#الدرج_العالي
🌷🌹للكاتبه زهور جمال الدين 🌹🌷
❣❣الحلقه الاولى❣❣
عموما بنبدو توة فالحلقه الاولى والقصه بنجيبهالكم من جدورها ..من لما عمى الصادق دار عرس ولده
توة احنا حكايتنا خارج طرابلس ..وين الله اعلم تعرفونى لانحب انجيب الاصل ولا المنطقه ...
وعمى الصادق ربي يطول فى عمره كان عنده معصره متع زيت وارثها من بوه ..وبوه وارثها من جده ..لدرجه ان لقبهم الرسمى فالدولة يقولولهم عيت الزيات ...
وعمى الصادق عنده زوز ولاد وبنت ضناه عزيز بعد وين ووين حصلهم اكثر اللى تجيب فيهم مرته يموتو ...
ولده الكبير عمى "خليفه" متسمى على جده من مواليد سنه 63 شادها خدمه مع بوه ترس وخلاص .. والولد الاصغر منه "عمران" ..مواليد سنه 70 ..ماهو قلتلكم الحاج الصادق ضناه عزيز وماتوله هلبا ف فرق العمر بين الاولاد هلبا ...واختهم "آمنه" مواليد 73...هدا ماحصل فالدنيا
كبرو الشباب ولما طق خليفه 30 عام سنه 83 خدوله سالمين بنت خاله ..جابوها من اقصى الشرق ..ماهو خالهم "مختار "ماشى عايش فى الشرق ..وداروله عرس كبير امطنطن .. وسكنت مع عمتها فى دار ..الحوش كبير وهما شوية من هناك غير عمران وامنه وبوهم وامهم عمتى غالية .. العروس تاكل وتشرب معاهم وهوا يخدم مع بوه وماشيه امورهم .. . وحملت سالمين من ثانى شهر ..
ومرو التسعه شهور على خير ..وجابت" شريف" سنه 84..ومادلعت فيه حناه وعمته امنه ...قالولها هدا ولدنا وانتى اخدمى على واحد ثانى ..لكن الله غالب ربي ماعطاش ..
وقعد شريف مدلل بين حناه وعمته ..وسالمين تجرى وتحزم تبى تزيد صغار مع ولدها ..وكل ماتمشى وتعاين يقولولها مافيكم شى ..لحد ماحملت سنه 89 وجابت بنتها سرور
وفاتو السنين ... وامورهم تمام
وفى سنه 92 ...
عمران مركب امه جنبه فى سيارته وماشيين طرابلس بيسلمو على خالته ربيعه مروحة من برة هيا وصغارها
-عمران: والله ماماشى الا على خاطرك ياام ..
-غالية: مفهمتش علاش متحبش خالتك ياعمران
-عمران: تتجكتر هلبا هيا وولدها ..تقول مش ليبيين واصلهم مننا
-غاليه: غير انت تتحسس هلبا ياوليدى..
-عمران : اسمعى بنحطك وبنطلع طول نقول عندى عمل
..والمغرب نجى نروح بيك
-غاليه: غير وين بتطلع بس طرابلس من تعرف فيها انت ياوليدى ..خليك تغدا مع ولد خالتك وبعتالى نروحو
-عمران : قلتلك لا ..مش حنقعد ..وغير الحاج قالك روحى الليله ومرة ثانيه ارجعى باتى ..كنهدا راهو حطيتك ودورت طول
-غاليه: باهى باهى.. لازم اديرولى شق العقل كيف تخلونى مرتاحه انتم وبوكم ..لازم هكى تنغصو عليا
ووصلو غاليه وولدها حوش اختها ربيعه ..ماهو ياحنه ربيعه كيف روحت اولامس من تشيكا.. تسكن غادى راجلها يخدم فى القنصليه .. وماعندها غير راس وليد وبنية ..محمود م72 وامال م 74...مروحة غير زيارة بتقعد شهرين وبترجع ثانى هيا وصغارها.. وراجلها ماجاش معاهم بيلحق بعد اسبوعين
ربيعه وغالية خوات من الام والاب ..وخوهم مختار خوهم من بوهم بس ...
