Clinic

Ang Pagibig ng Aswang pt. 3(Chapter 8)

Dumating sila sa bayan ni Joshua sa Probinsya Luisita.

Biglang nagising si Lilia dahil sa sikat ng araw na tumama sa kanyang mukha pagkatapos buksan ni Joshua ang kurtina sa malaking bintana. Kaso bigla niyang pinandilatan ang asawa.

"Oh! Bakit mahal?" nakangiti namang tanong ni Joshua.

Agad na lang tumulo ang luha ni Lilia sa kanyang mga mata kaya nilapitan siya ng asawa at dahan-dahang pinunasan ang kanyang luha.

"Nanaginip ulit ako na hinahabol ako ng mga tao na tila gusto nila akong patayin," ani Lilia na wala pa ring imik pagkatapos magsalita.

Natulala si Joshua na tila wala siyang masabi.

"Ano ba'ng nangyari, Joshua? Sabihin mo sa akin? Aswang pa ba ako? Aswang ba talaga ako? Hihiwalayan mo ba ako dahil hindi ako normal na tao?" naiiyak na sigaw ni Lilia habang pilit siyang bumabangon ngunit bigla siyang nasaktan.

"Huwag kang gumalaw, may sugat ka. Natamaan ka ng baril ng kapitan habang nasa bubong ka," kalmadong sinabi ni Joshua nang biglang kumatok ang inay niya.

Binuksan ito ng kanyang asawa saka pinapasok sa kuwarto nila.

Lumapit ang ina sa anak. "Lilia, anak. Babalik na ako sa probinsya natin."

"Nay, huwag! Ayoko po na kayo ang pagdiskitahan ng mga tao roon dahil nasundan nila ako papunta sa bahay natin."

Ngumiti naman ang ina nito. "Huwag kang mag-aalala. Niligaw sila ni Joshua. Siya rin ang nagtakas sa 'yo. Kaya ko na rin ang sarili ko. Sasabihin kong wala ako sa oras na 'yon dahil inihatid kita sa Maynila kasama ang asawa mo."

"Nay, iiwan n'yo na ba ako sa kanya?" sabay tingin ni Lilia kay Joshua.

"Anak, asawa mo siya at alam kong mas ligtas ka sa kanya. Di ka niya pababayaan. Hanggang tatlong araw lang ako rito kasi madami pa akong kailangan tapusin sa bayan natin. Huwag kang mag-alala kay Joshua dahil malaki ang tiwala ko sa kanya at sana sa 'yo rin dahil nangako kayo sa Diyos," paliwanag pa nito. Agad naman silang nagyakapang mag-ina.

~~~

Simula nang magsama sina Joshua at Lilia sa iisang bubong ay mas lalong nabuo ang pagmamahalan nila sa isa't isa dahil parang si Lilia ang minimithing asawa ni Joshua.

Marunong ito sa lahat ng gawaing-bahay. Magaling magluto, maalagang asawa, mabait, maganda, at malambing. Marunong ring makisalamuha sa ibang tao at lahat na yata ng katangiang gusto ni Joshua sa isang babae ay nasa kanya na.

Nagtahulan na naman ang mga aso.

Nagising bigla si Joshua. "Lilia!" sigaw niya dahil nakalimutan niyang ngayon pala ang kabilugan ng buwan.

Biglang may kumatok nang malakas sa pintuan ng mansyon nila kaya agad siyang tumakbo para buksan ito.

"Huwag mo na siyang itago, Joshua. Dito dumiretso yung manananggal sa mansyon n'yo!"

"Nagkakamali ka!" sigaw na sabi ni Joshua nang itulak siya ng mga tao at dumiretso papasok lahat sa bahay niya.

Nauntog siya at natumba sa drawer na naging dahilan kung bakit nabasag ang salamin. "Aray! Lilia!" sigaw pa ulit ni Joshua. Bumangon pa rin siya kahit masakit ang likod at ulo niya. Sinundan niya ang mga mamamayan na tila gigil na patayin ang kanyang asawa.

Bawat kuwarto sa mansyon ay pinasok nila. Hanggang sa noong pinasok na nila ang huling kuwarto ay nagulat silang nandoon si Lilia na nakahiga na tila masarap ang tulog habang nakakumot.

Hindi sila nakapagsalita nang biglang nagpakita ang ina nito. "Ano'ng ginagawa n'yo rito? Puwede namin kayong kasuhan lahat ng trespassing."

Sabay dumating din si Joshua na hawak ang sugatang ulo.