمتي ونهى ..عمتي وسناء اول ما فتحت حلكي كالت ما ننطيها لاحسن منك بعد وانت احق بيها وفرحت وكالت بس اصبر علينا لحد ما نفاتحها بالسالفه...نهى مترددة بمساعدتي ..ما كالوا اي شي ولا ذكروا سبب عدم قبولها بيه 

تقربت الهن وصرت لزكه بامتياز ...العصر كل يوم مسير يمهم وامي تحترك بحالها ما مهتمين الها ابوي متكفل بيها وبعصبيتها اللي صارت فوق الحد...طول عمرها غيرتها من زوجة عمي لدرجة الجنون وزادت بعداوتها الهن لما عرفت اني رايد منهن ..كانت تريد تاخذ الي بنت خالتي واني كنت ما احبها لان بيها صفات ما تعجبني هواي متكبرة ولسان ووكحة ...يمكن عرفتوا تشبن منو ميصير الواحد يحجي عن امه !!

......

مرت فترة واني فاتحت اهلها امها وخواتها وكان قبول منهم ووصلها خبر عن هالشي بس كان مو بصورة مباشرة ...جابتها امها اول مره لمحلي بحجة تاخذ الها قماش ونفصل الها صداري مدرسة واتفقنا وتركتها يمي وكالت احجي وياها وحجينا بس كلامنا اكثره كان مشحون ومتشنج

-اي شلونج صبا وشلونها الكعدة ببغداد مو تخبل؟؟
-زبالة😥

-زبالة!!عود ليش هيج عالاقل جامليني

-شجامل وليش اجامل ..صدك راح اختنك من ريحة الزبالة هاي شكد اكو وصخ هنا وليش هيج قذرة بغداد
-الله كريم عود نقدم الج شكوى بامانة بغداد 😏

-لا تقلد والله صح حلوة بس كلش احياؤها وفروعها وصخه وخاصه السوك والشارع العام
-الله يساعدج شلون حتعيشين بيها

-لا اصلا حنرجع لديالى دا اقنع بابا نرجع

-وين ترجعون ما ترجعين بعد
التقت عيونا بعصبية اثنينا وهي انهزمت بنظراتها بسرعه ..يا الله شكد فقيرة ما تكدر تواجه حتى بعيونها دوم مهزمتهم
-تتذكرين بيت جدو القديم

-لا
-يعني تره دا احاول احجي وياج شويه الرد يكون احسن ممكن...عالعموم فد يوم اخذج لهناك المنطقة صايرة تخبل شنو من بيوت وشوارع نظيفة كاعد يهتمون بيها يجوز تعجبج اكثر من هنا ..هالمنطقة شعبية حيل

-اي مو حلوة
-شبيج بس تباوعين بره

-اريد ماما تاخرنا اريد ارجع للبيت
-شعندج مستعجلة

-لا بس كافي عاد تعبت
-هو انت كاعده يمي شمسويه
-اوووف حاره وضوجه

مسحت وجهها بكفوفها مع كلماتها تبين ضجرها الشديد ..احمر وجهها فوك ما هي خيرات ربنا كلها بالخدود توردن اكثر والشفاف ربي يستر من افكاري بيهن بس

دنكت عنها ما اريد اباوع الها وحجيت بعصبيه لان هالحسن متاح للكل
-انت ليش هيج تلبسين
باوعت الي بخزرة بسرعة وانخبصت وكأنها كوه متحملة حجايتي
-شبيج مو دا احجي وياج