المراهقة و الأربعيني

الحلقة 55

الحلقة_55

ابد متحملت ان صراع يداوم ابيجي .. جانت بيجي مكبره ما ترد ميت والكل يعرف الفات بيها ما طلع سالم ..

لما سمعت الخبر انهاريت‌ وتخربطت .. كعدت وهم يصحون بيا ويغسلون بوجهي .. دحكت الحجيه .. حطيت راسي بحظنها وكمت ابجي ..

معرفو اني عرفت هو ابيجي واني ما حجيت بس دموعي تشرح حالي بقيت ابجي بجي اليتيم المالو احد ..

بقت الحجيه تحجيه ويايه وتهديني وتكلي ادعيلو ولا تفاولينو ومو زين عليه

... اعرف بس شيصبر گلبي ؟ اني شاردة بنفسي وتاركه  اعز الناس عندي بوسط النار !

نزلنا عمان وطلعنا بالسياره المنطقه اسمها الشميساني  .. منطقه حيل حلوا وهادئه وتكثر بيها الشقق الفندقيه .. هينا صراع مشغل فلوسو بالعقارات و الأيجارات ..

صراع عندو حكمة بالتصرف .. اليشوفو ابد ميكول عندو هلكد فلوس .. عايش عيشه طبيعيه يصرف على كد الحد ما يحب التبذير .. ولا يحب البخل

من بعد سقوط النظام البعثي بالعراق .. هو باع  المزرعه و باع بيتو و وذهب مرتو وامو و سيارتو والعندو والماعندو واشترك بأسهم بمول ابغداد

هذا جان اربح وارد لصراع .. المول ابغداد حيل ناجح لأن بغداد مدينه ناسها تحب تطلع وتفر وتتونس ما بس كاعدين بالبيت .  يعني نسبيا بيها انفتاح اغلب من بقية المناطق ..

فصراع كام هاي الاموال يستثمرها .. كام يشتري ويبيع وشقق وايجارات وكل هذا وارد الو ويكبر يوم يوم ..

وهو عندو نوع الكرم الو كلمه يكول انه مجرب روحي شكد ما اكرم الله يكرمني بمضاعف ..

فتفاجأت عندو شقق بعمان هيج حلو ومرتبه .. اخذنا شقتين لأن الشقق ما كلش كبار مال عرسان عبالك، غرفتين وصاله وملحقات وبلكونه شقه كامله مأثثه

.. شقه اني والحجيه وهيام وجهالها وشقه فوكانا لام سعد و الحجي و حلا ..

اني والحجيه اخذنا غرفه هي ع التخت واني ع الكاع فرشت .. و هيام غرفه هي وبناتها و الصاله لعلي ..

هيام استلمت المطبخ هي تطبخ النا و التنظيف اكو عاملات ينظفون من ضمن خدمة الشقق واني اكف شتريد او شتحتاج هيام

بس هي ما تسخرني مقدره حزني على صراع وهو من طلعو وهو يوصي بيهم عليه و يكلهم :- هلله هلله بيها تراها يتيمه وما الها احد.بديرة الغربه صيرولها اهل من بعدي ..

ف ابد متحب تأذيني كلو على راحتي .. وراحتي مسلوبه ببعدي عنو .. لا ليلي ليل ولا نهاري نهار .. اسمها الدمعه بعيوني عليه واخاف من اللحظه اليجون يكولولي راح و الله بعوضج  ...

لو شكد ما اهيئ نفسي واتحمل .. احس نفسي صفر وكلشي ما اتحمل ..

رغم المكان حيل حلو و هادئ واجواء غير الأجواء التعودت عليها من راحه وحياة غير حياتنا العايشيها .