لكن غالية من النوع الطيوبة..ومعشريه ..اما ربيعه سبحان الله ماتقولش اختها تحب غير النفخه والتكويش ..وماعاجبها شى ..وديما عند روحها خير من الناس
وصلت غاليه وسلمت على اختها ربيعه بالاحضان مستاحشتها ليها اربع سنوات ماشافتهاش..وخش عمران وسلم على خالته
وخش سلم على محمود .. لكن قعد حاير لقى محمود ايسلم وايرحب ومتغير مش نفس الشخص اللى شافه زمان..لقاه كبر وبدى متواضع ويرحب ويسلم ...ياودى حسه عمران استريح وماصارش من طلوعه
قعدو فالمربوعه هوا ومحمود يحكو ويهدرزو ..وبعد ساعه
-محمود: اهو بنطلع شوى انا وعمران نديرو دورة ونجو ماتعطلوش بالغدى يااام
-ربيعه: غير وين ماشيين بس ..خليكم هدرزو معانا
-عمران : دورة بسيطه ياخالتى ونرجعو
-غاليه: باهى غير ماتعطلوش بس
طلعو عمران ومحمود ايديرو فى دورتهم ...
ووخشت ربيعه للمطبخ اتشوف فى الغدا ..وجنبها شغالتها زوبا افريقيه ليها فترة عندها رافعتها معاها برة ومعلمتها اللهجة الليبيه تطقطق اطقطيق بيها ..وامال هيا اللى سمتها زوبا ماللى هيا صغيرة
-ربيعه : برى نادى امال اتسلم على خالتها
-زوبا : باهى
وخشت زوبا لقت امال اتغير فى خوايجها بتطلع تسلم على خالتها ..وبالفعل طلعت وسلمت وهدرزت وروحو محمود وعمران ..خشو للصالة ..
-محمود : هيا وين الغدى يااام
-ربيعه : نحطو مع بعضنا على طاولة الاكل.. ولا تبو تمشو بروحكم فى الصالون
-محمود تلفت لعمران : على راحة عمران
-عمران : لا كيف متحبو عادى
-غاليه: اسمعى ماتحطيناش فوق عالكراسى والله مانعرف ناكل .. هما ديريلهم غادى وانا وياك وامال حطيلنا هنايا
-عمران : وينها هيا امال ..قاعدة بكاية زى زمان ولا عقلت
-ربيعه : لا وين بكايه ..امال توة كبرت ورزنت .. حتى هيا كيف طالعه من الشهادة الثانوية وبتخش للجامعه
-عمران يضحك: انا مانتخايلش فيها الا فى هادوكه القرينات زى زمان والعيون خضر مليانات دموع وعياط 😁
وقعدو كلهم يضحكو
-ربيعه: زوبا ..يازوبا ..نادى امال تسلم على عمران ولد خالتها
-زوبا : امال فالمطبخ ..حاضر اهو تو اناديها
غسلت امال ايديها وطلعت ...
جت امال خاشه عليهم عمى عمران رعش مع بعضه😁
..يتخايل فى بنوته قصيرونه بقرينات ..وتخش عليها بنية طولها 170 ..وجسمها رشيق والعيون خضر والرموش للسما
-وقف عمران😍 : اهلا امال
امال صارلها نفس الشى ..ليها سنين مش شايفاته ..حساته تغير وبدى شخصيه
-امال: اهلين عمران 😍
ومدو الغدى ..وامال تصول وتجول وتمد فالصالة ..وعمران مش محول عيونه من عليها وهيا نفس الشى ..وهاتك يا ابتسامات لبعضهم وخلاص ...
وجى موعد المرواح ..عمران ماخاطراش ايروح ويخلى هالغزالة 😁😁....قام عمران تليفونه واتصل ببوه
-عمران: يابوى السيارة عطلت وحطيتها فالورشه ..واحتمال الليله بايتين ماتنشغلوش علينا
-الصادق: باهى ساعدو ارواحكم
