#فوبيا_الحب
الحلقة [15]
ماما : فيها جمال الله اكبر جسمها سمح شعرها مش طويل واجد نص ظهرها لونه اسود مش طويله ومش قصيره وبيضاء عيونها تقول منحوتات فيها فلتت عين الله اكبر لونهن سود تقول مكحلات ورموشها طوال وحواجبها تقول رسمتهن فمه فيه نفخه وخشمها صغير سمح ومش دايره مكياج واجد ولبسه فستان يهبل جاي عليها عليه كندره كعب
نا : عليك اللي امفصفصه البنت
ماما : طبعا مش تبي تبقي كنتي
هبه : وسعيلنا بالك يا ماما راك تبقيلنا من عمات اععع واعرات
هاجر : نذكر صاحبتي اجوزت ونحن مازالنا في معهد تحكيلنا علي عمتها قالت تفتش في شكاير قبل ما يركبهن ولدها لمراته ههههه
ماما : امشن مرض إن شاء الله انا ماني هكي
نحن : ههههههه
ايمان : امالا كيف يا ماما
ماما : نا نختار عايله وجمال بنت وتربيتها عشان اوليدي يتريح نفسيته بعد يخش لشقته
هبه : عقبالنا يا ماما تجينا عمه نفسك
ماما : إن شاء الله ربي يرزقكن بعويل حلال وعمه طيبه
ايمان : نوضي افتحي باب
نا : ايووه.. من.. اهلا
عمو عمر : وين امك
نا : بشويش مش هاربه ماما جو في دار
دق ع باب دار وخش
ماما : مرحبتين تفضل هاجر صبي جيبي لعمك حاجه يأكلها
صبت هاجر وضبحت للهبه تلفونها يرن
عمو عمر : بعدك جعان ها شن صار مع فرخ احمد
ماما : لا آلله اكبر طاح وين استرح ماشاءالله جمال واخلاق
عمو عمر : باهي تمام ربي يكمل عليه نا بكرا راه
ماما : إن شاء الله يا باتي نطلع نا وياك ونجاح وهدي نتكو ع فاطمه
هاجر جت : تفضل ي عمو
عمو عمر : منوره شن عشاكم بيتزا
ايمان : لالا عصريه عدن ماما وخالاتي وعميمه كسدنا درنا بيتزا
عمو عمر ياكل : نبي نغير ونعدي للشباب في كافي كان جاء احمد بدري قوليله يلحقني كافي خو حسن
نا : تمام
................
هبه : ايوه
عصام : اهلين شن جو
هبه : عادي الحمدالله كنك ران بدري احمد علي خشته
عصام : والله من امس ونا نرن مقفل ونهار كله مقفل توا لقيته مفتوح قلت بلكي تعبرني وترد
هبه : من غلطان نا ولا انت من الي قعد يعيط نا ولا انت
عصام بصوت هادي : باهي آسف يا ستي شن رضيتي
هبه ساكته
عصام : قلت آسف تقريبا شن ندير اخري
هبه : شي خلاص
عصام : تعرفي راه نخش فكيني من جو جفاف
هبه : وين تخش
عصام : احم مه نا قاعد قدام حوشكم
هبه : هييي حي عليا عدي يا مطرشق راه يحقوك هلي بعدك علي خشت احمد
عصام : هههههه توا عليش تشهقي سياره مظلمه
هبه : لالا عدي و النبي نسكر توا نهدرزو بعدين
عصام : متأكده تردي عليا بعدين
هبه : ولله نرد غير عدي
عصام : قوليلي نحبك قبل
هبه عصبت : تحرق في دمي انت
عصام : هههه لا والله بس نبي نسمعها بيش نتريح ونار اللي والعه فيا تطفي
هبه هدت بصوت واطي: شن مطافي نا
عصام بصوت هادي: انتي مطافي امتاعي نا وقلبي نا وحبي نا انتي نا يا فرخه نعشقك من أول ما شفتك ف مدرسه و انا متلخبط عمرك شفتي مدرس هبل حب مدرسه معاه من أول نظره قصدي عركه
هبه : ههههه اها شفت انت
عصام : باهي قوليها ي عمري
هبه بصوت هادي : نحبك
عصام : شن ما سمعتش تغطيه ضعيفه 😜
هبه بنفس نبره صوت : نحبك
عصام : اوووف يا فرخه انتي عذاب انتي خلقتي لي تعذبيني وماذا فعلتي بعاشقا متيم بيك ونا نمووت في تراب اللي تمشي عليها
هبه ساكته ومنسجمه
عصام : اوووي معايا
هبه : احم معاك معاك
عصام : هههههه شكلك سحتي انتي تي حي عليك كان معايا
هبه : خلاص نبي نسكر
عصام : تي يانعليا من متحشم انا بس شن رايك ف شعر
هبه : يهبببل بكل هذا ليا نا ولا غش
عصام : والله يطلع بروحه كلام ما عندي من وين نبي نغشه
هبه : هههه نبصر معاك عارفتك تحب شعر وخواطر نفس ايلاف تموت فيهن
عصام : باهي نرن تردي بعدين ولا لا
هبه : حاضر توا نرد سلام يا هبل
سكرت تلفون واضبطته وقعدت تنط ع سرير وتضحك
نا: بسم الله ربي يشفي يا ماما ارتزعي
هبه : ههه يهبل بكل مجنون عسل مش عارفه شن نقول عليه
نا : ربي يكمل عليكم واسكتي نبي نسأل ع جامعه نبي نرن ع ملاك
هبه : عمو عدا
نا : اها
طلعت
..................
