كان صديقي

كان صديقي البارت الاول

سلام وعليكم لقصه طويله وحلوه ومشوقه وجريئه شوي لي يحب يقره ولي ميريد لا يقره

اية ولج اية روحي شوفيمنو بالباب..
اي اجت البنكلادش اية صار صار..
ولي ام لسان بسرعة..
ماما ولد بالباب يكول نريد الطرشي مالت ام مهند..
اي هاي المرة اول مرة تشتري مني جديدة..
همزين طلبها كامل..
تعاي نتكابل اني وياج حتى نطلع السطل ثكيل شوي..
مابيه يمه ثكيييل معليه..
رح اصيح لمروة ..

مروووة..مرووووة....لحكي ولج..
ها ها خير اية شكو !!
ههه ماكو شي ردتج تجين بسرعه..
اجيت لكيت امي بالمطبخ تلمع بسطل الطرشي ..
ايه عافتنا وراحت..
تعالي امي الله يرضى عليج..
ولد عدهم طلب طرشي اجه عليه ومابيه اشيله..
واخوانج طالعين محد هنا..
يلا لعد عيب نتاخر خل نطلعه...
بس البس عباتي وحجابي..

وصلنا اني وامي للباب ..
فتحت الباب والصدمة!!!
اشوفه واكف يم سيارته ويلعب بالفون ممنتبه..
معقوله؟؟؟؟هذا شجابه..
...................

اني مروة عبد الهادي..ابوي توفى ورا السقوط برصاصة طائشة..
ضربته براسة وتوفى بسرعة..
وامي ربي يحفظها ربتنا وعشنا بتقاعد ابوي ولان ميكفي..
ضلت تسوي طرشي وهي مشهورة بي من قبل الناس يمدحون بي..
ضلت تبيع وانعرفت وضلو ياخذون منها ويوصون ع كميات جبيرة..
اكو نسوان هواي حالتهم توب يوصوها تسويلهم فد كمية جبيره..
لان طيب ونظيف ويثقون بيها...

طبعا احنا ٣ اولاد و٣ بنات..
الجبيرة اختي ليلى مخلصة معهد وممتعينه...
واني بعدني طالبة مرحلة ثالثة علم نفس..
والصغيرة اية مرحلة اولى صيدلة..
اما الاولاد هم ..
امين الجبير وتارك المدرسة واشتغل اعمال حرة كل يوم شغلة..
الى ان اشترى تكسي واشتغل بيها ..
تعرفله ع وحدة حالتها زينه لان التزمها خط يوديها للدوام..
حبو بعض وتزوجها ..
وابوها شغله ويا لان هي رفاه مرته جبيرة اهلها واخوانها صغار..
لزم امين شغل عمه وعاش وياهم ببيته ..
ومايذكرنا بس من تصير مشكلة...

هشام تخرج من معهد الطبي وتوظف بالمستشفى..
بس بخيل ومصلحجي وفلسه اله..
واكرم هم ترك الدراسه وضل يوميه شغل شكل..
حاولت وياهم امي يكملون دراستهم..
بس مايطيعوها ومايسمعون كلام..
رغم تعبت عليهم وكسرت عمرها وشبابها بس ماغزر بيهم..

طبعا مواصفاتي شرقية بيضة عيون كبار سود ورمش ملفوف..
ومعاني مرتبة..
وطويلة وجسم متناسق كلش..
لبسي بسيط واغلبه من البالات لان شوي ارخص ومايستهلك بسرعة..
داومت بالكلية والحمدلله مستواي كلش زين ..
صديقات عندي ٣ مقربات وكله سوا..
اختلاطي بالطلاب قليل مجرد سلام ومااحب اتجمع وي الناس..

هواي يصارحوني ولد من الجامعة مو بس من كليتي..
بس مااتجرأ ارتبط واحب لان اخاف..
لحد مرحله ثانيه بالامتحانات ..
ورا الامتحان رحنا ناكل بالكافتريا لكيناها معزلة..
كالو البنات بعد وكت منا لساعة ١٢ يلا نطلع..
امشو نروح لنادي الهندسة..
النادي مالتهم حلو واسع كلش وكلشي بي ..
مو مثلنا كافتريت ومسكفة وكراسي وميوزه واللفات باردة..

