الظليمه

العاشر

الظليمه..... ليلان حكمت... اعتذر عن التاخير بسبب المرض
ادعولي من فديتكم...

الجزء العاشر... حقيقيه.. جريئه..

شكر خاص لمصممة الغلاف طائر الغربه...

بعد ما نور طرد ابوه من البيت اكتشفت نفسي
شكد جنت غلطانه....

بتوقعاتي لان كنت متصوره السجن ومرارته راح تغير
من خالد وتعدله وتخلي يفكر باولاده وبيته..

وكنت غلطانه اكثر لان ما اطلكت منه وهو بالسجن
عضيت اصبع الندم والقهر...

اولادي والبنات التموا بحضني وبجوا وياي بقيت اضرب
براسي لان بعد ما اتحمل قهره ولا اتحمل نوايب

الدنيا وظلمها.... شبعت بجي وهدات وگعدت افكر
لازم اسبق خالد بخطوه.. هذا كلب وكلشي يطلع منه...

ثاني يوم الفجر رحت ع الطابوا وتنازلت عن البيت لاولادي
سجلته بأسمائهم...

حسبت كلشي يصير وماطول اني هسه قويه بولدي
احتمال الوقت يتغير وهذا يسوي شي
ممتوقعته... مثلا يدبرلي سالفه..

ويقتلني مثل ما قتل حنان... اقلها اذا متت البيت باسم
الاولاد وما راح يستفاد شي منه....

بقينا كم يوم مرتاحين لحد ما امي خابرتني تبجي وتعيط
ادكول حراميه طافرين عليهم وابويه متواجهه وياهم
وضاربي براسه وهسه بين الحياة والموت...

اخذت حنان والولد ورحنا ع المستشفى لكيت ابوبه
سابح بدمه ويصارع....
كابلت امي وهويدا نبجي...

ما اعرف ليش بساعتها حسيت هاي الحركه من خالد
حتى يضغط عليه ارجع للبيت... صار المغرب
امي گالت روحن ارجعن لبيوتجن واذا
صار شي جديد اني ادزلجن خبر....

طول النهار نسيت بدور لادزيت واحد من اخوتها
ولا ادري بيها.... من خوفي لا هذا يكون
جاي للبيت لو داز واحد...

بقيت تاخذ الافكار وتجيبني وصلت للبيت مخروعه عباتي
كلها اتراب واكل باضافيري دكيت الجرس لحد ما عطب
كسرت الباب نسيت المفتاح بجنطتي....

فتحت الباب وبوجهي على غرفة البنات لكيتها نايمه
كعدتها من شفتها فزت تنفست وتعوذت من الشيطان
شدخل براسي من افكار....

كامت من فراشها خطيه خايفه... صاحت هااا يمه شكو..
گتلها ماكو شي بس ما اريد تبقين وحدج بالبيت...

لو اني لو اخوتج يبقون يمج...
الليل كله مانمته افكر بابويه ومنو هذا الحرامي الي طفر
عليهم امي وابويه ناس كبار بالعمر وشعدهم يادوب
غراض البيت وتقاعد ابويه....

بس كلبي يگلي هاي السالفه من سوالف خالد النذل..
فكره تجيبني وفكره ترجعني سمعت شي انكسر
مثل الماعون الفرفوري....