نا رنيت
ملاك : اهلا بهلال عيد
نا : ههههه شن جو مرايفه عليك والله انتي وبنات شن صار معاهن
ملاك : عليك طروح في رمضان كنت عندك بعد نتلاقو توا ويقولولك مهم شن داير خوك ؟
نا : تمام خلاص ي حنه رد للمحور
ملاك : هييي لالا تي كنه هبل مش انصاب
نا : رأس سوداني هذا وقال ل الاء انه يبيها بنت قعدت تحرق ف دمها وتخلي فيا كل يوم نرن عليه تنزل تسمع في صوته لكن ما تدويش
ملاك : يا ناري عليك عذاب
نا : هههه تستاهل هذي اللي تبي تحب تحرق دمها خطرها لقينا عرب للاحمد
ملاك : ماشاءلله من تبي ترضى بي المزاط خوك اسمعي خلوكم مع بنت صريحين قولوها طلباته واجده منظره مهم الكوره مهمه نت شغل ممنوع مكياج دبش قصير ممنوع اي حاجه منعها عليكن قوليها حتي انتي ممنوع
نا : هههههه ماشاءلله حفظتيهن تعالي قوليهن لها
ملاك : خوكي هذا ما نخش في مرقته بكل واعر ي خيا بكل نار والعه مايبصرش بكل
نا : لا والله عسل هههه
ملاك : من خذيتوله ولا يبيها
نا : لا قال للماما اخت صاحبي قولي طلع من صاحبه
ملاك : ماتقوليش اللي دويتيلي عليه
نا : هو بشحمه ولحمه
ملاك : مش قلتيلي يهبل صاحبي مرات خوك وقوليلها مش عطيتك خويا عطيني خوك هههه
نا : في حلمك ما نبيش مازال بدري نا رنه نبي نقولك شن قلت للايوب اسمعي قتله .....
ملاك : تعبريش انتي معاك حق عنجد تاخذي واحد اصغر منك لا وصايع فوتيه بعدين كبر يبان في بنت قبل راجل و يابال انتم بينكم 3 سنين فوتي فوتي
نا : بس وجعني تصدقي انه قلبي يقعد تقول طبله بعد نحقه
ملاك : راك تبقي حبيتيه ي فرخه
نا : لالا شن حبيته ما حبيته قتلك امتي جامعه
ملاك : اسبوع جاي تجديد والي بعده نقرو بيش تجي يوم السبت البنات جيات
نا : تمام تي باهي اللي ردونا في جامعه
ملاك : اها والله نحقو طروف من جميع الأقسام علي قول بيسو ههههه
نا : ههههه والله مرايفه عليكن وعلي اهبالنا اللي انديرو فيه في جامعه
ملاك : توا نردو تخافيش اسمعي ماما اضبح نتلاقو
نا : تمام سلميلي علي هلك
ملاك : يوصل سلام
سكرت منها وقعدت نطلع في دبش
ايمان : ي اوفي
نا برمت عليها : كنك
ايمان : اسامه عيد ميلاده توا شهر هذا تعالي خططي معايا
نا : ناعليا كيف عرفتي
ايمان : حفظته بعد قريت عقد زواج
نا : شو رايك يطلعنا واحد من شباب صغار وتشريله بدله عربيه بلكاط بكل نا عليااااا نا بعدها سخسيه يقعد
ايمان : صار سخسية
.............
