فجرَة

الجزء السادس ( الموسم الاول)

فجرة ❤ (قصة واقعية )
كتابة : ⚘ندى احمد⚘

في الجزء السابق : -

خشت فجرة بالسفرة فرقت قعمزت شوي و طلعت..
وام الشاب مبتسمة فرحت اكثر بفجرة وكانت راضية ..

خشت فجرة للمطبخ !!
اسراء : خلي بنمشي نقعمز معاهم !!

خشت اسراء : شرفتينا يا حاجة ..
الحاجة : تسلمي بنيتي !!
ميادة : زي ماتعرفي البنت حتى اللي جوها قبل رفضتهم على خاطر مايبوش خوتها معاها !
اسراء : ماهي هي الكبيرة وعمي ومرت عمي متوفيين ..

الجزء السادس : -

الحاجة : باهي وين خالاتهم وخوالهم ..
اسراء : قاعدين في الشرق وكل واحد لاهي بروحه ..
ميادة : المهم هو هذا شرط البنية خوتها الصغيرين يمشوا معاها !

الحاجة : اي ان شاء الله ربي يقدم اللي فيه الخير ! نشوف ولدي ونرد عليكم ..

وطلعت الحويجة وهذاكا يوم وهذا يوم لا عاد اتصلت ولا عاد هذاكا الشاب عاود اتصل باسراء ( مايبوش يتحملوا مسؤولية وتربية صغار صغيرين وفجرة حالفة كان تقضي عمرها كله بلا زواج ماتاخد واحد مايبيش خوتها يسكنوا عندها )

ميادة فرحانة وتبيها شغالة اضم اطيب تكنس !
وتاكل في حقها هي وخوتها الصغيرين ..
حتى المصروف ! ماتعطيش فيها ..

اسراء كيف مروحة من الجامعة واخدة المنحة
اسراء : هاك ..
فجرة : هذا شني؟
اسراء : مصروفك بالك ناقصك شي !
فجرة : لا والله ماصارت ..
اسراء : ما تحلفيش .. انا عارفة بوي وامي مقصرين في حقك وانتي مش مقصرة !
فجرة : صحيتي والله متحشمة منك ..
اسراء : بنات عم ورزقنا رزق واحد !

فاتت فترة شهرين !
وجي عرس اسراء ، ويوم البودري هما زي التوأم مع بعض ..
لين جت يوم الحفلة !
اسراء وهي يزفوا فيها ، فجرة مدرقة روحها وراء العرصة وتبكي ..
ميادة بكل قلب جاف : شن تبكي ؟ شن عزي هو؟ بري اغسلي وجهك ماتخليهاش تشوفك ..

مشت فجرة للحمام وتبكي تبكي !!
حست بايد على ظهرها : خيرك يا بنتي ! خيرك تبكي ؟
تلفتت فجرة لقتها (رانيا الشغالة المغرببة)
رانيا : فجرة ماكنتش نحسابك انتي ، خييرك تبكي ؟
فجرة : تأثرت على بنت عمي ..!
رانيا : حسيتيك متعلقة بيها بالزاف !
فجرة : قد مانحكيلك احنينة وفزاعة شوية ،
رانيا : ادعيلها بالهناء
فجرة : ان شاء الله !
رانيا : معليش ممكن سؤال ؟
فجرة : تفضلي ..
رانيا : كيف دايرة مع مرات عمك حسيتها وحدة مسمومة ..
فجرة ضحكت وتمسح في دموعها المختلطة بالكحل : تعرفيها كويس شكلك هههه
رانيا : نجيهم في المناسبات كان على خاطر راجلي ، وقت نجي نشتغل في مناسباتهم ، تكشخ وتعلق على كبيرة وصغيرة ، كيف دايره معاها هالشكل ،
فجرة : متحملين وخلاص ماعندنا وين نمشوا ونسايسوا نخاف يلزونا في الشارع ،
رانيا : معقووول يعني يلزوكم في الشارع ؟
فجرة : تصير !
رانيا : كيفدايرة في مصروفك ،
فجرة : هاذي العروسة كانت تمدلي وكان ماعطتنيش مافي من بيعطي !
رانيا : به ليش ما تشتغلي مش قتلك في شركة تشغل في عاملات نظافة ؟ عطيتك رقمي علاش ما اتصلتيش ؟
فجرة : مافكرتش في الموضوع ، تو نفكر ونرد عليك !
رانيا : خدمة نظيفة جدا ، تو لم تمشي تبعتك شركة لمكان طالبين عاملة او شغالة ، مش زي لم اطقي على الباب وتسألي تبوا شغالة !! الناس تستهزا ، والشركة فيها تأمينك الصحي وكل شي كويس ،
فجرة تسمع بكل أذان صاغية : اها ...
رانيا : انتي تعالي واقري بنود العقد ،
فجرة : كم في الشهر تاخدي ؟
رانيا : على مستوى احترافك واتقانك في شغلك ، انا ناخد قريب 1000
فجرة : والله كويس ...
رانيا : اول شي بيشوفوك في الشغل وعلى اساسه بيقيموا المبلغ اللي بتتقاضيه !
فجرة : ان شاء الله خير والله مسؤولية ثلاث خوت صغار حتى النصيب يجي نرفض على خاطرهم ،