Aya's Confusion(Book 1)[Gxg]

40. The Fall

Few hours earlier…

Biglang naalimpungatan si Jessica mula sa kanyang pagtulog. Napatingin sa relong nasa bedside table. Alas-dos pa lamang ng madaling-araw. Si Nana Razon ay nasa ibaba. Inilalatag nito ang spare bed at doon natutulog. Napakunot ang noo niya nang makita ang ilaw mula sa maliit na siwang ng pinto ng CR. Napalingon sa tabi niya at nakitang bakante iyon. Wala si Yuna. Aywan ba niya pero bigla siyang kinabahan. Napabalikwas siya ng bangon. Lumapit sa banyo at bahagyang kumatok sa pinto.

“Yuna… nandiyan ka ba?” tawag niya sa pinsan.

“Yuna…” ulit niya sa mas malakas na boses nang hindi ito sumagot. Bahagya na ring nilakasan ang pagkatok sa pinto. Pinihit niya ang seradura ngunit naka-lock iyon. Nilakasan pa niya lalo ang pagkatok. Talagang kinakabahan na siya.

“Yuna, buksan mo nga itong pinto! Ano bang ginagawa mo riyan?” tanong pa niya.

Nagpasya na si Jessica na kunin na ang susi ng banyo. Nasa drawer iyon ng kanyang study table. Nang makuha ay nagmamadali nang binuksan ang CR.

Nakumpirma niyang naroon nga ang pinsan. Nanlaki ang kanyang mga mata sa nabungaran.

“What the hell are you doing?!” hintakot na sigaw niya dito.

Mula sa pagkakaupo sa inidoro ay napaangat naman ang tingin ni Yuna sa kanya.

Patakbong nilapitan ni Jessica ang pinsan at hinablot ang kanang kamay nito. May hawak-hawak itong isang piraso ng blade. Naabutan niya itong hihiwain na sana ang palapulsuhan.

Pilit na inagaw ni Jessica mula kay Yuna ang blade ngunit ayaw nitong bitawan. “Ibigay mo sa’kin ‘yan!”

“No! huwag mo ‘kong papakialaman!”

Sa pag-aagawan nilang dalawa ay biglang nasugatan si Jessica na ikinadaing nito. Sanhi upang mabitawan nilang pareho ang blade.

Yuna looked guiltily at her cousin. Kahit siya man ay nasugatan ng bahagya ngunit malalim ang kay Jessica dahil mabilis ang pagpatak ng dugo mula sa daliri nito.

“Sica… I-I’m sorry…” sising wika ni Yuna.

“Fuck,” napamura sa hapdi si Jessica. Lumapit siya sa sink at hinugasan ang kanyang sugat. Kumuha ng tissue at itinapal doon.

Si Yuna ay nakatingin lang at hindi malaman ang gagawin.

“What were you thinking?!” galit na sita ni Jessica sa pinsan at hinarap muli ito. “Sa tuwing may problema ba lagi mo na lang tatangkaing magpakamatay? Ha, Yuna? Ganyan ka na ba talaga kaduwag ngayon?”

“Hindi mo alam ang nararamdaman ko,” pagdadahilan ni Yuna.

“Damn hell, I don’t!” sigaw ni Jessica “We were here, Yuna. We love you. We care for you. Hindi ba sapat lahat ng ‘yon para pahalagahan mo ang buhay mo?!”

Si Nana Razon ay nagising na din dahil sa sigaw na iyon ni Jessica. Dali-dali itong bumangon at tinungo ang banyo. Lumapit siya sa dalawa.

“Ano bang nangyayari dito?” ang tanong ng mayordoma.

“That suicidal bitch tried to kill herself again!” duro ni Jessica sa pinsan.

Napatingin si Nana Razon sa kamay ni Jessica at parang nagtatanong ang mga mata.