احمد : خير ي جماعه
ماما: مرحبتين شن قالك باسم
احمد : وسعي بالك ي امي كنك مستعجله
هبه : ههههه مانحكيلك امبدري وهيا تدوي عليها بنت اكيده من بو فهاق قريب تموت
ماما : ندوي عليها بالخير نا
احمد : نا قتله السبت ان شاء الله مقابله
طلعت نا وايمان لقيناهم مقمعزين في صاله
نا : ماشاءالله العريس بروحه يهدرز
احمد : هههههه ماشاءالله ع براده
نا : مش قداء وجك رفع معنويات علي فكره علي برادتك هذي بنت توا ترفضك
احمد رفع حاجبه : صبي امسحي الكويش نبي نطلع
نا : باهي قالك عمو عمر تعال في كافي خوه حسن
احمد : عارف رنو عليا شباب
نا : قالتلك ماما علي سنيوه 😉
احمد : من سنيوه هذي
ايمان : عليك طروح
ماما: طاح سعدك راك تفضح بيا قدام ناس
احمد : ههههه نبصر معاكم عارفها شكلها محترمه ان شاء الله خير
إيمان : إن شاء الله سألت عليها عليك عار
احمد : لالا كيف نسأل ونا مصاحب خوتها محترمين
ايمان : فجعتني نحسابك
احمد تعشى وطلع بعدها توزعن كل وحده قعدت علي تلفونها يكلمن الا نا وهاجر😅طبعا هاجر ماعندهش فون
............
منتصر : نبي نشري دبش نا
ماما تقرض في خضره : ماتنفخنيش من عند الصبح امشي لبوك
منتصر : باهي ادويله انتي فكيني جو شين كان نا اللي طلب
هاجر : ادوي لاحمد بعد يروح من عمل
منتصر : لالا فكيني من وجه حتي هو يشيلني يختارلي هو
هاجر : لا يعجبك عجب ولا صيام في رجب
منتصر : يا الله نلحق في رمضان مش رجب ترا طيري
نا : نجيها حناطه ع صبح
ماما : كنك واعيه بدري غريبه
نا نصب في شاهي وحليب : اسبوع جاي جامعه نبي نعود روحي
منتصر : ايلاف تبي دبش ع جامعه صح
نا : ومطلوب
منتصر : حتي نا نبي قولي انتي لباتي يطلعك ونا يعطيني فلوس
نا : ماشاءالله ع تخطيط من امتي بابا يعطي فيك فلوس ف يدك
منتصر : حلوه هذي كبرت نا
هاجر : نبو نبدو في اسطوانات نا كبرت نا قعدت راجل نا ونا ونا
ماما : ما دام كبرت امشي قوله يا باتي عطيني فلوس
منتصر : خلاص منورات وجوكن
طلع ونحن بدينا نظمو ووعينا هبه وايمان وماما حطت غذاء ع نار كملنا وقمعزنا قعدنا نرجو في بابا ومنتصر ع غداء
هبه : ايلاف شن قالتلك ملاك
نا : اسبوع جاي تجديد بس اسمعي نبي نقولك حاجه
هبه : ها
نا : داء إن شاء الله مهم ايوب كنه معش جانا غريبه قبل يوميا عندنا
هبه : لااااا بعد كلام اللي قلتيه له تبيه يجي تي قالك نحبك وانتي قلتيله خلينا خوت كنك بارده
نا : هههه باهي شن دخلني بس نبي نقولك تذكري في عزاء اجديده شن قالي تقريبا لمحلي اصلا ونا نفكر في موضوع قعدت نذكر كيف يعامل فيا من قبل تاريته كاين يلمح غير نا غبيه
هبه : شن قالك
نا : قالي نا الحمار عندي بنت عم هكي ونبحت برا عطني عمى ما نلقاله دواء ضحكي والله
هبه : طح سعدكم نحن نتباكو انتم زيطين
نا : تي شن زيطين يا كلبه بعد الاسبوع كلام هذا في جيت عرب الغرب وشرق يعزو فينا ونا طالعه نعطي فيه في السفر
هبه : اهاا بس وجعني
هاجر : كان يبيها صح توا يرد اخري
هبه : تسنتي ي ابله
هاجر : حسيتك ملتي مش ع اساس لا حب لا بطيخ
نا : لا دلاع ي حبي ناقصه غير نحبه
هبه : كذابه كان ما حبيتيه راه م فقدتيه
نا صبيت : انبحن نا فاضيه جايا نسأل فيكن
طلعت وقمعزت شويه وجا بابا ومنتصر تغدينا وغسلت مواعين وجاء عمو عمر خذا ماما وعدا
..............
