Bakit ikaw pa ang nagustuhan?
Bakit ikaw pa ang kinahumalingan?
Bakit ikaw ang nagpapasaya sa araw ko?
Bakit ang puso ko'y litong-lito?
'Di ko malaman ang nararamdaman
Sadyang hindi ko maintindihan
Kung bakit sa araw ika'y nais makasama
At sa gabi ika'y naaalala
Minsan ko nang tinanong ang aking sarili,
Posible pa ba akong magmahal muli?
At sa 'di inaasahang pagkakataon, dumating ka
Simula noon, mundo ko'y naging masaya
Subalit, tila takot ang sa puso ko'y namamayani
Takot na baka ako'y muling maging sawi
Takot na baka ako'y tuluyang iwasan
Takot na baka ako'y iyong iwan
Ngunit aking napagtanto,
na ang wagas na pagmamahal ay dapat totoo
Hindi maramot, hindi mapagkunwari
At kailanma'y hindi uunahin ang sarili
Sa puntong ito, nais kong malaman mo
Mahal na mahal kita, at iyon ay totoo
Bigyan mo lang ako ng pagkakataon
Ipaparamdam ko ito sa iyo sa habang panahon
