# البارت الخامس...
#اسمعني صوتك
# للكاتبه روزايه....
اني اسمي مسك مواليد 1991 من كربلاء مرحله ثالثه علوم حاسبات تاخرت بالدراسه لان بطلت ورجعت ...
ماما توفت بلانفجار الصار مال كربلاء بمنطقه اسمهه الدعوم قبل ماندخل كربلاء جانت ماما كل زياره اربعين تروح للموكب تاخذ الاكل تودي وترجع ماتضل هناك لان اني صغيره واضل وحدي بالبيت ....
عندي اخ واحد اكبر من عندي بسنتين يروح ويه ماما لان هوايه تاخذ اكل تكعد من الفجر تتطبخ للموكب وتخبز بموسم الزياره....
بيومهه ردت اروح وياهه وماقبلت كالت شتسوين ازدحام بس اودي الاكل اني واخوج ونرجع ماتكدر تعوفني وحدي خلتني يم جيرانه وراحت....
تاخرت ماما هواي كلساع اركض للباب اشوفهم وينهم بابا ماموجود لان يداوم بالمرور وكل زياره يصير انذار ودوامهم لليل يله يخلص ويرجع تعبان ....
كاعده انتظر ماما واسمع صوت الانفجار الي رج البيوت رج حته الجام تكسر صار الصياح والهوسه وهي كربلاء منا ازدحام الكل ركض كل بيت طالع منه نفر لونفرين للزياره....
دموعي كامت تجري وحدي كلبي حس امي واخويه صارلهم شي ما احس غير بيت عمي وعماتي اجن للبيت ويصيحن ويلطمن ...
بهاي اللحظه ما اعرف شنو صار هسه جنت اسولف ويه ماما وتعاركت ويه اخويه محمد لان ماقبل اروح وياهم هسه جنت اساعد ماما بالطبخ ...
واكفه بنص الشارع ومذهوله احس اني بحلم كابوس وماجاي يخلص ما حسيت على نفسي واكعه بالشارع وشايليني للبيت ...
فتحت عيني اشوف الكل تلطم وتصيح كعدت مرعوبه من الصياح اريد امي افتر بالبيت واصيح ماما وينج محمد وينك تعال بعد ما اتعارك وياك والله ويوميه اغسل ملابسك حباب محمد رجعلي امي....
انهاريت دخلت بصدمه ضليت اعاني منهه طول عمري ادور بالوجوه بلكي اشوف ماما رحت للمطبخ اباوع على الموجودات بلكي اشوفهه هي كل مناسبه هي تلزم الطبخ وماتقبل وحده تتقرب لمطبخهه دكول كوله على ايدي احسن.....
كلساع اوكع بالكاع ويذبون عليه مي ويكعدوني اسمع النسوان يكولن خطيه ضلت هاي البنيه وناس دكول خطيه محتركين مالاكيلهم اثر لان الانفجار يم موكبهم .....
ما اريد اتذكرهه ولا اريد احجي عن هاي الايام المشؤؤمه لان كميه الوجع الي بداخلي ما الهه مثيل جنت مدلله عند اهلي ومحد يكدر يحجي وياي بحرف بنات عمي من يشوفني تكتلهن الغيره شلون البس لان بابا خير من الله واني هالوحده .....
خلصت الفاتحه وصار الوضع اسوء بس اني وبابا ليل نهار نبجي مرات اكعد نص الليل اسمع صوت البجي من غرفتهم ....
ورا وفاه امي ب6 اشهر عمامي ضلو يحجون على بابا عندك بنيه وخطيه وحده وتحتاج تربيه وانت رجال موضف بيتك فارغ وبهالحجي ....
أنت تقرأ
اسمعني صوتك
Mystery / Thrillerلا مكان يأويني ولا ملجىء يحميني.. هربت من ناسي وارضي وحتى من نفسي.. هربت واذا بي اخرج من بئر واسقط في حفرة..
