#الدرج_العالي
🌹🌷للكاتبه زهور جمال الدين 🌷🌹
❣❣الحلقه الرابعه ❣❣
حنين مقعمزة فى دارها وتبكى ...
وجدها وحناها يتناقشو فى الصالة ..
-الطيب: وانتى منين تعرفيه الولد بيش اتحبيه ويعجبك وتبى تعطيه حنين
-ربيعه : اسكت يا طيب انت مش فاهم
-الطيب: باهى فهمينى .. اقنعينى
-ربيعه : من زمان لما عطانى عمران بنته شرط عليا ان زواجتها عليه هوا مش علينا احنا
-الطيب: زواجت شنو ..المصروف قصدك
-ربيعه : لا مش المصروف .. المقصود انه هوا يعطيها للى يشبح انه يستاهلها واحنا ماندخلوش فيه الامر هدا
-الطيب: توة انتى ربيعه اللى كنتى تقولليها ترقى وماترضيش بأى شى اقل من مستواك ..جايه توة تقوليلها خودى على دوق بوك .. ياودى كلامك مش مقنع
-ربيعه: وخيره ولد عمها ..طول عمرنا نعرفو ولد العم هوا الاولى بالبنت
-الطيب: هداكه على وقتى ووقتك .. لكن وقت حنين لا
-ربيعه : اووووه علينا عاد ...النقاش زايد فى الموضوع حنين بوها عطاها لولد عمها خلاص .. والشهر الجاى عرسها
حنين كانت تسمع فيهم من ورا الباب ...فتحت الباب بالقوة وطلعتلهم
-حنين: مدامه هدا كلامك يا اميمه وبتغصبو عليا ..والله مانى قاعدة فيها الدنيا دقيقه ..لما نلحق ماما
-الطيب مشاله اضبطها : لا سلم بنتى ..والله مادامه جدك حى مايقدر واحد يغصب عليك
-ربيعه : يعنى هدا كلامك ..تبى تموتى كافرة ....
وقامت صبعها اشرت على حنين : قلتلك بوك عطاك واحنا ماعندنا مانديرو جهزى نفسك للسفر لليبيا
حنين تشبحلها ومصدومه ...وخشت لدارها سكرت على روحها بالمفتاح
__________________________________
ثانى يوم
ربيعه فاقت من الصبح جهزت الفطور ...ونادت على عمك الطيب
-الطيب : شويا بس وانجى
-ربيعه : طق على حنين نوضها من النوم
-الطيب : باهى ...
وظم الطيب الاوراق اللى فى يده وطلع من داره فات على دار حنين وطقطق
-الطيب: حنين ..حنين ..نوضى يابابا ياسرك من النوم
وطلع للصالة لقى الفطور عالطاولة
جت ربيعه من المطبخ : خيرك مانوضتش حنين مش قلتلك طق عليها
-الطيب: طقيت وماردتش عليا ..خليها براحتها
-ربيعه انشغلت🤔 : حنين نومها خفيف غريبه ماردتش عليك
ومشت للممر وقفت قدام دارحنين واطقطق
-ربيعه : حنين ...حنونه ...نوضى بنتى خيرك نومك ثقل اليوم
واطقطق : حنين ..حنين
زادت انشغلت وقوت صوت طقت الباب وقربت ودنها عالباب وتنادى: حنين ...حنين وينك ماما
-ربيعه : يا طيب تعال الحقنى البنت ماتردش
جى الطيب : حولى ترا كيف ماتردش ...
يخبط عالباب: حنين ...حنين ردى عليا انا جدك
شى مفيش فايدة والبنت ماتردش
-ربيعه حاطه ايديها ع خدودها : حيه عليا بنتى اكسر الباب يا طيب
-طيب يشبحلها ويفنص فيها : توة حيه عليا ينتى ..تى ماهو قلنالك خلى البنت فى حالها مابيتيش
-ربيعه : غير اكسر الباب توةوشوفها البنية شن صاير فيها
وقعد الطيب ايدف فى الباب لين كسر القفل وخشو للدار ...يلقو حتين فمها امسبت وتحت عيونها ازرق وصايخه
-ربيعه بدت تعيط : حيه عليا بنتى ...ووك عليا بنتى
-الطيب: اسكتى يا مراة ماترهنينيش ونوضى معاى البنيه نرفعوها للمستشفى
وبالفعل قامو حنين وطارو بيها للمستشفى العام
