#الدرج_العالي
🌷🌹بقلم زهور جمال الدين 🌹🌷
❣💕الحلقه الثالثه عشر 💕❣
.
.
-
-حنين : انا فى دارى راقدة وانت فى الصالة شادها هدرزة
..وماتبينيش نزعل ..يابرودك يا اخى
-شريف : باهى غير اطلعى نتفاهمو فى حوشنا
-حنين : قلتلك مش طالعه
-شريف: شنو قصدك عضبانه هنايا ولا كيف
-حنين : احسبها زى ماتحسبها ..
وخشت وخلاته واقف فى الباب ...
مشت للصالة قعمزت جنب النساوين وهيا دمها محروق منه
والف سؤال وسؤال يدور فى دماغها ..مدامها حبيبته كيف يرفعنى بيكشف عليا عندها ..اكيدة كان يبي يديراة حيلة معاها ...
وتخمم: معقولة شريف ايدير هكى..مستحيل نصدق ..باهى ليش رفعنى ليها ..ليش بس
طلع شريف ركب فى سيارته ..قري الرسايل مرة ثانيه
..خاطره ايكلم الدكتورة ايسبها لكن وخر وغير رايه
قام التليفون اتصل برقم سرور
-سرور: الو
-شريف: ترا ناديلى عمتى زهرة نبيها برة
-سرور : باهى اهو تو اناديهالك ..
وناضت سرور من مكانها ادور فى عمتها زهرة ..
طلعت للجنان الخلفى ..لقت زهرة واقفه على عمك خليفه ..اتقوله عالحاجات الناقصه
"زهرة نوعها تتحمل فى المسؤلية واترد فى بالها "
-سرور: عمتى زهرة
-زهرة تلفتتلها : نعم
-سرور : يبيك شريف فى فم الحوش من قدام
-زهرة : هى شوى اهو تو نمشيله نكلمه
-سرور: شنحالك يابوى
-خليفه تعبان : باهى الحمدلله بنيتى .. شن بتمشو اتزورو جدك اليوم
-سرور: كانا قعد فى العيادة بنقولو لشريف يرفعنا بعتالى
-خليفه : لا ماضنيتش يطلقوه اليوم
-سرور: معناها تو نمشوله
_____________________________________
ندى مقعمزة فى الصالة تشبح لحنين..
الحقد فى عيونها ...
فى دماغها افكار وافكار تبى اتودر العلاقه بين شريف وحنين ..لكن كيف .. تخمم واتفكر وادبر
ناضت من مكانها قعمزت جنب حنين
-ندى: حنونه شن حالك
-حنين 🙄: الحمدلله ..فى خيار الخير
-ندى : امبارح النساوين شافوك تعبانه يحسابوك حامل
-حنين 😏: اللطف وامتى كيف طقيت شهر ومعاه ايام
-ندى: قصدك انتى تحسابى روحك بتحملى ..شنو ماقالولكش ولا كيف
-حنين تعصبت : شن بيقولولى ..شن فى يا ندى تكلمى
-ندى شدت ايدين حنين : ياوخيتى فكينى منهم حوش خالى..مادخليش انا
-حنين : ندى ماتعصبينيش اكثر..قوليلى شن فى وخيرهم شن داسين عليا
-ندى: باهى احلفى ان الدوة ماتطلعش منك ..واحلفى ان حتى لو طلعت منك ماتجيبي سيرتى
-حنين بدت ترعش : عليك الامان يا ندى والله سيرتك مانجيبها
-ندى قامت يدها : راك حلفتى بالله يا حنين
-حنين : والله سيرتك مانجيبها فى كل الاحوال..غير قوليلى شن فى شغلتينى
-ندى: شريف عقيم 😳😳😳
________________________________________
طلعت زهرة للجنان القدامى ...
لقت شريف مقعمز فى سيارته ...
قامت يدها اشرتله بمعنى تعالة
نزل من سيارته : تعالى لجنان حوشنا شوى يا عمتى
