فقراء لم يخلقوا للحب

/النهايه/

#فقراء_لم_يخلقوا_للحب_
ل: #روز_الفياض_
ج٢٤ الاخير
‎ج24
‎بيوم جنت طالعه الصبح للدوام وجنت دائما من اطلع من بابنه امد راسي اشوف السايق جاي لو لا حتى اذا جاي اطلعله لان شارعنه جان بي حفر وطسات فما يقبل السايق يدخلي يم البيت يخاف على سيارته ..
‎طلعت كالمعتاد وشفته واكف سلمت وصعدت بالسياره وطلع بينه انه وبنيه موظفه وياي جنه نعبر على فلكه دائريه بالطريق وجنت دائما اشوف مجموعه طالبات لابسات ابيض ورصاصي عالاكثر طالبات جامعيات وكلما اشوفهن اتذكر ايامنه بالكليه انه وارشد .. واكو مدرسه ابتدائيه يوميه اشوف الجهال اهلهم جايبينهم واتخيل حمودي من يصير بالمدرسه ..

‎ذاك اليوم من وصلنه للفلكه شفنه ناس مخبوصه وسيارات وهوسه السايق فتح الجام وسأل واحد واكف:
‎هاي شكو هنا شصاير؟
‎رد عليه كله :
‎طفل انخطف ..
‎انه متت من القهر والخوف بيومها من رجعت للبيت حجيتلهم وكتلهم :
‎هسه مو بس مؤمن يريد يطلع ويسافر ويخلص هسه حتى انه اخاف على ابني مستحيل اخليه يروح للمدرسه وانوب ينخطف ..
‎كعدت حجيت ويه مؤمن وكتله انه وياك اذا صدك تريد تسافر انه وياك اروح مااكدر ابقى بعد اخاف ..
‎المهم ظلينه نحجي ونتناقش بالبيت اهلي كالوا مانطلع احنه نبقى هنا مانكدر نطلع مانتحمل غربه بهالعمر ..
‎جان عدنه خالي باستراليا عايش من زماان وبالسنه حسنه يتصل بينه حتى ماحاسبينه خالنه ومانتذكره بس مؤمن من كتله انه وياك راسأ اتصل بيه وحجاله ..
‎انه وامي نضحك عليه كناله :
‎مايسوي شي هو حتى اتصال بالكوه يتصل انوب يحاول يطلعنه يمه ..
‎المهم خالي طلب من مؤمن يطلع من العراق لاي دوله عربيه  على مايضبطله الوضع وراسا فكر مؤمن بالامارات بس المشكله الامارات ماجانوا ينطون فيزا بسهوله الا اذا فيزة عمل .. وطبعا بهيج حاله ماكدامه الا عصام يساعده.
‎على اعصابي اخذت رقمه من اهله وانطيته لمؤمن هو يتصل ويتفاهم وياه لان جنت زعلانه منه من سافر ولامره اتصل او دز مسج ..
‎بس اول ماحجه وياه مؤمن طلب منه يحجي وياي ..
‎جنت بالدوام من رجعت مؤمن كلي بقيت ساكته .
‎ثاني يوم انه بالدوام ودك تليفوني رقم غريب دولي اتصورته خالي بس من جاوبت طلع عصام سلم وشلونج وشخبارج وشلونه حمودي وانه جاوبته عادي لحدما كلي :
‎مشتاقلكم ..
‎رنا : تشتاقلك العافيه بس اليشتاق يسأل يتصل ينزل يشوف اهله يشوف اللي اشتاقلهم مو بس حجي .
‎ضحك على كيف كال :
‎دومج عصبيه .. حقج بس هيج احسن .
‎رنا : احسن؟؟ معناها يالله مع السلامه .
‎عصام : اوكفي شبيج ..
‎رنا : ليش مو تكول هيج بعيد بحدك احسن .
‎سكت شويه بعدين كال :
‎بعدين نتعاتب ونتحاسب هسه خل نحجي بموضوع جيتكم لهنا ..
‎رنا : احجي يابه .
‎عصام : مؤمن شغلته سهله يكدر يجي هنا بفيزة عمل ويبقى هنا مو شرط يروح لاستراليا هنا احسنله انه اشوف ..
‎رنا : وانه وابني ؟
‎عصام : انتي جيتج اسهل اكدر اسويلج فيزا واجيبج هنا بس ....
‎رنا : بس شنو ؟اذا شغلة فلوس ماكو مشكله.
‎عصام : لا يافلوس هاي السوالف بس بالعراق يمكم الرشاوي هنا ماكو هيج شي كل شي بالقانون .
‎رنا : اذن شنو المشكله؟
‎عصام : لا ماكو اي مشكله بس كتلج اجيبج هنا على اقامتي يحقلي اجيب اقربائي من الدرجه الاولى ..
‎رنا : شجابنه عالدرجه الاولى هو حتى ماكو اي صلة قرابه بيني وبينك؟
‎عصام : نتزوج ...
‎رنا : هااا ؟
‎عصام : يحقلي اجيب زوجتي هنا ينطونج فيزا واقامه على اقامتي .
‎ظليت ساكته بعدين كتله :
‎يعني علمود الفيزا اتزوجك ؟‎عصام : لا ليش مو بس علمود الفيزا انه هم اريد اتزوج لشوكت ابقى وحدي هنا .
‎رنا : وشجابرك تبقى وحدك ؟
‎عصام : انتي ..
‎رنا : وبعدين بهالحجي اليضوج؟
‎عصام : على كيفج شكايلج قابل كتلج احبج ..
‎رنا : هااا ..
‎ماادري من كلي احبج شصار بيه اتخربطت احوالي وبقيت ساكته مااعرف احجي ..
‎عصام : رنا ؟ وينج؟ الو؟
‎رنا : هااا ..
‎ضحك على كيف كال :
‎شبيج كطعتي الصوت ؟
‎رنا : هاا لا مابيه شي ماكو شي شكو؟
‎ضحك كال :
‎سلامتج .
‎رنا : الله يسلمك .
‎عصام : هسه شكلتي؟
‎رنا : بشنو ؟
‎عصام : نتزوج ... وتجون يمي هنا ؟
‎ماادري شبيه ضاع مني الحجي وبقيت مرتبكه ومستحيه كتله :
‎  هسه مااكدر احجي عندي شغل غير .. غير وكت نحجي ان شاءالله .
‎عصام : ان شاءالله ..