اسمعني صوتك

البارت16

البارت السادس عشر....
#اسمعني صوتك
# للكاتبه روزايه...

توادعـنه ونسـيت
بوجهـك عيــوني ..
شثگـل هجرك سمـا
وطاحـت علـﻰ مـتوني

.....

مسك...
اجتني الحجيه للغرفه كالت يمه لا اطلعين خلي اشوفهه شتريد اقفلي الباب عليج ماتدري بيج..

قفلت الباب وكعدت سمعتهه من دخلت شكد وكحه حته بدون سلام ..

مروه... جميله اتقي ربج يامره رجليج بالكبر وتحفرين وراي وتريدين تزوجين زيد والله تحلمين

الحجيه... السانج كصري لا اكوم اكصه الج اتماديتي هواي ومحد يردج وجلدج ادبغ على الكتل وجايه تهدين وصوتج شعلوه...

... شتريدين اجيج اهلهل على زواج رجلي اسمعي زين والله اذا زيد تزوج عليه احسبي بنتج مطلكه هي وبناتهه ومشموره على كلبج خاف تكولين مروه ماكالت....

... الاعوج يضل اعوج والعرمه والصلفه ماتنعدل لو مو ادك على راسهه جايه هاده بيج خير ضلي هنا وخلي يجي الرداد مالتج يكسر راسج وهذيج الساعه تعالي بوسي ادين مروتك خليني خدامه...

ولج طفح الكيل من عندج ومن تربيتج الصكط اني جميله اريد اوكفج عند حدج كدامه مسويه نفسج ملاك طاهر وانت ازبل من الزباله ...

... اسكتي لاتغلطين والله اخلي بابا ايشيلج منا ويخليج تحيرين بزمانج ...

... امشي ولج امشي ابوج خلي يروح يحاجي زيد مو اني وكليله دكول جميله لوبي خير جان فات للبيت مو واكف بالباب ...

... اوكفيلي هين ياجميلو شوفي شلون اخليج تتوسلين ...

مسك... طلعت وسدت الباب وراهه عزاا بعينج مسك هاي منال الثانيه هلا وزيد يكلي اخطبج وانت عندك هيج حوته بلبيت هاي تبلعني واني ببدله العرس ....

ردت اطلع للحجيه بس استحيت خاف دكول جانت تسمع علينه ضليت شويه كاعده سمعتهه صاحتني ركضت عليهه لكيتهه كاعده وايدهه على صدرهه متخربطه ...

... خاله سلامتج شبيج مددي ارتاحي..
... كومي مسك خابري زيد كليله يجيب علاجي بذاك البيت بسرعه...

... ركضت اخذت تليفون الحجيه وخابرته جاوب ...
زيد... الووو
مسك... زيد اني مسك الحجيه تخربطت ودكول خلي يجيب علاجي بالبيت ..
زيد... ليش شبيهه خاف صارت عصبيه..
... اي اجت زوجتك مروه وتعاركت وياهه هسه جيب العلاج لا تتخربط...
... عينج عليهه هسه جاي

...سديته من عنده ورحت يم الحجيه لزمت ايدهه وافرك بيهه وهي وجهه اصفر حيل خطيه مره جبيره مروه تغلط عليهه...

الحجيه... ليش مسك ليش كلتيله مروه اجت ولج هسه ينيمهه بالمستشفى...

... حجيه ماكدرت اجذب سالني وجاوبته ..
... لاتسولفيله التفاصيل اني احجيله زيد عصبي ومايرحمهه
... اذا هيج تخاف منه ليش سوت هيج
... الصوج من عندي خلصت عمري استر الهه وما احجي لمن تمادت عليه عديمه تربيه شفت العجب منهه ...