اسمعني صوتك

مشهد

#مشهد
#اسمعني صوتك
#روزايه

كاعده ومخليه ايدي على خدي وصافنه حسيت بحركه طفلي داخل احشائي خليت ايدي على بطني اتلمسه ومبتسمه ...

حجيت ويااا بصوت مبحوح حبيبي حاس بيه تعرف امك شبيهه وشنو بداخلهه ...

يانور عيوني فرحتي بيك ناقصه احجي وابجي وحركاته تزاد وكانما جاي يكول اني حاس بيج واسمعج واني وياج...

نزلت دموعي على خدي عبالك جبر ممزوجه بالم بخيبه بخذلان بغربه ...

متملكني اليأس واحس النفس بي ومايضيق...

تلمست صدري لزمت كلادتي عباره عن الصليب ضامتهه جوه ملابسي حته محد يشوفهه لان اذا شافوهه معناتهه يصلبوني على النخله...

رفعت راسي  لليفوك الغيوم مجتمعه وتتسابق منو الاسرع بالحركه  ...

اسراب الطيور محلقه وترسم اشكال جميله
صوتهه العذب وزقزقه العصافير بحد ذاته منظر جميل...

بس كل هذا الي اشوفه مابي فرحه احس حته هاي الطيور شايله كميه حزن وتحس نفسهه غريبه بديارهه ....

ابتسمت بداخلي واني اتذكر لمعه عيونه وشخصيته الحلوه الي كلما اشوفه كلبي يكوم يرف ...

عبالك مراهقه وشافت حبيبهه مفتخره بي حيل واني اسمع الكل يمدح بي وباخلاقه ...

اخذني بالي لبعيد واني اجي اركض اتلكا وهو جاي من الدوام يحضني ويخليني جوه ايده ويبوسني من راسي...

نجماته الي على اكتافه والبيريه على راسه وجهه الي تعبان من الشمس والحر كلهن هذني اخذني بعالم ثاني ...

فززني من صفنتي صوت خلاني اكوم على حيلي واني استعيد وعي وارجع للواقعي المر...

.. وش تعملي هنا ياحرمه ؟؟
... هاا ااا بس طلعت اشتم هوه ..

...  دشي للدار بسرعه ولا اطلعين بعد...

.. ركضت بسرعه للغرفه الي عباره عن مخزن قديم وريحه الباروود بي تخنك حته صار عندي تحسس منهه ليل نهار اكح وعيوني مدمعه  ...

كعدت بالكاع على فراش قديم وسندت ضهري على الحايط ...

تنهدت واخذت نفس عالي واني اردد دعاء بداخلي..

يارب احلفك بمحمد خلصني ودليني بباب مخرج منا وقر عيني بشوفته  ...

الهي لخاطر طفلي لاتخلي يولد يتيم ..

يامريم العذراء احلفج بيسوع انقذيني احس ايامي بدت بالعد التنازلي واني على هاي الحاله ...

طفلي موعد جيته قربت اني بشهر السابع وكل خبر عن عائلتي ماكو...

اسمع اصوات غريبه عجيبه برا دفرات جنيني بدت تزداد احسه خايف مثلي...

خليت ايدي على صدري وحاضنه الصليب واردد يامريم يامريم.....

.....

حبايب قلبي ما اكدر بدونكم ولازم اعذبكم شويه ....

مشهد بسيط عن القصه الي وصلتني ماكدرت ما انزلهه الكم لان مشغول فكري بيهه ردت اشغلكم ويايه...

قصتنه هالمره غريبه تتكلم عن فتاه مسيحيه حبت تشاركنه قصتهه وراح ارويهه الكم بكل تفاصيلهه بكامل الاثاره والتشويق...

ما اوعدكم انزل هسه من ابلش اكتب انطيكم خبر حته التزم وياكم وما اقصر بيهه احفظوهه عندكم...

متابعه ممتعه احبكم....