عمر : اهو الحوش انزلن اللي بابه أسود
ماما : نزلي يا فاطمه تورته وراني
عميمه فاطمه : هيا هي
دقن وحاللهن راجل وقاللهن تفضلن
امها : مرحبتين تفضلو
ماما : زيد فضلك
خشن قعدن يهدرزن ع بلاد وناس كيف تغير وجيران بعدها خشت البنت في يدها قهوه حطتها وقعدت تسلم
امها : هذي هنيده
عميمه فاطمه : ماشاءالله ماشاءالله
ماما : ماشاءالله تبارك الرحمن
نجاح : نجيها ي خيا
هدي : ماشاءالله
ماما : كيف حالك
هنيده : الحمدلله كيف حالكم انتم
عميمه فاطمه : الحمدلله شن تقري ولا مكمله
هنيده : لا مكمله نعطي في مدرسه خاصه
نجاح : مواليد كم
هنيده : 91
ماما : باهي ماشاءالله بطولة عمرك
هنيده : سلمك
طلعت بنت قعدو يهدرزو بعدها عميمه فاطمه وماما قاللها خلوها تقعد حدانا قمعزت شوي ورن عمو عمر عشان يروحن وطلعن
............
عمو عمر : ها شن عجبتكم
عميمه فاطمه: لا ماشاءلله غير امها قالت نقول للحاج ونردو عليكم
ماما : ربي يفرحنا بيكم
هدي : شن شايفها ي عمر
عمو عمر: احم اها مره وحده بس نبي ندير مقابله
ماما : لا من حقك يا باتي
نجاح : عمر حطني في حوش
عمو عمر: حتي نا نبي نديرها كيف ما خذيتكن نردك
ماما وعميمه وصبايا عمامي : هههههه
..............
ايمان : اهلين شن جوك
أسامه : فوق ريح بعد سمعت صوتك حبيبتي
ايمان : ههه به ان شاء الله ديمه فوق ريح
اسامه بصوت هادي : وان شاء الله ديمه نسمع صوتك
ايمان مبتسمه : ان شاء الله
اسامه : كيف نبي نوريك ديار نوم بيش تختاري
ايمان : اهم حاجه تركيه عشان يهبل بكل اختار انت عادي
اسامه : حاظر من عيوني اسمعي شن رايك نهايه سنه نطلعو فرح
ايمان : احم براحتك
اسامه : كيف براحتك انتي تبينيش كيف م نا نبيك
ايمان ساكته
اسامه بصوت وهادي : ندوي معاك حبيبي
ايمان تنش بيدها مبتسمه : نسمع فيك غير تغطيه بس
اسامه : تغطيه صار ههههه
اسامه : امتي بنسمعها كلمه اللي في بالي بالك يوم صباحيه امالا ههههه
ايمان : هههه لا توا تطلع بروحها قتلك وين قاعد
اسامه : في مكتب تبي حاجه
ايمان : لالا نبي سلامتك صوت ماما جت
اسامه : توا نرن عليك بعدين ان شاء الله غير صار منا عمر
ايمان : تمام حبيبي سلام
سكرت
ايمان : هييييي قتله حبيبي حي عليا يرن اكيده سمعها
أسامه: نا سمعت صح ولا نتخايل
ايمان : اسامه فكنا عاد توا ندوي معاك ف ليل صوت عمو عمر
أسامه: ههههه تمام ي هرابه انحببببك
ايمان : سلام ههههه
.....................
