فجرَة

فجرة (بعد زواجها ❤) الجزء الثالث

رواية فجرة (بعد زواجها❤)
كتابة 🌷ندى أحمد🌷

في الجزء السابق : -

تتسبل بدوشتهم ماتبيهمش يجوني
ميادة ابتسمت وفرحت في نفسها : لاااا عندها حق ، الواحد بيرتاح الدوشة الكبير مايتحملهاش ره
اسراء : في حوشي شن في حوشها يام ، بالله اسكتي حتى انتي !
ميادة : ....

الجزء الثالث : -

#قراءة_ممتعة ❤
.......
ميادة : مهما يكون ... كان مش عاجباتك سكنة فوق العيلة راك شرطتي من الاول ،
*اسراء تبي تغير الموضوع
اسراء : كيف حال بابا ؟ ما جتش كلماتك بسمة ؟
ميادة : لالا لا هو جي تالاي لا جيت تالاه وهاذيكا فالحة تقربع غر في البيبان في وجهي ،
اسراء : كيف ؟ باهي انتي كيف دايرة في ماكلتك وشرابك ودخولك للحمام ،
ميادة : الحمام البراني والكوجينة البرانية فتحتها ونعول فيها ،
*اسراء فكرت تبي تقوللها كلام  انها لو ماجتش في طريق فجرة قبل ما كانش عبد الله تزوج عليها ورقدت هي ف دار برانية في الصقع (لكن اللي يدير يلقا ) تراجعت اسراء وماتبيش تفتح مواضيع قبل ،
اسراء : به تعالي كسدي عندي وباتي ،
ميادة : لا يا ودي  نبات مانقدرش راجلك يضايق ، نجيك ونروح ،
اسراء : به تعالي امالا، عندك من يجيبك ولا نكلم منذر ؟
ميادة : تو نكلم بوك يرفعني ، فالح غر يدهور بهاذيكا الممصوصة ،
اسراء : يما فكينا من المشاكل اخطيهم ، تجي على راسك ،
ميادة : اي مشاكل ؟ قتلك بيرفعني هو ،
اسراء : تمام وردي عليا كان مش جايبك هو  نكلملك منذر ،
***
ميادة مشت واقفة على باب الفيلا واطق ،
طق طق طق ، طق طق طق ،

فتحت ضرتها "بسمة" الباب ،
وتتشقلع هادوكم الاظافر والمانكير الاحمر يلمع وايدين ناعمات وشعر بني يضرب لتحت حزامها ،
وعيون كبار وعسليات والوجه مدور زي القمر ،
لابسة روب اكمام كتافية مشماشي والحزام رابط خصرها ،
حاطة ايدها في نصها 
ميادة تشبحلها وساكته  من فوق للوطا شبحت رجليها دايرة المانكير الاحمر وشبشب الفرو السكري ،
بسمة بصوت هادي وتتشقلع : نعم تفضلي ! تبي حاجة ؟
ميادة الغيرة والحسد تحرك داخلها وكلمتها بجفاف ،
ميادة : وين عبد الله ؟ نبيه ،
بسمة : عبدو متكي ويتفرج على التلفزيون ، خير تبي منه حاجة ؟
ميادة :ماليكش دخل تسألي ناديلي عليه ،
بسمة : بعدين وهو طالع كلميه ، تاعب من الشغل ويبي يرتاح ،
ميادة جت وجهها في وجه بسمة : ترا حولي من قدامي ،
بسمة مابتش تحول ،
دفت ميادة بسمة : تي حولي ، تو نكلمه انا بروحي،
وقعدت ميادة تنادي : عبد الله ، يا عبد الله !
عبد الله متكي في داره سمع صياح ميادة ، ناض يجري ، طلع من الدار وهو في الدرج فوق ،

عبد الله : خيرك تعيطي شن خششك انتي ؟
نزل لصالة
عبد الله شبح لبسمة يفنص : من قالك خششيها هاذي ،
بسمة : هي خشت ودفتني انا ماقلتلهاش خشي ،
ميادة تشبح على جنب لبسمة ، قريب تاكلها
عبد الله شبح لميادة : شن جاية تبي ؟
ميادة : نبي نمشي لبنتي ، ارفعني ليها ،
عبد الله : توا ؟
ميادة : اي توا ولا فالح غر ترفع في هاذي !
بسمة : احترمي نفسك ما اسميش هاذي ، اسمي بسمة ايواه (وايديها في بعض)
ميادة شوية وتبي تمد ايدها : انتي صكريع فمك وشدي لسانك خيرلك شكلك تبي من يربيك ،
عبد الله علا صوته يكشخ : ضمي فمك انتي وياها ، (شبح لبسمة ) اركبي فوق انتي ،
بسمة : حاضر ، (ومشت تتشقلع وترمي بايدها في طرف شعرها وراء ظهرها وشبحت لميادة غلى جنب وركبت لدرج)
ميادة : قليلة ادب هاذي لواخدها ومش متربية !
عبد الله : لا انتي ما شاء الله والله ،
ميادة : خير منها ، ماتقارني بحد (طبعا ميادة حتى بعد اللي صارلها ، قاعدة متعنترة ومتغطرسة وقاعد الشر فيها مستحيل يتنح لان هاذي طبيعتها)
عبد الله : انتي شن جاية تبي ؟ تبي بنتك ؟
ميادة : نبي بنتي ايه ، تعبانة بنمشيلها ،