الدرج العالي

16

#الدرج_العالي

.
🌹🌷للكاتبة زهور جمال الدين 🌷🌹

.
💕❣الحلقه السادسة عشر ❣💕
.
.
حوش خليفه مليان بالضيوف.....

شى جايين يخطبو ..شى جايين ايحمدو بالسلامه وماسمعوش بالخطبه...

خشت فاطمه مرت حكيم ..استقبلتها زهرة بالاحضان....
وعليا حتى هيا استقبلت فاطمه مرت خوها ..ماهو حتى هيا خالة سرور ومرت عمها فى نفس الوقت

وسرور متكية عالفراش يانارى ..لا لبست لا كوزنت .. يادوبك جابتلها خالتها عليا بودرة دارتها ..وسشورت قصتها ...

متكيه عالمخدة جتها فاطمه تسلم وعييت ماتضبط فيها فرحانه ..هيا مالاول عندها نيه فيها اديرها كنه

وسلمت على عليا وغالية ...وقعمزت ...

شويا وخشت سالمة اخت زهرة ومعاها بناتها ابتسام ومروة

سلمو عليهم وقعمزو ..ولقت عندهم اربعه من جاراتهم  ....

وبدو يهدرزو على بعض .. فهمت سالمه ان الموضوع فيه خطبه ..حبت تستادن ...

-زهرة : غير اقعدى يا سالمه خيرك بتروحى

-سالمه:  غير ابتسام قالتلى بنمشى نشوف سرور..والله كان ندرى ان عندكم خطوبه رانى خليتها يوم ثانى

-زهرة : شنو انتى برانيه ياسالمه .. وراس وخيتى تقعدى
..ياحنه عالاقل البنات ايعاونونى تشبحى فى سرور وحنين مجبسات ...

-سالمه : كانا هكى باهى ..خلى مروة وابتسام ايعاونوك ..

ابتسام مقعمزة جنب سرور وتهدرز عليها ..عندهم علاقه صداقه ببعضهم ..بحكم انهم انداد و يتلاقو هلبا مرات

وفاطمه تشبح لابتسام ماحولتش عينها من عليها ..

-فاطمه: قتلك انتى متخرجه ولا تقرى

-ابتسام : لا تخرجت ..كنت نقرا انا وسرور فى نفس المعهد

-فاطمه 🤔: صار انتم صاحبات

-ابتسام : ايه من زمان لما كنا صغار

شرين تليفون سرور ..شافت لقاته رقم عمتها امنه .. ردت

-سرور: اهلين ياعمتى

-امنه : مرحبتين ببنية خوى وانشالله مبروك عليك زواجة الدهر يااارب

-سرور عيونها دمعو: والله تمنيتك معانا ياعمتى فى يوم زى هدا

-امنه : ماهو الضرف يحكم يابنية خوى ..والله كان مش من ضرفى رانى كنت اول وحدة تحضر ..لكن الله غالب هاك اتشوفى فيها

-سرور: الله غالب هكى جى الضرف .. والحكايه صارت فيسع فيسع ...

-امنه : عندى علم ..ماهو خوى خليفه كلمنى وحكالى ..ربي ياخد بخاطره يااارب ...لكن عمك البشير مشى عندكم