عمو عمر : خلاص نفس ما اتفقنا
ماما : باهي أول ما يرنو علي فاطمه طلع البنات يشرلها دبش وحاجات صبايا انت ادفع وبيان بس
عمو عمر: تم خلاص توصو بحاجه
ماما : سلامتك
نا : شني عروس سمحه يا ماما
عمو عمر : شن دخلك ي بطه
نا : نطمن علي نفسيه عمو بس هههههه
عمو عمر : اطمني سمحه عقبالك
نا : ههههه كان نفسك ان شاء الله
عمو عمر : هههه عليك اللي ما تحشم
ماما : مازالتي صغيره
ايمان : ماما فونك يرن هذي عميمه فاطمه
عمو عمر: هيا سلام
نحن : سلام
طلع
ماما : الو
عميمه فاطمه : خير توا تقولي توا كيف حطينها
ماما : لا يابتي غير شغلتيني
عميمه فاطمه : لا خير عمت هاجر رنت قالتلي قوليلهم خميس دفع وجمعه فاتحه
ماما : باهي ماشاءالله توا نقولها للحاج قالي قبلها نبي ندير معه نا مقابله
نا قعدت نشير للماما شن تبي عميمه فاطمه ماما تفنص فيا
عميمه فاطمه : كنه الحاج عليش
ماما : والله قالي قالو كويس لكن نبي نشوفه شاب صغير وضابط لازم نقابله
عميمه فاطمه : خلاص توا نقوله الأربعاء يجي للحاج
ماما: لالا خليها الاثنين بيش نلحق ع موالح ومثروده ونشري حاجات دفع يوم شنو في الأيام الله
عميمه فاطمه : سبت خميس طالبنا احمد ويوم جمعه
ماما : خلاص توا نقوله ونرد عليك علي خشته
عميمه فاطمه : خلاص بسلامه
نا : شن قالت عميمه ي ماما
ماما : خميس دفع وجمعه فاتحه هجوره
نحن : ووووووه لوووووولوي
هاجر : طح سعدكن هههههه اسكتن
جا بابا ومنتصر تعشو كل واحد خش سريره
مشن الأيام وماما هبه يطلعن يوتن للحاجات الدفع وجاء يوم الاثنين ومنذر جاء
...................
هاجر : بنات عليش بابا يبي منذر
نا : يبي يفحصه كان يسكر يحشش بابا فطني
ايمان : سكري فمك شن هلكلام بعدين اسامه مدرلش مقابله
هبه : حي عليا يا بنات بابا في مواضيع هذينا ما يفهم بكل شن يدير في عصام
نا : يسلخه لكي ههههه
منتصر : نقصي ضحكتك ي عن## اهلك
ايمان : تعرف ع كلام اللي تقول فيه والله عند احمد توا تشوف خوذ قهوه توا بس راجل برا
منتصر : غير فكينا من ابصاصه واسكتي
نا : ناس تخاف م تحشم
...................
بابا : كيف حال حاج
منذر مرتبك : الحمدلله ي عمي كيف حال صحتك
بابا : لك الحمد وشكر شن عمل ثابت
منذر : الحمدلله ثابت ضابط في مقر #### وعندي كافي حاط فيه خويا
بابا : اها ماشاءالله به مقر امرك عقيد فتحي ###
منذر : اها هذا هو رئيس مقر
بابا : صاحبي نعرفه من ايام حرب تشاد
منتصر : السلام عليكم
بابا و منذر : و عليكم سلام
منتصر جاء سلم وحط القهوه : كيف حالك يا منذر
منذر : الله يسلمك كيف حالك انت
منتصر : تمام تفضل
خذا قهوه وقعد يهدرز مع بابا لعند مغرب بابا قاله علي شروطه هو وافق
منذر : تمام ان شاء الله موعدنا خميس ي عمي
بابا : وانت طيب اهم حاجه الراحه فلوس ما يهمنيش وسلملي ع حاج
منذر : حاظر يوصل هيا عن اذنك
بابا : تفضل سلام
...............
ماما : شنو ي حاج
بابا : لا ماشاءالله محترم وراكز صدق مفتاح اللي قال اعطي وانت مغمض
ماما : باهي ماشاءالله خميس جايين
بابا : إن شاء الله قولي للايلاف تجيب شاهي
ماما : حاظر
............
ماما : ايلاف شاهي لباتك في داره
نا : باهي قولي شن زر منذر راجل طار
ماما : خميس دفع
ايمان : نركب نكلم خالتي هدي بيش نبدو ف موالح وحلويات
نا : لووووولوووي
هاجر : ههههه خزي ما تحشمش بابا جوا
قعدنا كل يوم ندير في أنواع حلو ومالح ونوتو مافضيناش بكل يوم الاربعاء جاء انس
................
وجو عرب يوم خميس تبييب وعياط ونحن نزغرتو وندربكو جو هما خشو بدينا في عزومه
ايوب : ترا مدي سفره قهوه
نا : هيا هي
ايوب رن تلفون عطاني بظهره ونا ماسكه سفره
نا : 😳
............
#يتبع...
#رايكن 😉😍
#كاتبة Fafy fa