رحنا وكعدنا وبدا الحش والقشب بالناس..
طبعا جانو كلش مرتبين يعني ينضرب بيهم المثل..
بس بعد البنات من ينجمعن لازم يكصن بالرايح والجاي..
كمنا اني وامل صديقتي نجيب الاكل..
هي طلعت تجيب عصير فريش ..
واني انطيت الورقه للولد جابلي الطلب ومسبل عيونه..
يا شبي هذا حينام وهو واكف ؟؟
جانو مخلين صلصة وطرشي وسلطة ويسالون اذا تريدين نخلي باللفة لو لا ..
طبعا بس اني اخذت لفة لان مصرفي محدود ماكدر اصرف زيادة..
سالني الدايخ...
تردين احطلج صلصة حارة لو سلطة..
لا سلطة مااريد بس اريد صلصة حارة هواي..
باوع بوجهي وعيونه فاتره يمكن شارب هذا..
اف بس هاي حارة كلش فلفل احمر هذا..
اي احبه خلي منه هواي ..
مو يحركج اخاف متتحملي...
اففف شبي هذا هسه انت شعليك قابل حاط من طاسة الخلفك ..
اييي مو مشكلة يااخي انطيني خلي اروح اذا تسمح ..
علت شويه نبرة صوتي..
اشو هذا انطاني اللفة وفوكها رقم!!وكال  ..

مدام تحبين الحار خابريني..
وغمزلي..
ثواني مااشوف الا واحد من وراي لزمة من تشيرته وجرة..
لك احترم نفسك ناااقص ..
اني انصدمت حتى مباوعت ع الوراي..
بس اشوف كبت عيطه..
وبسرعة صارت هوسه والتمو الولد..
رجعت بسرعه لمكاني..
والبنات صافنات لج شكوو شصاار؟؟؟

حجيتلهم الصار والكاله الولد ..
كالو..
لج هذا التعارك وياه عينه منج من كمتي..
وراح وكف وراج بس انت عوبة ماانتبهتي..
اجت امل جابت العصير وادردم مالحكت تعرف سبب الهوسه الصارت..
هالحجي الناس تفرقت واباوع للولد ظهرة الي ويحجون ويا المسؤول مالت النادي والشباب..
خلصنا اكلنا بسرعة البنات ناصبات عليه يكولن ام المشاكل..

كعدنا نحل باسئلة الامتحان واسمع واحد سلم ..
بس صوته خشن رجولي الى درجة بحيث مميز..
السلام عليكم بنات من رخصتكم اذا ممكن..
رفعت راسي باوعت ..
واحد لابس قميص بيجي ردانه مرفوعة للعكس..
ساعة جلد جوزي..
جينز ثلجي وبوت جوزي طوخ..

شعره اشقر عالي بشرته بيضة..
عيونه ماعرف خضر ماعرف صفر بس متلونات ..
وشوارب شقرا مو كثيفه وسط..
طوله متوسط ورفيع بحيث الملابس عليه قالب..
وكف كدامنا البنات كلوله تفضل ..كال لا مااطول
بس عندي حجاية وي حضرتج ..
وباوعلي..

تفضل !!؟
زاد فضلج بس ردت اعتذر ع الموقف الصار ..
بس من سمعته قلل ادب ماكدرت اسكت ..
واطمئني مااجت سيرتج بالمشكلة الصارت والولد راد يعتذرلج بس ماخليته..
اهاا ..لا شكرا اخي ماقصرت واني اسفة صارتلك مشكلة بسببي وممنونة منك ع موقفك ..
بالخدمة اني ..
من رخصتج ..
سلم وراح..
اباوع للبنات عبالك يتفرجون فلم فاتحين حلكهم وصافنين..
وي كعدتي طارت الورقة لان السبلت ع جهتنا..
اباوع يبوو يم الميز الي هو كاعد عليه..

استلمني البنات يداهرني وروحي جيبيها من يم ابو الغيرة..
وما خلن كلمة ماحجنها..
انتبهت للميز كاعد هو وولد ثاني..
بس اليمه اكلني اكل بعيونه ونظرات جريئه بلا خجل او حشمة..
شفتة باوع للاسئلة جوا وشالها..
واليمه صافن عليه..
عزاا نسيت اني كاتبه بيها اسمي لان الاساتذة ميقبلون الا نكتب اسمنا..
حتى لنبدل بينا ويصير غش..
وراسمه عليها وكاتبه شعر ..
لان خلصت من وكت وماقبلو اطلع قبل العشرة كعدت اشخبط..
رحت ركض اخذها قبل ليقرا..
لو سمحت هاي ورقتي..
باوعلي بنفس النظرة العميقة كال..
اريدها..

تابعو لباقي

شنو يريد 😉