وعد بالقسوة

جزء ١٦

الفصل ١٦

ريم: كنت بحاول استفز سامح...معرفش ليه حسيت اني لازم اعيشه في مرار زي ماعمل فيا انا مش هأذيه فيا لكن لازم اجننه واوصلو لمرحلة انه يسبني من دون مايطول مني ولا مليم...

كانت اول مرة يضربني فيها سامح...استفزيته لما عرضت اني اصاحب واحد زي مابيقول واجيبه يبات معايا..وبدون مقدمات ضربني بالقلم على وشي...وقعت على الأرض مفتكرتش اني سهل استفزه بالسهولة دي...شدني من شعري وقال: اسمعيني كويس لو كنتي فاكرة انك ممكن تضايقني عشان اسيبك اعرفي اني مش هرحمك...واعرفي انك مهما عملتي فلوسك وعقود الشراكة هتكون ليا حتى لو قتلك فهماني...
ورماتي على الأرض وكمل....من النهاردة مفيش رحمه مفيش عطف...اعرفي ان ايامك الجايه معايا هتكون كلها كره وقسوة...خديها مني وعد...هكون قاسي جدا ومش هرحمك...هتشوفي معايا ايام كلها هم وحزن...
انا وعدت امي اني مش هسيبك تتهني يوم واحد لحد ماتموتي...وبوعدك انتي بقسوة قلب عمرك ماهتشوفيها الا معايا....
بصلي وكمل....انا هنام ومسمعلكيش حس للصبح....
دخل اوضته وقفل الباب بقوة وراه...كنت مرعوبه...مكنتش مصدقه اني مقتلنيش او عمل فيا حاجه وحشة بس كسبت حاجه مهمه سامح سهل استفزازه....رغم اني بردو مش هنسى وعده ليا...
...................

سامح: ريم كانت مستفزة جدا مكنتش عاوز افقد اعصابي قدامها....
دخلت اوضتي وقفلت الباب ورايا....مكنتش متخيل انه ده يحصل من اول يوم...كنت عارف ان في مواجهة هتحصل بس مش كده ومش بالسرعه دي....
غيرت هدومي...اخدت دوش دافي...كنت محتاج اصفي تفكيري...طفيت النور ....وقعدت على السرير افكر...مش عارف هي ليه استفزتني كده رغم ان في العادي لو بنت مصاحبها قالت الكلمة دي كنت هسخر منها او أرد رد يضايقها وخلاص...معقول اكون اضايقت لأنها بقيت مراتي...بس انا مش حاسس الأحساس ده...
معقول اكون بغير....لأ لأ لأ انا مش ممكن احبها عشان اغير عليها...بس تفسير اللي حصل ده مكنتش عارفه...غمضت عيوني وقررت مفكرش في ألي حصل...افتكرت منظرها والدم خارج من بين شفايفها..حسيت بنغزة في قلبي...لكن لأ انا قدامي هدف لازم احققه...
همست بصوت واطي...ريم ايه دي اللي أحبها على أخر الزمن...
غمضت عيوني تاني والمره دي نمت....

يتبع