كان صديقي

كان صديقي
الجزء الثاني والاربعون

من كال مراوي اني جفلت!!شنو هالميانة !!رفعت راسي باستغراب وباوعتله..
كال اسمج حلو مثل اسم بنتي
اني ابتسمت كتله ربي يحفظها..
بداخلي يمكن هو يتعامل وياي مثل بنته واني فهمته غلط ..
يلا من حجه ببنته ارتاحيت شوية قل الخوف..
تالي كال تعالي شوفي هالاوراق شلون مرتبين بيها الاسعار والاسماء بجدول
اريد مثل هالشي تسوين ..
انطاني الورقة شفتها واخذ ورقة وقلم وكال خططيلي مثلها..
خططتله ىكتبت كال تمام اريدها تنزل بالحاسبة..
طلع من الكرسي وكعد ع التخم الي بالغرفة موجود وكال اشتغلي براحتج..
وكفت اني يم الحاسبة ونزلت المعلومات وطبعتها بالطابعه الصغيرة اليمه ..
شوفتها اله كال مضبوط خوش شغل ..
بس مكتبج مابي حاسبة لان ماخذها ابني يفرمتها ..كم يوم ويجيبها وتبلشين بالشغل..

كتله اوكي..لعد اني اترخص ..
كال لا اكعدي وين رايحة لازم اعرف معلومات عنج وهواي استفسارات. ..
رجعت كعدت اني من جهة وهو كاعد بالجهة المقابلة الي ويدخن
طبعا طول ماهو متواجد بالمكان جكارته متطفى..
حط رجل فوك رجل ويدخن ..
كال..
انت شعجب ممرتبطة؟
جاوبته ..مااحب احجي بحياتي الخاصة..
ماشي ع راحتج..
بس شكد صار متخرجة؟
السنة الفاتت تخرجت ..
اي امبين بعدج صغيرة وطبعا انت اصغر موظفة اجتلنا..
الي جانت قبلج عمرها نص الثلاثين
جانت مطلقة وخفيفة بس خوش بنيه هي فطيرة...
ماعجبني كلامة عليها مهما يكون جانت تشتغل وياهم وعيب هالشي
وشلون يكول مطلقة باستهزاء ..صح اني ماحجيت ولا يدري بيه متزوجة او مطلقة كلشي ميعرف عني
بس انغثيت من كلامه كتله..
شعجب تركت الشغل لعد؟؟
ارتبطت وزوجها عنده مدرسة اهليه وراحت اشتغلت ويا ..
بس جان شغلها مضبوط وشاطرة كلش
جنت معتمد عليها بكلشي اسافر واتأخر واني مامن بيها اكثر من الشباب
لان شاطرة وتهتم بالعمل ..
صفن وابتسم وباوعلي..
جانت شاطرة بكلشيييي..
اني دنكت كتله ربي يوفقها ووكفت..
اترخص منك لازم اخابر البيت اطمنهم لان كالو اتصلي ونسيت..
كال اخذي راحتج بس رجعي حتى نشرب جاي سوا ماشربنا..
لا شكرا بالعافية مااحب الجاي اني...
طلعت ورحت اخابر ..

جاوبتني امي حبيبتي سالت ع الشغل كتلها ماشي الحال بس طمنيني عن وجد
كالت نايم بعده ليضل بالج ابنج عاقل وميتعب واني عيني عليه ارتاحي يمه وهم اية متطول بس تخلص امتحان تجي وهو يحبها تلعب ويا..
كتلها ماشي ودربالج ع نفسج وختمته وياها..
طلعت هو لاكاني بيده كوب جاي..
يلا اذا خلصتي مكالمة تعالي يمي اخاف يجي ثامر واحتاجج...
رجعت يمه وهو يشرب جاي ويصفن ويدخن..
شوية فتح موضوع وضل يسولف عن عائلته
وعن بيته وحديقته مابقى شي..
ورا شويه واحنا نسولف اجه ولد شكله كلش حلو ابيض وملامحة جميلة امبين بكدي او اكبر شوي...دخل سلم وباوعلي باستغراب!!
كله ابوه اعرفك ع مروة الموظفة الجديدة طبعا من معارف جودت..
سلم عليه الولد كال..
اهلا وسهلا بيج ست مروة ..اني اسحاق ابن الحجي ..
اعتبريني اخوج وشنو تحتاجين بخصوص الشغل او غيره اني موجود ..
تشكرت منه وكمت استأذنت وطلعت ..
حسيته اجه نقذني من ابوه..
بقيت بمكتبي جان بي هواي تراب مبهذل الاوراق مطشرة..
لميتها ورتبتها وخليتها ع جهة حتى اذا ميردوها اذبها ..
طلعت كلينكس من جنطتي ومسحت الميز صار نظيف..
كعدت العب بالفون وبقيت للساعه ب١٢ زين محد صاحلي..
شوية واندك الباب وانفتح اني وكفت بسرعه عدلت نفسي ..
فات هو كال ليش تكعدين وحدج تعالي يمي كاعدين اني واسحاق وثامر نسولف..
اي شويه اجي ..
هلا بيج انتظرج...