فجرَة

فجرة (بعد زواجها ❤) الجزء الخامس

فجرة بعد زواجها ❤
كتابة : 🌷ندى احمد🌷

في الجزء السابق : -
وميادة تشبحلها من فووق ل لوطا لحنتها ولبستها كيف طالعة بتموووت ميادة بتنقهر ،
كيف حال فجرة تحسن هلبا وواخدها مدير شركة كبيرة وعايشة مرتاحة ، هكي الباين على وجه فجرة .

وصلت فجرة في ميادة مدت ايدها ،

الجزء الخامس : -

#قراءة_ممتعة ❤

ميادة دارت روحها ما شافتش فجرة وناضت من مكانها  دايرة روحها بتقيم السفرة
وقامتها وطلعت ..
وفجرة حست بالاحراج والناس مقعمزة  فيه اللي شاف دار روحه ما شافش
واللي شاف وقعد مستغرب ..
قعمزت فجرة على المندار وحطت شنطتها جنبها .. والناس طبعا اتفصل فيها مالقوا فيها ما ينعاب
والصبايا يفرقوا ويمدو على عصير وشاهي وحلاوات الخير كله حطوه وداروا شوط دربوكة على الخفيف
وناضت  ميادة تشطح ترقص ببطنها وتوخر مدايرة انديترو وتخمس بايديها  خايفة من العين هههههه

اسراء نخصت فجرة : نوضي ارقصي ..
فجرة : مانعرفش نتحشم ..
اسراء : نوضي ارقصي هيا حتى شوية ..
ناضت فجرة حزمت .. ميادة طول قعمزت هالمسمومة ..
ورقصت فجرة وهما يغنوا
**حزامك هلي تلوي فيه ان شاء الله على وليد تحليه **
اسراء ناضت من مكانها ومشت اتصلت ببوها
عبد الله : ايوة بنتي ..
اسراء : خيركم عطلتوا ؟
عبد الله : اهو في الطريق ..حلفت قالتلي مش ماشية فاضية توا تنزل تاخدلي هدية ..
اسراء : بارك الله فيها .. عادي قلها قالتلك مش برانية علينا ..
**
فجرة ترقص وميادة تشبحلها من فوق للوطا كان تلقا تطلق عليها الموت ..
ميادة اشرت للبنت اللي ادربك : ياسر خلاص راسي بيتفجر نبوا شوية هدوء ..
وقفت هاذيكا البنت الدربوكة ونحت فجرة الحزام وخدت شنطتها وطلعت من المربوعة  ..
متضايقة من لقطات مرت عمها والغصة في رقبتها
مشت للحمام للحمام حاولت تفتحه لقاته مصكر ..
وهي تهرب من نظرات النساوين والصبايا اللي يعولوا ماشيات جايت بين المربوعة والمطبخ
ماتبي حد يلاحظ عليها دموعها ..
طقت على دار اسراء ..
اسراء شادة ولدها ..
اسراء : خشي ..
خشت فجرة لدار اسراء وجهها احمر وعيونها دموع
اسراء : اسم الله عليك خيرك تبكي ؟
فجرة : مافي شي ..
اسراء : والله لم تقولي ؟
فجرة : مافي شي يا اسراء  اطمني غر متضايقة شوية ..
اسراء : العفو انتي جيتي مافيك شي وجوك حلو ؟
فجرة : ...
اسراء : هاذي امي وله ؟ .. اهو ماشيتلها ( واسراء حطت ولدها في البوكس و كيف طالعة ... بتفتح باب الدار )
فجرة : بالله عليك اسراء  فوتيها ..(حطت ايدها على دراع اسراء )
اسراء : صار هي امي اللي قلبتلك جوك ..؟
فجرة : فوتيها انا كان نبي ناخد حقي ره خديته منها .. لكن مرا كبيرة ماتجيش ..
اسراء : تو نكلمها  .. كان ماتبيش تبطل بنكلم بوي
فجرة : لالا سرو بالله عليك المرة الأولى طلاقها بسبب موضوعي وتوا مانبيهاش تكبر بينهم خليها انا نحاول نتفداها وخلاص
اسراء :باهي امسحي دموعك اهو القجر الأول مكياجي .. ساوي روحك قبل ما تطلعي
وسكرت اسراء باب الدار بالمفتاح ورجعت قعمز على السرير تغطي في ولدها ..))
فجرة تحاول تغير الموضوع : شن قررتوا تسموه ؟
اسراء : والله منذر قال بنسميه أنس ..
فجرة : خفيف وحلو الاسم .. ترا نشوفه ..
وطبست عليه فجرة تضحك ..
فجرة : ههههه تعرفي بيطلع لمنذر نسخة طبق الأصل ..
اسراء : ماهو جت الهبلة عليه ..
فجرة : شوفي سبحان الله نسخ لصق .. ومزال يبان اكثر ..
اسراء : كنت نتخايل فيه يجي اشقر زيني ..
فجرة : لالا منذررررررر سبحان الخالق ..
اسراء : كان يسمعك منذر يفرح ..